is mine - ni Wangu! Part 1, Sehemu ya 17

S

iku ya jumapili Nanaa aliongozana na Antii kanisani kwao. Alikuwa anasali kanisa katoloki la mtakatifu Maximillian, mtaa wa Mwenge. Kweli Antii alikuwa mtu wa shuguli. Jumatatu mpaka jumatatu. Siku hizo za jumapili alikuwa na ratiba zisizoisha. Mara kwa mara alikuwa akienda kusalimia wagonjwa katika hospitali ya Mwananyamala.  Lakini mwishoni mwa mwezi anapolipwa mshahara wake, alijijengea tabia ya kununua baadhi ya vitu, kisha huenda navyo huko hospitalini Mwananyamala.  Hasa kwenye wodi ya wazazi na kugawa kama sadaka, kwa marafiki anaokuwa amejitengenezea akiwa anaenda kuwasalimia na kuomba nao.

Sasa jumapili hiyo iliangukia mwishoni mwa mwezi. Antii alikuwa akienda kutoa misaada hospitalini. Nanaa akaona ni jambo la kujifunza na yeye, ajiunge naye. Wakaongozana na kumsaidia kugawa vitu. Baada ya siku ndefu ya misa, huko kanisani na kutembelea wagonjwa hospitalini, walirudi wote wamechoka, wakajitupa kwenye kochi wakasinzia. 

Baada ya kurudi kutoka Marangu.

Waliwasili nyumbani mapema tu. Hata chakula cha mchana walikila nyumbani. Mama G akaanza kumsaka Nanaa kwa simu. Akawa hapatikaniki mchana kutwa. Aliiacha simu yake nyumbani, kwani iliishiwa chaji baada ya kusikiliza miziki usiku kucha akiwa analala. Akaona hamna haja ya kuibeba. Akaicha nyumbani kwa Antii. Asijue kama kuna mtu atamtafuta. “Kwanza nani? Kina mama G sasa hivi wapo Arusha na wanae wanafurahia utajiri Mungu aliowapa. Kaka atakuwa ameenda kumuona baba mkubwa. Hakuna wakunitafuta.” Nanaa akawaza na kuitupia simu yake kitandani na kuondoka.

Aliporudi nyumbani, akaiweka kwenye chaji pembeni yake, akalala. Asijue anavyotafutwa. Yupo ambaye alishachanganyikiwa tokea mama yake alipomkosa kwenye simu kwa mara ya kwanza walipofika tu nyumbani. Chini palikuwa hapakaliki, usingizi hauji. Kila mtu alikwenda kulala kupunguza uchovu wa safari na kuamka alfajiri siku hiyo, kumuwahi Nanaa jijini Dar. Walipokula tu, kila mtu akaelekea chumbani kwake kulala.

Mama G hakulala. Kila wakati Geb aliingia chumbani kwake na kumuulizia kama amempata Nanaa. “Hivi unajua hata dakika moja haijaisha tokea ulipoingia hapa chumbani na kuniuliza swali hilo hilo?” Geb akanyamaza, nakutoka. Baada ya dakika tano akarudi tena chumbani kwa mama yake. “Mimi naona upande hapa kitandani, uendelee kumpigia simu kwa kutumia simu yangu. Wakati mimi nalala kidogo. Akipokea, uniamshe.” “Sasa unalalaje mama kwenye hali kama hii!?” Geb akauliza kwa hasira na kulaumu. “Nimechoka Geb mwanangu. Nimepiga simu zaidi ya mara kumi. Na nimemuachia ujumbe, akiwasha simu yake tu, ataona ujumbe na atanipigia. Naomba tusubiri. Atapiga tu.” Geb akajilaza pembeni ya mama yake.

“Unaweza kukuta simu yake iliibiwa au hana pesa.” Mama G ndio alikuwa anapitiwa na usingizi. “Umeniamsha Geb jamani! Kwa nini unakosa subira bwana?” Mama G akalalamika. “Naomba uondoke na usirudi tena humu ndani mpaka nitakapokuita. Haya toka.” Akaamua kumfukuza. Geb akatoka. Lakini hata mama G mwenyewe akashindwa kulala kwa kumuhurumia. Akatoka na yeye. Akamkuta amekaa sebleni peke yake. “Atapiga. Usiwe na wasiwasi.” Akamfariji wakati anakaa. “Njoo ulale hapa karibu yangu. Sitakuongelesha tena.” Mama G akacheka. Akaenda kweli kulala kwenye kochi refu alilokuwa amekaa Geb.

*******************************************************

Alishtuka kutoka usingizini, akaiwasha simu akiwa amejilaza pale pale kwenye kochi. Mara simu ya mama G, ikaingia. Akaipokea kwa haraka na sauti ya kiusingizi, kabla hajamwamsha na Antii aliyekuwa amelala, kwenye kochi la pembeni yake. “Mama!” “Maajabu, unalala saa hizi! Kwani wewe mgonjwa?” Nanaa akacheka kidogo. “Mwenzio nilikuwa hospitalini kuona wagonjwa na kuomba nao. Nilimsindikiza Antii.” “Bora. Tumerudi.” “Poleni na safari.” “Asante. Lakini nataka tuzungumze Nanaa.” “Unataka nije sasa hivi!? Naona giza limeshaanza kuingia. Nitakuja kesho.” Nanaa asijue jinsi alivyokuwa akisubiriwa na kutafutwa kwa muda mrefu.

“Hapana. Njoo leo. Tena sasa hivi. Chukua taksii mimi nitalipa.” Nanaa akaanza kucheka. “Sasa unacheka nini?” “Mwenzio huko bado sijafikia. Yaani nizungushwe na taksii hapa mjini!? Kwani daladala zimeisha? Nakuja, lakini si kwa taksii.” Mama G akaanza kucheka. “Mimi nitalipia bwana. Chukua taksii Nanaa.” “Utanifanya nisilale usiku bure. Niwe na kazi ya kuota usiku kucha. Acha tu nipande daladala.” Mama G akacheka tena. “Nanaa wewe mtundu sana. Sasa kwa nini uote?” “Si kupanda taksii! Yaani eti Nanaa ajikute tu amepanda kwenye taksii! Halafu anaendeshwa na mtu atakayemlipa baadaye! Mama wewe hunitakii mema.” “Si mimi nitalipa?” “Acha tu nije na daladala mama yangu. Nishazoea.” “Usichelewe sasa.” “Wewe unanijua. Nusu saa tu, nitakuwa hapo. Niombee usalama tu huko barabarani.” Wakacheka kidogo. Wakaagana.

*******************************************************

Akaingia kuoga. Akabadilisha nguo. Akavaa gauni la kawaida tu refu mpaka chini. Mtoto huyu wa kichaga ni wa ajabu. Umbo lake la tofauti. Alipendeza na gauni lake la kawaida tu. Mikono mifupi mpaka chini kidogo ya mabega. Alijaza gauni hilo kwenye maeneo ambayo ungependa kutizama. Akatoka. Antii alikuwa anakoroma. Akaanza kucheka. “Nanaa unanicheka?” “Sasa ulalaji gani huo wa kukoroma hivyo Antii jamani!?” “Nimechoka bwana. Mbona umetokelezea? Unaenda kwa James?” 

Ikabidi Nanaa akae chini amuelezee stori ya Mama G, na wanae. Akaeleza kwa kifupi mpaka simu ya mama G aliyompigia muda mfupi uliopita, kutaka kufika mara moja pale kwao ili wazungumze. “Kwa hiyo naweza kurudi na mabegi yangu.” “Wewe njoo nayo tu.” Wakaagana, Nanaa akatoka akiwa na furaha.

Kwa Geb!

Ilikuwa siku ya jumapili. Hakupata shida ya kupata daladala. Akapanda daladala zilizomfikisha mpaka kituo kilichokuwepo karibu na nyumbani kwa Geb. Tabata Barakuda. Akatembea mpaka getini. Akabonyeza kengele. Mlinzi akamuuliza kwa kupitia spika iliyokuwepo kwenye nguzo nje, pembeni ya geti. “Naitwa Nanaa. Mama G, ananitegemea huko ndani.” “Subiri.” Mlinzi alimjibu kwa kutumia spika hiyo. Nanaa akajua ni mpaka apige simu ndani, akiruhusiwa ndipo atamfungulia geti.

Alisimama pale kwa muda mfupi tu, akasikia geti dogo likifunguliwa. Akasogea akijua ni mlinzi. Macho yake yakagongana na Geb. Akashtuka sana, akarudi nyuma kidogo. Hakutegemea kuiona sura ya baba mwenye nyumba getini. Kwani haikuwa kaiwada ya hapo. Unafunguliwa geti na kuingia ndani. Utakutana na wenyeji ndani ya nyumba. Sio ufuatwe nje, getini.

 Akababaika sana huku Geb akimwangalia. “Samahani nimekuja mida hii. Najua ni usiku. Na giza limeingia. Mmetoka safari, mmechoka. Lakini Mama ndiye aliyeniita. Nilimwambia nije kesho, lakini amesema nije tu leo. Nitajitahidi nisikae sana. Sitachelewa kutoka ili na nyinyi mpate muda wa kupumzika.” Nanaa aliongea kwa muda mrefu, akijitetea, huku Geb akimwangalia. 

Geb alijua amepaniki kumuona pale. “Lakini naweza kurudi tena hata kesho. Mapema kidogo. Au nitamwambia mama tuzungumze tu kwa simu.” Nanaa akendelea tena akionyesha kutaka kuondoka. “Hamna shida. Nimefurahi kukuona. Karibu ndani.” Kidogo Nanaa akatulia akifikiria jibu la Geb huku akimwangalia kutaka uhakika na alichomwambia.

Alikunja uso kidogo. Geb akamuona. Pale nje ya geti lake, Geb alijengea mataa makubwa yenye mwanga mkali, mweupe kwa ajili ya usalama. “Karibu ndani.” Akampisha getini. “Asante.” Akaingia ndani akiwa na wasiwasi. Akili zake zilishindwa hata kufikiria kwa nini Geb yupo pale. Na kwa nini yeye ndio anamfungulia geti na sio mlinzi. “Labda kwa kuwa ni usiku sana.” Nanaa akawaza. Palikuwa na umbali kidogo kutoka getini mpaka kufikia nyumba. 

Akanyanyua uso kumtizama wakati wakitembea. Geb naye akamwangalia. “Pole na safari.” Ndilo neno lililofanikiwa kutoka tena, mdomoni kwa Nanaa. “Asante.” Geb akajibu, wakaendelea kutembea kuelekea ndani

*******************************************************

Alikuta watu wote sebleni. Kidogo akaingiwa na wasiwasi. “Nilijua mtarudi kesho!” Nanaa aliongea huku akimsogelea mama G taratibu. “Tuliahirisha. Sababu yako.” Nanaa akaanza kucheka taratibu. “Ulinimiss?” Alimnong’oneza mama G, wakati anakaa. Mama G, akacheka kidogo. “Muone!” “Sasa kwa nini hamkwenda kutembea Arusha? Ungepata sababu yakuniletea zawadi.” “Hata hivyo nimekuletea zawadi.” “Mmmh! Unanidanganya mama kunirusha roho!” “Kweli.” “Zawadi gani ya kutoka hapo Moshi?” “Utaiona. Ngoja kwanza tuzungumze.” Nanaa akaangalia wengine, akaona wametulia wanawasikiliza wao. Hapakuwa na kuangalia tv. Kwanza haikuwa hata imewashwa. Akaingiwa hofu. Akatulia. 

“Mbona sasa umeingiwa woga?” Mama G, alimwangalia Nanaa alishapooza. “Sijui.” Nanaa alijibu kwa upole. “Wala usiogope Nanaa. Ni mambo machache tu yakuwekana sawa.” Nanaa akajiweka sawa. “Hatukufurahia jinsi ulivyoondoka na kutuacha Marangu.” Nanaa aliinama. “Huwa tunazungumza sana mimi na wewe. Tena mara nyingine tunaagana kwenda kulala, lakini ukifika chumbani ukikumbuka kitu, unanipigia simu. Tunazungumza hata lisaa, ndipo tunaagana tena. Kwa nini uliondoka Marangu bila kunijulisha wakati tulipeana mipango mingi sana mimi na wewe?” “Kaka…” Nanaa akasita, kisha akaanza tena kwa kujirudi.

 “Nilikosea mama. Lakini ni maamuzi yalikuwa ya haraka tukashauriana na kaka niondoke tu. Lakini mama, nia ilikuwa nzuri tu. Kuleta amani. Sikuwa na nia mbaya. Kama nilikosea, au kama mimi na kaka tulikosea kuamua vile. Naomba radhi, nilikosa. Mtusamehe.” Tayari machozi yalishaanza kumtoka Nanaa. Kama alivyomwesi kucheka, ndivyo alivyokuwa mwepesi kulia. Hisia zake zilikuwa karibu sana.

Wote wakanyamaza wakisutwa moyoni. Nanaa alijirudi, yeye ndio akawa anawaomba msamaha. “Nilifanya maamuzi ya haraka, mama yangu. Halafu sikutaka mimi ndio niwe sababu ya kuharibika jambo zuri kama lile. Ndio maana nikaamua kuondoka kwa haraka. Kama nilikosea, naombeni mnisamehe.” “Nia ilikuwa nzuri Nanaa. Lakini kulikuwa na njia nyingine ya kuleta amani, kuliko ulivyoondoka.” “Kwani niliharibu zaidi?” Nanaa akauliza kwa upole. “Ndiyo Nanaa.” Mama G akajibu.

“Oooh! Naomba nisamehe mama yangu.” Nanaa akamshika mkono. “Nisamehe mama. Sikukusudia kuwaudhi.” “Mimi ni mama yako Nanaa. Lazima ujifunze kuniambia chochote kile.” “Nilifikiria hivyo mama. Lakini nikawa hata sijui nikwambie nini. Nilishika simu mara kadhaa nikitaka kukupigia, lakini nikashindwa. Nikasema nikutumie ujumbe ili nikuombe ushauri. Niliandika jumbe karibia tatu. Nikaishia kuzifuta tu. Nilishindwa nilikuwa sijui nitakwambia nini! Wazi nilijua mimi ndio tatizo mama yangu. Mimi ni mpitaji tu hapa kwenu. Na tokea nimefika hapa kwenu, nilichokikuta kikubwa ni amani. Sijawahi kusikia hata kupishana kwa maneno kati yenu. Mimi huwa najijua mama. Au kama mama mkubwa alivyosema, mimi ni tatizo. Kila ninapoenda lazima kuwe na tatizo. Nikajua nikiondoka, utakuta amani. Na wewe upate wakati mzuri wa kufurahia na kusherehekea. Sikukusudia baya mama. Nimekosa, naomba mnisamehe.” Nanaa alikuwa akiongea kwa kunyenyekea huku akilia.

 “Hapana Nanaa. Usikubali huo uongo. Wewe sio tatizo. Umekuwa faraja kubwa sana hapa kwetu. Umeongeza kitu kingine kati yetu. Kwanza nimehesabu ni kama nimepata mtoto mwingine.” Nanaa akatabasamu huku anafuta machozi. “Kweli kabisa. Wote tumekuelewa. Na pole na yote yaliyokukuta huko njiani mpaka ulipofika hotelini na kukufanya uondoke.” Nanaa alinyamaza akabaki ameinama huku anafuta machozi yaliyokuwa yakiendelea kutoka.

*******************************************************

 Simu ya Nanaa ikaanza kuita. Akaingalia kwa muda. Akafuta machozi akaipokea. “Ulifika salama? Maana usingizi umeniishia ndio nikakumbuka umeniaga unakwenda Tabata na utarudi na mizigo.” Nanaa akacheka. “Nilifika salama. Pole na uchovu.” “Asante. Niliamka mapema sana.” “Nikufuate na gari?” “Wala usihangaike. Wewe pumzika tu. Hata hivyo sio mizigo mingi Antii. Nitapandisha tu kwenye daladala. Ila usilale tena, ukanifungia mlango.” Antii alisika akicheka. “Nimekwambia usingizi umeisha. Utanikuta nipo macho nasafisha na kumwagilia mboga zangu.” “Usiku huu!?” Nanaa akashangaa kwa sauti huku akiangalia muda kwenye simu yake. “Si unataka nikusubiri wewe?” Nanaa akacheka. “Haya mwagilia. Nakuja muda sio mrefu, sitachelewa.” Wakakata simu.

*******************************************************

 “Kwa hiyo mama umenisamehe?” Nanaa alivunja ukimya. “Yameisha Nanaa.” “Basi nimefurahi. Siku nyingine nitakwambia. Sitaondoka bila kukuaga.” Mama G, akatabasamu. “Na wengine naomba mnisamehe. Nilikosea.” Geb, Danny, Grace akiwa amempakata Fili walikuwa kimya wamekaa wakiwasikiliza.

 “Mimi naelewa Nanaa. Pole na wewe.” Grace akaongeza. Nanaa akatabasamu akainama. “Unajua Nanaa, mimi huwa sio muongeaji sana. Na kukiwa na hali ya kutokuwa na amani, ndio kabisaa. Huwa siwezi kabisa kuongea. Nikijitahidi sana, nikulia basi. Maneno haya machache huwa yanaishaga kabisa kila panapakuwa hamna amani. Kwa hiyo wakati mwingine unaponiona nimenyamaza, sio kwa kuwa sijui au sielewi kinachoendelea, ila ni kwa kuwa naishiwa. Sijui niseme naishiwa nguvu! Sijui niseme nini! Lakini kunyamaza kwangu hata siku ile usiku, nilikusudia kupunguza maneno mengi ili kutulie. Lakini sio kwa kuwa nilifurahia mkasa mzima. Hapana. Kwa hiyo naomba na mimi unisamehe tu pale unapoona ulitakiwa kutetewa, halafu ukaona kuna ukimya.” Grace aliongea kwa upole kama kawaida yake. Ongea yake yenyewe ni kama alishachoka kabla hata hajafikisha neno la pili.

“Kwa hiyo naomba unisamehe. Na kama mama alivyosema. Ukiona kitu hakipo sawa, mwambie tu. Usiache kumwambia mama.” “Mimi mnanijua nilivyo na maneno mengi na hasira. Kwa hiyo huwa naona ni heri kuongea na mtu kama Geb, au rafiki zangu. Kwa kuwa wameshanijua. Na wanajua mpaka sauti yangu. Kwa hiyo wanajua nikiongea hivi, wanisaidie kwa haraka ili nisipandishe hasira zaidi. Huwa siwezi hata kidogo kuzungumza na mtu anayenijibisha. Ndio maana huwa nikishakujua huwa unajibishana, huwa sipendi ukaribu na wewe, hasa nikiwa nahasira. Labda ndio maana nampenda mke wangu. Mtu mkali sana huwa simuwezi. Au mwenye maneno makali huwa simuwezi.” Danny akamkatisha mkewe na kuendelea.

“Kwa hiyo na mimi naomba unisamehe kama uliona nimenyamaza. Ni heri vile nilivyonyamaza, kuliko ningenyanyua mdomo wangu. Ningeharibu zaidi. Wote hawa wananijua. Ndio maana huwa hawashangai wanaponiona nyakati nyingine huwa nakuwa kimya. Wananijua. Muulize hata kaka yako akiwa ametulia. Atakwambia juu yangu. Ananifahamu, na huwa anashukuru Mungu kunapokuwa na ugomvi, halafu nanyamaza. Huwa mimi sio msaada mzuri sana. Huwa naharibu, badala ya kusaidia.” Nanaa akacheka huku ameinama. 

“Hamna shida, nimeelewa.” Ukimya ukazuka. Geb akiwa kimya. Walitegemea aongee kitu. Lakini hakuwa amezungumza jambo lolote tokea wametoka Marangu. Alijibu baadhi ya maswali wakiwa njiani tena pale alipoulizwa. Tena alichagua nini chakujibu. Mengine hakujibu kabisa. Alionekana anamawazo mengii.

*******************************************************

“Naomba niwashukuru kwa kunihifadhi kwa kipindi hiki. Nimepata sehemu nyingine yakuishi mpaka nitakapopata chumba au mpaka chuo kitakapofungua. Asanteni kwa kila kitu. Nataka kuwahi kuondoka kabla daladala hazijai...” “Subiri kwanza Nanaa. Kwa nini unatuacha sisi, unaenda kuishi kwengine? Heri ingekuwa unarudi kwa James!” Mama G, alimbadilikia Nanaa. 

“Sio kwa nia mbaya mama. Siwezi kurudi tena kwa kaka. Mama mkubwa ameniomba nimpe nafasi ili na yeye aweze kujifikiria, na pengine atafikiria swala la kuoa. Amenikataza hata nisiwe nakwenda pale na kumsaidia kaka kazi. Anasema ndio maana anashindwa kuona umuhimu wa mwanamke. Amesema nisirudi tena pale, na yeye hataondoka mpaka ahakikishe kaka ameoa. Ndio pengine ataniruhusu kurudi tena pale. Kwa sasa ndio tumempata huyo mama, mtu wa kwetu. Ameonyesha anaweza kunihifadhi kwa muda wowote nitakao taka mimi.” “Kwa nini uondoke hapa?” Mama G akauliza. Wakati anaweka tu kituo kwenye swali lake, wakasikia gari inaingia getini. Wote wakajua atakuwa ni Liz tu. 

*******************************************************

Kwani kwa yeye Liz mlinzi wa getini hakuhitajika kuuliza ndani kama anaruhusiwa kuingia au la. Magari yake yalifahamika. Kwa hiyo kila gari linalosimama pale getini, namba ziliingizwa kwenye komputa. Zilizoruhusiwa kuingia, geti lilifunguliwa bila kuonana na mlinzi, lakini kama namba yako haikuwa kwenye kompyuta ya getini, utasikia sauti ya mlinzi kwenye spika ndogo ya kwenye nguzo ya chuma iliyokuwepo hapo nje. Akikuuliza wewe ni nani na unamtaka nani. Ndipo utaambiwa usubiri mpaka ruhusa itolewe ndani ndipo utafunguliwa geti. Lasivyo hutaingia kwenye hiyo nyumba. Na wakati wote kamera za nje na ndani ya kuzunguka hiyo nyumba, zilikuwa zikionyesha kwenye screen ya chumba kidogo hapo ndani ya geti, walipokuwa walinzi.

*******************************************************

 Ukimya ukazuka, akaingia Liz, mpenzi wa mwenye nyumba. Aliingia akionekana na haraka kidogo. Aliwakuta watu wote wamekaa palepale sebleni. “Za safari jamani?” Liz alisalimia bila kusimama wala kumwangalia mtu, akapitiliza chumbani kwa Geb. Hakuna aliyeitikia. Mama G akamtizama Geb, Geb akaelewa macho ya mama yake. Kwani macho hayo yalikuwa wakati mwingine yakizungumza nao yeye na Grace, tokea wakiwa watoto, bila hata mama huyo kufungua kinywa, aliweza kufikisha ujumbe kwa macho tu. Na walimuelewa mama yao kwa kumuangalia machoni na kutekeleza kwa haraka sana. Geb akasimama taratibu na kumfuata Liz chumbani.

 Akafungua mlango na kusimama mlangoni akiwa anamwangalia Liz. “Vipi?” Walimsikia Liz akimsemesha Geb. “Safi tu.” Liz akaanza kupekua. “Unatafuta nini nikusaidie?” Geb akauliza. “Ndio nimetua na ndege sasa hivi. Lakini nimeona kabla ya kufika nyumbani, nije kuchukua vitu vyangu. Niliviacha hapa mara ya mwisho nilipokuwepo hapa. Usiku kabla ya safari.” “Ni nini?” Geb akauliza. Kimya, Liz akaendelea kutafuta. “Labda ungeniambia, ningekusaidia kutafuta.” “Yaani unanifukuza, unatamani nitoke hapa sasa hivi!?” Liz akauliza kishari. “Mimi ndio nalala hapa. Inawezekana wakati nasafisha, kuna mahali nimekuhifadhia vitu vyako.” Kimya, Liz akaendelea kupekua. 

“Mbona sasa sioni mkufu wangu?” Liz akauliza. “Niliuvua nikauweka hapo mezani na hereni. Nilipoamka nikachukua hizi hereni nikasahau mkufu. Na mkufu wenyewe nilipewa zawadi na mama yakumaliza darasa la saba. Ni wa muda mrefu na umebeba historia ya muhimu sana kwenye maisha yangu. Siwezi kuupoteza maana pia ni ile dhahabu nzito ya thamani kweli kweli.” Liz alisikika ameshapaniki. 

“Kwani nani mwingine huwa anaingia humu?” Liz akauliza. “Tuangalie vizuri, Liz. Kama uliacha hapa, utakuwepo.” “Kwa hiyo unaniita mimi muongo?” “Namaanisha kama uliuacha hapa, lazima utakuwepo. Hakuna mgeni aliyekuja tokea uondoke, na wala hakuna mwizi humu ndani. Tuendelee kutafuta. Ninauhakika tutaupata tu.” “Wewe unawajua watu wote humu ndani? Unajua tabia zao? Mbona sikuelewi? Unatetea nini sasa!? Hakuna mwizi! Wewe unashinda nao humu ndani?” Liz aliendelea kuropoka.

Grace alinyanyuka akaamua kwenda kumlaza mtoto, akawafuata huko chumbani. “Naombeni na mimi nisaidie kutafuta huo mkufu, kutulie humu ndani.” “Unamaanisha nini? Kwamba mimi napoteza amani ya hapa?” “Nisikilize Liz. Mimi sitaki maneno mengiii. Shida ni mkufu uonekane au ni nini? Kama ni mkufu tu, naomba tuutafute. Utakakuwepo tu. Hiki chumba anasafisha Geb mwenyewe. Hakuna mtu mwingine anaingia humu ndani.” “Unajuaje?” Liz akauliza. 

“Kwa hiyo unafikiri mimi na mama au Danny ndio tumekuibia huo mkufu?” “Kwani ni nyinyi tu ndio mnaishi humu ndani? Mbona siku zote naacha vitu vyangu humu ndani na ninavikuta? Iweje leo sivioni? Nanaa aliondoka Marangu tokea siku ya ijumaa. Ulikuwa naye?” Grace aliumia sana. “Liz wewe!? Naomba nyamaza. Tafadhali sana nyamaza.” Grace hakutaka kuongea naye zaidi, akaanza kumsaidia Geb kutafuta huo mkufu. Grace alivuta droo zote kwenye kabati la Geb, akamwaga vitu vyote kitandani, nakuanza kuchambua kitu kimoja baada ya kingine bila mafanikio.

“Mlikuwa mnaniona mimi muongo. Sasa uko wapi huo mkufu? Na hapa ndio sehemu ya mwisho kuwa nao.” Waliendelea kutafuta wakati Liz amesimama. Chumba cha Geb kilikuwa kina kapeti kubwa chini ya kitanda. Geb akainama kutafuta uvunguni. “Huu hapa mkufu wako.” Geb akanyanyuka na ule mkufu. Liz akauchukua na kutoka pale bila ya kuongeza neno. Hakusema hata asante, akaondoka. Alipita pale sebleni bila hata kuaga.

Mkufu ulipopatikana tu, na Liz kuondoka, Nanaa naye akasimama, akaingia kwenye chumba alichokuwa analala. Akaanza kukusanya mizigo yake huku akilia. Machozi yalikuwa yakimtoka mfululizo huku kwikwi imemng’ang’ania kooni. Alijua wenyeji wake watakuwa wameshapata jibu la kwa nini anaondoka. Akasikia mlango unagongwa taratibu. “Karibu.” Nana alimkaribisha huku analia sana. Alikuwa Geb. Alipomuona tu ni yeye, akasogea mbali zaidi huku ameina akilia. 

“Nanaa!” Geb alimsogelea karibu, lakini Nanaa aliendelea kulia huku akirudi nyuma kama kumkwepa. “Nanaa!” Akasogea tena kama amkumbatie, lakini Nanaa akamkwepa. “Hapana Geb. Naomba unipishe. Nataka nimalizie kukusanya mizigo yangu niwahi kuondoka.” “Nanaa please!” “Hapana Geb. Naomba usiniongeleshe chochote. Nataka kuondoka. Nimepata sehemu nyingine ya kuishi. Acha niende tu.” Nanaa aliendelea kulia huku ameshika baadhi ya nguo zake mkononi. Alichukua moja wapo ya nguo hizo, akajifutia machozi na kamasi zilizokuwa zikimdondoka. Alikuwa ameshafika mwisho kabisa kwenye ukuta.

Geb akamsogelea mpaka pale akamvuta karibu yake akamkumbatia. Alimkumbatia kwa kupishanisha mikono yake juu ya mgongo wa Nanaa, na kubaki ameegemeza kichwa chake juu ya kichwa cha Nanaa. Alisikika yeye kupata nafuu kubwa kuliko hata Nanaa mwenyewe aliyekuwa akilia. Alikuwa amemkumbatia kwa nguvu sana, hata Nanaa alisikia ile hali. Akamuhurumia. Mwishowe akaanza kusugua mgongoni kwa Nanaa kwa kutumia mkono wake moja. Faraja aliyokuwa akiipata Nanaa, alitamani asinyamaze aendelee kulia ili aendelee kubembelezwa vile. Lakini taratibu hasira zikapungua. Akajikuta amenyamaza. Wote wakifurahia ile hali ya utulivu pale.

Geb alirudisha mikono yeke kama ilivyokuwa mwanzoni. Akamkumbatia tena Nanaa. Wakajikuta wamenyamza na kutulia. Wakajikuta nyuso zao zimegeukiana kwa karibu kabisa. Nanaa akipata sawia pumzi ya Geb, kadhalika Geb vile vile aliweza kupata pumzi ya kujaribu kutulia kwa Nanaa. Ukapita muda kidogo, Nanaa akakumbuka Geb ni wa Liz. Akajitoa mikononi mwake, akasimama pembeni kidogo akainama.

*******************************************************

Geb alimshika mkono akamvuta mpaka pale kitandani, akamuomba wakae. “Naomba nikuombe radhi, Nanaa. Pole na samahani sana.” Nanaa alianza kulia taratibu huku ameinama akichezea kifungu cha moja ya nguo aliyokuwa ameshika. “Nikwambie tu ukweli Nanaa, ni heri vile nilivyonyamaza tokea mwanzo kuliko ambavyo ningetoa hata neno moja kinywani mwangu. Hakuna mtu yeyote kati yenu ambaye angekuwa tayari kupokea neno lolote kutoka kinywani mwangu. Ingekuwa mbaya zaidi.” Nanaa hakuwa ameelewa.

 “Sielewi Geb.” Nanaa aliongea kwa upendo huku akifuta machozi. “Ukikaa hapa kwa muda kidogo. Pengine utanielewa.” Nanaa akainama kama anafikiria. “Huna haja yakuondoka hapa. Kwanza wewe ni mwanafunzi, kodi yakulipia chumba utapata wapi?” “Grace ananilipa mshahara. Ninazo pesa na kaka amesema nikiacha kazi, chuo kikifungua, ataendelea kunipa pesa. Ninazo pesa. Acha tu niondoke hapa, ili nisiharibu mahusiano yako. Sitaki kuwa mvunja amani au mahusiano ya watu. Mimi ni mpita njia tu, Geb. Kama nisipoondoka leo, basi lazima itakuwa kesho. Basi ni heri iwe leo kabla sijaharibu zaidi.” “Mapenzi ya kweli huwa hayavunjwi na nguvu ya nje Nanaa. Labda ndani. Ikitokea wapendanao wamechokana. Hizo nyingine ni sababu tu.” Nanaa akahisi anafikishiwa ujumbe yeye. Kwani Geb alibaki akimtizama.

*******************************************************

 “Hawezi kuwa ananizungumzia mimi. Itakuwa anamuongelea Liz.” Nanaa akawaza wakati amekwepesha macho yake baada ya kumsikiliza Geb. “Kwani mimi ni mpenzi wake? Atakuwa anaongelea Liz tu.” Nanaa akaendelea kujitetea. “Lakini amesema mapenzi ya kweli hayavunjwi na nguvu ya nje. Hajasema mpenzi wa kweli. Lakini kwani mimi nimesema wapi kama nampenda?” Nanaa akaendelea kuwaza huku akichezea kile kifungu. “Lakini kuna kitu cha tofauti ninachojisikia nikiwa na Geb. Nashindwa kujizuia kabisa.” Nanaa akawaza tena. “Itakuwaje nikiondoka halafu nikawa nakimbia nafasi ya pekee kwa Geb?” Bado Geb alikuwa ametulia kana kwamba anampa nafasi ya kufikiria.

*******************************************************

 “Utajuaje sasa kama lipo penzi la kweli?” Nanaa akajikuta anaendelea kuwaza. Safari hii swali likatoka kwa sauti. Akashtuka kidogo. “Sio kwamba nakuuliza wewe. Nahisi nimeropoka tu. Nimewaza kwa sauti.” Nanaa aliendelea kujitetea. “Maana wakati mwingine unaweza kuta hiyo nguvu ya nje, ndio ishara ya kuwaonyesha kuwa hamtakiwi kuwa pamoja. Ishara ya kushtuliwa ni muda mwafaka wakutoa mawazo potofu.” Nanaa akaendelea kuongea. 

Mwishowe akajishtukia. “Samahani. Ulikuwa unaongea wewe. Nakusikiliza.” Geb akatabasamu. Alifurahi kujua ujumbe wake umefika. “Penzi la kweli kama lipo, lipo tu Nanaa. Na upendo huwa umebeba sifa nyingi sana. Moja wapo ni subira. Upendo unatabia ya kuvumilia. Ukiona mtu anasubira na mwenzie ujue lipo penzi la kweli.” Nanaa akainama. Geb akatulia akabaki akimtizama.

Akamsikia anavuta pumzi kwa nguvu. Akajiweka sawa. Nanaa akamwangalia. “Mbona midomo imekukauka Geb? Umechoka. Uliweza kupata muda wa kupumzika kweli?” “Hapana. Imekuwa safari ngumu zaidi ya nilivyotarajia. Nimejuta kwa nini nilikulazimisha twende wote. Najua utakuwa umenichukia kwa hilo.” “Hapana Geb. Naomba usijilaumu kabisa. Najua nia yako ilikuwa nzuri. Lakini nafikiri na mimi nilikata tamaa mapema. Ningejua ningekusikiliza uliponiambi siku ile usiku nivumilie. Labda siku zilizobaki zingekuwa nzuri. Lakini Geb, sikutaka kukuweka kwenye wakati mgumu. Nilikuona ulivyokuwa ukifanya kazi kwa bidii hapa ili ukapate muda wa mapumziko kule Marangu na baadaye Arusha. Sikutaka mimi, na tatizo langu la sweta, ndio nikawa sababu yakutokufanya usipumzike na mpenzi wako. Nilipokwambia nimeogopa. Ni kweli niliogopa Geb. Nikaona ni heri niondoke, niwape nafasi.” “Haikusaidia Nanaa. Ndio iliharibu akili zangu kabisa.” Nanaa alimuhurumia Geb.

Akajikuta amemvuta mkono wake. Akaushika kwenye viganja. “Pole Geb. Na naomba unisamehe nilishindwa kukusikiliza. Hakika nilifanya kwa ajili yako. Nilitaka..” Akasita. “Ningejua kama haitasaidia, hakika nisingeondoka. Kama ningejua kama kubaki kwangu ni bora kuliko kuondoka, hata kama ningeendelea kunyanyasika kihisia. Hakika ningebaki Geb, ili wewe upumzike. Samahani sana. Wakati mwingine nitakusikiliza.” Geb alifurahi sana. “Asante Nanaa.” Wakatulia. 

Nanaa akagundua bado ameshika mkono wa Geb. Mpenzi wa Liz. Akauachia kwa haraka. Aliuvuta na kuukumbatia bila kufikiria. “Samahani.” Geb alimwangalia na kutoa tabasamu. “Sasa utakula nini?” Nanaa akauliza. “Si ndio mmefika sasa hivi?” Asijue wenzie walianza safari alfajiri, wakimuwahi yeye hapo Dar. Watu wengine walikuwa hata hawajaamka wakati Geb anaegesha gari nje ya nyumba yake asubuhi hiyo na kumuomba mama yake ampigie Nanaa simu.

Geb alibaki kimya. Hakujua hata amwambie nini. Kwamba alikuwa anashindwa hata kupumua, mpaka alipomkumbatia pale. Au amwambie ameendesha gari huku mawazo yakiwa kwake! Amwambie nini wakati bado Liz anatambulika kama mpenzi wake? Akaona anyamaze tu. “Najua hakutakuwa na chakula. Naomba nikuletee hata maji na matunda uanze kula. Wakati nakupik..” Nanaa akakumbuka anatakiwa kuondoka. Tena na daladala ambazo anahatari ya kuzikosa mida hiyo. Ilikuwa jumapili, siku ambayo usafiri unakua sio mwingi kama siku za kazi. “Ingekuwa mapema kidogo, ningekutayarishia chakula haraka haraka, wakati unakula matunda. Lakini inabidi niwahi kuondoka ili nisikose daladala na nisimcheleweshe Antii kulala.” Geb alikuwa ametulia tu wakati anaongea.

*******************************************************

 “Naomba nipe muda mfupi tu nikwambie kitu kimoja. Labda itakusaidia na wewe ikakubadilisha mawazo.” Nanaa akajiweka sawa kumsikiliza. “Naweza kuzungumza? Sitachukua muda mrefu sana.” “Hamna shida. Nakusikiliza Geb.” Alishasahau haraka yakuondoka aliyokuwa nayo. “Okay. Nataka ujue kuwa, hivi unavyoniona nilivyo. Uzima wangu, shule niliyo nayo na maendeleo yeyote niliyo nayo, ni kwa kuwa kuna garama kubwa sana imelipwa.” Geb akaanza hivyo.

“Simaanishi garama ya fedha tu. Namaanisha, ipo garama kubwa sana mtu amelipa kunifikisha hivi unavyoniona. Amenilipia garama kubwa sana ambayo hailipiki kwa fedha. Kuna kipindi nilipoteza tumaini maishani, nilikuwa nakaribia kujiua. Sikujua kama mpaka leo nitakuwa hai na kuwa hivi nilivyo leo. Lakini unamuona vile alivyo mama? Kama hataki kuhusika na maamuzi yangu. Hata yale mabovu na yakijinga ninayofanya sasa hivi. Lakini mama anauwezo wa kuniambia nifanye chochote kwenye maisha yangu, na ikanilazimu kutii, sio kwa kuwa ni mama yangu tu, lakini ni kwa umbali aliofika na mimi kwenye maisha yangu mpaka leo.” Geb akaendelea.

“Alifanya mambo ambayo kila nikikumbuka, inabaki kuwa fundisho. Alikuwa halali mchana na usiku akiniombea na kuhakikisha ananihangaikia kupata ada nyingine, tena pesa nyingi sana, ili anirudishe shule. Kwa kuwa shule ya kwanza nilifeli kwa ujinga wangu. Tena akiwa alinionya, mara kwa mara. Kwa kurudia rudia akiniambia niwe mwangalifu. Lakini sikumsikiliza, mpaka nikagonga mwamba. Ndipo yakabaki majuto. Nilikata tamaa, lakini sio yeye. Nilikuwa nalala masaa 24, sitaki kutoka kitandani. Mama alikuwa ananiacha hapo kitandani, anaenda kunitafutia pesa, akirudi jioni, ndio anipikie, anifulie, na kubaki akiongea na mimi.” Geb aliguna huku akivuta hisia.

“Usiku kucha mama alikuwa na mimi. Halali mpaka ahakikishe mimi nimelala. Alikuwa akiniombea bila kuchoka. Wakati mwingine nilikuwa naamka usiku, namkuta amepiga magoti kitandani kwetu, anaomba. Unakumbuka vile ulivyokuwa umeshika huu mkono wangu wa kulia?” Nanaa akatabasamu kwa aibu na kuinama. 

“Basi ndivyo mama alivyokuwa akiushika huo mkono akiomba hata nikiwa usingizini. Alihangaika hivyo mpaka nikaamua na mimi nimuunge mkono kujaribu tena. Aliniambia nisikate tamaa, nina maisha marefu, na mazuri sana mbeleni, ambayo Mungu amenikusudia. Kwa wakati ule, hayo maneno hayakuwahi kuleta maana hata kidogo.” Geb akaendelea.

“Kwa ufupi nilipata tena shule nyingine ambayo mama aliuza kila kitu chake, kuhakikisha namaliza ile shule. Tena niliamua kusoma shahada mbili kwa wakati mmoja, na zote hizo, mama ndio alikuwa akilipa. Shahada moja nilisoma madarasa ya Online kwenye chuo kimoja nchini Marekani, na ilitaka pesa nyingi, na shahada nyingine nilisoma pale pale nchini India. Nilikuwa nikiingia darasani kama wanafunzi wengine. Kwa hiyo na hapo pia nilikuwa nikilipa pesa kamalifu. Tena kubwa kama international student. Na pesa zote hizo za ada alikuwa akilipa mama. Nikikwambia aliuliza kila kitu, ni aliuza kila kitu mpaka vitenge vyake. Kutoka kwenye maisha mazuri aliyokuwa ametuacha nayo baba, mama akarudi kuwa fukara. Watu wakimcheka. Tulikuwa tukiishi kwenye nyumba yetu, lakini mpaka mimi namaliza chuo miaka minne, tukajikuta kwenye chumba kimoja cha kupanga. Tunaishi wote, na dada yangu Grace.” Nanaa alikuwa akimsikiliza Geb. Macho yake yalimfanya Nanaa kuendelea kutulia. Na alikuwa akiongea kwa utulivu sana.

“Somo jingine alinifundisha Grace. Aliolewa na Danny, kwa mapenzi tu. Danny ni rafiki yangu mimi. Lakini alimpenda Grace karibia kuchanganyikiwa. Hakuwa na pesa, ila penzi tu. Grace akiwa anafuatwa na wanaume wenye pesa, tupo kwenye shida, pengine angeolewa na mwanaume mwenye pesa labda angetutoa pale kwa wakati ule. Lakini akabakia na Danny tukihangaika kwa muda mrefu tu. Maana na mimi nilipomaliza chuo, sio kwamba nilipata kazi moja kwa moja, hapana. Nilirudi, nikakaa nyumbani kwa muda. Nikihangaika mimi na mama. Tena nikiwa nimeshamfilisi vyakutosha. Nilirudi nikawakuta hawana kitu. Mimi nina vyeti vizuri, lakini havina kazi. Yaani nimemrudishia mama makaratasi. Kumwambia juhudi yake yote. Pesa yake yote aliyokuwa akinitumia, ni yale makaratasi yasiyo na kazi kwa wakati ule.” Geb akatulia kidogo.

“Hapo napo nikajaribiwa sana Nanaa. Lakini sio mama yangu. Alikuwa akinipa moyo na kuniambia Mungu anaangalia kile nilicho nacho mkononi, ili akitumie. Hapo sielewi Nanaa. Nina makaratasi. Kazi sipati, mama ananiambia nisubiri. Mama akaanza kuombea tena vile vyeti. Kama mwehu vile. Nakumbuka kumsikia kwenye maombi akimwambia Mungu, kama alivyomuuliza Musa, yule wa kwenye bibilia. Samahani lakini mimi sio mzuri sana wa mambo ya bibilia.” Nanaa akacheka.

“Lakini alikuwa akimwambia Mungu kama vile alivyomuuliza Musa ana nini mkononi, Musa akamjibu kuwa alikuwa na fimbo tu. Tena fimbo chafu ya kuchungia kondoo. Lakini akawa jasiri na kuitaja mbele za Mungu, na bado Mungu aliitumia ile fimbo kutenda maajabu yanayosimuliwa mpaka leo. Kwa mataifa na mataifa, akawa anamsihi Mungu kuwa, aangalie kile nilichokuwa nacho mimi mkononi.” 

“Akawa anamkumbusha kuwa nina vyeti mkononi. Akamwambia Mungu anaomba hivyo vyeti avitumie. Usifikiri lilikuwa ni jambo la siku moja! Mama alikuwa anaomba hayo maombi mchana na usiku mpaka nikajua na kuyakariri hayo maneno. Haikuwa kazi ya muda mfupi. Na usifikiri nilikuwa nikiomba naye. Mimi nilishakata tamaa. Nikaona ni mchezo wa kuigiza. Lakini sio yeye. Aliendelea hivyo mpaka nilipopata kazi BOT. Hakuna aliyeamini kati yetu. Lakini vile vyeti vikaleta kazi yenye kipato kilichofungua milango mingi sana.” Geb akatulia kidogo.

 “Haya. Turudi kwa dada yangu. Grace naye kama nilivyokwambia. Kipindi hicho cha shida, akajikuta anaolewa na Danny, mwanaume asiye na kitu.” Geb akacheka kidogo. “Yaani badala yakupunguza tatizo, ndio tukaongeza tatizo jingine. Maana Danny naye akaongezeka kwenye familia. Hana pesa na ni mwanafunzi. Tena akiwa hana vipindi chuoni ndio anakuja kula hapo nyumbani, na kulala hapo hapo kwenye hicho chumba kimoja na sebule, ndio alale na mkewe hapo. Lakini hawa watu wanapendana sana Nanaa. Na wametoka mbali sana.” Geb akaendelea.

“Haya, Grace akapata kazi. Haikuwa ikimlipa sana, lakini ilimsaidia Grace akumtunza mumewe na sisi. Siku alizojua Danny anamitihani chuoni, alikuwa anampikia vyakula vingi, anamfungashia ili akifika chuo, ale kwa hizo siku ambazo hatakuwepo nyumbani. Maisha yakaendelea kwa muda. Mama naye akawa anahangaika kivyake. Akipata pesa, alete nyumbani kidogo, nyingine alipe madeni ya pesa alizokopa kipindi nasoma. Na mimi nahangaika maofisini kutafuta kazi. Asubuhi mpaka jioni. Wakati mwingine ilikuwa ikinilazimu kutembea ili kubania pesa. Natembea umbali mrefu tu, siwezi hata kumudu pesa ya kupanda daladala. Ukipata kazi, mshahara hautoshi. Ni vile vikazi wanakwambia unaongeza ujuzi. Pesa wanayokulipa ni nauli tu.” Nanaa akamwangalia Geb, akawa haamini. Geb aliyekaa hapo pembeni yake, amejaa neema na amezungukwa na neema tupu. Hafananii na anayoelezea.

“Maisha yakaendelea hivyo mpaka mimi nikapata kazi. Haya, bahati nzuri kwa Grace akashika mimba ya Fili. Akaugua sana sababu ya ule ujauzito. Wakamfukuza kazi. Lakini Mungu alitusaidia wakati huo na mimi nikawa nimeshapata kazi. Ndio na mimi nikampokea Grace na mama ambaye wakati huo alikuwa na vibiashara vyake vilivyokuwa vikitusaidia kulipia hicho chumba na sebule.” Geb alivuta pumzi.

“Kwa nini nimekwambia yote haya? Ni kwa kuwa nataka uone jinsi maisha yalivyo mchezo wa ajabu. Ukikosea kidogo tu, ndio basi. Kama mimi nisingekubali kupokea msaada wa mama, nikakataa kurudi shule. Wote hawa wasingekuwepo hapa. Na kama Danny asingekubali kudhalilika kwa muda, kwa kuendelea kutunzwa na Grace, ili kuhakikisha anamaliza ile shule yake na kuendelea kusoma, hivi leo Danny angekuwa labda aliamua kuacha shule wakati ule, angetafuta kazi ya kawaida sana ili kumlea Grace. Kuna kipindi alishawishika kukatisha masomo ili atafute kazi, amchukue Grace na mtoto wake, lakini mama alimkatalia kata kata, akamwambia lazima asome mpaka amalize shule yake. Asingekubali yote hayo, sasa hivi Danny asingekuwa na shahada mbili na wala asingekuwa akiingiza pesa anayoingiza sasa hivi. Tena Mungu amemuheshimu Danny, analipwa kwa dolla akiwa nchini Tanzania. Danny analipwa mshahara mzuri sana.” Nanaa hakuwa hata akijua kuwa Danny na porojo zote zile kumbe na yeye mambo yake safi. 

“Mama na Grace walikubali kutulipia sisi watoto wakiume garama kubwa sana, kutufikisha hapa tulipo. Wapo hapa nyumbani kwangu sasa hivi sio kwa sababu hawana uwezo wakupanga. Wanajenga. Aina ya nyumba Grace anayotaka au niseme nyumba ya ndoto zake, inawagarimu sana ndio maana wanachukua muda mrefu kumaliza. Hatukuona sababu wakalipie nyumba nyingine yakupanga, wakati hapa pako. Tunakwepa nini sisi watu tulioishi hivi kwenye chumba kimoja. Tena hivi hivi kama unavyotuona, ila Fili ndio alikuja kuongezeka baadaye. Lakini tulikuwa hivi hivi. Mtu anayekuja sasa hivi kwenye maisha yetu itamuwia ngumu sana kutubadilisha, kwa kuwa tunayajua maisha kwa vitendo, kwa kuyaishi sio kusimuliwa.” Geb akatulia kidogo.

“Mungu anapokutumia msaada, usikatae Nanaa. Hujui ni kwa nini upo hapa. Lakini kikubwa ni kwamba, sasa hivi unahitaji msaada, sisi tupo kukusaidia. Tumia hii nafasi kwa kadiri ya uwezo wako. Usikubali kashfa, kejeli na dharau zizuie kufikia ndoto zako. Unajua kwa nini James anakupenda sana?” Nanaa akatingisha kichwa kukataa, huku machozi yanamtoka. 

“Alikuwa akitusimulia maisha yako yote, na vile ambavyo uliendelea kujitahidi kufika hapo ulipo. Anasema wewe ni role modal wake. Kila akisikia kukata tamaa, anayaangalia maisha yako na changamoto unazopitia na bado unaamka asubuhi na kuendelea, wakati dada zake wanakila kitu lakini wameshindwa kuendelea na maisha. Usikubali watu unaokutana nao njiani wakukwamishe Nanaa. Hujui jinsi maisha yako yalivyo fundisho kwa wengine. Umebakiza kidogo tu umalize shule. Jikaze mpaka uone mwisho wake. Leo unakutana na changamoto hii hapa kwetu, hujui huko unapokimbilia usiku huu utakutana na changamoto gani. Utakimbia mpaka lini Nanaa?” “Nilikuwa nakuhofia wewe, Geb.” Nanaa aliongea kwa upole huku akimtizama Geb.

 “Sikutaka kukuharibia.” “Kwa hiyo unaondoka kwa ajili yangu?” “Niliona vile ulivyonipokea kwa upendo. Wote mnaishi na mimi vizuri. Najua maisha nimagumu. Lakini wewe unanitunza hapa bure kama mtu ninayekuhusu. Wakati hunifahamu kabisa. Sina jinsi ya kukulipa isipokuwa kukupunguzia matatizo.” “Kwa kunikimbia kila mahali?” “Sikujua nifanye nini? Nataka kukusaidia na wewe.” “Sasa unajuaje kama maamuzi yako huwa yananisaidia?” “Sijui Geb.” “Ndio ungeniuliza mimi mwenyewe ili ujue nini nataka.” Nanaa alinyamaza kwa muda. Akajikausha machozi. Akatulia tena.

Akanyanyua uso na kumwangalia akiwa ametulia. “Kwa hiyo unataka nini?”  Nanaa akauliza. Geb akatoa tabasamu. “Nataka usinikimbie. Usihame hapa na kwenda kuishi nyumba nyingine, labda chuoni.” “Nitakuwa nakuja kuwatembelea Geb. Itarahisisha maisha yetu wote. Hapa patakuwa na amani, na mimi nitakuwa na amani.” “Hapana Nanaa. Naomba usihame. Sio sawa. Umeshafikiri utakuwa na maisha gani hayo? Unahama nyumba moja hadi nyingine. Mpaka lini? Kwa James inaeleweka. Na hapa je?” “Hapa sitakiwi Geb. Nitaishi hivi mpaka lini?” “Sisi wote tunaoishi na wewe tunakutaka ubaki na sisi. Kila mtu alikataa kwenda mapumzikoni Arusha sababu wewe hukuwepo. Tunakuhesabu kama mmoja wetu.” “Naomba unisamehe Geb. Ni kweli niliondoka ili kukuletea amani na mpenzi wako. Sikukusudia kuharibu.” “Nimeelewa Nanaa. Lakini kama mama alivyokwambia, tuwe tunazungumza.” Geb akaweka msisitizo.

“Nataka yale unayomwambia James, na mimi uwe unanishirikisha kwa kuwa sasa hivi tunaishi wote. Haupo na James. Unaishi na mimi. Najisikia vibaya, au najihisi kushindwa pale unapokuwa unaishi hapa, halafu matatizo yako unayatuma kwa James. Yaani mimi nasikia matatizo yako kutoka kwa James, wakati mimi ndio naishi hapa na wewe! Sioni kama ni sawa Nanaa.” Nanaa akanyamaza.

“Tunaishi wote hapa, naomba na mimi unihusishe kwenye maisha yako. Naweza nisiwe msaada kama James, lakini naamini tukiwa pamoja hatutashindwa kitu.” Nanaa alianza kulia tena huku ameinamisha kichwa chake kwenye magoti yake. Geb aliweka mkono wake mgongoni kwake akaanza kumbembeleza tena taratibu. Alipitisha mkono taratibu mgongoni kwa Nanaa mpaka akatulia. Akatoa uso magoti, akamwangalia. Akakuta Geb akimtizama kwa karibu. “Asante.” Nana akashukuru kwa upole. “Karibu.” Geb akajibu na uso mtulivu huku akimtizama.

Nanaa akacheka kidogo. “Nini?” Geb akauliza natabasamu usoni. “Sikuwahi kupata bahati kama hii.” “Bahati gani?” “Mtu kuomba kujua matatizo yangu!” Geb akacheka. “Na yalivyo mengi! Nahisi utajuta kama wenzako.” Geb aliweka kidole chake kwenye dimpo ya Nanaa. “Nilijaliwa tunda la uvumilivu. Kwa hiyo wewe yalete tu hayo matatizo.” “Haya, tutaona na wewe utaishia wapi.” “Usiseme hivyo sasa. Niombee niweze. Usiwe kama mtazamaji wa mpira. Hutaacha kuona kasoro. Nimekwambia tutatue pamoja.” Alimsugua mgongoni kwa nguvu kidogo, Nanaa akacheka. “Sawa. Na ninakushukuru sana.” “Kwa hiyo si tumekubaliana unabaki?” Nanaa akatingisha kichwa kukubali.

“Asante Nanaa. Basi twende tukafuate mizigo yako.” “Nina wazo la tofauti.” “Wazo gani?” “Leo niende nikalale na Antii. Nipate muda wa kuzungumza naye. Halafu kesho nikitoka kazini nitarudi hapa moja kwa moja.” “Naomba urudi nyumbani Nanaa. Tafadhali naomba iwe leo. Mimi nitakupeleka. Nitasubiri hata kwenye gari. Zungumza naye mpaka uridhike, halafu turudi wote nyumbani.” Nanaa aliinama akifikiria. 

“Tafadhali Nanaa.” Kwa sauti ile ya Geb. Mikono mizuri ambayo ikikushika lazima ufarijike. Macho yake ndio ungetamani hata akushike na kukumbatia. Ilikuwa kama barafu moyoni. Hakuna jinsi Nanaa angemkatalia Geb. Labda ndio maana alijikuta akikubali kila kitu hata kama amekusudia kukataa. “Nanaa, please!” Geb aliendelea kubembeleza. Nanaa akajikuta anatingisha kichwa kukubali huku akimwangalia. Kama angekuwa mwanaume mwingine, ule ndio ulikuwa wakati wa busu. Lakini Geb hakuwa mtu wa papara. Kila kitu alikuwa akikipigia mahesabu. 

“Basi twende sasa hivi.” Akamshika mkono, Nanaa akatoka pale kitandani. Akamtengeneza nywele vizuri kama kumuweka sawa, akamfuta machozi vizuri kama anavyomfanyia Fili. Nanaa akacheka. “Asante.” Akashukuru. “Karibu.” Geb akajibu. Akamtizama kidogo. “Gauni imekukaa vizuri.” Nanaa akajiangalia. Akajicheka na gauni yake ya mtumba. “Asante. Lakini gauni yenyewe ya zamaniii!” “Bado inaonekana nzuri mwilini mwako.” Geb alisisitiza sifa zake. “Asante.” Akajibu kwa aibu huku anacheka. Wakatoka pale chumbani. ‘Kumbe huwa ananiangalia!’ Nanaa akawaza.

*******************************************************

 “Mama yuko wapi? Lazima nimuage?” Nanaa akamuuliza Geb, lakini Grace aliyekuwa sebleni akasikia akawafuata pale koridoni. “Unaondoka Nanaa? Naomba usiondoke bwana. Tubaki wote. Usitukimbie, tuvumilie tu. Sisi tunakupenda na tunataka ubaki.” Grace akaongea kwa upole. Wakamsikia Mama G na yeye anatoka chumbani. “Usiondoke Nanaa.” Mama G naye akaongeza. “Naenda kuchukua tu vitu vyangu narudi. Nitakaa hapa mpaka tutakapo pata chumba changu. Kaka amesema akirudi kutoka safari ataongeza juhudi ya kunitafutia chumba changu, na yule dalali niliyekuwa naye amenipa moyo. Amesema nitafanikiwa tu. Nisubiri. Kwa hiyo nitakuwa hapa nikisubiria. Sitahamia tena kwa Antii.” “Afadhali. Ulitaka kunitia presha.” Nanaa akacheka.

 “Asanteni jamani. Asanteni kunisamehe na kunipokea tena. Nashukuru.” Wote walijua Nanaa hajui moto aliowasha kaka yake huko Marangu. Kama angejua yeye ndio anastahili kuombwa msamaha, asingerudia rudia kuomba msamaha. Lakini Mama G alifanya makusudi, kumuwekea hukumu ili kumfanya arudi kuishi pale ndani. 

*******************************************************

“Mimi naenda kulala. Nimechoka.” “Geb hajala mama. Njaa inamuuma.” Nanaa akajikuta anaropoka. Kama ndiye anayewajibika na Geb. Grace na mama yake wakaangaliana. “Namaanisha hakuna uji wake ili niweke kwenye kikombe, twende huku anakunywa huko njiani?” Nanaa akajishtukia, akaongeza kwa aibu kidogo.  “Au nipike mara moja kabla hatujatoka? Najua mmetoka safari, mmechoka.” “Ujue tumefika hapa tokea asubuhi? Hata chakula cha mchana tumekula hapa.” Nanaa akashangaa na kumgeukia Geb aliyekuwa kimya nyuma yake.

“Sikujua. Maana nimeona Geb amecho...” Akasita kama anayefikiria kitu akaelewa kwa haraka, akamgeukia tena Geb. “Pole.” Akaongea kwa sauti ya chini na kumuhurumia. Akakumbuka alivyomwambia tokea alivyoondoka, kichwa chake kilivurugika. “Nilikutafuta sana. Karibia siku nzima nilikuwa nakupigia wewe simu.” “Pole mama yangu. Simu iliishiwa chaji. Nikaicha nyumbani hata sikwenda nayo kanisani. Nilijua sina wakunipigia. Nikaipuuza simu na kuiacha nyumbani kwa Antii.  Tulipotoka kanisani, tukaenda kuona wagonjwa hospitalini.” Nanaa alijieleza huku akimfikiria Geb kwa kina na kumuhurumia.

“Basi sisi tupo hapa tokea asubuhi. Na uji upo kwenye chupa yake huyo. Nilipika tu tulivyorudi. Lakini hakuwa tayari kunywa.”“Asante mama yangu. Ngoja basi nikamuwekee kwenye kile kikombe kirefu kinachokaa kwenye gari yake. Anywe njiani wakati ananisindikiza kufuata mizigo yangu kwa Antii.” Nanaa akaongea huku anaelekea jikoni. 

Akawaacha wanaangaliana, yeye hana habari. Grace akatoa tabasamu kwa mama yake. “Nitamsindikiza Nanaa.” Geb alipita kati kati yao huku na tabasamu usoni. “Muone anavyocheka. Kama sio yeye! Unashida ya roho wewe!” Mama G akarudi chumbani kwake. Grace akarudi kwa mumewe sebleni.

Nanaa akamimina uji kwenye hicho kikombe kirefu cha Geb, akatoka jikoni akiwa ameshika chupa ya uji mkono wa kushoto na kikombe cha uji mkono wa kulia. Akamkuta Geb akimsubiria pale sebleni. “Nikupokee?” Geb akamuuliza. “Lakini uwe makini. Ni wa moto sana. Au tukae ule kwanza? Nitakuwekea kwenye bakuli kubwa, upoe kwa haraka.” Danny na Grace walikuwa wakiwasikiliza, lakini wote wamegeukia tv. “Twende tu. Utapoa njiani. Asante.”  Wakaondoka.

*******************************************************

 “Na wewe umekula?” Geb akauliza wakati wapo njiani. “Sijala tokea asubuhi. Lakini sisikii njaa.” “Ulikuwa ukifanya nini leo?” “Antii huwa anakuwa anakwenda kutembelea wagonjwa mahospitalini mara kwa mara. Lakini kila mwisho wa mwezi akipata pesa anakwenda kuwapelekea mahitaji yao muhimu huko hospitalini. Sasa leo baada ya kutoka kanisani, nikamsindikiza. Nimependa. Ni kitu kizuri. Nimemwambia nitakuwa nakwenda naye kila mwisho wa mwezi, asiniache. Nitakuwa na mimi nanunua vitu, naongozana nae.” Geb akamwangalia nakucheka kidogo. 

“Unafikiri Geb? Imenibadilisha sana mtazamo wa maisha yangu. Ile ni therapy tosha ya maisha. Huhitaji therapist. Ukidhani wewe unashida, basi nenda mahospitalini. Utajisikia kujisuta. Mimi nimetoka pale, nikamuomba Mungu msamaha.” “Safi sana. Itabidi tuwe tunaenda wote.” “Kweli Geb?” “Kweli. Sasa ni nani ambaye hataki kujiona hana matatizo?”  Nanaa akacheka kidogo kisha akafikiria.

“Wewe huna matatizo Geb.” Geb akamwangalia. “Najaribu kuangalia maisha yako, naona mkono wa Mungu katika kila eneo la maisha yako.” “Basi utakuwa hujanifahamu vizuri.” “Niambie unashida gani Geb? Kama ni mali, Mungu amekubariki. Hilo halina swali. Upande wa mpenzi, pia Mungu amekupa mwanamke mzuri, msomi na anajielewa. Tena mnapendana sana. Hapo napo hakuna mjadala.” Geb akamtizama Nanaa.

“Haya. Tukirudi kwenye familia. Kitu kinachotamaniwa na wengi. Hapo napo Mungu amekubariki. Unafamilia ya watu wanaokupenda na mnaelewana sana. Binafsi sijawahi ona familia kama yenu.” “Ikoje?” Geb akauliza.

“Familia iliyofanikiwa katika kila eneo na bado mkabaki kuwa wanyenyekevu kama vile! Mnaheshimiana na mpo kitu kimoja. Mtu akija pale kwenu, anaweza kufikiri nyinyi wote watatu ni watoto wa mama mmoja. Mpaka Danny.  Halafu mnapenda watu.” Geb akacheka. “Kazi ya mama G hiyo.” Akamsifia mama yake. “Hata nyinyi wenyewe mnaonekana mnamsikiliza. Sio kama watoto wengine. Haya, turudi kwa baraka Mungu alizokupendelea na kunifanya nikwambie huna shida.” Geb akacheka tena.

“Nini tena?” “Unamarafiki wazuri wanao kuheshimu Geb. Wote wanakuheshimu sana japo mwenyewe ukiwa katikati yao huzungumzi sana. Lakini ukiwasikia wakikusema, wanakusema vizuri. Hata wafanyakazi wako, au wenu, wote wanakusema vizuri. Wanakusifia sana wewe na Grace. Haya niambie Geb, shida yako wewe ni nini?” Geb akamtizama na kurudisha macho barabarani.  “Niambie tu Geb. Wewe unashida gani?” “Siwezi kukwambia mpaka unipe maelezo ya kwa nini hukujibu ujumbe wangu.” Nanaa akacheka sana.

“Geb wewe! Husahau tu?” “Ndio maana ulikuwa ukinikwepa ili nisahau nini?” Nanaa alicheka tena. “Mwenzio nina sifa yakutosahau mambo. Sasa sijui kama ni sifa nzuri au mbaya. Kwa hiyo kabla ya kujua matatizo yangu mengine, ujue una deni kwangu. Lakini sio leo. Tutatafuta siku nzuri, ambayo sijachoka na kichwa changu kimetulia. Tutapata muda mzuri wa kuzungumza.” “Pole. Ni kweli unahitaji kupumzika. Umekuwa ukiendesha wakati wote.” Nanaa aliongea asijue yanayomchosha kijana huyo. Geb akamtizama tena kidogo, akarudisha macho barabarani na kunywa uji wake kidogo. 

*******************************************************

Alikuwa na njaa yakupitiliza. Kwa asili alikuwa mvivu wa kula. Lakini kila alipokuwa na jambo zito moyoni, chakula kilikuwa kikigoma kabisa kupita mdomoni kwake. Hasa jambo linalomuhusu Nanaa. Hakujua jinsi yakufanya linapokuja swala la Nanaa, ambaye alimjali kuliko hata Liz mpenzi wake. Na Nanaa alifanya bila hila. Akajikuta furaha yake nikumuona Geb anafuraha tu, bila kutaka sifa au kujipendekeza.

*******************************************************

 “Na ili usinitoroke tena au usiwe unanikimbia, nitahakikisha tunakuwa karibu na tunaonana kila siku.” Nanaa akacheka. “Wakati wewe huwa unawahi kuondoka asubuhi na wakati mwingine unachelewa kurudi nyumbani?” “Kuanzia kesho, tunaondoka wote kwenda kazini. Kama nachelewa kutoka kazini, nitazungumza na Grace aweke utaratibu mzuri kazini. Ili akiwa anatoka, muwe mnatoka naye. Sio kurudi tena nyumbani usiku, tena peke yako kwenye madaladala.” Nanaa akacheka kwa kuridhika.

“Halafu..” Geb alitaka kuendelea, lakini Nanaa akamuwahi. “Nisilale mpaka urudi kutoka kazini?” Nanaa akamalizia. Kama aliyekuwa anasoma mawazo yake. Geb akacheka. “Utachoka?” Geb akauliza, Nanaa akatingisha kichwa kukataa. “Kwanza ndio itakuwa vizuri. Unajua kwa nini?” Akamuuliza Geb wakati ananyanyua kikombe chake kupata funda jingine la uji.  “Sijui ni kwa nini itakuwa vizuri.” Geb alijibu baada ya kumeza.  “Itanipa nafasi yakujua kila siku, siku yako ilikwendaje. Na kama umekula au la.” Geb akacheka. “Asante Nanaa.” Pakazuka ukimya mpaka Geb alipomuuliza nyumba ya huyo Matroni.

*******************************************************

 “Si tutaingia wote?” “Kama ndio unavyotaka. Lakini naweza kusubiria tu kwenye gari.” “Basi wewe pumzika kwenye gari wakati unamalizia uji wako. Najua umechoka na una njaa. Sitachelewa.” “Usiwe na wasiwasi na mimi. Hakikisha unaacha mazingira mazuri. Kuwe na amani.” “Sawa.” Geb alifika mpaka kwenye jengo la hiyo hosteli ambayo nyuma yake ndipo alipokuwa akiishi huyo matron, kwenye nyumba ndogo tu. Akaegesha gari yake. Nanaa akashuka. 

Na kweli baada ya muda mfupi akarudi na begi lake alilokuwa nalo safarini. “Sikumkuta. Nimempigia simu na kumuaga. Ameniambia yupo sehemu hawezi kuongea. Sasa sijui ni wapi. Antii anashuguli kweli! Sijui amepatwa na dharula gani tena!? Maana aliniahidi atanisubiri. Ila nimemwambia nitarudi kuongea naye siku ya jumamosi.” “Sawa.” Geb akaondoa gari.

*******************************************************

 “Naona umechoka! Twende ukapumzike.” “Hapana, kawaida tu. Tena afadhali sasa hivi nimekunywa huu uji, nimepata nguvu kidogo. Twende tukatafute chakula.” “Kwani nyinyi hamkula?” “Unajua tulirudi na mama. Ilibidi kusimama zaidi ya mara nne ili kunyoosha miguu.” “Kwa nini hakurudi tena na ndege!?” Geb akanyamaza. 

Nanaa akajua anakitu anaficha. “Geb?” “Hali haikuwa nzuri Nanaa. Ikabidi mama awepo na sisi kwenye gari.” Ni kama alielewa nusu ya lile jibu. Akajisikia vibaya sana. “Nimejisikia vibaya sana Geb. Kweli sikukusudia kuharibu.” “Naomba usijilaumu Nanaa. Sidhani kama unahusika moja kwa moja. Ni kama wote tulimiss uwepo wako pale. Wote tulitaka uwepo pale. Hatukulaumu.”  Nanaa akatulia kidogo.

“Kwa hiyo mlikula?” Akakumbuka swali lake. “Tuliokota okota vitu njiani. Naona kila mtu ameshiba.” “Twende tukanunue nyama choma. Si unajua jana ilikuwa mwisho wa mwezi? Nimelipwa mshahara wangu. Sasa nisindikize nikanunue hiyo nyama choma na ndizi. Halafu si unajua inavyonukia? Tunaweka pale sehemu ya kulia chakula, karibu na sebleni. Ili inukie nyumba nzima. Wataamka wenyewe waje kula.” Geb akacheka. 

“Wewe unafikiri wenzio wanapenda kula kama wewe?” “Ujue ni wewe peke yako hapa duniani usiyependa kula? Hakuna mtu asiyependa chakula. Labda awe mgonjwa. Sasa twende nikakuthibitishie. Halafu utaona kama haitafanya kazi.” “Sawa Nanaa.” Kweli wakafanya kama Nanaa alivyosema.

*******************************************************

Lakini Geb alilipia yeye hakutaka Nanaa atoe pesa yake. Wakafika nyumbani wakakuta kila mtu yupo chumbani kwake. Nanaa akakiweka kile chakula mezani. “Wewe kaa hapo kwenye kochi, halafu nyamaza kimyaa. Utaona mwenyewe. Usimwite mtu yeyote” Geb alicheka akatingisha kichwa, akavuta kiti pale pale pembeni ya Nanaa. Wakakaa nakutulia.

 “Mbona hawaji sasa?” Geb akauliza. “Wewe subiri.” Nanaa alinong’ona. Baada ya dakika 5 akatoka Danny, akijidai anafuata maji ya kunywa. Nanaa akamkanyaga Geb kama kumkonyeza. “Njaa inauma kweli.” Danny alijiongelesha. “Mbona kunanukia hivi?” Grace akatoka. “Nanaa amerudi?” Mama G, naye akatoka chumbani. Nanaa akaanguka kicheko. “Nyama choma huwa haidanganyi.” Geb alikuwa akimwangalia Nanaa huku anacheka.

“Mlitutega?” Mama G, akauliza. “Hasa wewe mama.” “Ujue wewe Nanaa akili yako haikutoshi? Na kwa taarifa yako wala hujanipata.” “Mmmh mama! Kweli?” “Kweli tena. Mimi nimetoka kuja kukuangalia kama umerudi.” “Haya mama yangu. Kaa tule. Nilijua mmelala bila kula. Tumenunua chakutosha watu wote.” “Mbona tunashukuru.” Grace akaongeza huku wakiendelea kucheka. Wakakaa. 

Mara Geb na Nanaa walipotoka tu, mama G badala ya kulala, akaingia jikoni na kumpikia mwanae mchemsho wa ndizi na kipande cha samaki walichokuwa wameacha kwenye friji. “Mlipoondoka, nilitaka kulala. Lakini nikakumbuka huyo Geb, hajatia kitu chochote cha maana tumboni, zaidi ya siku mbili.” Mama G akaanza. “Nanaa! Kamletee chakula chake hapo kwenye hotpot kwenye meza ya jikoni.”  “Asante mama.” Geb akashukuru. 

Nanaa akaenda kufuata hicho chakula jikoni. Lakini kama kawaida, akakipanga vizuri kama siku zote. Alikimimina hicho chakula kwenye bakuli kubwa. Maalumu la Geb. Akamimina juisi kwenye glasi ya Geb, akaweka hapo kwenye sinia. Kulikuwa na zabibu kwenye friji. Akaziosha kwa haraka, akaweka kwenye kibakuli cha Geb cha matunda. Akampelekea pale alipokuwa amekaa. Alisahau napkins na kijiko. Akarudi kwa haraka jikoni. Akaenda kuchukua. Akamwekea hapo kwenye sinia. “Karibu.” Nanaa akamkaribisha. “Asante.” Wote walikuwa wakisubiria hapo mezani. Mama G akamwambia Nanaa aombee chakula na kumshukuru Mungu kuwarudisha nyumbani salama. Nanaa akaomba kwa kifupi tu. Wote wakaanza kula kwa pamoja pale mezani. Nanaa akitaniana na mama G.

****************************************************

Utulivu na amani umerejea nyumbani kwa Geb. Wamefanikiwa kurejesha uwepo wa Nanaa na cheko la Geb. Kila mtu alianza kuelewa kwa nini nafsi ya Geb inavutiwa na Nanaa. Ni kama alikuwa akipata kwa hakika anachokita au mtu yeyote anachostahili maishani, kutoka kwa Nanaa. Kujaliwa kwa dhati.

Yote aliyomtajia Geb, kuwa Mungu amembariki nayo, hayakuwa yamekamilika kama yeye hayupo kwenye picha nzima. Kuna jinsi alifikia nafsi ya Geb, hakuna mtu wala pesa iliweza kufika huko. Tena kwa kukana nafsi yake. Hata kama akiwa ameumizwa na wivu ukimwendesha kwa kasi, lakini linapofika swala la Geb, Nanaa aliweka kando hisia zote, nakutaka kumuona Geb yupo sawa. Yeye kama Geb. Alimuonyesha kujali kwa namna yake. 

Sasa Geb ameweka mkakati mpya wakumfanya Nanaa awe karibu naye zaidi ili kuridhisha nafsi yake. Alimwambia, akiendelea kuishi pale, ataelewa zaidi.

·      Je, watafanikiwa kueleweshana kile kinachoendelea mioyoni mwao wakati tayari ni kama   Geb  alitamka mbele ya marafiki zao na Liz kuwa anamsaidia tu Nanaa?

·      Itakuaje wakati Liz bado yupo kwenye maisha ya Geb?