Story

My Past - Sehemu Ya 9.

Wednesday, May 31, 2017 naomimwakanyamale 0 Comments

“Shikamooni.” Bella aliamua kusalimia. “Marahaba Bella. Naona watu wa masoko wamekwama, wanahitaji masaada wako.” “Ngoja niende huko sasa hivi.” Bella alimjibu Mzee Mwasha na kuondoka, akimuacha Elvin na familia yake.
“Nilijua ungerudi jana.” Mama Mwasha alimwongelesha Elvin. “Tulichelewa ndege. Nilimpigia simu baba kumwambia, nikataka kuongea na wewe, akasema ulisha lala. Vipi unajisikiaje?” “Vizuri. Nimeona nije kukaa na baba yako huku, kule nyumbani najiona mpweke.” “Mnaweza kurudi nyumbani ukapumzike, mimi nitakuwepo hapa.” “Mbona baba yako ameniambia umechukua likizo ya siku kumi, zimeshaisha?” “Naona akili zimetulia. Nimepumzika vyakutosha. Naona nipo tayari kuanza kazi.” Elvin alijibu huku akimuangalia baba yake. Alibaki akishangaa kumuona Irene pale hasa baada ya mazungumzo yake na Eli.
“Naona uanze kazi kesho Elvin, ili leo ukapate muda wa mazungumzo na Irene. Amekuja hapa, amesema anataka kuzungumza na wewe.” Mzee Mwasha alijaribu kumshauri Elvin. Lakini Elvin alikunja uso. “Tangia lini umeanza kunipangia kitu chakufanya!?” Elvin alionyesha kukasirika kidogo. “Yaani ikitokea Irene ananitaka kwa muda na wakati wake yeye, natakiwa kuacha kila kitu nifwatize ratiba zake!?” “Nafikiri ingekuwa vizuri ukamsikiliza Elvin.” “Hapana baba, hatuwezi kuishi kwa mtindo huo. Siwezi kuendelea kuishi kutokana na kile Irene anachotaka. Nimeshaishi hivyo kwa muda mrefu sana, nafikiri inatosha. Na ninaomba na wewe asikuingize huko, atatuvuruga sana.” Irene alianza kulia.
“Nimekwambia baba, Elvin amebadilika sana. Najua yote hayo ni sababu ya Bella.” “Umeanza Irene. Tafadhali hili ni eneo la kazi. Bella anafanya kazi hapa, anajiheshimu na anaheshimika na wafanyakazi wengine. Acha kumuharibia sifa yake kwa tuhuma zisizo za kweli. Najua huwezi kujizuia kuongea, naomba uondoke tutazungumza nikitoka kazini, kila mtu anatusikiliza sisi.” “Hukuwa hivi Elvin. Tulikuwa na matatizo yetu, lakini wakati wote tulikaa chini tukatatua pamoja. Lakini tangia aje Bella, mambo yamebadilika.” “Hebu acha tuhuma za kijinga Irene. Bella alikuwa na wewe wakati unamahusiano ya siri ya kimapenzi na marafiki zangu, Junior na Phil? Nafikiri ni wakati muafaka uanze kuwajibika na makosa yako. Acha kutupia watu lawama. Lini unampango wakujirekebisha, Irene? Naomba uondoke tafadhali. Acha kufanya fujo hapa kazini. Umeshaharibu vyakutosha, acha kuendelea kuharibu. Na ninakuomba kabisa, acha kuingiza wazazi wangu katika hili. Tulianza mahusiano yetu tukiwa mimi na wewe, naomba tumalize hivyo.” “Tunamaliza!? Kwani ndio tunaachana Elvin? Kumbuka tulipotoka mimi na wewe.” Elvin alifungua mlango wa ofisini kwake, akaingia na kufunga mlango. Aliwaacha wazazi wake na Irene palepale.
“Nilikwambia baba JJ, nimapema sana. Mpeni Elvin muda jamani! Ona ulivyomnyima mtoto raha. Amekuja na furaha yake, umeharibu kila kitu. Ni juzi tu ndio amejua kuwa wewe Irene ulikuwa sio mwaminifu kwenye mahusiano yenu, akaumia sana. Halafu leo mnataka kumlazimisha! Na yeye ni binadamu. Naomba mumuache. Haraka hiyo uliyonayo Irene ni ya nini?” “Kwa hiyo Mama Mwasha unasema anayonifanyia Elvin ni sawa?” “Hebu kuwa na utu kidogo Irene! Wewe uliyomfanyia Elvin unaona ni sawa? Uchafu wote ule uliomfanyia, unataka leo ageuke tu aseme yamekwisha!? Mwache mwenzio afikirie. Hivyo unavyomfuatilia kila siku humpi muda wakufikiria, unazidi kumsukumia mbali.” “Kwa hiyo unasema nimpe muda wa kuendelea kuwa na Bella? Unafikiri mimi mjinga? Mnataka eti nikae tu nyumbani wakati najua Bella anamchukua mwanaume wangu!?” Irene alikuwa akiongea kwa nguvu sana, kila mtu alikuwa akisikia.
 Elvin alitoka ofisini kwake na kumsogelea Irene. “Siku nyingine nikikusikia unaongea na mama yangu hivyo..” “Utanifanya nini Elvin? Eeh? Utanifanya nini?” “Toka Irene tafadhali. Naomba uondoke.” “Kwa hiyo unanifukuza?” “Unaning’ang’ania nini Irene? Kwani mwanaume nipo peke yangu? Au kama alivyosema Eli unataka kuthibitishia watu wewe nimshindi? Naomba uniache kabisa, na leo ndio iwe mwisho kunitafuta tafadhali.” “Kwa hiyo na uchumba wetu?” “Nimekwambia basi, Irene. Huna nidhamu kwa yeyote yule. Unaongea na kila mtu vile unavyotaka wewe! Wewe utakuwa mke wa namna gani, bwana? Naomba uondoke Irene, tafadhali. Toka.” “Unafikiri huyo Bella ndio mwanamke atakaye kufaa? Tutakuona.” Irene aliendelea.
“Na Bella! Bella! Najua unanisikia. Utapaona mjini pachungu wewe. Wewe si unatumia huo uzuri wako kuchukua wanaume za watu, tutakufundisha adabu. Utaukimbia huu mji.” Irene alihakikisha anatoa watu ofisini kwa kelele. Wafanyakazi walioweza kutoka walitoka kuangalia kulikoni, maana Irene alikuwa akipayuka kama mwehu. Alifanya fujo zakutosha kabla hajaondoka. Alimtukana sana Bella, akamgeukia Elvin na wazazi wake, tena kwa sauti ya juu, hakuna aliyetaka kumgusa asije akazua kesi nyingine. Wote walibaki wakimtizama, mpaka alipochoka ndipo alipoondoka.  Elvin alirudi ofisini kwake.
***************************************
Irene aliweza kuharibu hali ya hewa ya pale ndani. Furaha yote kati ya Bella na Elvin iliisha. Mama Mwasha aliendelea kulalamika. “Naomba uwe unanisikiliza baba JJ. Unaona sasa?” “Sikujua kama huyu mtoto ni mkorofi kwa kiasi hicho bwana. Twende nyumbani ukapumzike.” “Hapana Mwasha. Umeshachafua akili ya mtoto, lazima tumuache akiwa sawa. Ulimuona jinsi alivyoingia? Alikuwa na furaha sana, ona sasa hivi alipoondoka hapa.” “Basi nenda kanisubiri ofisini kwangu, wakati naenda kuzungumza naye.” Mama Mwasha alikuwa na matatizo ya moyo. Baada ya kuugua sana na kufanyiwa vipimo vingi ndipo walipogundua moyo wake ni mkubwa. Kwa hiyo walikuwa wakimwangalia kwa karibu sana. Afya yake ilikuwa ikibadilika mara kwa mara.
Mzee Mwasha aligonga ofisini kwa Elvin. Elvin alimkaribisha. “Unauhakika utaweza kubaki, au unataka tuwe wote?” “Nipo sawa baba. Wewe rudi nyumbani na mama ili akapumzike. Nitawaona jioni.” Mzee Mwasha alisimama pale kwa muda. “Elvin! Nia yangu ni nzuri mwanangu. Nataka uwe na furaha.” “Naelewa baba. Usiwe na wasiwasi, kila kitu kitakuwa sawa tu. Nyinyi nendeni nyumbani mkapumzike. kukitokea chochote kile ambacho kinakuhitaji wewe mwenyewe, nitakupigia.” “Asante.” Mzee Mwasha akatoka, lakini Elvin alikuwa amekasirika sana. Alishindwa kufanya kazi kabisa, alibaki amekaa tu ofisini kwake mpaka muda wa chakula cha mchana. Alimtuma mfagizi akanunue chakula na kumwambia akilete ofisini mwake. Kilipokuja alipiga simu ofisi za masoko akitaka Bella afike ofisini kwake.
Baada ya muda Bella aligonga ofisini kwa Elvin. “Vipi kazi huko?” “Ni vitu vidogo tu, naamini nitamaliza kabla siku ya kazi haijaisha.” “Njoo tule.” “Asante Elvin, lakini hapana.” “Kwa nini?” Bella aliingia ndani na kufunga mlango. “Samahani Elvin, nafikiri kwa sasa inabidi nikae mbali na wewe kidogo. Watu wananifikiria vibaya. Hata muda mrefu haujapita tangia tumalize kelele za Lily, yule dada wa masoko, akinilalamikia nakuganda sana, wakati kila mtu hapa ofisini   anajua yeye anakupenda sana. Leo Irene anaonyesha kuwa mimi ndio sababu ya matatizo yenu. Nafikiri turudishe mahusiano kama ya zamani, iwe ni kazi tu.” “Unafanya hivyo kwa ajili yako mwenyewe Bella, au kwa ajili yao?” Bella akanyamaza. “Unajua nini Bella, uwamuzi ni wako. Fanya vile unavyoona inafaa, sitakusumbua tena.” “Kwangu sio usumbufu Elvin, nia yangu ni nzuri.” “Sawa.” Elvin alijibu kwa kifupi, akasimama akatupa kile chakula chote kwenye ‘trash can’ nakutoka nje. Bella alisimama pale ofisini kwa Elvin kwa muda mrefu akiwaza mwishowe alitoka kurudi kuendelea na kazi.
***************************************
Mambo yalibadilika sana kwa Elvin na Bella, mbali na maswala ya kazi ni kweli Elvin hakumuongelesha kitu kingine chochote Bella. Ilikuwa salamu, na kumpa maagizo kitu gani cha kufanya kama kipo, na kama ni wajibu wa kawaida tu wa Bella, Elvin hakusogea kabisa ofisini kwake. Bella alianza kuwa na hamu na Elvin. Alikumbuka wakati mzuri waliokuwa nao wakati wapo Arusha, nakutamani kutokee sababu waongee tena, lakini hapakuwepo. Alikuwa na maswali mengi sana yakumuuliza afanye nini kwa wakati ule juu ya mahusino yake na Mzee Masha lakini aliogopa kumsogelea, kwani Elvin alionyesha sura ya kazi wakati wote. Siku zilizidi kwenda hali haikuwahi kubadilika kati yao.
***************************************
Bella aliamua kutafuta bahasha akaweka kadi za Mzee Masha, ili asitumie kabisa. Akaanza kujinyima sana. Alianza kuona hata shida kuendeshea ile gari. Kwani lile gari lilikuwa likimgharimu sana kwa upande wa mafuta na matengenezo. Akawa analiacha nyumbani ili kubania pesa yake, na kaunza kupanda daladala. Haikuwa rahisi hata kidogo kwa Bella. Aliacha kadi mbili zilizokuwa na pesa za kutosha, moja ilikuwa ni ya dolla akaunti na nyingine ya pesa ya kitanzania. Alikuwa akiamka asubuhi na mapema kuwahi daladala ambazo alikuwa akizifuata mbali sana na alikuwa karibu wa mwisho kutoka ofisini ili kusubiria watu wapungue posta mpya ili apate daladala ya kurudi kwake.
Alipoona mateso yanazidi, alianza kutafuta vyumba karibu na kazini kwake. Alimshirikisha Joo uhitaji wake, Joo akamwambia yupo mtu anaweza kusaidia kupata nyumba za msajili wa majumba. Akamtafuta yule dalali na kuongea naye. Alimwambia ampe muda ili kumtafutia sehemu nzuri karibu na mjini. Bella alikuwa akichoka sana sababu ya kutembea. Wakati mwingine aliishia kulala sebleni kwenye makochi, nakushindwa kabisa kufika chumbani kwake sababu ya kuchoka.
“Masha atua jijini, akisubiriwa na Talaka yake kutoka kwa Bela”
Siku moja ya ijumaa alipotoka kazini, Bella alikuwa amechoka sana, mvua ilimnyeshea, alijaa matope kila mahali kwani magari mengine yalimpita njiani na kumwagia maji machafu. Alipofika tu nyumbani kwake, akapanda kwenye makochi akiwa bado amevaa viatu vyake, na kukumbatia pochi, vilevile mchafu akapitiwa na usingizi. “Bella! Bella!” Alishtukia Mzee Masha anamwamsha. “Nimechoka T, naomba niache nilale.” “Unalalaje kwenye makochi wewe!? Twende ukalale ndani.” “Sitaki.” “Umekuwa mbishi wewe! Hebu jione ulivyojaa taka. Unanuka Bella, na mimi unajua siwezi kukaa sehemu chafu.” Bella alisimama na kwenda moja kwa moja bafuni, akaoga nakurudi kujitupa kitandani.
“Wewe Bella vipi? Hutujaonana muda wote huo, nimerudi kukuona halafu unanifanyia ukorofi.” “Nakuomba unyamaze, T. Kama nikunipiga au mambo mengine iwe kesho. Sasa hivi nimechoka siwezi hata kujisogeza.” Bella aligeukia upande mwingine na kupotelea usingizini. Mzee Masha alishangaa  sana.
Kama kawaida yake, kabla ya kufika nyumbani alishakunywa dawa za kuongeza nguvu za kiume ili akifika nyumbani, aweze kulala na Bella. Mzee Masha alikesha akizunguka ndani ya ile nyumba, mpaka palipokuwa panapambazuka. Kwa kuwa hali yake ilikuwa mbaya, ilimbidi kumbaka tu Bella akiwa usingizini. Bella alilia siku hiyo kuanzia mwanzo mpaka mwisho. “Hizi ni siku za hatari T, kwa nini unafanya hivyo? Nikishika mimba?” “Si tutaitoa!” “Yaani uue mtoto! Kwa nini?” “Niko kwenye kipindi kigumu sana na familia yangu, siwezi kuongeza mtoto mwingine sasa hivi.” “Wewe ni shetani Masha.” Mzee Mwasha alianza kucheka.
Bella alienda jikoni na kuchukua mwiko na kurudi nao chumbani nakuanza kumpiga nao Mzee Masha. “Unataka nikuumize tena Bella. Acha ukorofi usio na sababu.” Bella aliendelea kumpiga kila mahali huku akilia. “Nimekwambia acha Bella. Nikisimama hapa nitakuumiza ulie wewe.” “Huwezi kuniumiza zaidi ya hivi. Umenibaka! Wewe ni shetani.” “Sijakubaka, nimechukua haki yangu.” “Huna haki juu ya mwili wangu. Mimi sio mkeo.” “Acha ujinga wako. Hebu rudi kitandani ulale.” Bella alitaka kumpiga tena, lakini Mzee Masha alichukua ule mwiko na kuuvunja. “Nimekwambia panda kitandani.” “Sipandi na chukua….” Bella alienda kwenye droo alipokuwa ameweka ile bahasha iliyokuwa na kadi zote za benki na funguo za gari, akamtupia Mzee Masha. “Maskini mkubwa wewe. Chukua vitu vyako uone kama sitaweza kuishi.” Mzee Masha aliokota ile bahasha huku akicheka.
“Sasa hapa maskini ni mimi au wewe?” Bella alikuwa akilia kwa hasira sana. Mzee Masha alifungua ile bahasha akakuta zile kadi za benki. “Utarudi kuziomba hizi kadi wewe mwenyewe. Wewe kubali hasira za kijinga zikutawale. Na kama kweli hutaki hili gari, mimi nitaliuza kesho.” “Nimekwambia sina shida na vitu vyako.” “Mbona nimekukuta hapa sasa? Kama huna shida na vitu vyangu?” Bella aliingia bafuni kuoga.
Alitoka, akachukua pochi yake akaweka mswaki na dawa ya mswaki na nguo za ndani akataka kutoka. “Nakwambia ukitoa huo mguu tu hapo nje ya geti, kitakachompata mdogo wako usinilaumu.” Bella alicheka. “Unajua nini Mzee Masha, kwanza nitakushukuru sana kama utamuua. Itanirahisishia maisha yangu. Nakushauri uende ukamchukue sasa hivi wewe mwenyewe. Mpige risasi, mnyonge, fanya kile unachotaka. Wote tutakufa siku moja. Acha kuwa mjinga kunitishia maisha.” Bella alirudi ndani kuchukua vitu vyake baadhi. “Na kwa taarifa yako, picha zile nilizokutumia wewe ukiwa umenipiga na kuniumiza mwili wangu, na zile nyingine ulizonipiga mpaka nikalazwa nikafanyiwa upasuaji, nimezitengenezea video, kisha nikazituma na kwa watu wengine. Nimewaambia wasiponisikia kwa siku mbili tu, au Ric akipotea tu wakufuate wewe. Sijui utajificha wapi uso wako! Na uangalie email yako. Nimekutumia hiyo video niliyojirekodi maisha yangu yote kuanzia ulipojidai unatusaidia ukaishia kunitoa bikra yangu, vipigo na picha zote ulivyokuwa umeniharibu mwili wangu, vyote vipo kwenye hiyo video. Na vyote hivyo viko kwa watu zaidi ya mmoja. Nimekutaja jina lako, mkeo na watoto wako wote. Sasa niguse tena uniumize, nikaongeze ushahidi, au niue unitupe, watu wasambaze ile video. Utapaona mjini pachungu.” Bella aliendelea kukusanya vitu vyake vyote bila wasiwasi.
“Acha hivyo vitu vyote ni mali yangu.” “Acha upumbavu Masha. Hata mimi hivi vyote ni jasho langu. Umesahau ulivyokuwa unanibaka? Umesahahu ulipotoa bikra yangu bila ridhaa yangu? Umesahau jinsi ulivyokuwa ukinidhalilisha? Matusi na kushikashika mwili wangu hata mbele ya dereva wako, ukiwa umeniamuru niwe na kuja kukupokea kutoka uwanja wa ndege? Kwa hiyo hili ni jasho langu.” Mzee Masha alikuwa haamini.
“Tena wakati nafungasha, ili usibaki unashangaa ngoja nikuwashie video niliyojirikodi.” Bella alimuwashia Mzee Masha ile video akiwa anaongea amekaa kwenye kochi huku picha zake akiwa amemjeruhiwa vibaya sana zikipita. Bella alimalizia. “Utakapokuwa unaangalia video hii ujue Mzee Masha ametufanyia kitu kibaya sana, mimi na mdogo wangu Eric. Naomba haki itendeke. Enabella.”
Wakati Mzee Masha anaangalia ile video, wazo lilimjia Bella. Alijiandikia cheki ya pesa nyingi sana, akamgeukia Mzee Masha. “Na hiki ndio kiinua mgongo changu baada ya kustaafu ajira yako.” Bella alimpokonya funguo za gari mkononi, akapandisha vitu vyote vya thamani kwenye gari yake. “Tena nilitaka niondoke bila kitu kwako. Lakini nimeona ni ujinga. Umenitesa vyakutosha, umechukua usichana wangu, hivi vitu havifikii hata nusu ya vitu ulivyochukua kwangu. Gari yako utaikuta hotelini.” Kama utani Bella alijikuta yupo huru.
Alitoka pale getini huku akitetemeka, asiamini ule ujasiri aliutoa wapi. Machozi yaliendelea kumtoka. Aligeuka nyuma kuangalia kama kuna mtu anamfuata, lakini hakuona mtu anayemfuatilia. Alikwenda moja kwa moja mpaka benki. Akatoa zile pesa alizojiandikia kwa haraka sana ili kuwahi Masha asiizuie ile hundi. Akazibadili zile pesa kwenda kwenye pesa za kitanzania, akaziweka kwenye akaunti yake aliyokuwa amefungua kwa jina lake yeye na Ric.

“Bella aanza maisha mapya, bila Masha.”
Alibaki akiwaza sehemu ya kwenda. Akaamua kumpigia tena yule dalali, lakini dalali alimwambia ana sehemu nzuri sana, ambayo amepata mteja aliyekubali kumlipa yeye pesa nyingi zaidi ya Bella. Bella alimbembeleza na kumuahidi kumuongezea pesa zaidi kama atampa yeye hiyo sehemu siku hiyo hiyo, akakubali. Siku hiyo hiyo Bella akapata sehemu ya kuishi kwenye nyumba za msajili wa majumba, eneo la Ocean Road. Hakuwa na kitanda wala kochi lakini Bella alikuwa na furaha yakupindukia. Alitupa nguo zake zote chini na kulala palepale sakafuni siku nzima huku akilia kwa furaha.
Ilipofika jioni alirudisha gari ya Mzee Masha hotelini, akaacha na simu yake ndani ya hiyo gari, akatafuta taksii yakumrudisha nyumbani kwake. Alijawa na furaha sana. Aliingia bafuni kuoga tena na tena kutoa harufu ya Mzee Masha mwilini mwake. Alisimama katikati ya bomba la maji, yakiwa yanamwagikia. Bella alijisafisha sana mpaka roho yake iliporidhika.
Alipata sehemu ya vyumba vitatu, akaanza kupigia mahesabu pesa aliyonayo na majukumu makubwa yanayo mkabili. “Kwanza lazima kuwa na ada ya Ric ili asiache kwenda shule, na mimi mwenyewe ni lazima nirudi shule. Halafu lazima kununua gari itusaidie mimi na Ric. Siwezi kumrudisha Ric kwenye maisha ya daladala. Lakini lazima kununua vitanda na tv,vyombo, jiko,…” Bella alianza kuingiwa na wasiwasi kila alipopanga mahesabu ya pesa aliyonayo na majukumu mazito yanayomkabili. Wasiwasi ulizidi kumuingia. Ndio alikuwa ametoka kulipia kodi ya mwaka mzima. ‘Au nimefanya haraka kuondoka kwa Mzee Masha? Ningesubiri kwanza wakati nipo kwake ningekuwa nanunua vitu taratibu mpaka ningejaza hii nyumba ndio ningeondoka. Sina hata kitanda!’ Bella aliendelea kuwaza usiku huo akiwa peke yake. ‘Najua nikirudi kwa Masha atanipokea.’ Bella alianza kushawishika. ‘Lakini hapana, inabidi nifanye kama alivyonishauri Elvin. Nitaweza tu. Hatua ndogondogo kama mtoto mdogo. Nianze kutafuta shule ya Eric kwanza.’ Bella alipata muda mzuri sana wakuwaza akiwa peke yake. Weekend ile alilala chini kwenye nguo zake kwani hakuwa hata na kabati, lakini alipata muda wa kuwaza na kufanya mipango mingi sana.
***************************************
Siku ya jumatatu aliamka asubuhi na mapema kuwahi kazini. Alijitahidi kufanya kazi zake harakaharaka akaamua kumfuata Elvin kumuomba ruhusa awahi kutoka. Aligonga ofisi ya Elvin, akakaribishwa, lakini Elvin alikuwa kwenye simu. Ilimbidi akae asubirie. Baada ya muda Elvin akamaliza. “Samahani Elvin, naomba niwahi kutoka kidogo.” Elvin alibaki akimwangalia. “Nikiwahi kumaliza mapema naweza kurudi kazini.” Bella aliongeza baada ya kumuona Elvin ametulia kama anatafakari. “Naomba urudi Bella. Mambo ya muhasibu hayajakaa vizuri.” “Nitajitahidi kuwahi kurudi, na nikirudi nitahakikisha namaliza kila kitu.” “Sawa.” Bella alitoka na kuanza kuzungukia shule za sekondari.
Alijitahidi kutafuta shule nzuri lakini ambazo hatalipia pesa nyingi. Alitembea siku hiyo, jua likimchoma, bila kula wala kunywa maji. Viatu alivyokuwa amevaa vilikuwa vya juu, kwa hiyo alikuwa amechoka na alianza kutokwa na malengelenge miguuni. Hakuwepo Kaka Mat, wala gari la Mzee Masha, au dereva wa Masha. Bella alikumbuka usemi wa Mzee Masha akimwambia anatakiwa ashukuru yale maisha aliyompa. ‘Nikweli nilikwa nikiishi maisha ambayo sio yangu.’ Bella alijiambia.
Baada ya kuhangaika sana, alipata shule. Hakutaka kufanya kosa, aliamua kulipa ada ya mwaka mzima ili asije ishiwa. ‘Siwezi kununua gari sasa hivi, itabidi kumfundisha Ric kupanda daladala kila asubuhi ili kutunza pesa.’ Bella aliwaza wakati ametoka kulipia kila kitu kilichohitajika shuleni kwa Eric. Alianza kutembea akiwa amechoka sana, akirudi ofisini.
***************************************
Alifika ofisini akiwa amechelewa. Muda wa kazi ulishaisha. “Umechelewa Bella. Nataka kufunga mlango niwahi kurudi nyumbani.” Bella alikuwa amechoka sana. “Samahani Elvin, imechukua muda mrefu zaidi ya nilivyotegemea. Naomba unifungie humuhumu ndani ili nimalize hii kazi leo kabla ya kesho.” Elvin alimgeukia ili kumwangalia kwani alikuwa ameinamia meza ya mapokezi akisaini makaratasi fulani, na alikuwa akiongea naye bila kumtizama. Bella alikuwa akitokwa na jasho, nywele zilikuwa zimevurugika, amejawa vumbi na usoni hakuonekana na furaha hata kidogo.
“Ukirudi asubuhi nitakuwa nimesharekebisha kila kitu, na watakuwa tayari kuendelea na kazi.” Elvin alimwangalia kwa muda. “Tunaweza kuongea ofisini kwangu?” Elvin alihoji huku akimshangaa. “Ndiyo. Naomba nikaoshe uso kwanza. Nitarudi muda sio mrefu.” Aliondoka kwenda kujisafisha kidogo na kumuacha Elvin bado akimtizama.
Bella alimkuta Elvin ofisini kwake. “Najua nimechelewa Elvin, samahani sana.” “Mbona kama ulikuwa unalia?” Bella alinyamaza huku akijaribu kuzuia machozi yake. “Ulienda wapi?” “Kutafuta shule ya Ric. Nataka akimaliza mwaka huu asirudi tena kule kwenye ile shule ya Arusha.” “Umepata sasa shule?” “Nimefanikiwa kupata, na nimelipia garama zote kabisa.” “Gari yako iko wapi?” “Ile ya Mzee Masha?” “Ndiyo Bella. Si ndio ulikuwa unatumia?” “Nilimrudishia mwenyewe. Sasa hivi sina gari.” Elvin alimwangalia kidogo. “Kwa hiyo unakujaje kazini?” “Natumia daladala.” Elvin alimuhurumia, hakuwa amemuangalia Bella kwa muda mrefu sana tokea siku walipokuwa wametoka safari, Arusha. Alikuwa amekonda, alionekana anapitia wakati mgumu sana.
“Kwa hiyo daladala zinafika mpaka huko kwenu?” “Kule nilikokuwa nikiishi na Mzee Masha, zilikuwa haziingii ndani, nilikuwa nikitembea. Lakini nimehama, sasa hivi naishi hapa karibu. Sio mbali sana na kwenye daladala kama nitataka kupanda daladala, lakini huwa wakati mwingine natembea tu mpaka hapa kazini.” “Umehama kwa Mzee Masha!?” “Ndiyo.” Elvin alikuwa haamini, hakujua kama Bella angechukua ushauri wake nakuufanyia kazi kwa haraka vile. Alijisikia vibaya kumuacha peke yake hasa baada ya kumwambia aachane na Mzee Masha. Ni kama alimtoa mahali fulani, akamuacha njia panda.
“Kwa hiyo siku hizi unaishi peke yako?” “Ndiyo. Nilipoachana na Masha, nilitafuta sehemu yakuishi mimi na Ric. Akirudi safari hii ndio mwisho wa maisha ya bweni. Tutakuwa tukiishi wote. Asante kwa ushauri Elvin. Nimeweza kujikomboa na Mzee Masha.” “Hongera Bella. Najisikia vibaya naona kama nimekutelekeza.” Bella alitabasamu kinyonge akainama. “Sasa unaonaje maisha?” “Kwa kweli nimagumu sana. Lakini najua nitazoea. Kama jumamosi hii itabidi niende Arusha kwa basi ili nikamuone Ric.” “Nakupongeza Bella. Mwanzo utakuwa mgumu sana, lakini kwa vile ninavyokufahamu, najua utaweza tu.” “Naamini hivyo. Naweza kwenda kuendelea na kazi?” “Umesema nikufungie humu ndani!?” “Nataka nimalizie kabisa kwenye idara hiyo ya uhasibu, ili kesho nione vitengo vyote vinaonekanaje. Kama vitahitaji marekebisho au la, ili nisikucheleweshee ripoti mwishoni mwa mwezi.” “Umekula?” “Muda wachakula umenikuta barabarani nazunguka kutafuta shule. Lakini hamna neno, nitatengeneza chai hapo jikoni nitakuwa sawa tu.” “Sawa.” Bella alitoka pale na kuingia kwenye ofisi ya muhasibu. Kazi za pale ofisini pekee ndizo ziliweza kuchukua akili za Bella, kutoka kwenye shida zake na kumfanya azame pale kazini akitaka amalize haraka na kwa ufasaha. Hata hivyo hakuwa na kitanda kwa hiyo makochi ya pale ofisini yangemfaa tu.
***************************************
Wakati akili zake zimezama na kusahahu hata alipo, huku akifanya kazi zake, alisikia mlango mkubwa ukifunguliwa. Aliangalia saa, ilishakuwa saa nne usiku. “Elvin!” Bella aliita kutaka kuhakikisha. “Ni mimi Bella.” “Umesahau nini?” “Nimekuja kukuangalia na kukuletea chakula. Njoo jikoni.” Bella alipumua kwa nguvu, akaanza kujisikilizia. Kweli njaa ilishaanza kumuuma. Alitoka pale na kuelekea jikoni. Elvin alionekana alishafika nyumbani akaoga na kubadilisha nguo za kazi.
“Asante kwa chakula. Njaa ilishaanza kuniuma sema nikaipuuza.” Bella alikaa chini na kuanza kula. “Mbona wewe huli?” “Nimekula nyumbani na mama.” Bella alifikiria kidogo.  “Nimekumiss Vin!” Bella aliongea kinyonge sana. “Wewe si ulinifukuza, Bella?” “Nilikosea Elvin. Nahisi siku ile niliingiwa na hofu. Sikufikiria wakati naongea. Naomba unisamehe. Lakini nia yangu ilikuwa nzuri. Sikutaka mimi ambaye nimeshaishi maisha yangu yote ndio niwe sababu ya kukugombanisha na mchumba wako.” “Umeshaishi maisha yako yote!?” Bella alicheka kwa kujidharau.
 “Nimebakiza nini Elvin? Nawezekana nikawa mdogo wa umri kwenu, lakini nimeshaishi maisha yote, kama mama aliyekula chumvi nyingi. Mimi sio kama wewe au Irene, ambao bado maisha mazuri tena yenye ahadi nyingi yanawasubiri mbeleni.  Sikutaka mimi ndio niwe kizuizi cha kuwafanya msifikie ndoto yenu.” “Wewe huwezi kuzuia chochote Bella. Hata hivyo na mimi nahisi nilikuwa na hasira na nilikuwa kwenye mshtuko. Sikutegemea kumuona Irene siku ile, tena baada ya kujua uchafu mwingi alionifanyia. Tulipokuwa Arusha, nilipata wakati mzuri sana. Nikajua nimepata rafiki mwingine hasa baada ya kugundua marafiki zangu wakaribu wote walikuwa na mahusiano ya kimapenzi na Irene. Nilimshukuru Mungu kuona angalau umeweza kufanya akili zangu zitulie. Nikajisifia nimeweza kuamsha kitu kipya ndani yako. Sasa kuja hapa na wewe unaniambia unaomba tukae mbali mbali, hasira za kusalitiwa na kukataliwa zikanisumbua sana. Nilijua umenikataa Bella. Nilijichukia na kuumia sana.” “Pole Elvin, lakini sikukusudia kukuumiza. Na sikujua mambo yaliyokuwa yakiendelea kati yako wewe na Irene. Naomba nisamehe.” “Yameisha Bella!” “Kwa hiyo tutarudi kuwa marafiki?” Bella aliuliza huku akicheka. “Nilikuwa nakumbuka kweli hicho kicheko chako.” Wote walianza kucheka, ile hali ya uzuni ikaisha kabisa. Wakarudi ofisini kwa muhasibu na kuanza kufanya kazi pamoja mpaka walipomaliza saa saba ya usiku.
“Twende nikurudishe nyumbani kwako.” Bella alianza kucheka. “Ujue hakuna hata kochi.” “Unalala wapi sasa?” “Kwenye nguo zangu.” “Bella!” “Kweli. Nabania pesa kwa ajili ya shule ya Ric na mimi nataka nirudi shule. Sitaki kuja kuishiwa hela halafu Ric akateseka.” “Ndio maana ulitaka kulala humu ndani nini? Ili ulalie sofa za Mzee Mwasha.” Bella alikuwa akicheka. “Kesho lazima ununue kitanda Bella. Huwezi kuishi maisha ya namna hiyo wakati mshahara unaingia.” “Naogopa kuishiwa.” “Halafu ndio unajisifia umekula chumvi nyingi, wakati muoga wa maisha hivyo! Acha uoga. Maisha ni hatua Bella. Tena umeanza vizuri ukiwa na kazi. Anza kununua vitu vya msingi. Kitanda, tv, jiko na vyombo.” “Hela itaisha wewe Elvin!” Elvin alianza kucheka.
“Kweli kazi itakuwepo. Kwahiyo unataka kulala chini, halafu pesa unaweka benki?” “Sasa je? Kwa ajili ya Ric.” “Nilikwambia, lazima uanze kujithamini wewe mwenyewe kwanza, Bella. Usipojitunza wewe mwenyewe, utafika mahali utachoka na kushindwa hata kumsaidia Ric. Unahitaji kula vizuri, kulala sehemu nzuri ili uweze kufikiria. Kesho tunaenda kununua vitanda.” “Haya bwana.” Elvin alimuendesha Bella mpaka kwake.

Kwa mara ya kwanza, Elvin nyumbani kwa Bella.
“Kweli sio mbali bwana. Halafu ni pazuri!” “Unafikiri Ric atapapenda?” “Kwa jinsi nilivyoongea na Ric, anaonekana anataka sehemu atakapopaita nyumbani, basi. Namuona Ric sio mpenda makuu.” “Karibu ndani sasa.” Elvin alifurahi sana kuona Bella amechukua hatua.
“Hongera sana Bella. Naomba mimi ninunue Tv na kitanda, kama pongezi yangu kwako. Umefanya kitendo cha kijasiri sana.” “Asante Elvin. Angalau na mimi nina kwangu.” “Uliwezaje lakini kutoka kwa Mzee Masha?” “Njoo ukae hapa chini nikusimulie.” Bella alimsimulia Elvin kila kitu. “Daah pole sana Bella.” “Asante. Hapa nasubiri ikifika zaidi ya mwezi nikapime kama sikushika  mimba.” “Utafanyaje sasa kama umeshika mimba?” “Sijui Elvin. Yaani sielewi kabisa. Namwachia Mungu.” “Safi sana. Hiyo ndio inayotakiwa.” Walikaa pale wakiongea na kucheka mpaka ilipokuwa saa 9 usiku.
“Lala Bella. Nitakuja kukuchukua asubuhi twende kazini.” “Kweli Elvin?” Elvin alicheka. “Nitakufuata bwana. Usiku mwema.” “Sema asubuhi njema.” Alimuacha Bella anajiandaa kulala, wote wakiwa na furaha yakurudisha mahusiano yao.
***************************************
Bella alimfanya Elvin kuwa mtu wake wakaribu sana. Alikuwa akimwambia kila kitu bila kumficha. Kwa hiyo Elvin alijua maisha ya Bella kwa undani sana, na wakati wote aliweza kumshauri vizuri. Alimsaidia kununua vitu vya ndani vya muhimu ambavyo alijua angevihitaji. Bella alimtajia kiwango cha pesa alichonacho benki, Elvin alimsaidia kupanga matumizi, ikamsaidia Bella kuishi bila hofu. Urafiki kati yao ulirudi, ikawa ngumu kumtenganisha Elvin na Bella. Waliongozana kila mahali, walikula chakula pamoja. Kuanzia cha asubuhi mpaka jioni. Kama haikuwa nyumbani kwa Bella, basi ofisini. Furaha kati yao ilitawala, tena safari hii bila hofu ya Masha wala Irene.
***************************************
 “Lazima urudi chuoni umalize mitihani yako Bella.” “Kweli.” Elvin alimsindikiza Bella chuoni. Akafanikiwa kupata tarehe ya karibu ya kufanya mitihani yake, na kwa kuwa Mzee Masha alishalipia ada nzima, Bella aliweza kufanya ile mitihani bila gharama ya ziada. Hatimaye alipata cheti.
***************************************
 “Itabidi kuendelea kusoma, Bella.” “Sio sasa hivi Elvin. Ada ya hicho chuo ni kubwa sana. Nitashindwa kumsomesha Ric, na sitaweza kuishi mjini vizuri. Natamani tuwe na gari. Hata kama siyo ya thamani sana, basi ya kawaida tu ili kutusaidia kuzunguka hapa mjini kwa urahisi.” Elvin alikuwa akiongea na Bella nyumbani kwake siku hiyo jioni baada yakutoka kazini. “Si utasubiria chakula ili tule wote?” Bella alikuwa akipika. “Sijamuona mama siku mbili hizi, nataka leo niwahi nyumbani kidogo kabla hajalala. Maana kila nikirudi usiku anakuwa amelala na kila nikiondoka asubuhi ili nikuwahi wewe huku, anakuwa bado hajaamka.” “Hamna shida. Nisalimie wote. Nitakuona kesho Elvin.” Kilikuwa kipindi kizuri sana kwa Elvin ambacho hajawahi kukipitia kwenye maisha yake. Alikuwa mtoto mkimya na mwenye maadili yote. Akakutana na Bella mcheshi na mpenda kucheka sana. Kila kitu alikifanyia utani na kumfanya Elvin acheke. Elvin alishasahau kabisa usaliti wa marafiki zake. Akawa haendi tena kwenye vikao vyao vya watoto wa marafiki wa baba yake. Kila alipokuwa akipigiwa simu kuwa wenzake wanakutana mahali kwa ajili ya tafrija fulani, Elvin alitoa udhuru. Muda mwingi walitumia na Bella.
***************************************
 “Nataka kukufundisha kitu Elvin.” “Isiwe tu uchokozi.” Bella alicheka. “Nataka kukufundisha mambo ya IT.” “Utanicheka bure. Mimi na kompyuta vitu viwili tofauti.” “Utaelewa bwana. Mimi mwalimu mzuri.” Siku za jumamosi ambazo wafanyakazi wengine hawakuwa wakija kazini, Elvin alimfuata Bella na kwenda naye kazini. Alimfundisha mambo mengi sana. Akawa msaada mkubwa kwenye maisha ya Elvin. Mambo mengine Bella alimshauri Elvin kama utani tu, lakini kila Elvin alipofanyia kazi, alifanikiwa. Baba yake alikuwa akishangaa sana. Kwa muda mfupi sana Mzee Mwasha aliweza kulipa madeni ya watu, angalau akarudisha  heshima kwa Wazee wenzake.

“Bella kwa familia ya Mwasha.”
Siku moja ya jumamosi wakati Elvin yupo nyumbani kwa Bella akiangalia mpira, alipigiwa simu. Alionyesha kushtuka sana. “Lazima niondoke Bella. Mama ameanguka chooni, baba anasema hali mbaya. Na baba naye nimemuacha nyumbani akiwa hajisikii vizuri.” “Pole Elvin. Naomba unijulishe hali itakavyokuwa.”  Elvin akaondoka. Bella alisubiri simu ya Elvin mpaka usiku, lakini hakupiga, akaamua atume ujumbe. ‘Nina wasiwasi Elvin, naomba nijulishe hali ya mama ikoje?’ Elvin akapiga. “Pole Bella. Nimechanganyikiwa ndio maana nimeshindwa kukupigia simu.” “Nini tena? Hali ya mama ni mbaya sana?” Bella akauliza. “Siyo nzuri. Tumemleta hapa hospitalini na baba naye amefika hapa amezidiwa. Nipo peke yangu. Eli hapokei simu. Kaka JJ amesafiri. Nimemuomba mkewe aje ili akae na mama, anasema mtoto wao mgonjwa, hawezi kuja leo mpaka kesho.” “Pole Elvin. Basi ngoja nichukue taksii nije kukaa na mama.” “Unauhakika? Maana akiwa kwenye hali hii hawezi kuamka, kila kitu ni hapohapo kitandani.” “Usiwe na wasiwasi. Nitakuwepo kusaidiana na manesi. Nakuja sasa hivi.” “Asante Bella.” Wakaagana kwa makubaliano Bella amfuate hospitalini.
Bella alifika pale na kukuta Mama Mwasha ndio anabadilishwa nguo sababu ya kujisaidia. Hakufurahia kabisa jinsi wale wauguzi walivyokuwa wakiongea naye, nikama walikuwa wakimlaumu, kwa nini hakuwaita wakati anataka kujisaidia? Na hiyo ilikuwa mara ya tatu. Mama Mwasha alijitetea kwa shida kidogo kwamba ni kama hata hakuwa akijua kama anataka kwenda chooni. “Sasa hivi mimi nipo dada yangu. Hatutakusumbua tena. Akijisaidia nitambadilisha mimi mwenyewe. Naomba tu unielekeze kwa kupata mashuka ya kubadili mpaka hiyo kesho tutakapo mnunulia diaper.” Bella aliingilia. “Na ukiondoka nani atambadilisha?” “Nitakuwa naye hapa, sitaondoka.” Yule muuguzi alitoka akionekana kuchefukwa na harufu ya kinyesi cha mtu mzima.
“Pole mama. Utapona.” Bella alimuona Mama Mwasha akitokwa na machozi. “Sikujua mwanangu.” Alijibu kwa shida kidogo. “Wala usijali mama. Nitakuwepo kukusaidia. Utakuwa salama. Wewe lala tu, mimi nipo hapa, ukiwa na shida yeyote utaniambia.” Mama Mwasha alikuwa hawezi hata kujisogeza kila apatwapo na ile hali. Elvin alipiga simu, lakini Bella alikata akamtumia ujumbe. ‘Mama amelala,Vin. Hatuwezi kuongea. Lakini usiwe na wasiwasi anaendelea vizuri.’ ‘Asante Bella.’ Elvin alijibu. ‘Vipi baba?’ Bella naye akauliza. ‘Anasinzia hapa.’ Bella alituma picha ya kisanamu kinachocheka. ‘Akilala nitakuja kuwaona.’ Bella akajibu.’Sawa.’  
Ilipofika asubuhi madakatri walimruhusu Mzee Mwasha huku akiwa amepewa masharti ya kupumzika kabisa. Elvin alimrudisha baba yake nyumbani, na kurudi ofisini akiwa amemuachia Bella majukumu ya mama yake.
***************************************
Usiku ule Bella hakulala kabisa. Hali ya Mama Mwasha haikuwa nzuri. Alikuwa akimbadili mara kwa mara. Ilipofika asubuhi mkwewe, yaani mke wa mtoto wake wa kwanza JJ, Diva, alifika hospitalini hapo kumuona mama mkwe wake. Alikuwa amevaa kiofisi, alionekana anafanya kazi nzuri, na hata ukimwangalia usoni alionekana ni dada aliyesoma na anajielewa. Chumba kizima kilijaa manukato yake, alionekana na umbile dogo dogo, isingekuwa rahisi kujua hata kama ana mtoto mmoja. “Vipi anaendeleaje?” Aliuliza mara tu alipoingia. “Usiku hakulala, hali ilikuwa sio nzuri. Ndio anapitiwa na usingizi sasa hivi.” “Basi nitarudi baadaye. Nina vikao vingi sana ofisini na vyote nategemewa mimi.” “Sawa.” Yule dada hakutaka kabisa kumuamsha Mama Mwasha, akatoka. Hakuwa ameleta hata chupa ya uji au maji ya kunywa kwa mgonjwa.
Bella alikaa pale akisinzia mpaka Elvin alipokuja. “Pole Bella. Nakuona ulivyo choka, lakini itabidi uvumilie tu. Nimekuletea chakula, narudi ofisini. Siunajua ule mzigo wa Unganda ndio unaondoka leo?” “Wewe nenda wala usijali. Kukitokea tatizo lolote nitakujulisha.” Elvin alimsogelea mama yake akambusu, lakini alikuwa amelala. “Nitawaona baadaye.” Elvin naye akatoka.
***************************************
Ilipofika jioni kabisa, Elvin alirudi pale hospitalini akiwa na baba yake na Eli. Eli alibaki amemkodolea macho Bella. “Kwani hivi viumbe kweli huwa vipo hapa duniani!?” Eli aliongea kwa mshangao sana mbele ya wazazi wake na Elvin, akiwa anamshangaa Bella. “Uliniambia hajanywa kabisa.” Mzee Mwasha aliongea kwa sauti ya chini akimlaumu Elvin, aliyempitia kaka yake huko alipokuwa na kumleta hospitalini. “Sijanywa bwana! Mbona hamniamini?” Kumbe Eli alimsikia baba yake. “Mimi namshangaa huyu kiumbe. Sijawahi kuonana nao uso kwa uso viumbe kama hawa, isipokuwa magazetini tu, tena wamechorwa kama vikatuni. Au wewe Elvin husomagi katuni nini? Au kumbuka gazeti la San, wanachoraga wasichana kama huyu hapa.” Eli alikuwa akiongea huku akiendelea kumwangalia Bella bila kukwepesha macho. “Mama mgonjwa Eli. Si nimekwambia?” Elvin alimshtua kaka yake. “Kweli bwana. Huyu mtoto kanichanganya kabisa nikamsahau mama yangu.” Eli alimsogelea mama yake. Bella aliomba kuongea na Elvin wakatoka nje kidogo.
“Nanuka Elvin. Na sijabeba hata nguo za kubadili. Naomba nirudi nyumbani nikaoge na kuchukua vitu vya muhimu.” “Nisubiri tutaenda wote. Nafikiri shemeji anakuja. Leo atalala na mama ili na wewe ukapumzike.” Bella na Elvin walirudi ndani. Baada ya muda mfupi tu Mke wa JJ, Diva akaingia. “Yaani nimechoka. Tokea asubuhi nazunguka kwenye vikao.” Akavuta kiti akakaa. “Shikamoo baba.” “Marahaba mama. Pole na kazi.” Mzee Mwasha alijibu. “Asante. Cheo kimenijia na majukumu. Hivi kesho kutwa natakiwa kusafiri kwenda South Africa kwenye kikao.” Kila mtu alinyamaza kumsikiliza. Aliongea mambo mawili matatu yanayomuhusu yeye na kazi yake, mpaka harufu mbaya ilipoanza kuenea mle ndani. Bella alijua ni Mama Mwasha amejisaidia tena, akawa akitafuta jinsi yakumtoa kila mtu mle ndani ili ambadilishe.
“Mbona kunanuka?” Diva alianza kulalamika. Bella alimnong’oneza Elvin kumuomba awatoe watu pale ili ambadili. “Baba na Eli naomba tusubiri hapo nje kidogo.” Mzee Mwasha alielewa, hakuuliza chochote akatoka yeye wa kwanza, Eli akafuata nyuma Elvin.
Bella alisogea pale kitandani na kuanza kumfunua. “Kumbe ni yeye amejisaidia!” “Ndiyo. Naona anamchafuko wa tumbo.” “Sasa kwa nini huiti wauguzi?” Diva aliuliza huku amekunja uso na amekaa palepale. “Sipendi jinsi wanavyo muhudumia. Wanakuwa kama wanamlaumu wakati ni mgonjwa.” “Wanachoka!” Diva alidakia. “Ndio maana naona ni vizuri kuwapokea vitu kama hivi ambavyo tunaweza kufanya wenyewe.” Bella alimbadilisha Mama Mwasha, safari hii alimvalisha diaper alizokuwa amezileta Elvin. Maongezi yote hayo waliyokuwa wakiongea, Mzee Mwasha na wanae walikuwa wakisikiliza wakiwa nje.
“Chumba chote kimejaa harufu mbaya! Heri tufungue hayo madirisha.” Diva aliendelea kulalamika. Bella alitoa zile nguo nje, akarudi kuosha mikono yake, baada ya kutupa zile gloves alizokuwa amevaa wakati wakumbadilisha Mama Mwasha, akafungua madirisha na mlango.
Walipoona milango inafunguliwa Mzee Mwasha na wanae wakarudi ndani. “Asante sana Bella.” Mzee Mwasha akashukuru. Bella alitabasamu. “Jamani mimi naomba nitangulie nyumbani nikaangalie watoto. Kama mnavyojua JJ hayupo nyumbani, watoto wako na dada tu. Na kama mnavyojua wasichana wa kazi siku hizi. Ukute alishaondoka watoto wameachwa peke yao.” Akasimama. “Mama pole sana. Nitawaona kesho.” Alitoka bila hata kugeuka nyuma. Elvin alimgeukia Bella. “Naona turudi kwenye ule mpango wako wa mwazoni.” Bella akacheka. “Ndio twende sasa hivi, wakati baba yupo hapa.” Bella alinong’ona lakini Mzee Mwasha alisikia. “Na wewe mama unaondoka?” “Nitarudi baada ya muda mfupi sana. Nataka nikaoge na kubadili nguo. Sitakawia.” Bella alijibu na tabasamu usoni. “Haya mama. Nashukuru sana.” Mzee Mwasha alikuwa ni kama aliyeishiwa maneno kwa Bella. “Baba! Namsindikiza, tutarudi sasa hivi.” Elvin aliaga. “Kwa nini mimi nisimsindikize? Eti Dogo? Ili wewe ubaki tu hapa na mama.” Eli aliongeza. “Twende Bella.” Elvin hakutaka kumjibu kaka yake, akatoka nje Bella akafuata.
***************************************
Bella alimuuguza Mama Mwasha kwa muda wa siku sita akiwa peke yake usiku na mchana. Mzee Mwasha alikuwa akija mida ya asubuhi nakumfanya Bella apate muda wa kulala kidogo kwenye kochi wakati Elvin akiwa kazini. Waliendelea hivyo mpaka madaktari walipoona anaweza kwenda kutumia dawa nyumbani.
Siku hiyo anaruhusiwa, JJ na mkewe walikuwa wamekuja hospitalini. “Pole sana mama yangu. Ndio nimeingia sasa hivi. Amekuja kunipokea Diva, nikamwambia tupitie hapa moja kwa moja.” “Asante. Pole na safari.” Mama Mwasha alijibu. Hawakuwa wamemuona mkewe tokea alipoaga siku ile usiku. “Na mimi nilisafiri. Nilikuwa na mkutano South Africa.” Diva aliongeza lakini hakuna aliyejibu na yeye hakuonekana kujali. “Vipi mama. Wamekwambiaje?” “Nimeruhusiwa, wamesema nikaendelee na dawa tu nyumbani nikisubiri kwenda India.” “Wanachosubiri nini kukupeleka huko India?” “Si unajua tunasubiri foleni baba.” “Foleni ya nini tena?” “Tumeomba msaada wa serikali, na unajua tupo wengi na mimi mzee. Kwa hiyo mpaka zamu yangu ije ifike sio kitu cha leo hicho.” JJ alikaa kimya kwa muda.
“Kwani ni kiasi gani? Eti baba?” “Sijui ila wanasema ni pesa nyingi.” “Si dhani kama kuna pesa nyingi ya kushindwa kumsaidia mama. Itakuwa hamna sababu ya sisi wote kufanya kazi kama tutashindwa kumsaidia mama apone. Ngoja nikaongee na daktari wake, nijue gharama. Na Eno anakuja kesho. Tutapanga vizuri. Lakini lazima ukatibiwe mapema mama. Mimi sikujua kuwa tatizo ni pesa!” JJ aliendelea kushangaa.
“Mi naona ukaulize gharama kwanza babe. Inaweza kuwa pesa nyingi sana, ikalazimu kusubiria huo msaada wa serikali.” Mkewe, Diva alishauri. “Wewe unaongea nini!? Yaani mama akae anateseka eti tunasubiri msaada wa serikali wakati uwezo tunao?” “Unajuaje sasa kama uwezo tunao wakati hujajua gharama?” “Zitapatikana tu hizo pesa. Hata iweje, mama hawezi kuendelea na hali hiyo.” JJ na mkewe waliendelea kubishana pale mbele za watu. “Mimi nashauri kaka ukaulize tu ili tujue. Tunaweza tukawa tunaogopa gharama kumbe ni kitu kinachoweza kufanywa hata na mtu mmoja tu.” Elvin aliongeza.
“Mtu mmoja huyo, awe hana majukumu. Sisi tuna mambo mengi sana.” Mkewe JJ alijibu tena. “Unajua sikuelewi Diva!” “Usichoelewa nini?” “Mbona kama swala la mama yangu kutibiwa kwako sio muhimu!?” “Nimuhimu sana. Lakini tusiende kichwa kichwa, halafu mwishowe tukabaki tunaangaliana hata ada ya watoto hamna.” JJ akatoka bila hata yakumjibu mkewe.
Eli alikuwa amekasirika sana. Aliamua anyamaze. Bella alikuwa amekaa kimya kabisa kwenye kona akiwasikiliza ndugu hao. Ulipita ukimya wa muda, mwishowe Bella aliamua kuanza kukusanya vitu tayari kwa kuondoka. “Nikusaidie nini Bella?” Elvin alitaka kumsaidia Bella. “Kuliko kuzungukwa na mizigo humu ndani wakati tulisha ruhusiwa, labda wewe uanze kuweka vitu kwenye gari.” Bella alijibu huku akiendelea kukusanya. Eli alisaidiana na mdogo wake Elvin kurudisha vitu kwenye gari. Wakati wanamalizia JJ akarudi.
“Umeona baba! Tulikuwa tukiogopa bure kumbe wala sio pesa nyingi kabisa. Tukiwa na milioni 50, mama anaweza kwenda na muuguzi na akafanyiwa vipimo vyote, tena kama atatakiwa kufanyiwa upasuaji hiyo hiyo pesa itatosha kabisa.” “Hee!” Mkewe alishtuka. “Nini?” JJ akamgeukia mkewe na kumuuliza. “Nashangaa hiyo pesa.” “Kwamba ni kubwa au ndogo?” JJ akaendelea kuhoji. “Hapo inabidi vikao vya nguvu vifanyike.” “Ili kupata hiyo milioni 50 tu au vikao vya nini?” “Kumbe wewe mwenzangu unaona ndogo?” “Acha kuwa mbinafsi Diva. Utalinganisha hiyo pesa na uhai wa mtu? Hata sisi wenyewe tukiamua kulipia hayo matibabu tunaweza.” “Kwa nini iwe sisi tu!?” “Sijasema sisi tu ndio tulipie. Nimesema hata sisi tungeamua kulipia hiyo pesa yote tungeweza. Tutachangia wote.” “Labda hivyo.” Diva mke wa JJ alisikika kuridhika.
“Sasa jamani, naona tuondoke.” Mzee Mwasha aliamua kuaga. “Mlisharuhusiwa?” JJ akauliza. “Ameruhusiwa na ameandikiwa dawa za kutumia nyumbani.” Elvin akajibu. “Sasa mnafanyaje hapa?” JJ akauliza. “Kivipi?” “Nani anamsaidia mama?” “Bella anatusaidia kukaa na mama. Imekuwa kama Mungu amemleta kwa wakati huu. Tangia mama yako aanze kuumwa yeye ndio alikuwa naye hapa. Siunajua afya yangu na mimi ilikorofisha? Nilishindwa kabisa kukaa hapa na mama yenu. Alikuwa akishinda huyu binti hapa na mama yenu usiku na mchana.” JJ alikunja uso. “Wewe Diva sinilikupigia simu ukaniambia unaenda hospitalini kumuona mama?” “Kumbe?” “Mbona sielewi?” “Nilikuja. Sasa usichoelewa nini?” Diva akajibu kwa ukali huku na yeye kama hamuelewi mumewe.
“Sikiliza kaka JJ na mkeo. Naomba mkaongelee mambo yenu nyumbani kwenu. Mama anaumwa.” Eli alikuwa na hasira sana. “Katika hiyo milioni 50, ninayo million 10 kamili hata kesho naweza kuwapa, halafu tano nitaongeza wishoni mwa week hii. Kama kaka ulivyosema, mama akatibiwe. Anateseka sana.” Kila mtu alibaki akimwangalia Eli cha pombe. “Nyinyi vipi? Tatizo lenu mnaniona mimi mlevi sana, lakini nakunywa kwa akili. Halafi sihongi mwanamke, nalala na kula bure, kazi nzuri ninayo, mnafikiri mimi sina hela? Tuheshimiane jamani. Mimi kesho namkabidhi Mzee Mwasha milioni 10, mwisho wa week nampa 5. Sawa baba?” “Asante Eli. Asante Sana.” Mzee Mwasha akashukuru.
“Mimi naomba niwe wa mwisho baba. Watakapokomea wenzangu, mimi nitamalizia.” “Hee! Wewe JJ vipi? Wakikomea milioni 20?” “Mimi nitamaliza hizo 30.” JJ alijibu kwa hasira. “Unasema tu.” Diva alijibu kwa kujiamini sana. “Twende mama, nikusindikize kuingia kwenye gari.” JJ alimsogelea mama yake karibu. “Tunakwenda wote?” Mama Mwasha akauliza. “Nitakuja nyumbani baadaye, mama. Naomba nikasalimie watoto kidogo, sijawaona muda.” “Hamna neno, hata kesho unaweza kuja.” “Unakumbuka supu yangu ilivyo nzuri?” Mama Mwasha alitoa tabasamu. “Sasa ndio nataka kuja kukupikia, iwe ndio chakula chako cha usiku.” “Haya, nitasubiri.” JJ alimnyanyua mama yake kutoka kitandani na kumuweka kwenye kigari cha kusukuma cha hospitali, {Wheelchair}.
“Eli! Asante sana mdogo wangu kwa mchango. Umejitahidi sana.” JJ alikuwa akiongea na Eli huku akimsukuma mama yake kutoka hapo chumbani.  “Na dada mdogo unaitwa nani tena?” JJ akauliza. “Naitwa Enabella, au Bella.” “Asante sana mdogo wangu kutusaidia kumuuguza mama.” “Asante kushukuru.” Bella alijibu kwa heshima sana. JJ naye alionekana ni mtu anayejielewa na pesa ilionekana wazi ipo. Alifanana sana na baba yao.
Walipompandisha mama yao kwenye gari, Elvin alimgeukia kaka yake. “Kwa hiyo mmesema mtarudi jioni?” “Nakwenda kuwaona watoto tu, halafu nitarudi.” “Sawa. Nilitaka kumrudisha Bella nyumbani kwake akapumzike kidogo. Maana tangia mama amelazwa hapa, hajarudi nyumbani kwake.” “Hamna shida kabisa, mimi na Diva tutakuja kumpokea. Nenda kapumzike Enabella. Asante sana.” JJ alimpa mkono. “Asante.” Bella alijibu huku akitoa tabasamu. “Bella mwanangu!” Mzee Mwasha alimsogelea Bella. “Nakushukuru mama. Mungu akubariki.” “Asante.” Bella alijibu tena kwa heshima huku akimpa mkono Mzee Mwasha.
“Dogo! Mimi naweza kumpeleka Bella na gari yangu, ili na wewe ukapumzike kidogo.” Eli alimgeukia Elvin. “Naomba twende nyumbani Eli. Tafadhali sana.” Mama yake aliwahi kabla Elvin hajajibu. “Mbona mpo hivi nyinyi watu wa nyumba ya Mzee Mwasha? Nifanyaje sasa? Mnanilalamikia kila siku hamjawahi kuniona na mwanamke. Haya, sasa hivi nimemuona Bella, nataka kumchangamkia mnaanza kuweka vipingaamizi. Nifanyaje sasa?” “Naomba twende Eli.” Mama Mwasha alirudia.
“Bella akinikubali, nakuahidi naacha pombe mama. Na jumapili tutakuwa tunaenda wote kanisani. Nakuapia kwa Mungu mama yangu. Kwanza wewe mbona hushangai siku hizi sinywi?” Wote walibaki wakimwangalia Eli. Bella aliinama. JJ alikuwa akicheka sana. “Umeacha kwanywa Eli?” “Kweli kaka, sijanywa tangia nimuone huyu mtoto. Muulize Dogo. Ilikuwa natoka kazini nakuja hapa kwa mama.” “Si kawaida yako Eli, mama akiiumwa huwa hunywi.” “Kaka nakwambia safari hii ni sababu ya Bella, sio mama. Huyu mtoto akinikubali, nitakuwa siendi baa. Mimi itakuwa kazini, halafu nawahi kurudi nyumbani kwa Bella. Au unasemaje Bella?” Eli aliuliza. JJ alizidi kucheka. “Twende ukapumzike Bella.” Elvin hakutaka kuchangia kitu alimgeukia Bella akaongoza njia.
“Daah!” Eli aliweka mikono kichwani. “Umemuona jinsi Dogo anavyonibania, kaka?” “Tatizo unaanza kwa pupa Eli. Taratibu mdogo wangu.” “Etii!??” “Hutakiwi kuwa na haraka.” “Uzoefu kaka. Tatizo sina uzoefu na hawa viumbe kabisa.” “Hutakiwi haraka.” JJ aliendelea kuongea huku anacheka. “Nimekuelewa kaka. Napunguza kasi. Lakini nakuambia ukweli kaka yangu, akinikubali huyu mtoto, mwaka huu huu natangaza ndoa.” JJ alikuwa akicheka sana. Mzee Mwasha alitingisha kichwa akaingia kwenye gari. “Tatizo lako baba huniamini kabisa.” “Naomba turudishe nyumbani Eli. Mama akapumzike.” “Haya kaka, ngoja niwarudishe wazazi nyumbani.” “Lakini si jioni nitakukuta?” JJ alimuuliza Eli akijua lazima atakuwa yupo baa, kwa kuwa mama yake ameruhusiwa, na anaendelea vizuri.
Siku zote Eli akisikia mama yake mgonjwa, hakuwa akienda baa wala hagusi pombe, anabaki akimuuguza mama yake mpaka apone. “Inategemea saa ngapi. Nataka nipite kwa washikaji kidogo tukasherekee kupona kwa mama.” “Hapana Eli. Mama hajapona vizuri. Utasherekea akipona kabisa.” “Daah! Huo mtihani kaka. Nina kama siku sita sijanywa kabisa kaka yangu. Hapa nilipo akili haifanyi kazi vizuri. Ngoja basi nipate hata mbili, nitawahi kurudi. Sichelewi utanikuta nyumbani.” JJ alitingisha kichwa nakuondoka huku akicheka, kurudi kumfuata mkewe aliyeondoka katikati ya mazungumzo. Alirudi kukaa kwenye gari akimsubiria mumewe. Eli aliondoka na wazazi wao, Elvin alimrudisha Bella nyumbani, JJ akaondoka na mkewe.
***************************************
 “Nakushukuru sana Bella.” “Na wewe usianze Elvin. Mtaendelea kushukuru mpaka lini?” “Daah! Sikutegemea.” “Nini sasa?” “Basi bwana.” Bella alitabasamu. “Nataka nikifika tu nilale. Ninahamu na usingizi wa kitandani.” “Ndio uzime simu kabisa.” “Nani wakunipigia? Ni wewe tu na Ric ndio mna namba yangu.” “Basi nitakupigia baadaye.” “Si umesema nikalale?” Elvin akacheka. “Nitakupigia kukuangalia unaendeleaje.” “Mmmh! Haya tutaona kama hata hiyo baadaye itafika kabla hujanipigia simu.” Wote walikuwa wakicheka. Elvin alimsindikiza Bella mpaka ndani kabisa. Wakaongea mambo machache ya kazini.
“Umeona faida ya kujifunza kazi zangu? Sasa hivi ningekuwa nasubiriwa na kazi nyingi sana.” “Tena nimekuwa mtaalamu kukuzidi wewe Bella.” Bella alianza kucheka. “Mwanafunzi hawezi kumpita mwalimu bwana. Kuna mambo mengine sijakwambia.” “Si utaenda kukagua kazi yangu? Utaona kama utakuta kosa hata moja. Ila kutengeneza ripoti ndio bado hujanifundisha, na huko wala sijagusa. Nimekuachia mwenyewe.” “Haya Elvin.” Waliagana kisha Elvin akaondoka. Bila kupoteza muda, Bella alioga na kujitupa kitandani. Alilala kama mtu aliyekufa.
***************************************
 “Bella! Bella!” Bella alishtuka katikati ya ndoto. “Vipi Elvin!” “Samahani, imebidi niingie tu mpaka chumbani ulikuwa hufungui mlango.”  “Saa ngapi sasa hivi?”  “Saa tatu usiku.” Bella alikaa. “Nimelala muda mrefu! Tokea tulipotoka hospitalini.” Bella alifikiria kidogo akashtuka. “Oooh No. Kwa nini upo hapa? Mama mzima?” “Tunaomba msaada wako bwana. Nimekuja kukuchukua.” “Nini tena?” “Shemeji ambaye tulitegemea aje kumsaidia mama amesema hataweza kuja leo. Ndio tukaona turudi tu kwako tukuombe uje msaidie mama kidogo, bado hana nguvu ya kufanya mambo mengi na baba naye mgongo unauma na kama unavyotuona sisi wote watoto wakiume, hatuwezi kumsafisha. Ni kwa muda mfupi tu, akipata nguvu na wewe utapumzika.” “Usijali Elvin. Ngoja nichukue vitu baadhi nitakavyohitaji ndio tuondoke.” “Unataka nikusaidie nini?” “Kwanza umekula? Maana nakujua Elvin, mambo yakishapandana kidogo tu, na kula hutaki.” “Tutaenda kula wote tukifika nyumbani.” “Nani amepika sasa wakati mama mgonjwa.” “JJ yupo nyumbani. Mzuri sana wakupika. Naona mama alihamishia ujuzi wake kwake. Kwa hiyo amepika chakula kingi tu, twende tukale.” Bella alichukua kibegi kidogo akaweka vitu vyake wakatoka na Elvin.
Kwa mara ya Kwanza, Bella nyumbani kwa Mwasha.
Walifika, Elvin akamkaribisha ndani. “Pole sana Enabella, najua tunakusumbua. Lakini tuvumilie dada yetu.” “Hapo tena kaka JJ unaharibu bwana. Dada tena! Mwite shemeji.” Eli alimkatiza kaka yake. “Nilikwambia punguza kasi Eli.” “Daah! Tatizo kila nikimuona huyu mtoto nachanganyikiwa kabisa kaka. Nasahau. Basi karibu Enabella. Karibu sana.” Wote walicheka mpaka Bella mwenyewe. Mzee Mwasha alitoka akionekana anamaumivu. “Pole.” Bella alimuwahi. “Asante mama. Afadhali umekuja. Naona mama yako anakuhitaji humo ndani.” “Sawa. Nipeleke Elvin.” Bella alimgeukia Elvin. “Ningechaguliwa mimi bwana! Mbona mimi sina bahati jamani?” Eli alilalamika. Bella alicheka na kumfuata Elvin nyuma.
Walimkuta Mama Mwasha amelala kitandani akihangaika. “Pole mama.” “Naona nipunguze kula.” Mama Mwasha aliongea kinyonge na aibu kidogo. “Kwa nini mama?” “Naona najichafua tu. Mara ya kwanza nimejitahidi kujisafisha, Mzee Mwasha amenipeleka bafuni, tumeishia kuchafua bafu zima.” Mama Mwasha alianza kulia. “Ni nini hiki jamani?” “Pole mama. Usijali, nimapito tu utapona.” “Nahisi ninatatizo jingine jamani, sio moyo. Haja inatoka bila kujua!” Elvin alimsogelea mama yake. “Usilie mama bwana! Tutampigia simu daktari wako tumuulize ili tujue vizuri. Bella yupo hapa kukusaidia. Usiwe na wasiwasi. Hawezi kukuacha ukachafuka tena.” Mama Mwasha alijawa aibu sana. “Unisamehe Bella mwanangu.” “Usiwe na wasiwasi mama. Na wala huhitaji kuomba radhi. Sasa hivi wewe unatakiwa kuangalia afya yako tu. Utapona na utakuwa sawa kabisa. Mimi nipo hapa na wewe, kila kitu kitakuwa sawa.” “Asante Bella.” Mama Mwasha alikuwa akiongea kwa shida kidogo.
“Naomba Elvin utupishe.” Bella alimgeukia Elvin na kuongea naye kwa sauti ya chini huku akicheka. “Unanifukuza?” “Toka bwana, Vin.” “Uje kula lakini.” “Nitakuja, ngoja nimalizane na mama.” Bella alibaki na Mama Mwasha. “Tuangalie kama unahitaji kubadilishwa.” “Naomba nioge kabisa Bella mwanangu. Nilipokuwa na Mwasha naona nimejipaka uchafu kila mahali.” “Wazo zuri. Na tubadilishe haya mashuka.” “Asante sana Bella.” Bella alimsaidia Mama Mwasha kusimama, ni kweli alikuwa amejichafua. Alimsaidia kuoga, akambadilisha nguo, akamvalisha na dieper nyingine safi, akatandika kitanda vizuri na kuweka kila kitu sehemu yake. Kwa muda mfupi hali ya hewa ya pale chumbani ikabadilika.
Mama Mwasha alibaki akishangaa jinsi Bella alivyokuwa akifanya bila kinyaa na kwa haraka. “Inabidi ujilaze mama. Nikuletee nini?” “Mmmh! Naona niache kula mwanangu. Najisaidia hovyo kweli! Kila nikila chakula hakikai tumboni.” “Usiache kula kwa sababu hiyo mama. Mwili wako unahitaji chakula kingi. Usiwe na wasiwasi juu ya usafi. Ukijichafua nitakubadilisha tena bila shida.” Bella alitabasamu kumfanya atulie na kumuondoa wasiwasi. “Sasa nikuletee nini?” “Supu. JJ ametengeneza supu nzuri sana.” “Haya. Basi jilaze kidogo, upumzike. Nitakusaidia kukaa nitakapo rudi na hiyo supu.” “Asante Bella.” Bella alicheka na kutoka na yale mashuka machafu.
“Kazi ya kufua hiyo ni yangu, Bella.” Eli alipokea yale mashuka machafu. “Asante.” Bella alitabasamu kisha akamgeukia Elvin. “Vin!” Bella aliita na kufanya kila mtu amgeukie Elvin. “Bwana Dogo na jina amebadilishwa bwana! Umesikia kaka?” Wote walianza kucheka. “Bella! Na mimi naomba nibadilishe jina. Nichagulie zuri kama la Vin.” “Ona ulivyoharibu jina la watu. Mwenyewe Bella hatamki hivyo.” JJ aliongeza kuchokoza. “Daah! Kumbe na wewe kaka umemsikia Bella? Itabidi tuanze shule. Bella awe mwalimu wangu anifundishe kutamka hilo jina Viiin. Viini au VIIIn!” “Jina fupi tu, lakini lishakuwa gumu!” JJ aliendelea kutaniana na Eli.  “Eebwana we kaka! Sijui nimepatia? Eti Bella?” “Tatizo ni sauti Eli.” “Hapo na mimi nakukubalia kaka. Sauti ya Bella ndio inatamka utamu.” Bella alikuwa akicheka sana vile Eli alivyokuwa akijaribu kutamka Vin.
“Ulikuwa unasemaje Bella?” Elvin aliuliza huku akitingisha kichwa na kucheka vile kaka zake walivyokuwa wakiwatania. “Mama anataka supu.” “Kazi ya kumlisha mama, hiyo ni yangu. Wewe kaa chini ule.” JJ alisimama kwenda kumtayarishia mama yake chakula. Alishangaa jinsi wanavyofanya kazi kwa ushirikiano. “Kaa ule.” Elvin alimshtua Bella. “Kwani hapa hamna msichana wa kazi?” Bella alinong’ona akimuuliza Elvin. “Sisi hatukukuzwa na msichana wa kazi Bella. Mama huwa anafanya kazi zake mwenyewe na sisi tukimsaidia. Ila kweli kazi ya kufua na pasi ni kazi ya Eli. Anapenda sana kufua, ila kazi za ofisini zilipoanza kuwa nyingi alimtafuta kijana wakufua, huwa anakuja mara mbili kwa juma, anafua na kupiga pasi. Usafi wa ndani tunasaidiana.” Bella alishangaa kidogo.
“Kwa hiyo kupika JJ?” “Yeye huyo anapenda jikoni sana. Akipika kila mtu lazima atakula. Mjuzi wa mapishi kama mama. Kula uone alivyompishi mzuri.” “Na wewe kazi yako ni nini?” Elvin alicheka. “Mimi kiziwanda bwana. Nipo potepote. Wananituma kuanzia asubuhi mpaka jioni. Hata sijui kazi yangu ni nini humu ndani. Lakini sipendi kabisa kufua.” Waliendelea kula pale mezani Elvin akiongea na Bella. “Unaonekana umechoka Elvin.” “Sana. Nimezunguka sana leo.” “Basi uwahi kulala.” “Maadamu wewe upo, na umelala kidogo, sitakuwa na wasiwasi. Najua mama yupo kwenye mikono salama. Hivi nilikwambia asante?” “Sitaki Elvin.” “Haya bwana. Twende nikakuonyeshe chumbani kwako.” “Nahamia hapahapa nini?” Wote walicheka.
Nyumba ya Mzee Mwasha ilikuwa kubwa sana. Japokuwa ilikuwa ina ramani ya kizamani lakini waliitunza nyumba yao vizuri sana. Ilikuwa safi na vitu vizuri. “We Elvin!” Elvin alikuwa akitaka kutoka. “Sasa nitajuaje kama mama ananihitaji?” “Ni sawa nikimwambia baba akupigie simu kila wakikuhitaji?” “Una akili sana.” Bella alijibu huku akijitupia kitandani. “Wewe mwambie baba apige wakati wowote mimi nitaenda.” “Haya. Ndio ulale sasa.” “Sina usingizi. Nataka nipitie mambo machache kwenye laptop yangu ndipo nilale. Na mimi nikiwa na shida nitakupigia.” “Sawa sawa. Na mimi nikiamka nitakuja kukuangalia.” Waliagana Elvin akaondoka.
***************************************
Haukuwa usiku wenye hekaheka nyingi. Bella aliamshwa mara moja tu, kwenda kumbadilisha Mama Mwasha, wakati mwingine alilala tu. Aliamua kumtumia Elvin ujumbe, kwani aliamka na kukuta nyumba iko kimya kabisa, hakujua kama watu wapo au walitoka. ‘Bado umelala?’ ‘Angalia saa.’ Elvin alijibu. Ilishakuwa saa tano asubuhi. Bella akapiga. “Uko wapi sasa?” “Nimekuja huku uwanja wa ndege, kumpokea Eno.” “Nimepitiwa na usingizi, nikamsahau mgonjwa wangu! Sasa amekula?” “Usijali. Baba alisema tusikuamshe. Nilimpa uji kabla ya kuondoka, muulize kama anasikia njaa umpe matunda.” “Na chakula cha mchana je?” Bella aliuliza. “JJ anakuja sasa hivi, atarekebisha. Usiwe na wasiwasi.” “Kwa hiyo nikagonge chumbani kwa baba na mama?” Elvin alianza kucheka. “Usicheke bwana. Kumetulia sana. Kama wamelala je?” “Hawajalala. Nimetoka kuongea na mama muda sio mrefu.” “Haya. Baadaye basi.” Bella alijisikia vibaya kulala kwa muda mrefu tena ugenini alipoenda kuuguza!
Alikwenda kugonga. “Karibu Bella.” Mzee Mwasha aliitika. “Shikamooni.” “Marahaba Bella. Ulilala salama?” Bella alicheka kwa aibu. “Nimelala sana mpaka nimemsahau mama!” “Ndio vizuri umepumzika. Naona hana tatizo lolote. Nenda kaangalie chakula ule.” “Sio mama angeoga kwanza?” Bella aliuliza kiuungwana. “Ningeshukuru Bella. Naona nitajisikia vizuri.” Mama Mwasha akajibu. “Basi twende ukaoge, halafu ndio na mimi nikaoge.” Bella alimsaidia kusimama, akaingia naye bafuni. Alimkalisha kwenye kiti na kumsaidia kuoga mpaka alipomaliza.
“Kwani uzoefu wa kuuguza ulipata wapi Bella?” Ilibidi Mama Mwasha amuulize. Bella akacheka. “Kabla ya kifo cha mama, aliugua kwa muda mrefu sana na hatukua na msaada wowote ule, mimi tu ndio nilikuwa nikimuuguza.” “Aliugua nini?” “UKIMWI.” Bella alijibu kwa upole sana. “Pole Bella.” “Lakini nashukuru Mungu, hospitalini walinifundisha jinsi ya kumuuguza.” Bella akatulia kidogo, kama anayefikiria. “Mama yangu aliugua sana. Sana. Alikuwa kwenye mateso makali sana, mpaka anakufa alikuwa amechanganyikiwa kabisa. Hakuwa akitutambua tena.” “Una ndugu wangapi?” Mama Mwasha aliendelea kuhoji wakati Bella anampaka mafuta.
“Tulizaliwa wawili tu, mimi na mdogo wangu Eric.” “Baba yenu yuko wapi?” “Mama ndiye alikuwa akitulea, hatukuwahi kumuona baba yetu.” “Ndugu wa mama je?” “Hawakuwa na maelewano mazuri na mama. Kwa hiyo hata baada ya kifo chake, hakuna aliyetaka kutuchukua ili atusaidie. Tukabaki mimi na Ric tu.” “Pole sana Bella.” Bella alicheka. “Asante. Lakini tumeshazoea maisha ya sisi wawili tu, japo tunamkumbuka sana mama yetu. Alikuwa mtu mzuri sana.” “Basi utakuwa umechukua kwa mama yako.” Bella alicheka tena. “Sidhani. Mama alikuwa mkarimu wa kupitiliza. Alikuwa tayari atoe kila kitu ampe mtu, yeye akose. Furaha yake ilikuwa ni kumuona mtu mwingine anafuraha.” Waliendelea kuongea wakiwa wawili kwenye chumba kidogo kilichokuwa na nguo, wakati Mama Mwasha amekaa na Bella akimsaidia kuvaa.
“Ngoja nikuchane na nywele kabisa, uzidi kupendeza.” “Mmmh! Nimeshazeeka Bella mwanangu. Na maradhi haya ndio yananinyima raha kabisa. Nazidi kuchanganyikiwa.” “Pole mama. Utapona usiwe na wasiwasi.” “Sijui Bella mwanangu.” “Unajua nini mama? Nimejifunza kitu fulani katika maisha. Kila mwanadamu anakuwa na kipindi fulani kwenye maisha ambacho ni kigumu sana, hakuna jinsi akaeleza mtu  mwingine akaelewa. Lakini huwa kinapita mama. Inaweza kuchukua muda usiotegemea, lakini itaisha mama yangu. Vumilia tu.” Mama Mwasha alimshangaa sana Bella. Alionekana ni mtoto lakini aliweza kufanya mambo makubwa sana. Hakujua hekima hiyo aliipata wakati wakumuuguza mama yake, au baada ya kifo.
 “Asante sana Bella. Unanipa moyo sana, wewe hujui tu.” Bella alicheka. “Kweli mwanangu. Niliingiwa hofu sana na hawa watoto wakiume watupu niliozaa! Nikajiambia ndio nafikia hatua naogeshwa na Eli!? Nikamwambia Mungu anisitiri aibu yangu. Sasa wewe kuja, na wala hunionei kinyaa, kweli Mungu atakulipa.” “Amina mama. Ona ulivyopendeza.” Bella alimchana nywele vizuri na kumvalisha gauni alilojua halitamsumbua. Mama Mwasha aliugua kwa muda mrefu sana. Hata alipolazwa hospitalini hakuwa na nguvu. Ni mtu aliyekuwa kwenye uangalizi wa daktari kwa karibu sana, kila wakati.
***************************************
 “Mama yuko wapi?” Eno aliingia chumbani kwa wazazi wake. Mzee Mwasha alikaa. “Mbona hamna hata salamu bwana? Kama hujaniona?” Eno akacheka. “Samahani baba. Akili na mawazo yote yapo kwa mama.” “Yupo hapo ndani anavaa.” “Mama Mwasha!” Eno akaita. “Nakusikia.” “Toka basi.” Bella aliona uso wa Mama Mwasha jinsi ulivyofunguka kwa furaha. “Nakuja kukubeba.” Mama Mwasha akacheka. “Njoo.”  Eno alifungua mlango akaenda kumkumbatia mama yake. “Pole sana mama.” “Nimefurahi umekuja Eno, mwanangu.” Eno akambusu kichwani. “Ona ulivyokonda! Hauli nini?” “Nakula. Msalimie Bella.” Ndipo Eno alipoinua macho yake kumtizama Bella.
Alibaki ameduwaa kama kwa dakika moja. “Hujambo Bella?” “Sijambo, shikamoo.” Eno alikuwa bado kwenye mshangao. “Mbona hivyo! Mnafahamiana?” Eno hakutaka kusema mengi. “Nahisi nimemfananisha. Twende sebleni. Nimekuletea zawadi nyingi sana.” Mama Mwasha akacheka. “Kama umeleta viatu tena, siwezi kutembea.” Eno akambeba. “Ni kwa muda tu. Utapona mama. Urudie enzi zako.” “Sijui Eno.” “Wewe mwenyewe ulitufundisha tusikate tamaa, mbona wewe unakata tamaa sasa? Utapona bwana.” Eno alikuwa akiongea na mama yake huku amembeba, wakielekea sebleni.
***************************************
Bella aliamua kwenda kuoga, akatoka akiwa anaonekana ametulia na sura ya uchovu imeisha. Nyumba nzima ilikuwa ikinukia. “JJ akiwa jikoni, utajua tu. Tunakula saa ngapi?” “Acha haraka Eno. Tulia kitawekwa mezani sasa hivi.” Watoto wote walikuwa hapo siku hiyo. Ulijaa utani wakiwachokoza wazazi wao. Bella alikuwa amekaa kwenye meza ya chakula ameinamia kompyuta yake.
“Eno!” Eli akaita. Eno akamgeukia. “Ushasikia kuwa naoa?” Eno alianza kucheka sana. “Tatizo lako wewe Eno, dharau zimekuzidi.” “Nionyeshe shemeji basi.” “Unataka kuonyeshwa mara ngapi? Pombe nishaacha. Jumapili naenda kanisani na baba. Au unasemaje baba?” Mzee Masha alitingisha kichwa kama anayesikitika. “Baba na wewe unanitosa!? Mimi kondoo mpya.” “Sasa na Bella akikukataa? Kanisani tena basi na unarudia pombe?” Mzee Mwasha akamuliza.  “Baba naye kwa maswali yake! Bella wangu baba. Hawezi kunikataa. Dogo nitamuweka sawa anisaidie kunichongea kwa Bella. Au unasemaje Elvin?” “Bella huyu hapa. Wewe anza kupanga maneno tu.” Elvin akajibu. “Zaidi ya haya?” “Hapo bado hujasema kitu Eli.” “Daah! Kama ndio hivyo, basi bwana. Mnataka mpaka jasho linitoke ndio nioe? Mimi ndio maana mambo ya wanawake yamenishinda. Bora bia. Unakamua chupa zako taratiiibu, usiku ukifika unalala.” “Tatizo una haraka Eli mdogo wangu. Nimekwambia taratibu.” JJ alichangia wakati wanapanga chakula mezani. Waliendelea kutaniana wakicheka. “Lakini kaka, Bella mwenyewe si unamuona anavyo changanya? Nashindwa kuvumilia.” Wote walikuwa wakicheka.
***************************************
Walikaa mezani wote wakaanza kula. “Jamani naomba nichukue nafasi hii kumshukuru Bella. Najua kazi anazofanya yeye alitakiwa afanye Diva, mke wangu lakini tangia jana kichwa kinamuuma.” “Mkeo muongo kaka.” Eli akadakia. “Eli! Naomba nyamaza.” “Sawa mama.” Eli akanyamaza. “Ni kweli JJ. Bella amekuwa msaada mkubwa sana.” Mzee Mwasha alieleza kazi alizokuwa akifanya Bella, mchana na usiku, tena bila kuchoka. Kila mtu alimshukuru na kumpa mkono Bella. “Sasa ndio tuungane kumfanya Bella asiondoke humu ndani. Akimalizana na mama, mimi naoa kabisa.” “Utamuweka wapi?” JJ akamuuliza Eli. “Sasa Kaka na wewe mbona kama huoni mbali? Ndio tunabaki humuhumu ndani kuendelea kumlea mama!” “Umegoma kujenga kabisa?” JJ akamuuliza tena. “Nyinyi wote mnajenga. Sasa mnataka nani aje abaki na mama humu ndani? Mimi ndio nimejitolea kubaki humu ndani.” Waliendelea kucheka mpaka JJ alipotaka kuzungumza tena.
“Eno! Inabidi kumpeleka mama India akatibiwe. Nimeuliza gharama, wanasema milioni 50 itatosha.” “Mimi nitaitoa hiyo pesa.” Kila mtu akamgeukia Eno. “Unataka kutoa yote peke yako!” “Ndiyo. Maana nyinyi wote mpo hapa karibu, mnamsaidia baba na mama. Mimi nipo mbali. Mnakumbuka ule mchango wa biashara ya baba wa wakati ule? Nyinyi mlichanga, mimi sikuwa na pesa. Sasa hivi nalipwa vizuri sana tu, acha na mimi nisaidie.” “Daah! Milioni 15 yangu imepona. Tena nilikuwa nimeshawandikia Mzee Mwasha hundi ya milioni 10 kabisa. Ngoja niirudishe. Asante Eno.” Walianza kucheka tena.
“Asante sana Eno mwanangu.” Mzee Mwasha aliongeza. “Na Eli nashukuru kwa moyo wa utayari.” “Asante baba.” Wote walijibu. “Nawashukuru wanangu. Mungu awabariki.” Aliongeza mama yao. “Amina mama.” Wote waliitikia kwa pamoja tena.
“Sasa kaka JJ, uanze kufuatilia hiyo safari na huyo nesi atakayekwenda na mama.” Eno alitoa wazo. “Nitaenda kuongea naye jumatatu.” “Kama hiyo pesa itatosha, naomba niende na Bella pia.” Mama Mwasha aliongea kinyenyekevu. “Naona Bella ameshanielewa. Hawa manesi nirahisi kunichoka na kunifanyia mambo mabaya. Kama pesa itatosha lakini, sitaki niwaumize wanangu.” “Hamna shida mama. Kama Bella atakuwa tayari kwenda, tutamkatia na yeye tiketi.” “Eti Bella?” JJ akamgeukia Bella. “Naomba niongee na Elvin kwanza.” Bella akajibu. “Kwa nini usiongee na mimi Bella?” Eli alimchokoza tena Bella. “Elvin ndio bosi wangu kule kazini.” Bella alijibu huku akicheka na kuinama chini. “Baba na mimi naomba kazi kwenye kampuni yako. Hata bure mimi nitafanya tu. Huna haja yakunilipa.” Kila mtu alianza kucheka tena.
***************************************
Wakati wanaongea na kucheka, aliingia Diva, Mama yake Diva, na yeye alikuwa mmoja wa kundi hilo la kina mama Mwasha, Mama Banda, Mama Danny na kina mama wengine. Waliingia wakakaa. Eli, Elvin na Bella walikuwa wamebaki mezani, wakati wazazi wao, JJ na Eno walipohamia sebleni kuongea na wageni. “Pole sana Mama Mwasha. Unaendeleaje?” “Nashukuru Mungu sasa hivi nina nafuu.” “Pole sana.” Kimya cha muda kilitanda.  
“Bella! Njoo uwasalimie marafiki zetu. Mungu ametupa mtoto mwengine jamani. Amekuwa msaada kweli kipindi cha kuugua  kwa mke wangu. Bila yeye sijui tungefanyaje.” Mzee Mwasha alivunja ukimya. “Kwa kuwa hana kazi ndio maana.” Diva akajibu kwa kiburi. Bella alisimama kwenda kusalimia. “Shikamo…” “Hee! Huyu mtoto si ndio Enabella? Au nimechanganya jina?”  Mama Banda, yaani mama yake Irene, akauliza kwa mshangao mkubwa. “Ndio jina lake. Kwani vipi?” Mzee Mwasha akajibu. “Wewe Mama Mwasha si ndio shoga yake kipenzi Mama Masha!? Leo mbona kumgeuka mwenzio!? Unakula sahani moja na mke mwenzie!?” Mama Banda aliuliza kwa mshangao sana.
“Kwani mtoto mwenyewe ndiye huyu, mke mdogo wa Masha?” Mama Danny akauliza. “Kumbe! Si niliwaambia nyinyi ni katoto kadogoo? Basi ndio huyu, aliyemchanganya Mzee Masha. Unaambiwa Masha kabadilika kama siye yeye kwa huyu mtoto. Hasikii la wazee wenzake wala haoni vile anavyotesa familia yake. Na nasikia ukitaka ugomvi naye, muingilie mambo yake na huyu mtoto! Sijui kamfanyaje Masha? Itabidi atoe hiyo siri kwa ulimwengu mzima wanao mjua Masha.” Wote walicheka kwa kejeli.
Bella alitamani ardhi ipasuke apotee pale pale. “Naye kajaliwa uso wa mbuzi! Hana aibu? Anazunguka humu humu! Na si ndio huyuhuyu kavunja uchumba wa Irene na Elvin?” Mama mwingine akauliza. “Ndiye yeye huyu huyu. Hana atakaye mbakisha.” Mama Banda, yaani mama yake Irene akadakia. “Atawachanganya huyu mtoto, mpaka mshikane mashati. Naona na JJ naye anatoa shukurani zake haziishi.” Diva aliongeza. “Sijui kachanganywa na hicho kiuno!” Diva alicheka kwa dharau. “Diva! Angalia mdomo wako wewe!” JJ alijibu. “Kumbe uongo? Asante gani zisizoisha? Asubuhi asubuhi umeamkia hapa ili uje umuone huyu mtoto! Sasa ukae utulizane. Ushaambiwa mkewe Masha. Na akikusikia atakupiga risasi. Maana hakawii yule.” Diva alikuwa akiongea huku anamcheka mumewe.
***************************************
Bella amekamatwa. Mbele ya washitaki wake, katika nyumba hiyo ya Mwasha wanaojiheshimu. Nini kitaendelea?
Usiache kufuatilia na kutoa mchango wako hapo chini.
Barikiwa.
About author

naomimwakanyamale

Writer ,Journalist, Fashonista ,Entrepreneur ,Storyteller, Mother , Wife.

0 comments:

Subscribe to: Post Comments (Atom)