Usiku wa Ritha.

siku  huo wakati kina Cote wamelala wakionekana kushindwa kwa hali ya juu. Harusi kubwa ambayo ilikuwa imetangazwa na watu wa maana walikuwa wameshaalikwa, kushindwa kufanyika na kubakiwa na hofu tupu, wakijiwinda kwa hali na mali, maisha ya Ritha yaliendelea kwa furaha zote. Kwa mara nyingine tena, akaibuka mshindi. Hana hatia. Hana alipoguswa na sheria. Aliowahusisha kwenye njama zake wapo chumba cha maiti na wengine kifungoni. Hapo ni mpaka kina Cote waliokuwa wakizungukwa na askari masaa 24 na kushindwa kwenda kila watakapo, waligeuka wafungwa wa Ritha. Kilikuwa ni kama kifungo tu cha nje, ila kiukweli hawakuwa na tofauti na Vic na Bethy waliokuwepo jela bila kuhukumiwa. Hata wao kina Cote walilijua hilo, kuwa Ritha amefanikiwa kuwapa kifungo cha nje.

Wakati kina Cote wakiwa wanazungukwa na ulinzi mkali na wa waziwazi, ikawa hivyo hivyo na kwa Ritha ila asijue. Kwake ilikuwa tofauti. Bado polisi na askari wa CSIS walikuwa mbele ya jengo hilo kubwa alilokuwa amepangisha apartment ila usingeweza kuwatambua kama ni askari. Walionekana kama raia tu. Lakini wakimfuatilia Ritha kwa karibu sana. Kila alipotoka, alifuatwa nyuma bila yeye kujua.

Gari yake yenyewe ilishachomekwa kitu ambacho kilionyesha kwenye mitandao ya CSIS, kila alipo na anapokwenda. Lengo kubwa ni kujua kama atatoka kwenda kukutana na Jeff, ili wawakamate wakiwa pamoja. Askari wa hao walishamuona Jeff amefika kwenye mji anaoishi Ritha mapema tu siku hiyo ya jumamosi. Wakaendelea kumfuatilia na kujua ni nini anafanya mjini hapo bila kumpoteza hata dakika moja.

Alikwenda mpaka kwenye jengo hilo analoishi Ritha. Akagundua kuna ugumu wakuingia humo. Huwezi kuingia tu mpaka mtu wa ndani unayekwenda kwake, akufungulie. Akaona wengine wanafika hapo, wanabonyeza namba ya apartment ya mwenyeji, wanazungumza kwa spika, kisha mtu wa ndani kama anamkubali ndipo anamfungulia akiwa hukohuko kwenye apartment yake.

Na kulikuwa na askari pia. Kwa hiyo usingeweza tu kupita na mgeni yeyote, kwani askari alikuwepo hapo kuhakikisha umekaribishwa na mtu wa ndani. Jeff akajaribu kuingia hapo na wengine, karibu siku nzima, akashindwa. Namba ya apartment anapoishi Ritha alishaijua, lakini shida ikawa kufunguliwa na kuingia ndani.

Siku ya Ritha ilianza na kuendelea kama kawaida. Kwa upande wake akiwa na furaha kuwa jumamosi hiyo ilikuwa harusi ya mwanae na Tunda, amefanikiwa kuivunja tena kwa kishindo kikubwa tu. Akawatikisa kina Cote na afisa usalama hapo nchini vyakutosha tu. Na yeye alikuwa miongoni mwa mamilioni ya watu waliokuwa wakifuatilia kwenye vyombo vya habari tokea Tunda anaanguka mbele ya Vic mpaka kutekwa.

Walimuona Ritha akielekea kufanyiwa manicure na pedicure, kisha akafanyiwa masaji ya lisaa. Baada ya hapo akarudi nyumbani.  Baada ya muda wakutosha tu, wakamuona anatoka tena akiwa amependeza sana.  Wakaendelea kumfuatilia wakaona amekwenda kupata chakula cha jioni sehemu nzuri sana tena ya pesa nyingi, kama anaye sheherekea jambo. Kwa muonekano wake, usingejua ni Ritha, mtanzania. Alijawa ujasiri, akajibeba kishujaa, hata tembea yake ungejua ni mshindi.

Baada ya chakula hicho alichokula kwenye hoteli hiyo ya kifahari sana hapo mjini, wakamuona anarudi nyumbani kwake. Ritha alipishana na kuhudumiwa na watu tofauti tofauti asijue kama ni askari waliovaa nguo za kiraia. Hata askari wa jengo lao aliyeingia mida ya jioni hiyo na kusalimiana naye wakati anarudi kwa chakula cha jioni, pia alikuwa ni afisa wa CSIS aliwekwa hapo makusudi kwa muda kama mlinzi wa hilo jengo kwa kumfuatilia yeye Ritha.

Mfagizi aliyekuwa akisafisha gorofa yao ya juu kabisa na kwenda kumgongea kumuomba takataka mchana aliporudi tu kutoka kutengeneza mwili wake, pia alikuwa ni afisa wa CSIS. Jengo zima lilizungukwa na afisa wa CSIS kuanzia ndani mpaka nje, wakifanya kazi tofauti tofauti, wengine kama ombaomba tu wa mtaani, ilimradi kuhakikisha hakuna linaloharibika na wote wanakamatwa wakiwa hai.

Baada ya juhudi za kuingia kwa Ritha kugonga mwamba, Jeff aliondoka, wakamuona amerudi tena, safari hii akiwa amevalia nguo za kiaskari kabisa, kama polisi. Ilishakuwa imetimu saa tatu usiku.  Askari wa kawaida tu wa hilo jengo, aliyekuwepo hapo ambaye alikuwa ni afisa wa CSIS, akamsalimia kawaida tu, Jeff akaitika na kumdanganya yeye ni polisi wa mji wa karibu na pale. Bila shida yule afisa wa CSIS aliyejidai ni askari au mlinzi pale, akamtania kidogo, Jeff akabonyeza namba ya Ritha, Ritha akasikika kwenye spika.

“Nikusaidie nini?” Ritha akamuuliza. Jeff akajitambulisha kama yeye ni polisi, anataka kumuhoji maswali machache kutokana na tukio la kina Cote. Ritha kwa kujiamini sana, akamkatalia na kumwambia azungumze palepale, anamsikia ameshachoshwa na maswali ya kijinga.

Aliposhindwa kuingia, yule askari wa CSIS akamtania kidogo, kuwa watu huwa wanakimbia polisi bila sababu. Jeff akamuomba kama anaweza kumruhusu aingie. “Lakini usije kunitaja.” Yule afisa akajidai kama anamuonya Jeff. “Kwanza hata sikufahamu wala sijakuona.” Wakacheka kidogo, akamfungulia mlango mkubwa wakumwingiza ndani. Akamfungulia tena mpaka lift yakumpandisha anakoishi Ritha, Jeff akamshukuru sana,  na kuingia ndani ya lift.

Jeff alipoingia tu kwenye lift, afisa wa CSIS wakaanza kumiminika hapo ndani ya jengo kama nyuki. “Show time! Show time!” Kila mmoja akahamasika, wakijua muda waliokuwa wakiusubiria kwa hamu umefika.

Jeff alipanda mpaka gorofa la mwisho kabisa ambako alikuwa akiishi Ritha kwa kutumia lift huku askari wengine wakipanda kwa kukimbia, wakitumia ngazi.  Alipotoka tu kwenye lift, Jeff akakutana na yule mfagizi wa jengo akiwa na vifaa vyake vya usafi, akijidai kufuta vumbi na kupangusa vioo. Akamsalimia asijue na yeye ni afisa wa CSIS pia.

Akafika mlangoni kwa Ritha, akagonga na kujificha pembeni ili akichungulie kwenye tundu la mlango, asimuone. “Ni nani?” Ritha akauliza. “Housekeeping!” Jeff akadanganya kuwa ni mtu wa usafi. “Sina takataka walisha...” Ritha akawa anamjibu huku anafungua mlango. Hapo hapo Jeff akamsukumia ndani na kufunga mlango.

Alimvuta mpaka sebuleni na kumuweka kwenye kochi. “Kaa vizuri, tuzungumze. Sipo hapa kukudhuru.” Akaanza Jeff na kuendelea. “Labda nianze kwa kujitambulisha kwa kuwa ulikuwa ukikutana na Malinda tu. Naitwa Jeff. Ndiye niliyekuwa mtekelezaji wa kile ulichokuwa ukipanga na Malinda.” “Mimi sijui unazungumza nini?” Ritha akakataa. Jeff akatoa kofia.

“Labda nianze upya.” Jeff akatoa kofia, nakukaa mbele yake. “Mimi naitwa Jeff. Sio polisi kama unavyoniona. Hii ni sare tu ili kuweza kuingia humu. Na hii ni risasi niliyotumia kwa Malinda na mdogo wake. Nasisitiza, sio lazima nikaitumia kwako labda unilazimishe. Sijui kama unanielewa?” Jeff akauliza. Hofu ikamwingia Ritha. Maafisa wa usalama walikuwa wakiwasikiliza tu.

“Nipo hapa kupata haki yangu. Sipo kukudhuru.” Jeff akaweka msisitizo. “Kwa hiyo wewe ndiye uliyewaua kina Malinda?” Ritha akauliza. “Narudia. Sipo hapa kukudhuru wewe. Wao ilinilazimu kuwaua ili kufupisha malumbano na safari yakupata pesa yangu. Kwa hiyo, kama ulivyokubaliana na Malinda. Ulimlipa pesa kiasi kama kianzio cha kazi uliyompa kumtorosha Mrs Cote, halafu zingine uliahidi kulipa tutakapo kamilisha kazi nzima.” Jeff aliongea taratibu tu.

“Sasa kama wewe unajua malipo yote ni mpaka kazi itakapo kamilika, yuko wapi huyo Mrs Cote?” Akajikaza kuuliza Ritha. Alikuwa akitetemeka kwa hofu. “Kazi ilikuwa nikumteka nyara Mrs Cote. Tulimtoa pale bila shida. Kazi yetu ilikamilika, ila wewe hukutokea. Ninachotaka ni pesa yote ya kazi kama tulivyokubaliana.” Akaendelea Jeff taratibu tu.

“Mimi sikujui. Ndio nakuona hapa leo. Sijawahi kupanga chochote na wewe. Naomba uondoke.” Ritha akasimama. Jeff alimrukia, akamshika kwa haraka kabla hajafika mlangoni. Akampiga kichwa cha nguvu kichwani, Ritha akaanguka sakafuni. Akampiga mateke ya mfululizo mbavuni. Kisha akamvuta kutoka pale sakafuni alipokuwa akivuja damu, mpaka kwenye kiti cha sehemu yakulia chakula. Ritha alikuwa akilia, damu za puani na kwenye kipanda uso alipochanwa baada ya kupigwa kichwa, zikaendelea kuchirizika usoni, Ritha asiamini kama ni damu na si machozi na kamasi. Hofu ikazidi kumwingia akijua kilichompata Malinda na mdogo wake, ndicho kimemfikia na yeye.

Jeff akampiga tena begani na kitako cha bastola. “Tafadhali usitoe sauti. Nitakuumiza zaidi.” CSIS wa mpaka ofisini walikuwa wakifuatilia mazungumzo yao yote. Walimsikia Ritha akilia kwa maumivu makali, na baadhi ya maafisa walikuwa hapo nje ya mlango tayari, lakini amri kutoka makao makuu ilikuwa wasiingie mpaka wapate ukiri wa uhakika kutoka kwa Ritha, ndipo wataruhusiwa kuingia.

Mpaka hapo Ritha hakuwa bado amekiri chochote. Kwa hiyo hawakuwa wamepata amri yakuingia, hata kwa kilio na kitisho cha namna gani, wale maafisa wasingeweza kuingia mpaka kwa amri. Ritha akawa anajitahidi kupunguza sauti kwa hofu ya kipigo kingine, lakini aliendelea kugugumia maumivu, akabaki akifuta machozi na damu.

“Nimekwambia sipo hapa kukudhuru. Ninarudia tena, nimekuja kwa amani kudai haki yangu. Tafadhali usitake nikuumize zaidi. Kama nimemuua Malinda mpenzi wangu na mdogo wake, watu ninaowafahamu unafikiri nitakufanya nini wewe?” Akampiga tena kwa nguvu begani. “Ni kweli hukuzungumza na mimi. Lakini kama utakumbuka Malinda alikwambia tupo watatu anataka malipo ya watu watatu. Kazi yakumteka nyara Mrs Cote haikuwa ya mtu mmoja! Na wewe unajua. Nimewatoa kina Malinda, ili kufupisha mambo. Nipe pesa yangu niondoke na ninakuahidi hutakaa unione tena.” Akaendelea Jeff huku Ritha akilia taratibu kwa kugugumia.

“Ritha? Naomba pesa yangu. Na kama huna hiyo dola elfu 85 yote iliyobaki kwa taslimu, nihamishie kwenye akaunti ambayo hakuna mtu atajua, kama alivyokuahidi Malinda. Tulishaiandaa hiyo akaunti. Mdogo wake aliitengeneza kwa umakaninifu sana, hata watu wa usalama hawatajua. Naomba pesa yangu.” Akasisitiza Jeff akimpiga piga mgongoni.

“Kwanza hiyo pesa uliyoitaja siyo niliyokubaliana na Malinda. Tulikubaliana elfu 20 tu kwa kazi nzima. Ndio maana nilimpa elfu 5, nikamwambia akinipa Tunda, namalizia 15.” Jeff akaanza kucheka. “Kama unafikiri utanizidi ujanja katika hili, fikiria mara mbili. Mimi si mjinga wakuweza kumuua Malinda kwa sababu ya elfu 15 tu! Nataka pesa yangu na ninaitaka sasa hivi. Unaweka wapi kompyuta yako unihamishie pesa yangu au lete simu yako unihamishie pesa yangu sasa hivi.” Ritha akasimama.

“Unakwenda wapi?” “Kufuata simu ili nikuhamishie hiyo pesa yako! Unafikiri nitahamishaje sasa?” “Nakuonya Ritha, usifanye chochote kile, nitakuumiza. Chukua simu kwa ajili yakunihamishia pesa tu.” Ritha akaondoka pale sehemu yakulia chakula, akichechemea na kutema damu akielekea sebuleni alipoacha simu yake.

Jeff alibaki palepale akimtizama kwa makini sana. Aliiacha kwenye kochi. Wakati anaichukua, akabonyeza kwa makini 911, kuita polisi. Kama wasiwasi ukamwingia Jeff akasogea pale kwa haraka. Wakati Ritha anabonyeza tu sehemu yakupiga, Jeff akawa ameshafika. Jeff akaona. Akaiwahi kabla hata haijapokelewa na watu wa 911. Akaizima kwa haraka, wakati amezama kwenye simu, Ritha akawahi urembo wa meza ndogo ya hapohapo mezani, akaunyakua na kumpiga nao Jeff, akakwepesha kichwa chake kwa haraka, akakinga kwa mkono nakumpiga teke Ritha. Alipoanguka akampiga risasi ikampata ya mkono. Hapo hapo askari wa wa CSIS wakavamia ule mlango, ukaanguka pembeni ya Ritha.

Maana amri ilikuwa ni kuwakamata wote wawili wakiwa hai. Zaidi Ritha akiwa ameshakiri. Na kwa kuwa alishakubali mpaka na kiasi alichokuwa amekubaliana na Malinda, ikabaki uokoaji tu. Waliingia wengine wakamuwahi Jeff. Wakamfunga pingu na kuichukua ile risasi kama ushahidi. Maana ndiyo aliyokiri kuwa ndiyo aliyotumia kumuulia nayo Malinda na mdogo wake, ikachukuliwa kwenda kupimwa.

 Ritha aliokotwa pale sakafuni akilia kama mtoto huku akivuja damu. Watu wa huduma ya kwanza nao walikuwa tayari. Wakamchukua na kumkimbiza hospitalini baada yakumpa huduma ya kwanza.

~~~~~~~~~~~~~~~~~~~~~~~~~~~~~~~

Wakati bibi Cote anapitiwa na usingizi, simu ya Mike ikaingia. Akawasha taa ndogo ya mezani, akapokea. “Unahabari njema?” “Ritha amekamatwa. Yupo chumba cha upasuaji.” “Hapana Mike, nilikwambia namtaka akiwa hai!” Akalalamika bibi Cote. “Hawezi kufa. Ni risasi ya mkononi tu. Usiwe na wasiwasi.” Hapo kidogo roho ikamtulia bibi Cote. “Na akitoka tu chumba cha upasuaji, nimewaambia wamuhamishe huku, usiku huuhuu.” Bibi Cote akafunga macho, akasikia machozi yanamtoka.

“Asante sana Mike. Najua unajua namaanisha.” “Najua.” Mike akajibu huku akicheka. “Tafadhali watakapomfikisha tu huku, niwe wa kwanza kujua ili nimuone mimi kwanza.” “Sawa kabisa. Hamna tatizo.” Wakaagana, bibi Cote akainamisha kichwa chini asiamini kama amefanikiwa kumtia nguvuni Ritha, mwanamke aliyemwendesha kichwa na kumuumiza roho yake kwa miaka mingi sana, tokea yupo na CJ mtoto wake wa pekee, akitamani amlipize kisasi, lakini akafanikiwa kumzidi mahesabu kila wakati na kushindwa. Ritha alikuwa kama samaki aliye hai baharini, mikononi kwa bibi Cote. Alimteleza kila alipodhani amemkamata.

Usingizi ulishindwa kurudi kwa bibi Cote, akabaki akimfikiria Ritha huku akisubiria simu yakutaarifiwa kuwa Ritha amerudishwa Norfolks, kwenye himaya yake. Mji anaotawala kwa pesa yake na mamlaka. Uwanja wa nyumbani. Bibi Cote akabaki akimpigia mahesabu.

Ushindi wa Bibi Cote.

likuwa saa 12 asubuhi bibi Cote alipopokelewa na Mike, kiongozi mkubwa sana, ngazi ya juu kabisa ya CSIS nchini Canada. Moja kwa moja wakaelekea chumba alicholazwa Ritha. Alimkuta na pingu mkononi, amelala.  Wakamuona bibi Cote amefunga macho na kuvuta pumzi kwa nguvu kama aliyetua mzigo mzito sana, uliokuwa umemlemea kwa muda mrefu. Akatulia kwa muda akiwa amefunga macho, na wao pia wakanyamaza kama kumpa nafasi.

Baada ya muda bibi huyo akafungua macho. “Naomba muda naye.” Mike akakunja uso. “Unauhakika?” “Unafikiri atanifanya nini huyu?” Bibi Cote akauliza kwa kejeli na kumgeukia Ritha, akamuona amefungua macho anamwangalia. Mike akatoka na walinzi wote. Mpaka mlinzi wa bibi Cote naye alimtaka asubiri nje. Aliporidhika kuwa wamebaki wao wawili pale chumbani, akacheka kwa kejeli huku akimtizama Ritha alivyoumizwa kichwani. Akashusha macho mpaka kwenye mikono alipokuwa amefungwa pingu kote. Hata mkono uliokuwa umepigwa risasi pia ulikuwa na pingu, ukaegeshwa kwenye chuma ya kitanda. Na huo ulinzi hapo nje, bibi Cote akacheka na kurudi kumtizama usoni.

“Hivi ulivyo sasa hivi, ndivyo nilitamani sana kukuona ukiwa hivi kwa muda mrefu sana.” Akaanza bibi Cote. “Ni kwa muda tu. Unajua mimi nina akili ya kukuzidi wewe. Hapa nitatoka tu.” Akajibu Ritha kwa jeuri. “Nashauri utoe hilo tumaini Ritha. Anza kuzoea hayo maisha.” Akaendelea bibi Cote akiwa ameshaanza kubadilika kwa hasira.

“Unakumbuka mara ya mwisho kuzungumza na wewe, Ritha?” “Ulipokuwa ukijaribu kunitisha, kama wafanyakazi wako?” Ritha akamuuliza na yeye kwa kumkejeli akionekana wazi yupo kwenye maumivu makali. “Kama ulifikiri nilikuwa nikikutisha tu, jua safari hii nitakupitisha kwa vitendo. Nitahakikisha hutakaa ukaonja uhuru wako tena. Pingu zitakuwa sehemu ya maisha yako mpaka kifo chako. Nitahakikisha kila siku kuanzia jana, unajisikia uchungu aliopitia CJ, mtoto wangu wa pekee uliyemchagua kumtapeli ili ujinufaishe hapa duniani.”

“Hakika utalipa Ritha. Utalipa kwa uchungu kama unazaa. Na nitahakikisha ni kila siku, unakumbushwa kwa uchungu. Nitahakikisha unaumia sana ili na wewe kwa sehemu uonje kule ulikompitisha Maya ambaye amekuwa bila wewe kuwa mama kwake ila tapeli, ukijinufaisha kwa mali za Cote kwa kuwatumia wao kama kitega uchumi. Utakaa matesoni, ukikumbuka Tunda ndiye mama Cote, wewe hutambuliki popote.” “Hata ufanye nini, mimi ndiye niliyewazaa Net na Maya.” Ritha akamjibu tena akitaka kumuumiza zaidi.

“Na tafadhali sana, hilo usiwahi kulisahau mpaka unapoingia kaburini. Ulibeba miezi 9, ili mimi na Tunda tunufaike kila mmoja kwa namna yake. Wewe utabakia ni njia tu ambayo ulituletea hao watu wawili, kazi na safari yako imeisha. Nitahakikisha hilo unakumbushwa huko kifungoni kwa uchungu sana.”

“Nitahakikisha wanakufungia jela ya wale wauwaji makatili sana tena wazoefu. Serial killer. Utaishi na wafungwa wale ambao nivichaa wakubwa, tena wanao ogopewa hata na askari wenyewe. Utakwenda kula na kunywa nao kila siku.  Kila utakapofungua macho, nitahakikisha ni wao tu ndio unao waona, ili wakakutese sana.” Bibi Cote akaendelea.

“Na nitahakikisha macho ya askari wote yanakuwa kwako ili hao wafungwa wenzako wasije kukua kabisa, ila mateso tu. Na ili usije kujiua kwa haraka ili uonje hayo mateso kwa muda mrefu sana. Ukakae huko ukijua ninakulipa Ritha. Na kamwe hukuwahi kunishinda Ritha, ila nilikuwa nikitaka kukuweka mwangani ili kila mtu akubaliane na mimi kuwa huko utakapokuwa baada ya hapa, panakustahili. Na nimefanikiwa vizuri tu. Kila muhusika anafikiri huko ndiko kutakapokustahili kwa kuwa wewe ni mtu wa ajabu sana na hatarishi.” Kidogo akamuona hofu imemuingia. Ritha akanyamaza. Akamtemea mate usoni. Akatoka.

~~~~~~~~~~~~~~~~~~~~~~~~~~~~~~~

Alirudi nyumbani mida ya saa moja na robo, karibia na muda wa kifungua kinywa. Akaelekea mezani moja kwa moja. Hakumkuta mtu hata mmoja hapo. Akalifurahia hilo ili ajaribu kutulia baada ya kumuona Ritha. Alikuwa amekasirika sana. Baada ya kama dakika 5 hivi, akamuona Maya. “Mbona uso una wasiwasi?” “Malcom hapokei simu yangu Nana!” “Labda bado amelala Maya. Sasa hivi ni asubuhi sana.” Mara Net na mkewe nao wakasogea hapo sehemu yakulia chakula.

Wakasalimiana, Maya macho kwenye simu. “Ni nini tena?” Net akamuuliza. “Nina wasiwasi na Malcom. Tokea tulipoachana naye jana, sijamsikia tena na wakati aliniahidi angenipigia simu ili kujua kama nilifika salama. Malcom sio muongo.” Akaanza kutokwa na machozi. “Kabla yakuanza kulia, nashauri mpe muda zaidi. Lolote linaweza kuwa linaendelea.” “Na huo ndio wasiwasi wangu. Iweje sasa kama Zoe amemfunga?” Wote wakawa kama wamegutuka.

“Mimi naenda kumtafuta kila kituo cha polisi.” “Tafadhali naomba utulie kwanza Maya. Inaweza pia ikawa sio hivyo. Huyu mtu anajukumu la mtoto pia. Inawezekana kabisa, amejifikiria na kuona anafanya maamuzi ya haraka, yatakayo muathiri mtoto wake.” Net akaendelea kumsihi taratibu tu. “Basi ndio nimpate, aniambie mimi mwenyewe. Siwezi nikabaki nikidhani tu!” “Kwa nini usimpe muda? Mwache kwanza. Mwache akutafute yeye kama alivyokwambia.” Hapo Maya akazidi kulia.

“Uliniahidi utakuwa na mimi Net.” “Na ahadi yangu ipo palepale.” “Hivyo si kuwa na mimi Net. Hivyo ni mimi kuwa na wewe!” Net akashangaa. Bibi Cote na Tunda kimya wakiwasikiliza. “Ulitaka nifanye nini sasa!?” “Uwe na mimi katika maamuzi yangu.” Maya akajibu huku akiendelea kulia. “Hata nisikushauri!?” “Sio ushauri wa kukaa mbali na Malcom!” Hapo Net akaishiwa nguvu.

“Sijakwambia ukae mbali naye, ila kumpa muda Maya. Please! Huyu mtu anamajukumu.” “Malcom alinichagua mimi jana, Net. Mbele za watu. Malcom sio mtu kigeugeu. Mbona inakuwa ngumu kuamini hilo!” Net kimya. “Kama inakuwa ngumu kwako, basi Net. Ila mimi sitasubiri. Nitakwenda kumtafuta mwenyewe. Hayo unayoniambia, nataka nikayasikie kutoka kwake yeye mwenyewe.” “Sawa Maya. Mimi nitakwenda na wewe popote utakapo. Naomba unyamaze. Tupate kwanza kifungua kinywa ndipo tutoke tukamtafute Malcom mpaka tumpate.” Hapo Maya akatulia.

“Ni sawa?” Net akamuuliza. Maya akatingisha kichwa kukubali huku akijifuta machozi. “Unayo namba ya Roy?” Tunda akamuuliza. “Hapana. Sina.” “Basi tulia Maya. Tuliza akili ili uweze kufikiria vizuri. Kama kweli yupo matatizoni, hivyo unavyoanza, ukiwa na hali hiyo, hutaweza kumsaidia.” Tunda akamtuliza, mpaka akanyamaza. Wakatulia kidogo, bibi yao kimya.

“Ulikwenda wapi Nana?” Net akamuuliza. Bibi yake akashangaa kidogo. “Ulijuaje kama nilitoka?” “Nana! Am the man of the house.” Net akaongea kwa kujivuna kidogo huku akijisogezea sahani ili ajiwekee chakula. Bibi yao akacheka kidogo. Kimya. Wote wakamwangalia. “What?” Bibi yao akauliza alipoona wote wanamshangaa. “Ulikuwa wapi Nana? Mbona kama unasita!” Net akauliza kwa msisitizo. “Nilikwenda kumuona Ritha.” Pakazuka ukimya. Hata sauti ya kijiko haikusikika.

“Wamemkamata jana usiku...” Akawasimulia kila kitu. Kimya. “Kuna anayetaka kumuona kabla hajapeleka mahabusu?” “Binafsi yangu hapana kwakweli. Sina huo muda wakupoteza.” Maya akajitoa mapema kabisa. “Mimi nataka kwenda.” Wote wakamwangalia Net. “Nina swali nataka nikamuulize. Huwa linanisumbua sana.” Maya akamcheka kaka yake kwa kejeli na kumwambia, “Goodluck with that!” “Kwa nini?” Net akamuuliza.

“Kweli Net unauliza swali kama hilo kwa mtu kama yule!? Unategemea jibu gani kutoka kwa mtu kama yeye ambaye kweli haijawahi kutoka kinywani kwake?” “Labda kujiridhisha tu. Acha mimi niende.” Maya akaaanza kulia tena. “Hakuna mtu ananijali mimi! Mnanipuuza. Ona sasa hivi amekuja yeye, unaamua kuniacha mimi na kumfuata yeye! Mimi naondoka, hata sisubiri tena. Nakwenda kumtafuta Malcom binadamu anayenijali mimi, Maya.” Maya akasimama.

“Tunakwenda Maya. Naomba utulie tafadhali. Nakwenda kuzungumza naye  kidogo tu, kisha tunakwenda popote unapotaka wewe. Tafadhali nifikirie na mimi hata kidogo. Huyu mtu amenitenda ubaya mkubwa sana bila sababu. Kumbuka niliacha maisha hapa nikaenda kumtumikia. Ameniadhibu mimi bila kosa, kama haitoshi amehamia kwa mtoto wangu! Kweli Maya unafikiri sina haki yakumuona mtu kama huyo?” Maya akatulia kidogo.

“Hata kwa dakika moja tu, nataka niione sura yake ajue kile ninachojisikia.” “Unafikiri ameshawahi kujali kile tunachojisikia?” Maya akamuuliza kwa kuumia sana. “Safari hii nitahakikisha anajali Maya. Acha nikamuone na kuzungumza naye kwa mara ya mwisho, kwa kuwa sitakaa nikazungumza naye tena. Tafadhali nivumilie.” “Sawa, lakini mimi sitaingia ndani. Sitaki hata kuiona sura yake tena maishani mwangu kote.” “Sawa. Basi usilie. Hilo halina shida. Utanisubiria kwenye gari. Nenda kaoshe uso.” Wakakubaliana ndugu hao wawili. Maya akaondoka kurudi chumbani kwake kuosha uso na kuchukua pochi.

Net akambusu mkewe na kusimama. “Sasa mbona huli tena na wakati ulikuwa unalalamika umeamka na njaa!?” Tunda akamuuliza. “Hamu ya chakula imeisha yote! Acha tu niende. Nitakuja kula nikirudi.” Akamgeukia bibi yake. Akaenda kumbusu. “Asante kwa kwenda na Maya. Nitajitahidi kuulizia alipo Malcom, nikijua mapema, nitawapigia kuwataarifu alipo ili msisumbuke sana.” “Utakuwa umeturahisishia sana.” Net akaondoka.

Tunda & Bibi Cote.

unda akajikuta amebaki kimya yeye na bibi Cote. “Hiyo hasira na kilio cha Maya sio cha Malcom peke yake. Maya ana mengi yanayoendelea kichwani kwake. Ameumizwa sana na mama yake. Acha Net akamsaidie labda atatulia. Ningekwenda mimi mwenyewe lakini najua itawaogopesha watu zaidi.” Tunda akafikiria kidogo. “Mungu atamsaidia hata haya yatapita tu.” Akaongea Tunda taratibu kama anayefikiria. “Unajua kabla ya haya yote kutokea, alikuwa akiniambia kuwa kuna kitu kimoja tu, ambacho anacho Vic na ndio maana wakati wote alikuwa akimshinda, japo yeye Maya anaakili kumzidi yeye!” Bibi Cote akakunja uso kidogo.

“Kitu gani!?” Akauliza bibi Cote huku na yeye akikitafuta kama asikione. Wao walikuwa matajiri sana kuliko kina Vic, baadhi ya biashara ni wao wamewafundisha wazazi wa mama yake Vic. “Alisema wazazi wa Vic wakati wote wamekuwa upande wa Vic hata katika ujinga wake. Hawakuwahi kumuacha tokea mtoto mpaka sasa na ndio maana katika maovu yake yote, Vic hakuwahi kukamatwa kwa kuwa wazazi wake wamemzunguka na kumfuatilia kwenye kila hatua ya maisha yake.” Bibi Cote aliumia mpaka Tunda akamuona usoni. Akainama kwa muda, akanywa juisi aliyokuwa amewekewa na Gino.

“Ulitaka kwenda kumuona Ritha na wewe?” Akabadili yale mazungumzo. Tunda akashtuka sana. “Hapana Nana. Nahisi sitaweza hata kulala usiku. Acha tu Net aende.” Bibi Cote akafikiria kidogo, akamuona anatoa simu. “Nataka kujua alipo Malcom sasa hivi.” Akakata simu na kupiga tena simu kwengine. “Net na Maya wametoka, nataka macho kwao wakati wote mpaka wanarudi hapa in one piece.” Akakata.

“Pole Nana.” Tunda akamuhurumia. Bibi Cote akacheka. “Hivi unapata muda wakulala kweli?” Akacheka. “Sina tofauti na wewe Tunda. Si umeona mwenyewe tokea upewe mtoto wako!” “Kweli Nana! Silali tena usingizi kama zamani!” Wakacheka kidogo. “Basi ndio hivyohivyo. Huwa hawakui, na hata wakionekana nje wamekua na kuondoka nyumbani, bado mawazo yanawafuata huko huko. Hupumziki.” Tunda akafikiria kidogo.

“Sasa ulifanyaje Net alipokuwa Tanzania?” “Mwanzoni alikuwa akilindwa masaa 24. Alipoanza mambo ya kuchumbia, akitaka kupendwa kama yeye.” Tunda akacheka. “Net! Yupo kama babu yake! Akakataa kabisa ulinzi. Nikamwambia hutawaona hao walinzi, akasema hawezi akawa anazunguka au kuonekana na wazungu kila mahali halafu isikushtue. Nikamwambia nimbadilishie waje weusi, pia akakataa. Akasema huko Tanzania kuna amani, hakuna anayemfahamu, hakuna atakaye mdhuru. Yeye anataka Tunda ampende kama yeye.” Tunda akacheka sana.

“Lakini alijuta mlipokuja kukamatwa na Ritha! Wewe ukaishia jela, yeye akafika huku nusu mfu! Alijuta sana. Alikuwa akilizwa na mengi, mimi nilijua nikaona nimwache tu, ajifunze aache ubishi kama babu yake.” Tunda akanyamaza kidogo.

“Mbona kama kuna kitu ambacho unasita kuniambia?” Tunda akacheka na kuhamia pale karibu yake. “Sasa hivi Net anajua maisha yote na kwa undani vile walivyoishi wazazi wake, Nana. Ndio maana unamuona ameumia sana.” Bibi Cote akashtuka sana na kushangaa. “Amejuaje!?” “Kumbe kuna sehemu Papa alikuwa akiandika. Sasa hizi siku ambazo hakuwa anakwenda kazini. Tokea mimi nipatwe matatizo, amepata muda wakupitia mafaili yote ya Papa, kule ofisini kwake. Amekutana na hayo mambo kwenye kitabu cha kumbukumbu Papa alichokuwa akimwandikia yeye Net binafsi. Alikuta jina lake limeandikwa nje, kwa mwandiko wa Papa, Nathaniel Cote. Ndipo alipofungua.” Bibi Cote akabadilika kabisa.

“Hivi unajua kuwa mali zote za Ritha ambazo alizipokea kutoka kwenu, Papa aliandika ni za Net yeye ni kama mwajiriwa au msimamizi tu?” Bibi Cote kimya. “Hata Net hakuwa akijua. Ila inavyoonekana, Ritha anajua, ila akakusudia kunyamazia tu. Zipo karatasi zote alizosaini Ritha na kukubali. Mlizoziona wewe na Logan, hazikuwa na maelezo yakutosha na ilikuwa kwa baadhi ya pesa.” Bibi Cote akakunja uso.

“Alisaini kwa makubaliano kuwa pesa zote, mali zote mpaka nyumba aliyouza Ritha ambayo mlimnunulia CJ, ilikuwa ni yako na Papa, mrithi ni Net. Wala  haikuwa ya CJ kama ulivyodhani. Nafikiri Papa alishajua ujanja wa Ritha, akaamua kuwa naye makini. Na hakutumia mwanasheria huyo wenu Logan, ameandika copies zote sahihi zipo kwa mwanasheria wenu mwingine wa mambo ya mirathi. Net amemtaja kwa jina moja tu la Leon.” Bibi Cote akajiweka sawa.

“Papa ameandika kuwa siku akifa tu yeye, kila kwenye jina lake yeye Papa, watu wasome Nathaniel Cote au kila anapotakiwa kusimama yeye Papa, asimame Nathaniel Cote. Kusiwahi hata kuwepo na kuhisiwa na utofauti, popote. Kasoro tu sura yake ndio iwe haipo. Ila Papa amemwambia Net, anajua ataishi kwa kupitia yeye, kwa kuwa anauhakika na alichokifanya akiwa hai.” “Hiyo najua na nina uhakika. Alijihamisha kwa Net, kwa asilimia 100.” Bibi Cote akathibitisha na kufuta machozi.

          “Basi ndio hivyo. Kwa kifupi, mali zote alizouza Ritha ni za Net. Sasa Net ameamua kuchukua kila centi iliyoingia kwenye mfuko wa Ritha.” “Tunda!” Bibi Cote akashtuka sana.

“Hivi moja ya sababu  ambayo anaenda kumuona Ritha leo, ni kumuonyesha aliposaini baada ya makubaliano na Papa. Na kumwambia atamfilisi mpaka centi ya mwisho ili hiyo pesa yake yeye Nathaniel Cote, ambayo aliishika kwa dhamana tu, asiendelee kuitumia kudhuru watu.” “Nyumba ya Tanzania?” Bibi Cote akauliza.

“Amesema atafanya kama alivyofanya ile yake kule Tanzania. Atahamishia kwa jina langu. Na vyote ameniambia anaenda kumwambia siku atakayoiona sura yake. Ndio maana mimi nimeona leo nisiende.” Bibi Cote akavuta pumzi. “Usiku hajalala, Nana! Kuna muda niliamka usiku nikamkuta akilia bafuni. Nikasema nimuache. Kwenye saa 9 usiku tena, nikamkuta bado yupo macho. Ndio nikambembeleza, akalala.”

“Pengine anahofia utamuacha!” “Hapana Nana. Hilo tulishalimaliza.” “Mbona bado umehama chumba?” Tunda akacheka. “Siwezi kulala chumba mbali na mwanangu Nana! Sitalala. Nahisi kama wanaweza kuja kumuiba nikiwa usingizini!” Wakacheka. “Hawawezi. Unaulinzi mkali sana hapa.” Tunda akabaki kama anayefikiria. “Anyway. Hilo tulishalimaliza. Yameisha na nimemwambia tutafunga ndoa kama alivyotaka tokea mwanzoni.” “Kweli Tunda!?” Bibi Cote hakuamini.

“Nana! Nitapata wapi mimi mwanaume atakayenipenda kama Net?” Bibi Cote akafikiria kidogo. “Mimi nilipoona wanaanza kutangaza kiwango cha mali utakachopata baada ya kuachana na Net, na kuwa hata mtoto atakuwa wako sababu Net amezini, nikajua watakuchanganya.” “We Nana! Nipate mali nimkose Net!? Halafu hizo mali zitanisaidia nini mimi? Sijawahi kupata utulivu wa akili na moyo maishani mpaka alipokuja Net kama Net kwenye maisha yangu.”

“Labda aje anikatae mwenyewe. Lakini hivihivi, nitatafuta sababu yakusamehe tu ili niwe naye mpaka kufa.” Bibi Cote alicheka sana. “Bila kuombwa msamaha?” “We Nana, asiponiomba je?” Tunda akamfanya bibi Cote azidi kucheka. “Nimekwambia nitatafuta sababu yakusamehe tu Nana, ili nikae na Net wangu. Hapa nimemwambia kwa kunikosea, nataka watoto mapacha, tena haraka.” Bibi Cote akatoa macho.

“Tunda! Hujachoka?” “Hata kidogo. Ndio tiketi yangu hiyo mwenzio yakuweka ugumu wakutoachana.” Angalau bibi Cote alicheka asubuhi hiyo baada ya juma hilo lililokuwa limejaa hekaheka.

~~~~~~~~~~~~~~~~~~~~~~~~~~~~~~~

Simu ya bibi Cote ikaita. Akamuona amepokea kwa haraka. Akasikiliza kwa muda bila kujibu akamuona bibi Cote amefunga macho kwa sekunde kadhaa. “Mtaarifu Logan, mwambie anipigie na majibu ya nini chakufanya. Isichukue muda mrefu.” Akakata simu. “Ni nini Nana?” Akavuta pumzi kwa nguvu. “Maya atachanganyikiwa.” “Kwa nini tena?” Akavuta tena pumzi kwa nguvu. “Malcom alikamatwa na polisi jana usiku akiwa njiani kuelekea kwake, ameshikiliwa na polisi.” Tunda akashtuka sana.

“Kwa nini?” “Zoe alipiga simu polisi na kuwaambia Malcom ametoka kwake akiwa amembaka. Ameonyesha majeraha aliyomjeruhi wakati akimbaka.” “Nana! Unafikiri ni kweli?”  “Tutajua. Lakini...” Akasita. Akaonekana kama anafikiria. “Nikuulize Nana?” Bibi Cote akamwangalia. “Katika vipindi kama hivi vya matatizo makubwa mfululizo. Tena ambayo yote yanakuhitaji, unafanyaje?”  Akamuona amecheka kidogo na kubaki akifikiria.

“Maana mimi  kwa tukio moja tu, nilitaka kukimbia kabisa.” Tunda akamfanya bibi Cote acheke tena kidogo. “Muonekano wa nje usikudanganye Tunda.” “Hapana Nana.  Nimekutizama tokea Tanzania na nilipokuja hapa! Unawezaje?”  Akajiweka sawa. “Unakumbuka nilikwambia wakati wote katika kila maamuzi unayochukua  chukua ukiwafikiria mpaka watoto wa huyo Cote. Unakumbuka?” Tunda akavuta pumzi kwa nguvu, nakunyamaza.

“Umetoka kusema utafanya kila njia kubaki na Net. Hiyo ni hatua ya kwanza na ya msingi. Unachotakiwa kufanya sasa, kila jambo zito na gumu linapokuja mbele yenu, ukumbuke hilo, ndipo hisia zifuate. Kingine, najua mimi nikichanganyikiwa hata kidogo tu sasa hivi, si hasara kwa Net na Maya peke yao, hata Cote ataathirika. Kwa hiyo tunarudi palepale. Lazima kuwafikiria mpaka watoto wa Cote. Na lazima kufikiria kwa haraka na kuchukua hatua ya haraka bila kupoteza hata sekunde. Na wakati wote huwa nahakikisha nipo hatua moja mbele ya kila kitu.”

“Kwa mfano katika hili la Malcom, kabla sijafanya chochote na kuharibu au kuaibika, nimemtaka Logan anipe ushauri wa kisheria juu ya hili. Sitatoa mguu wangu hapa. Wala sitampigia simu yeyote, bila kujua nataka kuongea nini na nani. Sijui kama unanielewa?” Tunda akabaki kimya. “Kupaniki kwangu ni jambo la mwisho sana na huwa siruhusu kupaniki katika maisha yangu. Kwa kuwa sijajaliwa hiyo nafasi kama wengine. Nafasi yangu kwenye jamii na familia, hainiruhusu kupaniki, ila kutafuta suluhu katika kila jambo. Na ndio maana huwa sishindwi.”

“Imenisaidia kufanya akili yangu kuwa na uwezo wa kufikiria kwa haraka sana. Mfano. Nilipokuja hospitalini siku uliyotekwa nyara, nilimkuta Net anakusubiri, wewe haupo. Akaniambia umekwenda kufanyiwa vipimo hata yeye hakukukuta. Hapohapo nikajua kuna kitu hakipo sawa.” “Nana!” Tunda akashangaa kidogo.

“Hata wao hawakuwa wakiamini na kuelewa. Walishangaa  ninachukua hatua kama kuna moto mkali sana unaowaka nakutaka kuteketeza jengo wakati mazingira yalikuwa matulivu, hakuna chakushtua, kwa kuwa Tunda yupo kwenye vipimo! Lakini tangia naingia pale hospitalini, mpaka kujua haupo kwenye vipimo. Umetoroshwa na watu wawili, wamekutoa pale kwenye mazingira ya hospitalini na gari fulani. Kuifuatilia hiyo gari mpaka ilipoishia chini ya tunel,  haikuchukua hata dakika 20. Sijui kama umenielewa?”

“Mpaka wale polisi walishangaa. Nilijua nini chakufanya na wakati gani. Nani nimpigie kwa haraka ili anipe majibu ya haraka. Na ni hapohapo mbele ya polisi, mpaka wao wenyewe wakabaki wamepigwa na butwaa. Lakini sio kwa sababu ya akili kuwazidi  wao au pesa yangu tu, lakini ni kwa sababu yakujizoesha kufikiria kwa haraka bila kutoa nafasi ya kupaniki. Lakini sio kwamba huwa siingiwi hofu? Hapan..”  Simu ya bibi Cote ikaita.

Akapokea akamuona ameshtuka sana. “No No nooo! Usingemuacha akashuka kwenye gari.” Akakata simu. Akamuona anapiga simu nyingine. “Maya yuko wapi?” Tunda akabaki akimtizama. “Nashukuru sana. Hata iweje, asiwe mbali na wewe hata kwa hatua tano. Unanielewa? Nakuja sasa hivi, tutakutana huko huko.” Akakata. “Nahitaji gari yangu iwe tayari sasa hivi.” “Yes ma’am.” Carter akajibu.

“Ni nini tena Nana?” “Nafikiri Maya amepata taarifa za Malcom kutoka vyombo vya  habari au kwenye mitandao yao hiyo! Dereva aliyekuwa nao anasema walikuwa wakimsubiria Net nje ya hospitali, akamsikia Maya anapiga simu kuulizia alipofungwa Malcom, inaonekana alipojua, akatoka ndani ya gari na kuanza kukimbia. Bahati nzuri mlinzi niliyemtuma kuwafuatilia alimuwahi akamwambia apande kwenye gari yake. Hapa walipo wanaelekea kituo cha polisi. Inabidi niende Tunda. Hali aliyonayo Maya, kama mimi mwenyewe nisipoenda pale, watamfunga na yeye. Anahasira na mama yake, ataenda kumalizia polisi huko kituoni. Acha niwahi.” Hapo hapo akanyanyuka.

Tunda akamsikia akipiga simu nyingine.  “Nikukute na majibu yote kituo cha polisi cha Norfolk sasa hivi.” Tunda akajua huyo ni Logan tu. Akamsikia kama anayekimbia, baada ya dakika 2, kimya. Akajua ameachwa peke yake humo ndani na wafanyakazi. Tunda akavuta pumzi na kujivuta nyuma ya kiti. Akabaki kimya ameduaa.

Net kwa mama yake.

et alifika pale akamkuta mama yake amelala vizuri, kama aliye kwenye usingizi mzito. Nesi aliyekuwepo pale akataka kuwapisha. “Hapana. Moja ya sifa zake huyu, ni mzuri sana wakubadilisha maneno. Tafadhali kama huna kazi nyingi, naomba uwepo hapa ili nizungumze naye. Haitachukua muda mrefu. Na acha mlango wazi. Tafadhali sana.” “Sawa.” Yule nesi akakubali kwa heshima. Alipogeuka akamkuta mama yake amefungua macho.

“Unakumbuka mara ya mwisho nilipozungumza na wewe tulipokuwa nchini Tanzania?” Net akamuuliza mama yake, akiwa ametulia tu tena kwa lugha ya kingereza. “Nilikwambia angalia usifike umbali ambao ukashindwa kurudi. Usiruhusu hiyo roho iliyokuingia ikakufikisha mbali, lakini nisijue kuwa ndivyo ulivyo tokea kabla hujakutana na baba.” Ritha akacheka kwa kejeli.

“Naona bibi yako amekazana kweli! Safari hii ameamua aniangamize mimi na watoto wangu. Amekusudia kukuharibu kichwa chako ili tu kuniumiza. Haya, endelea kuongea ili nijue amekwambia nini?” Net akazidi kuumia. “Wala Nana hajaniambia baya lolote kuhusu wewe! Na ni kama amejionya juu ya hilo. Hajawahi hata kuropoka kukutaja kwa ubaya mbele yetu. Nafikiri ni kwa kuwa anatupenda sana, hataki kuona tunaendelea kuumizwa na wewe. Na wala hafahamu ni nini nataka kuzungumza na wewe.” Net akaendelea.

“Ni mimi mwenyewe nimechunguza mpaka nimejua ukweli wote. Nikisema wote namaanisha nimegundua ambayo hata Nana hakuwa akiyajua. Au ambayo hata wewe hukuwa ukijua kama Papa anayajua.” Ritha akakunja uso. “Sipo hapa kurudia maovu yako. Kwa kuwa najua unayajua maovu yako yote. Ila najua kwako sio maovu ni maisha uliyoyachagua kuyaishi zamani sana hata kabla mimi na Maya hatujazaliwa na wala hata kabla hujakutana na baba.” Bado Ritha alikuwa anamtizama mwanae kwa makini tu, kutaka kujua ni nini amejua!

“Wewe kwa asili ni muovu na wala huwezi kutenganishwa na uovu kwa kuwa wewe ni MUOVU.” “Acha kunipotezea muda Net. Nenda kwenye pointi, maana sina muda mrefu wa kijinga wakukusikiliza. Kama bibi yako amekudanganya kuwa wamenikamata safari hii, nitakaa hapa muda mrefu, ujue amekudanganya. Hapa kwenye hizi pingu sina muda mrefu. Tumia huu wakati vizuri.” Ritha akaongea kwa kugomba na kujiamini.

“Anachotaka bibi yako nikunilipiza kisasi. Na ninakuhakikishia, hajanipata. Mimi nina akili, usifikiri ni mjinga. Huwezi kunishitaki kwa ukiri nilioongea nikiwa nimeshikiwa risasi. Au nimepigwa risasi!” Akaongea Ritha bila wasiwasi. “Mtu anaongea chochote anapokuwa akitishwa ili kujiokoa. Confession under duress! Jua sheria wewe mtoto, acha kukurupuka nakuja hapa kuongea ujinga! Kwanza ondoka ili nilale. Sidhani hata kama una kitu chakuzungumza na mimi isipokuwa uzushi tu.” Net alishtuka sana maana mama yake aliongea ukweli. Lakini akajikaza.

Ritha alishageuza kichwa upande mwingine. “Jiandae kutafuta mwanasheria atakayetetea huo ujinga unaoendelea kichwani mwako tena atakayekufanyia bure. Maana mimi kwa kutumia kila cent  ambayo unadhani ni yako  nitahakikisha unakaa sehemu ambayo hutaweza kumdhuru mtu mwingine yeyote hapa duniani, hiyo ni hata na wewe mwenyewe, mpaka Mungu mwenyewe atakapoamua kukutoa hapa duniani.” Ritha akashtuka sana. Akageuka.

Net akacheka. “Ninapokwambia nimefanya uchunguzi wa kina na ninajua mambo zaidi  ya unayodhani wewe na anayojua Nana, ulifikiri nakutania?” Net akacheka akionekana anahasira yakupitiliza. “Wewe unasainishana na Nana, bila mimi? Mimi ndio mrithi wa CJ na Cote. Mimi ndio mwenye mali. Papa amekufa mwili, lakini anaishi hapa.” Net akajionyeshea kidole yeye.

“Hilo ameandika kwa maandishi, kwa mkono wake yeye mwenyewe Papa. Na ameacha nakala tatu. Kwa wanasheria wawili tofauti tofauti, siwezi kukutajia wewe, na nakala moja ameniachia mimi. Kila mkataba alioingia yeye akiwa hai, amesema yeye ndio atakufa, lakini mikataba yoote aliyoingia yeye, haitawahi kufa kama Nathaniel Cote, ninaishi.” Net akaongea kwa jeuri.

“Sasa ni hivi, mkataba uliongia na Nana,  kupitia Logan, SIUTAMBUI.  Hapa ninapozungumza mimi kama Nathaniel Cote, nimeshatuma Tanzania makaratasi ya kumuuzia Tunda ile nyumba uliyodhani ni yako, kwa shilingi 100 tu.” Akamuona mama yake amebadilika. Net akacheka.

“Umesikia?” Net akamuuliza kwa kejeli. “Sio milioni. Shilingi 100 tu. Ambayo hivi karibuni itakosa thamani. Itakuwa ni kama nimempa bure kabisa. Nimesema kila kitu kilichopo ndani mpaka kijiko ulichotumia muda kwenda kununua kwa pesa yangu, ni cha Tunda. By the way, yupo hai. Nimemuacha anakaribia muda wa kwenda kumnyonyesha mtoto wetu.” Net akamtizama usoni.

“Usiku wa jana, nimeandaa madai yangu yote kwako. Na uthibitisho wote mliokubaliana na Papa. Nitamlipa mwanasheria mkubwa sana, ili kuhakikisha kabla hujafikishwa mahakamani, uwe na uhakika kuwa umefilisika kabisa. Huna hata chumvi unayomiliki kwa jina lako.” Net akamkazia macho.

“Nitahakisha safari hii hutakimbia hukumu yako Ritha. Najua umeshajipanga kwa utetezi, lakini  ujue safari hii utalipa kwa kifo cha  Gabriel. Alikufa akiwa anakutafuta, nimekuja kukutangazia, NIMEKUPATA. Na nitahakikisha unalipa.”

“Hii ni Canada. Hakuna ujanja ujanja wa meneno kugeuzwa geuzwa. Utahukumiwa kwa maneno ya kinywa chako mwenyewe. Na ujue hapo unapolala ni dakika za mwisho. Unakaribia kupelekwa kunapokustahili.” Ritha akakunja uso. “Mimi bado mgonjwa!” “Wapo wauguzi watakaoendelea kukuhudumia ukiwa jela. Usiwe na wasiwasi. Baada ya muda mfupi sana gari ya kukupeleka unakostahili itakuja kukuchukua. Utapata muda wakujifikiria na kujipanga vizuri huko jela. Wewe si umesema unayo akili? Nenda sasa ukajipange ukijua huna pesa na upo na pingu mkononi. Na kingine, kuwa na uhakika kuwa, pesa yangu uliyokuwa ukiihangaikia kuizalisha miaka yote, ndiyo itakayosaidia kuhakikisha unakaa ndani mpaka kifo, ili mke wangu alee vizuri na kwa amani akijua hutaweza kumdhuru tena.” Net akaongeza.

“Na nitahakikisha, Cote na wadogo zake, wanapata kutoka kwa mama yao, ambaye ni Tunda kile ulichoshindwa wewe kutupa  mimi na Maya, kwa kuhakikisha unaishi jela maisha yako yote, bila kutoka au hata kuwa na uwezo wa kutumia watu kufanya maovu yako tena, kwa kuwa hutakuwa hata na  cent moja kwa jina lako, kuweza kuwalipa watu kama kina Jeff.” Akamtizama na kutaka kuondoka. Akasimama.

“Nilitaka kukuuliza kitu, lakini naona Maya yupo sahihi. Nitapoteza muda tu. Wewe ni muongo, na wala kweli haijawahi kukaa ndani yako. Huna majibu ya maswali yangu.” “Nijaribishe.” Net akageuka akamtizama kwa muda. Akakunja uso, huku akicheka kwa kumkejeli mama yake. “Naaaah!  Nina mambo ya muhimu ya kufanya na mke  wakumuwahi.” “Malaya yule!”  “Yeap! Yale yooote aliyokuwa akiwapa wengine, sasa hivi mimi ndio nayafaidi peke yangu! Nalala nikiwa tajiri. Nina uhakika wa utajiri wa mpaka kifo changu na watoto wangu, halafu napata na penzi safi kutoka kwa Tunda. Na ninakuhakikishia, ni mzuri kitandani.” Akamtusi mama yake huku akicheka. “Deal with it!” Akamuwekea mama yake msisitizo wakati anatoka.

~~~~~~~~~~~~~~~~~~~~~~~~~~~~~~~

Je ni kweli safari hii wamemkamata Ritha? Amashatengeneza hoja ya kweli kisheria. Huwezi kuchukua ukiri wa mtu aliyekuwa akitishwa kama ushahidi. Mtu akiwa anatishwa anaweza kuzungumza chochote ili kujitetea nafsi yake. Ritha ndio umesimamia huo utetezi wake. Watafanyaje kushinda hilo?

Maya na Malcom nao je?

Usikose sehemu ya mwisho ya  Simulizi hii.

 Usiku Kwa Ritha.

Usiku  huo wakati kina Cote wamelala wakiwa wanazungukwa na ulinzi mkali, ikawa na kwa Ritha pia hivyohivyo. Polisi na CSIS walikuwa mbele ya nyumba aliyokuwa akiishi Ritha wakiwa wamevaa kama raia wa kawaida tu. Lengo ilikuwa ni ili kujua kama atatoka kwenda kukutana na Jeff, mwanaume wa Malinda, aliyehusika kumteka nyara Tunda. Na kusadikika kuhusika na mauaji ya Malinda pamoja  na mdogo wake, ili kujipatia pesa zote watakazolipwa na Ritha, yeye mwenyewe

Na kule mbele ya Motel aliyokuwa amejificha Jeff pia kulikuwa na polisi wanamwangalia kuona ni nini atafanya. Nia ni kumkamata akiwa na Ritha, kwa ushahidi. Kwa kuwa Ritha yeye alikuwa makini sana. Hawakuwa na ushahidi mkamilifu kuwa anahusika ila ukiri tu wa Vic. Ila  kwa Jeff, yeye walishapata ushahidi kuwa ni yeye muuaji kwani aliacha alama za vidole sehemu moja tu, ambayo inaonekana  alijisahau kuifuta. Kwenye dripu waliyokuwa wamemuwekea Tunda. Walikuta alama zake yeye za vidole,  na Malinda. Ni kama alimsaidia kunyanyua hiyo chupa ambayo ilichukuliwa na kwenda kupimwa, ndipo ikakutwa na alama zao wao wawili. Kuwa wao wiwili waliishika ile chupa ya maji waliyokuwa wamemuwekea Tunda.

Mpaka hapo hawakuwa wamekuta risasi iliyohusika kumuua Malinda na mdogo wake ila miili yao tu. Na Jeff alionekana alifanya juhudi za makusudi kusafisha kwa kutoa alama zake za vidole kila mahali kwenye ile nyumba.

Huku kwa Ritha alilala akiwa hajui hata kinachoendelea. Habari za kukamatwa kwa Vic zilifichwa kabisa na kuhakikisha hazivuji. Mbali na wazazi wa Vic ambao walifurahia kutotangazwa hizo habari, hakuna hata aliyejua kama usiku huo Vic na Jake wapo chini ya ulinzi wa CSIS, na wamelala ndani kama wafungwa.

Jeff alisubiria simu ya Ritha akiwa na simu yao waliyokuwa akitumia Ritha na Malinda, bila kuona mafanikio. Akasubiri na kusubiri, akaanza kukosa uvumilivu. Siku nzima hakumsikia Ritha, na huo usiku pia. Akajua Ritha anataka kuwachezea mchezo mchafu. Walishafanya hatua ya kwanza waliyokuwa wamekubaliana kumteka nyara Tunda. Hayo malipo alifanya kiasi tu, bado hakumaliza. Alisema mpaka amuone Tunda yupo chini yao, na kama Malinda akikubali wamuue, anampa pesa yote.

Yeye Jeff hakuona sababu ya mtoto, alitaka wammalize Tunda, walipwe, maisha yaendelee. Lakini Malinda alitaka mtoto. Alitaka wamfungie Tunda mpaka awazalie mtoto ndipo amwache kwa Ritha. Ndio maana alimgeukia Vic kumdai pesa ya matunzo. Vic alipokataa, na Malinda bado akang’ang’ania kumtunza Tunda hivyohivyo mpaka apone ndipo wampandikizie mtoto, hapo ndipo pakatokea kutokuelewana kati yake na mpenzi wake Jeff.

Jeff akaona Malinda anataka kupoteza muda na Tunda ambaye atakuwa mzigo na kuzidi kuwagharimu wakati pesa kutoka kwa Ritha inawasubiri! Na Ritha aliwaambia ni afadhali wamalizane mapema na Tunda, wakamtupe au kumfukia mahali, lasivyo watakamatwa tu.

          Jeff aliposhindwa kumshawishi Malinda, na mdogo wake akawa upande wa dada yake akitaka dada yake apate anachokita. Yaani mtoto, ndipo Jeff alipowaua wote wawili ili akutane na Ritha, arudi kumuonyesha Tunda kama ushahidi, wamuue, alipwe pesa yote yeye mwenyewe.

Alipotoka baada yakufanya mauaji hayo, na kusafisha. Akaamua kumpigia sasa Ritha simu na kumwambia kwa wakati huo yeye ndio kiongozi. Akapiga simu ya Ritha ikawa haipatikaniki tena. Kumbe alichofanya Ritha, baada tu ya kutembelewa na afisa wa CSIS wakamuulizia Tunda kwake, akachukua ile simu aliyokuwa akiwasiliana na kina Malinda, ilikuwa ni ‘Burner phone’ tu. Simu ambayo haijasajiliwa popote, sio rahisi hata wataalamu wa simu kuifuatilia na kumpata. Akaichukua hiyo simu na kuitumbikiza kabisa chooni ili kuua ushahidi.

Baada yakujaribu kupiga simu ya Ritha mara kadhaa na kukomkosa, Jeff alitoka pale akiwa na njaa usiku ule kwenda kununua chakula, kurudi kwa mbali ndipo akaona helicopter na taa za polisi kwa mbali kwenye lile eneo walilokuwa wamemficha Tunda. Akajua tayari watu wa usalama wameshajua eneo alilofichwa Tunda na wamefika.

Hakutaka kukamatwa. Hapohapo akageuza na kukimbilia kujificha kwenye hiyo motel. Napo akajisahau akanunua sigara mchana baada yakujifungia kwenye hiyo motel kuanzia usiku ule. Ndipo maafisa wa CSIS wakachunguza kutoka ilipotumika kadi yake Jeff kama kuna nyumba za wageni karibu na hapo alipoonekana amenunua sigara, ndipo wakampata hapo amejificha kwenye hiyo motel.

Wakati director wa CSIS anazungumza na bibi Cote kumpa maendeleo walipofikia, bibi Cote akamsihi wasimkamate kabisa mpaka waweze kumuunganisha na Ritha. “Tafadhali Mike, naomba unielewe. Najua Ritha ni mjanja sana na ana akili kwenye mipango yake. Hamuwezi mkamkamata kwa ujumbe, au kwa kufuatilia kadi zake za benki au hata mazungumzo ya zamani aliyozungumza na hao wahusika.” Bibi Cote akasisitiza.

“Ni heri tuchukue muda mrefu, lakini tuhakikishe safari hii tunamkamata. Naomba Jeff aendelee kuachwa ili tuone anahusika vipi na Ritha. Pesa anazitoa wapi! Atajifungia hapo lakini tunajua ataishiwa tu, au atakosa uvumilivu na kufanya kosa, na hapo ndipo tutajua ni wapi atakapokwenda kupata hizo pesa au mahusiano yake na Ritha.”  Hilo wazo la bibi Cote likawa zuri.

Maafisa wawili wa CSIS, wakike na wakiume, wakachukua chumba pembeni ya chumba alichochukua Jeff, kama wapenzi tu ili wasimshtue Jeff. Salamu za kawaida kila wakikutana naye nje ya mlango na kujaribu kumzungumzisha mambo ya kawaida tu kama hali ya hewa na kadhalika.  Walipomuona akitoka kwenda kununua chakula na sigara tena, wakaingia chumbani kwake na kutegesha kamera. Ili kuweza kumuona na kumsikia kwa kila atakachozungumza na kila ambaye angezungumza naye.

Hapakuwa na kulala kwa hao maafisa wawili. Walipeana zamu kulala, kwenda chooni mpaka hata kutoka kwenda kununua chakula. Macho yalikuwa kwenye screen wakimwangalia Jeff kwa kila anachofanya. Mvuta bangi huyo Jeff alishakata tamaa yakumsubiria Ritha kwa muda wote huo. Akaona amfuate tu anapoishi. Jeff alikuwa na number ya simu ambayo haikuwa hewani. Ikawa kazi kujua nyumba yenyewe anayoishi.

Wale maafisa wakaona na kujua shida ni sehemu anayoishi Ritha. Wakacheza na mtandao mpaka wakamdokeza jina kamili analotumia Ritha kwenye kazi mpya. Akaweza kujua ni wapi Ritha anafanya kazi.

Kutoka alipokuwa amejificha Jeff  mpaka alipo Ritha, ilikuwa mbali. Lakini Jeff akaamua kuendesha tu ilimradi kumfikia Ritha apate haki yake.

Malcon kwa Maya.

subuhi ya saa 12 Maya akapokea ujumbe kutoka kwa Malcom. ‘Naomba tupate kifungua kinywa pamoja.’ Bibi yake akamuona anacheka. Akamuonyesha ule ujumbe bibi yake. “Utamjibu nini sasa?” “Nataka kwenda, Nana.” “Basi mjibu.” Maya akambusu bibi yake kwa furaha akijua amempa ruhusa. ‘Ningefurahia. Unataka tukutane wapi na saa ngapi?’ Maya akajibu. ‘Mimi ndio nakutoa. Nitakuja kumuomba Ms Cote au kaka yako. Wakiniruhusu tunakwenda kwa kifungua kinywa. Itakuwa saa mbili na nusu. Itakuwa sawa?’ Maya hakuamini.

“Angalia heshima anayonipa Nana!” Bibi Cote akasoma na kucheka. “Labda huyu atakuwa ndiye Nana!” “Naomba mpe muda Maya. Najua moyo wako. Naomba mpe muda wakumfahamu ndipo mfungulie moyo wako kabisa. Sitaki kuja kukuona unaumia tena.” Bibi Cote akamtahadharisha. “Ila kwa mwanzoni tu, anaonyesha dalili nzuri. Ananiheshimu huku akinijua ni mimi Maya ambaye nimepoteza heshima kwenye jamii!” “Hiyo ni kweli.” Bibi yake akakubaliana naye.

‘I would love that.’ Maya akamjibu Malcom kuwa angelipenda hilo wazo lake. ‘Okay. Nitakuona baada ya muda mfupi.’ ‘Okay.’ Wakamaliza hapo, Maya akatoka kitandani kwa bibi yake akikimbilia chumbani kwake kwenda kujitayarisha.

Saa mbili na dakika 20 Malcom alikuwa kwenye geti akigonga kengele akiomba afunguliwe. Baada yakujitambulisha, Carter akamfungulia. Maya, Tunda na bibi Cote walikuwa dirishani wakimchungulia. Alishuka nakuanza kujitengeneza. Akajitengeneza cola ya shati. Akasimama kwenye kioo cha dirisha cha gari, akaanza kuchomekea shati tena na tena. Tunda akaanza kucheka. “Atakuwa anaoogopa!” Wakamuona anachomoa shati. Akajiangalia tena kwenye kioo cha dirisha cha gari, akachomekea tena. Akarudi ndani ya gari. Wakamchungulia wakamuona anachana tena twele. Wote wakacheka.

“Anaonekana anahali mbaya sana.” “Sidhani kama ataingia.” Wakacheka. Akatoka tena. Wakamuona anaangalia saa yake ya mkononi. Akazunguka kwenye mlango wa abiria. Akajaribu kufungua na kufunga akiwa anajidai kama anamfungulia mtu. Akasimama mbele na nyuma ya mlango mpaka akaridhika. Akajiangalia tena, akajiweka sawa, kisha wakamuona anatoa maua mawili. Wakashangaa. “He is a gentleman!” Bibi Cote akasifia.

Akajipanga tena. Wakamuona anajiweka sawa, akaanza kusogea kwenye ngazi. Wakati yupo ngazi ya tatu tu, akajikwaa na kuanguka vibaya sana, wakamuona yupo ngazi ya chini kabisa, amelalia maua yote. Kila mtu akashika mdomo. Wakamuona ananyanyuka haraka haraka. Akaangalia kushoto na kulia. Akaokota yale maua. “No No No nooo!” Maua yakawa yameharibika kabisa. Shati la rangi ya bahari alilokuwa amevaa na jinsi nzuri sana ya blue iliyoiva, na vyote vilionekana kama vipya, vikawa vimeshafuka, zaidi shati. “Nooooo!” Malcom akazidi kusikitika kila alipojiangalia.

Wakamuona anakusanya yale maua na kuyatupia nyuma kabisa kwenye gari yake. Ndani ya buti. Wakamuona anatoa t-shert nyingine nyeupe. Akavua ile shati aliyokuwa amevaa nzuri imempendeza lakini ikachafuka sababu ya kuanguka, akavaa hiyo tshirt aliyoitoa garini huku akiangalia kulia na kushoto kama kuna mtu anamuona. Kisha akaanza kujifuta ile suruali. Akaangalia muda, akakuta amechelewa kwa dakika mbili. Akafunga gari kwa haraka, akaanza kukimbilia ndani. Alipofika katikati ya ngazi akatulia. Wakamuona anajaribu kuvuta pumzi kwa nguvu na kuzishusha taratibu kama anayetafuta kujituliza.

Wakaanza kucheka wote. Mara wakasikia kengele. Carter akaenda kufungua. Ile anaingia tu, akakutana na Net alikuwa akipita karibu na hapo mlangoni alipoingia yeye. Net akakunja uso. Akamsalimia. “Vipi, mbona asubuhi asubuhi! Kila kitu kipo sawa!?” “Kipo sawa kabisa. Nilitaka kuomba kumtoa Maya kwa kifungua kinywa.” “Hivyo ulivyo hata nywele hujachana!” Net akamuuliza kwa kumshangaa.

“Nilichana. Sema zimevurugika muda si mrefu hapo nje, wakati navaa.” “Ulikuja hapa uchi!?” Net akaendelea kumchemsha. “No no noooo, Sir. Not at all. Nilikuja nikiwa nimevaa kabisa, ila ikabidi kubadilisha.” Malcom alisikika akibabaika haswa. Kule walikokuwepo Maya, bibi Cote na Tunda walizidi kucheka taratibu wakisikiliza.

“Hukuamini ulichovaa kutoka nyumbani kwako!? Unakuwa mtu usiye amini mawazo yako na uamuzi wako wa kwanza! Itakuaje utoke hapa na Maya, ufike huko ugundue ulifanya kosa?” “Hapana, kuhusu..” “Nisikilize nani tena?” Net akamsogelea. “Malcom, Sir.” Malcom akajitambulisha huku akimeza mate kwa wasiwasi. Alishakuwa mwekundu. “Yes, Malcom. Maya sio binti wa kuchezea na wamajaribio kama ulivyokuwa ukimuona kwenye mitandao. Sasa hivi macho yangu yapo wazi nikiangalia kila mtu anayemsogelea Maya. Unanisikia?” “Yes Sir.” Malcom akaitika.

“Kama upo hapa kujaribisha, uondoke.” “Hapana. Mimi sijaribishi. Mimi namfahamu Maya kwa miaka mingi sana na sijawahi kumdharau hata mara moja. Wakati wote namuheshimu na ninamtetea. Hata Roy anajua. Sipo hapa kujaribu.” Malcom akajikaza na kujieleza kwa ujasiri. “Nampenda sana Maya.” Akajikuta akiropoka. Net akamkazia macho. “Umesema?” “Nampenda Maya.” Akaongea kwa utulivu, safari hii akaweka na hisia. “Na sipo hapa kujaribu. Na wala sitaki kumuona anaumizwa tena. Ndio maana nipo hapa. Kama ukinipa nafasi hiyo Sir, mimi nitahakikisha Maya anakuwa na furaha. Na ule moyo wake wa ukarimu na kuamini watu, nitauenzi. Sitamchezea kama watu wengine walilolijua hilo na kumtumia vibaya.” Malcom akaendelea kutetea hoja yake.

“Sipo hapa kujaribu au kuchunguza. Nipo hapa kwa mtu ninayemfahamu kwa muda mrefu, tena nina uhakika au ujasiri wakusema ninamfahamu zaidi ya kila mtu au yeye mwenyewe. Kwa kuwa nimemfuatilia kwa muda mrefu sana. Nampenda Maya.” Kule alipo Maya akaanza kutokwa na machozi ya furaha. Ilimgusa kila mtu. Hapo hata Net akafungwa mdomo katika hilo.

“Unatokwa jasho na hujachana nywele. Huwezi kutoka na msichana kwa mara ya kwanza wewe mwenyewe ukiwa hujatulia. Carter atakuonyesha kilipo choo. Ujisafishe kidogo, ndipo uitiwe Maya.” “Asante sana. Nashukuru sana.” Karibia Malcom apige magoti. Net akaondoka. Akamsikia akihema kwa nguvu na kuinama ameshika magoti kama asianguke. Net akacheka moyoni, hakugeuka. Akaondoka asijue bibi yake na kina Maya walikuwa wakiwasikiliza wakati akimchemsha Malcom.

Malcom alipelekwa kwenye choo cha wageni hapo karibu na sebuleni. Akaanza kuchanganyikiwa humo ndani. Kulikuwa na kila kitu. Akaanza kujisafisha akatamani kama aoge kabisa. Ila akajua atachelewa zaidi. Akatumia taulo dogo kujisafisha. Aliporidhika ndipo akavaa tena ile t-shert yake. Akaamua kuchomekea. Akajiweka sawa. Nakutoka.

“Upo tayari?” Ilibidi Carter amuulize maana alitoka nakuanza kushangaa hapo. “Yes. Naomba uniitie Maya. Au unafikiri nizungumze na bibi yake kwanza?” “Una maua?” Carter naye akaanza kumchanganya. “Nilikuwa nayo kabisa na Mungu wangu ni shahidi. Lakini..”  Akasita Malcom. “Sina.” Akaongea kwa upole Malcom. “Lakini nampenda sana Maya. Sitaki kuharibu mwanzoni.” Carter akampa tabasamu.

“Nina uhakika atafurahia moyo ulio muwazi kuliko maua.” “Unafikiri hivyo?” Malcom akauliza kwa wasiwasi huku akimsogelea Carter. “Najua hivyo. Upo tayari.” Malcom akatingisha kichwa kukubali. Carter akashangaa. “Come on Son! Man up!” Akajiweka sawa. Akasimama kwa kujiamini. “Upo tayari?” Carter akamuuliza tena. “Yes Sir.” Akajibu kwa kujiamini. Carter akamtengeneza vizuri kola ya ile t-shirt.

“Halafu usiongee sana kwa Ms Cote, labda iwe lazima sana. Maneno machache tu, tena yamuhimu.” Akamshauri huku akimpiga piga mabegani. “Nitakumbuka hilo.” Akakubali kwa haraka sana. Akameza mate, Carter akaondoka. Baada ya muda akaona bibi Cote na Maya wanakuja. Malcom akabaki ameduaa kwa Maya. Maya alivaa vizuri na akapendeza sana. Maya akacheka, ndipo Malcom akagutuka.

Akasalimia mikono ameweka kwa heshima huku akimtizama bibi Cote na Maya. “Umependeza sana.” Akanong’ona huku akimwangalia Maya. Maya akacheka. “Asante.” Maya akajibu na cheko la taratibu. Malcom alibaki akimtizama.

Akakumbuka bibi Cote anamtizama. “Maam!”  Akaanza Malcom. Bibi Cote akabaki akimtizama na yeye. “Naomba nitoke na Maya kwa kifungua kinywa. Nitamrudisha salama.” “Salama na mwenye furaha kama hivi alivyo hapa.” Bibi Cote akajibu kwa msisitizo. “Nitahakikisha hivyo, Maam!” Malcom akakubali kwa haraka sana. “Okay. Mimi sitawachelewesha zaidi.” Malcom akakumbuka amechelewa. “Samahani sana kwa kuchelewa. Nilifika kwa wakati lakini...” Carter akasafisha koo kidogo kama kumkumbusha. Akatulia. Akakumbuka asiongee sana. “Samahani kwa kuchelewa.” Akajirudi. Lakini wote walijua hajachelewa. Kwani walimuona muda wote tangia anaingia hapo kwenye ua wao.

“It’s okay, Mal.” Maya akamtuliza. Akajisogeza taratibu kwa Maya. “Nilikuletea maua lakini niliyaharibu.” Akaongea kwa upole na sauti ya chini. “It’s okay. Nimefurahi kukuona.” Maya akajaribu kumtuliza. Akanyoosha mkono, Maya akamshika, wakatoka. “Umependeza sana Maya!” Wakamsikia akimsifia tena wakati wanatoka. Maya akacheka. Akamfungulia mlango kama vile walivyomuona akijaribisha kabla ya kuingia ndani. Maya alipokaa, akafunga mlango. Akaenda upande wa dereva akawasha gari.

{Atafuataye, Hachoki}. Kwa Mara ya Kwanza Malcom Afanikiwa Kumtoa Maya.

“Kabla hatujaondoka hapa, naomba nikutahadharishe kitu.” Maya akaanza. “Unatoka na mimi.” Malcom akawa hajaelewa. Akabaki akimsikiliza. “Inamaana haitakuwa siri, Malcom. Kila mahali utakapotokea na mimi, watakuandika mitandaoni na magazetini. Haiwezi ikawa siri, labda tupate kifungua kinywa hapahapa nyumbani.” Malcom akatulia kidogo.

“Najua ni nini nafanya Maya.” “Nina uhakika hujafikiria kwa upande huu. Watakuchunguza kuanzia siku ya kwanza utakayoonekana na mimi. Yale yako ya sirini ambayo hukutaka watu wasijue, watayajua kwa undani, hadharani. Watakudhihaki kwa kuwa upo na Maya Cote.” Maya akaanza kutokwa na machozi.

“Utakuwa gumzo kwa mabaya. Watu watakukumbusha upo na mimi. Watakwambia nitakuharibia maisha yako. Mimi ni bomu ambalo hulipuka wakati wowote. Naa..” “Please stop.” Malcom akamtaka atulie. “Mimi sijui ulikuwa unakuwa na kina nani kwenye maisha yako. Sijui wamekuwa wakikwambia nini! Lakini nipo hapa nikiwa nakufahamu Maya. Nimechagua kuwa hapa kwa kuwa ni nafasi niliyoitamani muda mrefu sana, lakini sikuwahi hata kufikiria kama naweza kubahatika kuwa hapa na wewe.” Malcom aliongea taratibu tu.

“Na kama kuchambuliwa hadharani ndio garama yangu yakulipa ili kuwa na wewe, nipo tayari.” “Wata..” “Naomba niangalie mimi, Maya.” Akamkatisha. Maya akajifuta machozi na kumwangalia. “Tafadhali, naomba kwa mara ya kwanza kwenye maisha yako, angalia karibu. Hapa. Halafu funga masikio, macho na muda wako kwa watu wasiojalisha kwenye maisha yako. Anza taratibu, utajikuta unazoea hayo maisha. Acha waandike watakacho. Acha wakufuatilie. Acha wakuhesabie siku zilizobaki kurudi kwenye madawa.” “Kumbe unajua!?” Maya akashangaa, hakutegemea.

Malcom akamgeukia vizuri. “Naomba uamini nipo hapa nikiwa nakufahamu Maya. Sitaki pesa yako wala umaarufu. Nataka kuwa na wewe kama Maya, basi.” Ilimgusa sana Maya. “Asante Mal. Kwa hiyo wakiniuliza juu yako, nisijibu?” Maya akauliza taratibu tu. “Mpaka iwe muhimu na ukiwa na uhakika. Usikimbilie kujibu mtandaoni. Jipe muda kujiridhisha na kila kitu. Ndipo ujipe muda wa kujibu na unaweza pia usiwajibu. Huwajibiki kwao. Wakati mwingine ukimya au kunyamaza ni jibu kubwa na la hekima.” Maya akavuta pumzi kwa nguvu, akajiegemeza nyuma.

Malcom akabaki akimwangalia vile alivyofunga macho. “Njaa inauma!” Maya akasikika ametulia, akafungua macho na kumtizama Malcom, macho yakagongana, akacheka. “Najua sehemu wanayouza kifungua kinywa kizuri sana. Twende.” Malcom akaondoa gari. Maya akawa kimya akimtafakari Malcom na maneno yake.

Malcom hakuwa tajiri kama wao, lakini alikuwa kijana aliyesoma vizuri na mwenye kazi yakuheshimika kwenye jamii. Japokuwa hakuwa akipata mshahara kama Maya, wala hana hata gari inayoendana na Maya, lakini alijawa hekima na utulivu wa aina yake.

Huyu Maya ashachezewa sana. Akipita popote au akionekana popote, huna haja yakujiuliza mwili wake ndani ukoje, ni kwenda tu mtandaoni na kuangalia kama ni matiti au sehemu yeyote ya ndani ya Maya, utaona tu. Alianikwa vilivyo.

~~~~~~~~~~~~~~~~~~~~~~~~~~~~

Alipotoka tu, Tunda akamsikia bibi Cote akiongea kwenye simu. “Maya ametoka hapa sasa hivi. Hakikisha anarudi nyumbani leo, tena in one peace. I don’t want any surprises.” Akakata simu. Tunda akajua ndio unatumwa ulinzi kumfuatilia Maya na Malcom.

Malcom&Maya Hadharani Pamoja.

alcom alimpeleka mpaka kwenye mgahawa wakawaida sana. Lakini waliuza ‘Butter tarts’ nzuri sana. “Najua hapaendani na hadhi yako, lakini hakuna sehemu utapata butter tarts nzuri hapa Norfolks, kama hapa.” Maya akacheka taratibu. “It’s okay.” Malcom akamtizama kama anayejua anajikaza tu kuwepo pale. “Kweli mimi nipo sawa, Mal. Tuingie na kuagiza chochote ulichokuwa unakifikiria.” “Kama ndio hivyo sawa. Nakuahidi hutajuta.” “Okay.” Wakatafuta sehemu ya kuegesha, kitu ambacho Maya hakuzoea. Alishazoea kufika kwenye mlango wa mahoteli makubwa, watu wanakwenda kuchukua gari yake na kutafuta wao sehemu ya kuiweka. Akitoka hapo, gari yake inaletwa palepale mlangoni.

Sasa siku hiyo walikwenda kuegesha gari wenyewe. Gari ya kawaida sana. Maya hakuwahi kupanda gari ya hadhi ya chini kama ile. Malcom akabaki kuwa muungwana. Akamfungulia mlango. Wakaanza kutembea kurudi sehemu ulipo huo mgahawa. Akamfungulia na mlango, Maya akapita akimshukuru. Maya akaanza kuangaza ili kutafuta meza ili akae. “Hapa wanapanga mstari unachukua kahawa yako kama unataka kahawa na kitafunwa. Lakini naweza kukuchukulia.” Malcom akamnong’oneza. “Sikujua!” Wakacheka kidogo.

“Niambie ni nini unataka, nitakuletea.” Maya alizoea chakula kuletwa mpaka mezani. “No. It’s okay. Twende wote.” “Unauhakika? Mimi naweza kwenda kuchukua na kukuletea.” “Nashukuru. Lakini twende wote.” Wakasogea walipokuwa watu na wengine wakishangaa kumuona Maya hapo, tena wakiongozana na Malcom! Ulikuwa mgahawa mdogo tu, lakini ulijaza watu wanaoonekana wanawahi makazini.

“Watu wengi wanapapenda hapa. Lakini kwa kununua vitafunio na kahawa, na kuondoka. Sio kukaa.” “Lakini sisi tutakaa. Si ndiyo?” “Labda kama unataka tuondoke, naweza kubeba.” Malcom akajua pengine yale mazingira yamemshinda. “Hapana. Mimi nipo sawa tu. Tunaweza kukaa, tukala.” “Unauhakika?” “Tafadhali usiwe na wasiwasi na mimi. Nipo sawa kabisa. Unakumbuka maisha niliyoishi ya club?” “Unaongelea zile club zenu za mapesa mengi?” Maya akacheka taratibu.

“Naomba usiwe na wasiwasi. Nimefurahia kuwa hapa na wewe.” “Kweli?” Malcom akauliza na kumshika mkono. Maya akacheka kwa deko huku akitingisha kichwa. “Nimefurahi sana. Sijali tulipo, ilimradi tupo wote. Unaniheshimu Malcom. Kwa hilo linaniongezea ujasiri.” Malcom akatoa tabasamu la kuridhika na kumvuta mkono karibu akauweka kwapani. Maya akajiegemeza kidogo begani. Wakaendelea kusogea na mstari wote kimya. Kama hawajui kama kuna watu hapo wanawatizama.

Walifika mbele ya muhudumu, hata muhudumu akashangaa. “Nimekufananisha au kweli ni wewe!?” Maya akacheka kidogo. “Umenifananisha na nani?” “Maya Cote!” Maya akacheka kidogo. “Ni mimi.” “Wao. Ni mzuri zaidi in personal kuliko kwenye picha.” Akacheka zaidi. “Asante. Mimi nitakula kile atakachokula Malcom.” Akaongea huku akimtizama Malcom. Malcom akamtizama Maya na kurudisha macho kwa yule dada ambaye bado alikuwa akimshangaa Maya.

Malcom akakohoa kidogo kama kumshtua. “Yuko wapi Roy?” Yule mrembo akamuuliza Malcom. “Leo nimeamua kupunguza kelele humu ndani.” Wakacheka na kutaniana kidogo ndipo wakaagiza vyakula vya wote wawili, wakasogea pembeni wakisubiria namba yao itajwe wachukue chakula chao.

“Inamaana wewe hapa unafahamiana na watu wote na umeshakula kila kitu?” “Yule msichana ni mtoto wa huyu mwenye mgahawa. Mimi na Roy nilazima tupite hapa karibu kila siku kununu vitafunio kama si kukaa na kuanza kula hapahapa.” “Lakini huyu msichana ni mzuri!” Malcom akacheka. “Hatuji hapa sababu yake, Maya! Baba yake ni mcheshi zaidi. Na Roy anawapenda sana wazazi wake. Akija ni lazima awachokoze.” Maya akatabasamu na kunyamaza.

Akamvuta tena mkono na kuushika. “Na ndiyo. Nimeshakula hapa karibu kila kitu. Ila napenda ‘butter tarts’ zao zaidi. Nzuri.” Maya akamwangalia na kumtolea tabasamu. Kisha akarudisha macho kwenye ubao mkubwa wa menu uliokuwa umetundikwa mbele yao.

Baada ya muda ikatajwa namba yao, Malcom akaenda kuchukua chakula chao ndipo wakaenda kutafuta meza iliyokuwa pembeni kabisa kwenye ukuta wa kioo. Kwa hiyo walikuwa wakiona wapita njia, nje. Maya akaonja hizo butter tarts zilizokuwa zikisifiwa. Malcom akabaki akimwangalia ili asome sura yake aone kama atapenda. Akamuona anatafuna huku akisikilizia utamu wake, akameza na kucheka. “Ni kweli ni nzuri.” “Nilijua tu utapenda.” Wakacheka na kuendelea kula.

“Unafikiri siku nyingine unaweza kurudi hapa?”  Maya akacheka kama anayefikiria huku akiangaza kulia na kushoto. “Labda niwe na wewe. Lakini si peke yangu.” “Kwa nini? Nilifikiri umependa hizi butter!” Maya akacheka kidogo. “Yule aliyetuhudumia jana kwa chakula cha usiku pale nyumbani, anaitwa Gino. Anakipaji cha ajabu sana. Unaona hii butter tarts?” “Ehe!” “Nikiichukua hii na kumpelekea Gino, nikamwambia naitaka hii kwa kifungua kinywa kesho asubuhi, atatengeneza kitu kama hiki au kinachofanana na hiki, ila kizuri zaidi.” Malcom akashangaa.

“Haiwezekani Maya!” “Kabisa. Ndio maana sisi tukitoka kwenda kula, sio sababu ya chakula, ni kwa sababu ya matembezi tu. Ila tunaye mpishi mzuri sana. Lakini hiyo sio sababu yakutorudi hapa.” Maya akanywa kahawa kidogo. “Ni nini?” “Kwa wakati huu, zaidi sifa yangu. Baada ya kutulia sasa hivi na kusikia watu wazima na vijana waliotulia kama wewe wanazungumza vipi juu yangu. Au wananitazamaje, imenitoa ujasiri kabisa Malcom.” Malcom akatulia kidogo akimtizama.

“Unajua zamani nilizungukwa na watoto au vijana wadogo au tuseme watu ambao wote hatukuwa tukiitizama jamii kwa macho haya niliyonayo sasa hivi. Nilikuwa nikiishi katika ulimwengu tofauti na huu ulimwengu ninao ishi sasa hivi.” “Ulimwengu wa sasa ukoje?” Akauliza taratibu Malcom. “Ulimwengu wa kuwajibika katika kila eneo la maisha yangu. Kwa maneno na vitendo. Nililelewa na Papa akiwa ananipa kila kitu. Kazi yangu ilikuwa ni matumizi tu. Sikujali ni nani anayehusika au kuumia kwa kuwepo kwenye maisha yangu.”

“Sasa, sasa hivi nimetulia ndipo naangalia madhara niliyoacha kwenye familia za watu!” Maya akajifuta machozi. “Wapo wakina mama wanao nilaumu kwa vijana wao. Wanasema mimi nilikuwa nikiwapa watoto wao unga.” “Kivipi?” “Sijui Malcom! Lakini ndivyo wanavyoniambia. Sasa sijui nilipokuwa nikinunua na wao walikuwa wakitumia ya kwangu! Mimi sijui.” Maya akajifuta machozi.

“Haya, wapo vijana kama wewe.” “Ndio wakoje hao?” “Wanao jiheshimu. Walio tulia. Waliokwenda shule na kutulia na kazi zao. Wananikimbia Malcom. Hawataki niwe karibu nao kabisa.” Malcom akakunja uso. “Subiri kwanza Maya. Hilo la vijana wanao kukwepa, umejua kutokana na watu wangapi uliozungumza nao?” Malcom akauliza taratibu tu. “Kwa sababu usije kuchukua mawazo ya watu wawili au mmoja, ukayaweka moyoni kuwa ni mawazo ya watu wote.” Maya akabaki kama anafikiria.

“Maya?” “Unakumbuka nilikwambia kuna kitu nilitaka kumwambia Tunda kabla hajatekwa? Ulipokuja nyumbani wakati unaondoka, ukaniuliza kama nilimwambia. Nikakwambia bado. Unakumbuka?” “Nakumbuka.” Malcom akaitika. “Basi jana niliporudi ndani baada ya kukusindikiza, nilipata muda na Nana, Tunda pamoja na Net. Nikazungumza nao. Unataka na wewe nikwambie?” Maya akauliza kwa upendo.

“Ningependa kujua na mimi.” Malcom naye akajibu kwa kujali. “Kuna mtu. Nilimuomba tukutane sehemu kwa chakula cha mchana.” “Kama date?” Malcom akauliza kwa wivu kidogo. “Hapana. Nilitaka tuzungumzie maswala ya harusi. Ni kipindi namsaidia Tunda na maandalizi yake ya harusi. Sasa yeye anautaalamu na mambo fulani. Nikataka tupange naye, tukishakubaliana ndipo nimshirikishe Tunda.” Maya akanyamaza kidogo.

“Nini kilitokea?” Malcom akauliza baada ya kumuona Maya amenyamaza kama anayeshindana na machozi. “Pale ndipo alipowakilisha mawazo ya wengi na watu wanavyonifikiria.” Malcom akakunja uso kidogo. “Aliniambia maneno mabaya sana. Kwa kifupi hakutaka hata kuwa karibu na mimi au hata kuonekana na mimi hadharani ili kwanza nisimuharibie sifa na baadaye nisije nikamuharibu.” “Kivipi!?” Malcom akauliza tena.

“Alisema huwa nina mtindo wa kuanza na vijana vizuri, wakiwa vijana wazuri tu na malengo makubwa ya maisha. Kisha nawaharibia maisha na kuwageuza mateja. Wanashindwa kuendelea na shule au hata kazi.” “Ouch!” Malcom akafanya kama aliyeumia. Maya akacheka huku akifuta machozi.

“Alitumia maneno mabaya sana akiwakilisha kile ninafanya na vile nilivyo. Kuwa ni kama bomu. Ukilishika ni dogo na halionekani kama halina madhara, lakini mwishoe nalipuka vibaya sana na kuathiri wengi. Kwa kifupi alikataa kukutana na mimi.” “Unajua Maya, kuna watu wanauwezo mkubwa sana wakuumiza watu, zaidi kwa maneno. Simjui ni nani na hao vijana anao walalamikia ni kina nani lakini hata mimi kuna kipindi nilitoka chini ya uangalizi wa wazazi nikatupwa kwenye ulimwengu huuhuu wanaoishi wengine na kuishia kufanya maamuzi mabaya.” Malcom akaendelea.

“Yapo makosa nilifanya kama mwanadamu, na sina mtu wakumlaumu kwayo. Siwezi nikageuka nyuma na kumnyooshea mtu kidole kwamba amenisababisha kutenda niliyotenda. Sijui kama unanielewa?” Malcom akaendelea. “Nimelelewa na mama kiasi na sehemu kubwa ni bibi. Wakati nikiishi nao au wakati nikiishi na bibi, hatukuwa matajiri, lakini alijitahidi kuwekeza kwangu kiasi ya kwamba nilitoka nyumbani nikijua mema na mabaya. Niliyoyafanya, nilijua ni nini nafanya. Sina mtu wakumlaumu.”

“Mzazi unayemsikia anamlaumu mtoto wa mwengine kwa ajili ya mtoto wake, huyo anatatizo tu.” Maya akatabasamu. “Kweli. Unawezaje kumlaumu mtoto mwingine kwa ajili ya kuharibika kwa mtoto wako? Inamaana hukumwandaa mtoto wako kukutana na watu wa namna hiyo.” Malcom akajiweka sawa.

“Wote tunatupwa kwenye ulimwengu uliojaa wema na ubaya. Ni jukumu langu mimi kama baba, kumuandaa kijana wangu kukabiliana na kila hali ndipo niwe huru kumruhusu kutoka nyumbani.” Malcom akaendelea. Taratibu tu. “Huwezi kumruhusu mtoto asiye na maadili hata madogo tu nyumbani, kwenda kukutana na marafiki ambao hata huwafahamu! Nyumbani tu anashindwa kufanya maamuzi sahihi, unamwamini vipi akiwa club? Ataweza vipi kushinda vishawishi vya huko!” Maya akainama.

“Huko ni kujifariji katika kushindwa kwao. Kila mtu anatakiwa kuwajibika kwa maamuzi yake mabaya. Wewe unagarama ya kulipa kwa maisha uliyoishi zamani, lakini sio kwa vijana waliokuwa wakitaka kutumia na wewe madawa! Huo ni uongo na wanatafuta kukubebesha mzigo kwa kushindwa kwao.” “Sasa wewe ungefanyaje?” Maya akauliza. “Kama hivyo wewe. Kukubali kuwa ulikosa na kufanya maamuzi mabaya yaliyokupelekea kuishi kama vile. Nilisoma post yako moja, na nilisikia mahojiano yako wakati ulipotoka rehab. Ukaomba msamaha hata kwa mabinti wadogo waliokua na ambao bado wanakuangalia wewe kama msichana kwenye jamii. Unakumbuka?” Malcom akamuuliza Maya, akatingisha kichwa.

“Ulisihi mabinti vizuri sana. Ukawafundisha na kuwaambia yale sio maisha mazuri kwa mtu yeyote kuyaishi na wanatakiwa kutumia kila fulsa Mungu anayowapa, hata ikiwa ndogo ya namna gani, kufanya kwa bidii, na kusaidia wengine. Na mengine mengi. Basi. Endelea na maisha kama mtu mwingine ila safari hii ukiwa makini zaidi, ili usirudi ulipoanguka.” Maya akanyamaza.

“Huwezi kuruhusu watu wenye roho mbaya wakuumize Maya. Lini na wewe utaishi kile ulichowaambia mabinti wengine waishi kama utajifungia ndani?” “Sijui Malcom!” “Hapana. Sasa hivi ndio unatakiwa uishi na kugusa maisha ya watu bila woga. Tena sasa hivi ni rahisi ukiwa unajua kuwa ulikuwa ukifanyiwa makusudi na watu ili kukuweka kwenye hiyo hali. Basi, chagua watu sahihi wa kukuzunguka na hakikisha unakuwa mahali sahihi. Fanya kile unachoweza. Huna haja yakujibu kila shutuma. Acha muda ujibu shutuma, zaidi za kijinga.” Maya akaanza kujisikia vizuri.

Jingine Tena kwa Maya!

akati wapo katikati ya mazungumzo na ndio wanaanza tu vicheko hata hawajui ni nani yupo pale akiwaangalia. Ni kama walikuwa kwenye ulimwengu wao peke yao. Hawajali watu wengine. Maya akashangaa kitoto cha kiume kimesogea pale mezani. “Hey!” Maya akamsalimia kwa upendo na tabasamu. Mara akasogea mdada mwingine, mrembo tu. “Nilikwambia usiwe unakimbia!” “Acha kumgombeza mtoto!” Maya akashangaa Malcom anamjibu huyo mrembo kwa hasira. Akahisi ndiye mama watoto wake. “Ulitaka nimwambieje!? Kama kila kitu ninachozungumza naye ni kosa, mbona sijaona leo sura yako wewe unayejidai ni baba mzuri? Leo ilikuwa siku yako ya kuja kumchukua, mbona hukuja?” “Nilimtuma Roy aje amchukue!” Malcom akajibu.

“Kwani Malcom ndiye baba yake?” “Tokea lini imekuwa tatizo kwa Roy kumchukua Ethan?” Yule dada akavuta kiti palepale kwenye meza yao akakaa. “Utalala na wasichana matajiri wangapi ili kuweza kufanya kazi yako?” “Tafadhali usianze Zoe. Tafadhali sana.” “Hapana. Mimi nataka tu kujua. Utalala nao wangapi?” Maya akaona awapishe.

“Ni sawa kusogea na Ethan pale pembeni ili kuwapa nafasi? Sitakwenda naye mbali. Tutakuwa hapo nje tu.” “Unafikiri wewe ni tofauti na kina Vic, Gina, Renee, Emily na wengineo alio lala nao huyu?” Zoe mama mtoto wa Malcom akamuuliza Maya kwa kumkejeli. Maya akamwangalia Malcom. “Tafadhali acha kumchanganya Maya, kwa shutuma zako ambazo huna hata..” “Kama unafikiri mimi natupa shutuma tu, nenda kazungumze na warembo wenzako wakitajiri, uone kama wote hawajamuona huyu akiwa uchi, kwa kisingizio cha kazi.”

“Ni sawa nikitoka na mtoto?” Maya akasisitiza swali lake. “Sikuamini, na wala sikujui zaidi ya kukuona kwenye mitandao ukiwa uchi na umelewa.”  Zoe akammkatalia mtoto wake kwa kumkashifu. “Tatizo lako ni nini Zoe!?” Maya akatoa tabasamu akainama kidogo. Akachukua pochi yake. Akaifungua palepale mbele ya Zoe. Akamwaga kila kitu pale mezani. “Hamna madawa humo ndani. Kwa hiyo kuwa na amani kuwa ninachotaka ni kutoka tu na Ethan hapa, wakati mkizungumza. Sio kumpa madawa. Na sitakuwa mbali na hapa. Ni hapo nje sehemu ambayo mtakuwa mkizungumza huku mkimuona Ethan. Unafikiri ni sawa?” Maya akawa ametulia hata Malcom hakutegemea.

“Hapana.” Akajibu Zoe kibabe. “Hata hivyo leo ni siku yangu na Ethan. Na kwa kuwa naona umeamua kuja kunitukana hapa mbele za watu, basi naomba Maya atoke na mtoto wangu, asisikie jinsi unavyozidi kunitukana na kunidhalilisha.” Malcom na yeye akaongea kwa msisitizo. “Asante Maya. Nitawafuata hapo nje baada ya muda mfupi sana.” Maya akamwangalia Ethan. “Unataka twende nje nikufundishe kitu?” Ethan kimya. “Nina uhakika hukijui. Twende, dad atakuja sasa hivi.” “Nenda na Maya, Ethan. Nitakuja sasa hivi.” “Okay.” Yule mtoto akakubali kutoka na Maya baada yakupata ruhusa kutoka kwa baba yake.

Maya akaanza kuokota vitu vyake pale mezani akirudisha kwenye pochi ili atoke na mtoto. “Na kwa taarifa yako tu, usifikiri wewe ni bora kuliko wanawake wengine wote ambao anawapitia huyu Malcom. Kazi yake ni kulala na warembo wenye majina kwenye jamii, ili kuwapeleleza. Usifikiri ni mapenzi.” Zoe akamwambia Maya, lakini wazi alionekana ameishiwa nguvu. Maya akacheka tu. Akamaliza kuweka kila kitu kwenye pochi akamgeukia Ethan aliyekuwa amesimama kimya akisikiliza wazazi wake. “Twende Ethan.” Akamshika mkono, wakatoka.

“Una miaka mingapi Ethan?” Akamuanza kwa kuwa alimuona Ethan ameinama. “Minne.” Akajibu Ethan akionekana amenyong’onyea, akajua pengine alikuja na mama yake akiwa anamgombeza huko njiani au kuna lililotokea huko ndio maana akapooza hivyo. “Wao! Kumbe wewe ni kaka mkubwa hivyo!” Ethan kimya. “Umekula?” Akatingisha kichwa kukubali. “Niangalie halafu nikuonyeshe kitu.” Ethan akamwangalia. “Umeniona sasa hivi?” Akatingisha kichwa kukubali. “Niangalie sasa hivi uniambie tofauti ni nini?” Ethan akamwangalia kwa makini.

Maya akainama ili amfikie. “Nini?” “Nyusi hii ipo chini hii juu.” Maya akacheka. “Na hivi?” Ethan akamwangalia. “Unafanyaje hivyo!?” Ethan akamuuliza huku akianza kucheka. “Mimi nina super power ya sikio. Naweza kutingisha masikio.” “Umepata wapi huo uwezo?” Ethan akauliza. “Nimezaliwa nao. Jaribu na wewe.” Ethan akajaribu na kuishia kujicheka. “Unatingisha kichwa bwana, unatakiwa kuchezesha sikio tu.” Ethana akazidi kucheka akitingisha kichwa huku akimwambia Maya ameweza. “God, you are so Cute!” “Hata dad ananiambia hivyohivyo na anasema am too smart for my age.” Maya alicheka sana.

“Unafikiri ni nini kilimpelekea kusema hivyo?” “Naweza kumsoma mtu kwa kumwangalia tu.” “Haiwezekani Ethan!” “Na mimi ndio super power yangu.” Maya akacheka sana. Ethan alionekana mtoto mdogo lakini kweli anaakili. “Haya, nisome mimi uniambie.” Ethan akacheka sana. “You are so nice na sweet.” Ethan aliongea hivyo kuwa Maya ni mzuri na mwema sana huku akicheka na kumshangaza sana Maya. “Ethan!” “Kweli. Wewe ndivyo ulivyo.” Maya akabaki ameduaa. Akaanza kumfikiria yule mtoto na wazazi wake. Mama yake anaongea kila kitu mbele ya yule mtoto mwenye akili vile!

“Nafikiri umeshakutanishwa na Ethan.” “Anko Roy!” Ethan akamkimbilia, Maya akageuka. Roy akambeba na kumkumbatia kwa upendo na kumbusu. “Samahani kwa alichokwambia mama. Lakini ujue mimi nakupenda.” Ethan akamwambia Roy. “It’s okay Ethan. Unafikiri nimekasirika?” Roy akamuuliza huku amembeba. “Sijui!” Akajibu Ethan. “Hata kidogo. Leo ni lazima tukacheze hockey.” “Halafu tunaenda kwa grandma Pauline kula cookies na hot coco?”  Ethan akauliza. “Kabisa!” Akamjibu. “Yesss!”  Akashangilia  Ethan. Maya akacheka.

Roy akamsogelea. “Upo sawa?” “Ethan alikuwa akinishangaza vile alivyo smart kwa umri wake!” Alijibu Maya, akijua kabisa Roy anachouliza. “Na ninaondoka na Ethan.” Wote wakageuka. Malcom na Zoe wakawa wanatoka ndani. Wakawasikia tena. “Sisi tuna mipango na Ethan leo. Huwezi kumchukua.” Akajibu Malcom. “Unataka ukamzungushe mtoto na mwanamke wako ambaye hata jamii haimkubali!” “Niliposema sisi, namaanisha mimi na Roy. Huyo mtoto anasubiriwa nyumbani kwa kina Roy. Jioni mimi, Roy, mdogo wake Roy na baba yake Roy tunakwenda kucheza hockey. Baba yake Roy ameshaweka reservation kwenye huo uwanja. Na ndio maana Roy alikuja kumchukua ili ampeleke kwa grandma Pauline kwanza, amekuwa akimuulizia sana Ethan.” Akaongea Malcom kwa utaratibu kama anayeepusha shari.

“Kwa hiyo unaenda kumtupa kwa mama yake Roy!?” Akashangaa kwa ukali sana Zoe. “Tafadhali punguza sauti Zoe. Unamuogopesha Ethan bila sababu! Kwa nini unashindwa kuzungumza kawaida tu. Hatugombani.” “Nani amekwambia tunagombana?” Zoe akamjia juu. “Namuomba mtoto wangu Roy.” Akamsogelea Roy. “Come on Zoe! Ni siku ya leo tu! Mama anataka kumuona Ethan halafu jioni ndipo twende naye hockey. Kwa nini leo unakataa wakati jana usiku ulikuwa ukipiga kelele aje achukuliwe leo asubuhi na mapema kwa kuwa unamambo yako yakufanya?” “Ratiba imebadilika. Leo na mimi nataka muda na Ethan.” “Upo naye jumatatu mpaka ijumaa. Leo tu!?” Roy akauliza kwa kumshangaa sana Zoe huku amembeba Ethan.

“Nilikwambia acha kumng’ang’ania Ethan. Ni mtoto wa Malcom sio wako. Kinachokushinda na wewe kuzaa mtoto wako ni nini? Zaa na wewe mtoto wako umpelekee mama yako!” Akamnyang’anganya Ethan kwa nguvu. “Hiyo ni roho mbaya sana Zoe! Usifikiri unayemuumiza hapo ni Roy, unamwadhibu mtoto bila sababu! Kwa nini unafanya hivyo?” Malcom akamsogelea akiongea kwa kuumia na kwa tahadhari kama wanao mugopa. Maya akashangaa.

Ethan akaanza kulia. “Nataka kwenda kwa grandma Pauline. Nataka kuwa na dad na anko Roy, mami!” Akamuweka chini na kuanza kumvuta. Akashangaa Roy na Malcom wamenyamaza wanamwangalia tu. “Usilie Ethan, tutapanga wakati mwingine. Sawa Ethan?” Roy akajaribu kumtuliza, Malcom akabaki kama bubu. “Come on buddy!” Roy akaendelea kuwafuata kwa nyuma akimbembeleza Ethan. Huku Ethan akivutwa mkono na mama yake wakielekea sehemu yakuegesha magari. “Nipe tano?” Ethan aliendelea kulia tu. Roy akakimbilia mbele ya Zoe. “Naomba nisikilize Zoe. Niambie chochote unachotaka nitakupa. Ilimradi leo utuachie Ethan.” Zoe akasimama.

“Chochote?” Zoe akauliza kama anayefikiria. “Chochote.” Roy akamwakikishia. “Mmmh! Akafikiria.” Akamgeukia Malcom aliyekuwa amesimama kimya nyuma yao palepale walipomuacha amesimama kama aliyeonywa asisogee hata hatua moja. Malcom alikuwa mwekundu kama anayetamani kulia.

“Nataka jioni ya leo Malcom anisindikize kwenye harusi ya binamu yangu, kama..” “No way Zoe! Hapana.” Hapo Malcom akakataa. Zoe akamgeukia Roy. “Kuwa mtu unayefikiria Zoe! Nimekwambia usiku wa leo ndio tunakwenda kucheza hockey sisi wanaume. Sasa..” “Nawezaje kumuacha tena Ethan acheze na watu wengine halafu mimi mwenyewe nisiwepo?! Maana lengo ni na mimi niwe na mtoto wangu!” Akaingilia Malcom na kumkata Roy.

“Nitamuhitaji aje anichukue na ile gari yako wewe Roy, sio ule uchafu wake. Hakikisha yupo kwenye suti nyeusi. Saa kumi na moja kamili, awe amefika mlangoni kwangu ili saa 11:30 jioni tuwe kwenye harusi. Hatutakwenda kanisani. Ila kwenye sherehe tu.” Akaendelea kuongea Zoe kama hajamsikia Roy wala Malcom. “Hapana Roy.” Malcom akakataa. Ethan akazidi kulia. Roy akamtizama Ethan, akarudisha macho kwa Zoe. “Unataka avae suti nyeusi, na viatu gani?” Roy akamuuliza Zoe.

“Come on Roy!” Malcom akamlalamikia Roy. “Hakikisha unamuweka kwenye tabia yake njema. Na mwambie sihitaji mlinzi, ila mpenzi. Kwa hiyo unaelewa ninachomaanisha.” Akamkonyeza Roy na tabasamu usoni. “Mabusu na kukumbatiwa kila ninapohitaji.” “No way Zoe and Roy! Siwezi kumbusu na kum..” “Deal.” Roy akamkubalia Zoe kwa haraka kama asiyemsikia Malcom.

“Na usinitanie Roy. Ukimchukua Ethan sasa hivi, Malcom aje kwangu jioni. Akija Malcom kama yule!” Zoe akamnyooshea kidole Malcom pale aliposimama. “Ujue jumatatu yupo mbele ya hakimu. Na ujue ndio utakuwa mwisho..” “Acha kututisha Zoe. Nimekwambia Malcom atakuja kukuchukua jioni. Nipe Ethan.” Akamuachia mkono Ethan. Ethan akaenda kumbusu mkono Roy, kisha akamkimbilia baba yake. Malcom akambeba mtoto wake huku akifuta machozi.  “Na...” “No Zoe. Inatosha. Huwezi kuendelea kutoa vitisho wala matakwa mengine. Wewe ondoka.” “Fine.”  Akataka kuondoka Zoe, akamgeuka Malcom na tabasamu la ushindi.

“Sina pesa ya kwenda saluni kutengeneza nywele na kucha.” “Kwa hiyo?” Akamuuliza Malcom kwa hasira huku amembeba kwa kumkumbatia mtoto wake. “Ndio unipe! Tunatokaje nikiwa sijapendeza!?” “Unafikiri mimi naitoa wapi?” “Unamlala mtoto wa Cote, unakosaje pesa? Kwani wewe hakuhongi kama wenzako?” Maya alikuwa ni kama mwili umeishiwa nguvu, umepigwa na ganzi kama kilichompata Tunda mbele ya Vic na Renee.

“Unataka kiasi gani?” Akadakia Roy. “Ngoja nifikirie. Mmmh! Kucha dola 85, nywele dola 120 naaa..” “Nakupa dola 200, Zoe. Uondoke na usiongeze kitu kingine. Tafadhali.” Zoe akaanza kucheka. “Shida sana kuwa karibu na wanaume maskini kama nyinyi wawili! Dola 200 tu! Labda Miss Cote atabadilisha maisha yenu.” Zoe akavuta zile pesa kutoka mkononi kwa Roy, akaondoka huku akicheka. Wakabakishwa pale wote kimya. Wameduaa Maya akikumbuka maonyo ya bibi yake juu ya kutofungua moyo kwa haraka kwa Malcom. Akajicheka taratibu.

Hali ya Malcom ilikuwa imebadilika kabisa. Akabaki amemuinamia mtoto wake aliyekuwa bado amembeba, akaendelea kumsugua mgongoni. “Mimi naweza kuita dereva akaja kunichukua kunirudisha nyumbani.” Maya akavunja ukimya. Kimya. Akamsogelea Ethan pale alipokuwa amebebwa na baba yake, akamgusa taratibu mgongoni. Akageuka huku amejawa machozi. “Uwe na wakati mzuri kwa grandma Pauline, na kwenye hockey.” Akatingisha kichwa kukubali. Maya akampa tabasamu na kumfuta machozi.

“Bye Malcom.” Maya akamuaga kwa upole. Malcom alikuwa mwekundu mpaka masikio. Alibaki akimwangalia Maya. “Asante kwa kifungua kinywa.” Akaongeza Maya na tabasamu la kiuungwana lakini akisikika ndio anaaga moja kwa moja. Kimya. Maya akamgusa begani, na kuondoka.

~~~~~~~~~~~~~~~~~~~~~~~~~~~~

Mambo yanazidi kuchanganya. Ni kweli Maya analipa gharama ya maisha machafu aliyoishi zamani na kusubutu kumtoa tonge mdomoni. Malcom aliyekuwa na vigezo vyote, akamgusa moyo wake vilivyo! Naye ndio huyoooo!

Jeff yupo njiani kumfuata Ritha kudai haki yake. Kama amemudu kumuua mpenzi wake kwa ajili ya pesa, kwa Ritha je? Usipitwe na muendelezo...