SIMULIZI

NILIPOTEA! PART 3 - Sehemu ya C.

 

Net akamjibu mama yake kwa utulivu tu, “Ndiye huyo huyo Tunda, mama.” Yule mama aliduwaa kwa muda kama haamini. “Umechanganyikiwa!?” “Hapana mama. Kwa nini?” “Umekosa nini hapa duniani mpaka ukajiingize kwa kahaba yule!? Unaficha wapi sura yako!?” “Tunda ametubu mama. Mungu amemsamehe, na wewe ulisema umemsamehe. Sasa nini tena?” “Una nini wewe Net!? Kwani kusamehewa kwa Tunda kunaondoa uchafu aliofanya!? Unaoa mwanamke ambaye kila mwanaume hapa mjini anamjua ndani na nje!? Una shida gani!? Unataka na wewe uonje wenzako walichopewa?” “Naona unaanza kunitukana mama. Tunda anakuwa mke wangu simchezei kama watu wengine. Nampenda Tunda.”

“Unampenda sasa hivi baada ya watu wote kumkinahi huyo msichana!?” “Nampenda Tunda. Hata babu anajua.” “Sasa babu yako hayupo hapa. Mimi ndiye nipo. Nimesema huyo kahaba hatakaa akakanyaga humu ndani, na wala hutamuoa. Amekosa soko kwa wanaume wote wa hapa Tanzania ndio anakufuata wewe! Haitakaa itokee Net. Labda kama mimi sio mama yako.” “Najua ni habari mpya kwako mama. Unahitaji muda wa kuzitafakari. Tunda ndiye mwanamke atakayekuwa mke wangu. Naomba upate muda wa kutafakari na kukubali. Kwa kuwa hilo linatokea. Tena ninataka kumuoa haraka sana.”

“Na kwambia Net, labda kama mimi siye niliyekubeba tumboni miezi tisa. Hutamuoa Tunda. Labda usubiri nife kwanza, ndipo umuoe huyo Malaya, lakini sio sasa.” “Naona unahitaji muda mama. Na mimi nipo tayari kukupisha. Nahamia nyumbani kwangu ili kukupa nafasi.” “Yaani unaniacha mimi hapa peke yangu sababu ya Tunda!?” “Umesema hutaki kumuona Tunda anakanyaga nyumbani kwako. Na mimi nimekuhakikishia nilazima nitamuoa Tunda. Sasa unafikiri itakuaje? Nakupa nafasi ya kutafakari, utakapokuwa tayari kumpokea Tunda, unajua pakunipata mama yangu.”

“Kweli Net!?” “Nimeamua mama. Lazima nitamuoa Tunda. Unajua ninavyokupenda na kukuheshimu. Lakini katika hili huna nafasi hata kidogo. Ni eitha ukubali uungane nami katika kukamilisha furaha yangu, au utajumuika nasi hiyo siku utakapo kuwa tayari. Haina haraka. Naelewa kuwa unahitaji muda, chukua muda wowote unaotaka hapa duniani. Lakini ujue jinsi unavyochelewa ndivyo utakavyopitwa na hatua muhimu sana kwenye maisha yangu, na ningetamani uwepo kushuhudia. Maana nitaoa mara moja tu maishani, na nitamuoa Tunda.” Net akaingia ndani na kuanza kufungasha vitu vyake huku akiviweka kwenye gari lake, usiku uleule.

          Alipomaliza, akamsogelea mama yake, akambusu. “Nampenda sana Tunda, mama yangu. Na nimaamuzi niliyoyofanya kwa muda mrefu sana, sijakurupuka. Nimempokea vile alivyo. Nakuombea Mungu na wewe uweze kumsamehe kabisa na umpokee. Maana ndiye atakayekuwa mke wangu.” Net akaondoka nakumuacha yule mama haamini kama Tunda amefanikiwa kumchukulia wanaume wawili, aliobakiwa nao hapa duniani, ambao aliwapenda na wenyewe walimuonyesha mapenzi na heshima zote.

Jumatatu!

Tunda aliamshwa na ujumbe mzuri kutoka kwa Net. ‘Naweza kukupigia?’ Tunda akamtumia huo ujumbe. Baada ya sekunde chache simu yake ikaanza kuita. “Uliamka salama?” “Ndiyo. Asante kwa ujumbe mzuri.” “Karibu. Mchana utakuwa na ratiba gani?” “Nitakuwepo tu ofisini.” “Naweza kuja kukuchukua tukale wote chakula cha mchana?” Tunda alifurahi sana. Akacheka.

“Unacheka nini sasa?” “Bado siamini! Nina furaha ya ajabu ambayo siwezi nikaeleza mtu akaelewa! Sikuwahi kufikiria kama naweza kuja kupendwa.” “Nakupenda mpaka nakuonea wivu.” Net akajibu na kumfanya Tunda azidi kucheka. “Nina mahali nakwenda asubuhi hii, sina uhakika nitamaliza saa ngapi, lakini nikitoka tu nitakuja kukuchukua tukale wote. Ila ukiona nachelewa, uende tu, nitakutoa jioni.” “As a date?” “Yes Ma’am!” Tunda akazidi kucheka.

“Kwani siwezi kupata vyote?” Tunda akauliza kwa deko. “Wewe tu na ratiba yako. Ukiwa tayari tutaenda kula wote chakula cha mchana na nitakutoa usiku.” “Basi nakusubiri mpaka utoke.” “Sawa.” “Usisahau kupata kifungua kinywa, Net.” “Nitachelewa. Sitaki kuwapa sababu ya kuninyima hiyo tenda.” “Pole. Nakuombea ufanikiwe.” “Asante.” Wakaagana, lakini Tunda akabaki kitandani akiendelea kurudia rudia ujumbe aliotumiwa na Net.

‘Hakuna usiku niliolala vizuri kama usiku wa siku ya kuamkia leo. Nikijua wewe ni wangu na utakuwa wangu daima. Asante kwa kunikubali Tunda. Nakupenda na ninaahidi kukupenda na kukulinda daima.

Net.’

~~~~~~~~~~~~~~~~~~~~~~~

Tunda aliingia kuoga na kujitengeneza vizuri kama kawaida yake, akijiandaa kutoka na Net kwa chakula cha mchana. Alijizungusha kwenye kioo kwa muda mrefu sana. Alibadilisha muundo wa alivyoweka nywele, akabadilisha nguo zaidi ya mara tatu, rangi ya kucha. Kila kitu hakuridhika nacho.

Simu yake ikaanza kuita. “Huu sio wakati wakunipigia kabisa, mama Penny. Nimechanganyikiwa.” “Kinacho kuchanganya nini?” “Sina nguo kabisa.” “Umegawa zote!?” “Hapana bwana. Net anataka tutoke naye kwa chakula cha mchana na usiku atanitoa pia.” “Kumbe na wewe unachanganywa na vitu vya kijinga kama hivyo!? Hebu vaa utoke hapo kwenye kioo.” “Ulijuaje kama nipo kwenye kioo?” Tunda akaanza kucheka.

“Hapa jasho linanitoka!” “Acha ujinga Tunda. Wewe ni mzuri tu. Na chochote unachovaa kinakupendeza.” “Kweli dada?” “Sikudanganyi. Unavutia kwa kila nguo unayoweka mwilini mwako.        Sijawahi       kukuona     umechukiza. Si ningeshakwambia?” “Kweli wewe ungeshaniambia.” Wote wakacheka.

“Nagawa watoto mwenzio.” “Nipe Penny.” “Huyo ukimtaka hata sasa hivi nenda kamchukue hukohuko shuleni.” “Kafanyaje tena msimamizi wangu wa harusi?” “Si Julius kapita hapa nyumbani asubuhi hii, kuna mambo alikuwa anaongea na Mchungaji, kawakuta mezani wanakunywa chai ili waende shule. Acha aanze kumcheka Julius. Eti anamwambia, ‘Mwenzako auntie Tunda anaolewa na Mzungu!’ Nusu nikae chini.”

“Mungu wangu, Penny jamani!” “Ungemuonea huruma Julius jinsi alivyoshtuka na kumgeukia Mchungaji kumuuliza.” “Uwii! Nilitaka kuja kuzungumza naye mwenyewe.” Tunda alikaa chini. “Sikutaka aje asikie kutoka kwa mtu mwingine jamani! Julius ali..” Tunda akasita.

~~~~~~~~~~~~~~~~~~~~~~~

Alikumbuka jinsi Julius alivyomweleza kuwa anampenda. Alitangaza kwa kila mtu pale kanisani kuwa Tunda ndiye atakuwa mkewe. Kanisa zima walijua mwisho wao itakuwa ndoa tu. Julius alikuwa kijana aliyetulia sana na mcha Mungu, kitu kilichokuwa kikimuogopesha sana Tunda. Ni kijana aliyekuwa na maadili mazuri, hakutofautiana sana na Net.

Wakati wote hakuwa akielewa hivi mtu unawezaje kumkosea Mungu kwa uzinzi! Mara kadhaa kwenye maongezi yake na Tunda, alimuonyesha kushangazwa na watu wanaokuwa na mahusiano ya kimapenzi kama si nje ya ndoa basi kabla ya ndoa. Tunda alimuona ni mwanaume mzuri, mwenye juhudi, lakini alijua hawezi kuja kumfaa hata kidogo. Alijua atashtuka sana akija kujua historia yake.

Hakumjibu moja kwa moja hapana, lakini alimwambia wapeane muda wakufahamiana zaidi. Kila Tunda alipokuwa akitaka kumweleza ukweli juu ya historia yake ya maisha, alishindwa kutokana na mwelekeo wa mazungumzo ya Julius. Familia yake, ndugu zake, jinsi walivyokuzwa na jinsi anavyoelewa misingi ya familia inavyotakiwa kuwa. Utaratibu wa wazazi wake kutaka kufahamiana vizuri na wazazi wa kila mkwe anayeletwa nyumbani kutambulishwa kwao kabla ya ndoa. Huo ulikuwa mtihani mkubwa sana kwa Tunda.

Ukizingatia baba yake yupo jela kwa kosa la wizi na mama yake ndiye hataki hata kumuona Tunda kwa kosa la kulala na mumewe. Mama yake alimchafua Tunda kupita kiasi. Alijua pindi ukweni watakapotaka kukutana na wazazi wake, haitawezekana kabisa kueleza ukweli juu ya wazazi wake. Kwa hiyo aliendelea kumzungusha Julius ili siku aje amwambie ukweli au yeye mwenyewe aje ajue historia yake na kuamua kuachana naye kabisa.

Uzuri wa Julius hakuwa na makuu. Kila kitu alimshirikisha Mchungaji wake, hata kukutana na Tunda walikutana nyumbani kwa Mchungaji, au ofisini au sehemu ya hadharani kwenye macho ya washirika wengine. Kwa hiyo hata hakuwa akimwambia Tunda maneno yeyote yale ya kimapenzi, kwa hiyo hata Tunda hakuwa na hisia zozote zile za kimapenzi juu yake kama Net aliyekuja kwa muda mfupi. Akaeleza nia yake yakutaka awe mkewe. Kama tu Julius. Lakini Net yeye akambusu, kamkumbatia na kumfariji katika hofu yake.

Kwa siku moja tu, Net akawa ameshampita mbali sana Julius aliyekuwa na Tunda hapo kanisani wakati wote na kutangaza kuwa Tunda ni mkewe. Japokuwa alikuwa amesoma na kazi nzuri, lakini bado alikuwa na misingi mikali ile ya zamani kabisa ya wokovu. Alifuata sheria zote za maadili ya kanisani. Hakuwahi kuwa na faragha na Tunda.

Jumbe alizokuwa akimtumia Tunda kila siku ni neno la Mungu, asubuhi na usiku muda wa kulala. Akijitahidi sana atamtumia nyimbo za dini. Lakini alimsifia kila alipomuona kuwa umependeza sana na kumkumbatia, tena wakiwepo watu. Basi. Alikuwa kaka mtaratibu sana. Tunda hakutaka kumuumiza hata kidogo alitaka kuja kujitoa taratibu akimtafutia sababu.

Sasa akaja Net. Anayemjua ndani na nje. Net anaonyesha uozo wa Tunda unathamani kwa kusaidia wengine. Kaka wakizungu. Mzuri. Akapata faragha. Kayasema yote. Kamuweka Tunda mikononi na busu! Ahadi ya kuwa naye daima, ipo. Net amekiri hajakurupuka. Alikuwa akimfuatilia na kumpenda tokea ni kahaba.

Net amemsindikiza Tunda mpaka kwa baba yake gerezani. Akaonyesha heshima yote kwa baba yake Tunda. Akamtamkia kuwa naye katika kila hatua yake hapo jela. Net anamfahamu Tunda na uozo wake wote. Huwezi kumlinganisha na Julius hata kidogo. Julius anamfahamu Tunda nadhifu ambaye anasubiri kwa wakati muafaka, atakuja kupelekwa kwa wazazi wa Tunda ambao anadhani nao wapo na hali kama wazazi wake. Kwa hakika Tunda alijua Julius hawezi kuja kuwa mumewe, lakini pia hakutaka kumuumiza.  Julius alikuwa mtaratibu na muungwana.

~~~~~~~~~~~~~~~~~~~~~~~

“We Tunda?” “Nipo. Namuwaza mchumba Juli.” “Pole mwaya. Utafanyaje?” “Itabidi nimtafute na kwa mara ya kwanza nimwambie ukweli.” “Utakuwa umefanya vizuri. Nitakupitia ofisini kwako. Nina safari ya huko.” “Umempikia kitafunio gani mchungaji?” “Sitaki kuombwa.” “Mimi na wewe mama Penny!” “Nishakufungashia. Nitakupitishia. Usijali.” “Ndio maana nakupenda.” “Acha kuniibia. Na utoke hapo kwenye kioo, uende kazini.” Tunda akacheka na kukata simu.

~~~~~~~~~~~~~~~~~~~~~~~

Tunda alifika ofisini, akakuta wafanyakazi wake walishafika. Alijawa furaha hata wao waligundua hilo. Walianza kutaniana, baada ya muda kidogo zikaanza simu za wateja na wengine wakaanza kuingia mle ofisini wakitaka kuonana na Tunda kwa ushauri na kuona picha za kazi alizokwisha fanya. Wengine walikuwa wakiangalia picha, wengine wakiongea nao huku wakiuliza maswali. Pakawa na shuguli nyingi tu asubuhi hiyo.

Mama Cote kwa Tunda.

Wakiwa kila mmoja akihudumia wateja wake, Mama Cote akaingia pale ofisini kwao. Tunda alipomuona aliwaomba wateja aliokuwa akizungumza nao, wamsubiri kidogo, akamsogelea Mama Cote. “Shikamoo Mama.” “Umenivunjia uchumba wangu. Sasa hivi ningekuwa nimeshaolewa na mimi. Isingekuwa mama yako kukutoa mimba, ungekuwa umezaa na baba yako. Ushajiuliza umevunja ndoa ngapi mpaka sasa hivi? Umeshajiuliza ni maafa kiasi gani umesababisha kwenye jamii?” Tunda alikuwa kwenye mshtuko, akabaki ameduaa.

“Au umeshajiuliza ni majeraha kiasi gani umesababisha kwenye maisha ya watu? Kana kwamba haitoshi umeingia kwenye maisha ya Net!  Kijana mdogo asiye na hatia. Na yeye unataka kumuongeza kwenye idadi ya wanaume utakao kuwa umewavulia nguo hapa duniani! Wameshafika wangapi? Eti Tunda?” Wateja wote walibaki wakimsikiliza yule mama huku wakimwangalia Tunda.

“Unataka kulala na baba na mtoto wake!? Yule mchumba wangu mimi ni kama baba yake Net. Umelala naye, halafu sasa hivi umemgeukia mwanae! Huna kinyaa!? Basi kama hilo hulijali, umelipuuza, basi kumbuka mahusiano uliyokuwa na kaka yake, Gabriel! Umemchanganya Gab karibia amuache mkewe kwa ajili yako, mpaka watu tukafunga na kuomba ndio Gab akashtuka na kukujua kama wewe ni shetani.” Tunda kimya.

“Jamani wewe binti! Wewe ni mchafu wa kiasi gani? Umenyimwa aibu  na huruma kabisa! Umeingia mpaka kwenye nyumba ya Mungu! Umeangusha wazee wakanisa. Gab alikuwa kijana ambaye ametulia kwenye ndoa yake, mcha Mungu, lakini umefanikiwa kumuangusha dhambini yule kijana!”

“Naomba umuhurumie Net, tafadhali. Amejitunza mwanangu maishani mwake kote. Leo unataka kumuharibia mwanangu maisha! Na ninajua wazi, umeokoka kwa ajili yake. Umeokoka ili umpate mwanangu. Tunda muogope Mungu wewe mtoto! Hata kama huna dhamira, lakini nataka kukwambia Mungu yupo na anakuona kwa unalotaka kumfanyia Net. Nakuapia kweli kabisa Tunda, Mungu atakuadhibu kwa ukatili na unyama unaotaka kumfanyia mtoto wangu. Hajafaidi maisha hata kidogo, leo unataka kuja kumuua na UKIMWI!” Wakati anaendelea kuongea, Mama Penny akaingia akamkuta yule mama akimtukana Tunda.

“Ukoje Tunda wewe!?” Watu wote wakamgeukia Mama Penny. “Unamuacha mtu anakuja ofisini kwako, anakutukana bila kosa? Umechanganyikiwa wewe? Huu ni ujinga ambao sitavumilia hata kama ni mama yake Net. Kama anaumwa na wewe kufuatwa na Net, aende akaongee na mwanae sio wewe. Acha kabisa kukubali kunyanyaswa kwenye hemaya yako! Nani hajawahi kukosea hapa?” Mama Penny alikuwa amekasirika mpaka anatetemeka.

“Nisikilize na kuniangalia vizuri, wewe Mama Cote. Mimi ndio mama Penny. Dada yake Tunda. Ukiuliza hapa jijini mimi ni nani, utaambiwa. Sijali wewe ni nani, unakiasi gani cha pesa benki wala unaendesha gari gani. Mwanao ndiye aliyejileta mwenyewe kwa Tunda. Nenda kamtapikie mwanao sio mdogo wangu.”

“Na kama unataka kuolewa, tafuta mwanaume mwenye uwezo wakutawala zipu za suruali zake. Mlango huo hapo, potea kabla sijakucharua. Na nikikusikia tena siku nyingine unamfuata Tunda, utaniona mbaya. Potea bila hata kufungua mdomo wako tena hapa. Kimya, toka.” Mama Cote alifungua mlango akatoka.

Tunda alianza kulia kama amechinjwa. Alilia hakutaka hata mtu amguse, tena mbele ya watu. Akaingia ofisini kwake, akachukua pochi yake na funguo za gari, akaondoka.

Ilimbidi Mama Penny ndio amalizane na wateja huku akihakikisha hawamkimbii Tunda. Kama alivyo na maneno mengi. Aliongea mpaka wote wakamuona Mama Cote ndiye mbaya. Wakati Mama Penny amefanikiwa kuwashawishi na wote wakakubali kutoa oda zao, na yeye mwenyewe akahakikisha amewaandika na kuchukua pesa za kuweka nafasi zao, ili ofisi ya Tunda isichukue wateja wengine, kwa kuwa wale wafanyakazi wa Tunda walikuwa kama wamepigwa na ganzi. Hakuna aliyeweza kuongea wala kusogea, Net naye akaingia.

Alitoa tabasamu baada yakumuona Mama Penny aliyekuwa ametambulishwa na kufika nyumbani kwake siku iliyopita. “Kina Penny hawajambo?” “Wazima. Namshukuru Mungu.” Net akashangaa kuona ile sura ya mama Penny ya ucheshi imepotea. “Najua nimewahi kidogo, lakini tulikubaliana na Tunda kwenda kupata chakula cha mchana pamoja. Sijui nimemkuta?” Net akauliza kiuungwana tu.

“Mimi ni mkweli, na huwa sizunguki nikitaka kuongea jambo langu. Tunda kaondoka hapa kama yupo uchi. Mama yako kamvua nguo Tunda.” “Tena kamvua haswa.” Mmoja wa wateja akadakia. “Huyo ndio Net mwenyewe!?” Mwenzake akauliza.

“Basi siye habari za Tunda tunazo zote! Kazitapika mama yako mzazi. Alitaka kuzaa na baba yake, lakini mama yake akamtoa mimba. Haya, kavunja uchumba wa mama yako. Katembea na kaka yako. Kalala na wazee wakanisa, yote hayo tumeyajua leo.” Yule dada mteja wa Tunda akaongea kishabiki. “Bwana mama yako anaongea!” “Kule si kuongea, nikuchambua!” Wakacheka na kugonga. Net alibadilika akawa mwekundu.

“Nafikiri sina haja yakuongeza na hayo unayasikia kutoka kwa wateja wa Tunda wanaohitaji huduma ya Tunda hapa ofisini kwake alipopaanzisha kwa jasho lake, lakini mama yako amemudu kuja kumdhalilisha hapa. Sasa ninachokuuliza wewe Net ni kitu kimoja tu. Kwa nini hukuanza kumwambia mama yako kwanza, mkishakubaliana na mama yako, ndio ungemfuata Tunda? Unajua historia yake tokea mwanzo. Kwa nini umekuja kumtonesha vidonda Tunda?”

“Alishatulia, maisha yake yalishabadilika, leo umekuja na mama yako, tena umemfuata Tunda wewe mwenyewe, wala hakukutafuta msichana wa watu! Halafu haya ndiyo mnayomlipa? Tunda ameanza chini kabisa, amesimamisha hii biashara kwa jasho lake! Bila kulala usiku na mchana anahangaika kutafuta pesa.” Mama Penny akaendelea.

“Hivi unajua ni watu wangapi walikuja kumposa Tunda pale kanisani akawakataa? Ulimuona Julius? Anamtaka Tunda mpaka kesho, na anapesa yule kijana sio za kurithi, pesa yake mwenyewe. Anampenda Tunda na yupo tayari kumuoa Tunda hata leo jioni, ila Tunda mwenyewe aliamua kutulia kwanza kidogo. Amekuamini wewe, akakukubali, leo mnakuja kumvuruga kiasi hiki!?”

“Nampenda Tunda, mama Penny. Sihitaji kuomba ruhusa kwa mtu yeyote kumuoa Tunda. Namfahamu Tunda, si kwa kusimuliwa. Nayajua maisha ya Tunda ndani na nje na nimemkubali kama alivyo.” Net akaendelea.

“Mama amekuja hapa na amefanya aliyoyafanya kwa mshtuko. Hakutegemea kama mimi naweza kumuoa Tunda. Aliyomwambia Tunda leo, ndiyo aliyoniambia mimi jana kama kunikumbusha kuwa Tunda ni nani. Lakini sikujali. Niliamua kumuacha nimpe muda, atakuja kuelewa baadaye kuwa ninamuoa mwanamke ninayempenda. Hakuna kitu wala mtu atakayebadilisha mapenzi yangu kwa Tunda. Kwanza Tunda yuko wapi?” “Kaondoka.” Mama Penny akajibu kwa jeuri.

“Unamaanisha nini?” “Namaanisha Tunda ameondoka hapa bila yakuaga, tena akiwa analia sana. Isingekuwa mimi kumfukuza mama yako humu ndani, hata wewe ungemkuta akiendelea kutukana hapa. Ilikuwa mbaya sana Net. Ni udhalilishwaji wa hali ya juu, sijawahi ona. Ni ngumu kuamini kama mwanadamu anaweza kumfanyia mwenzake hivyo! Tena eti anatumia maneno ya Tunda aliyotubu kanisani! Mnaabudu kanisa gani hilo ambalo halifundishi washirika wake kusamehe na kuheshimu watu!?” Mama Penny alikuwa akiwaka kama moto.

“Sasa ukicheza kidogo tu Net, nakuhakikishia Tunda ataolewa mchana kweupe, tena wewe na mama yako mkishuhudia. Tena ataolewa na mwanamme atakayekuwa akijua historia ya maisha yake, akamkubali na kumuheshimu. Nyinyi si mnadhani nyinyi ni watakatifu kuliko watu wote? Sasa mwambie mama yako asubiri kadi ya harusi ya Tunda. Labda mimi nisiwe Mama Penny. Nakuhakikishia Net, Tunda ataolewa. Msimbabaishe. Kwa kipi mno!?” Mama Penny alikuwa amekasirika, anaongea bila kumeza mate, ikambidi Net abaki akimsubiri amalize.

“Unafikiri Tunda anaweza kuwa amekwenda wapi?” Net akatupia hilo swali kwa haraka. “Sijui. Lakini nataka kabla hujamtafuta Tunda hakikisha unaandaa mazingira ya kumuweka Tunda. Tunda ameteseka tokea mtoto mdogo. Kwa mara ya kwanza sisi ndio familia yake, na yeye ndio ametulia. Sitaki ulazimishe kumuoa halafu akaenda kuteseka.”

“Hayo mazingira tutayatayarisha mimi na Tunda. Siwezi kujitayarisha kwa nisicho kijua, mama Penny. Lasivyo nitajikuta hata Tunda sitamuoa kwa kupoteza muda nikisitasita kwenye njia panda. Leo ni mama yangu, kesho anaweza kuwa mama yake Tunda mwenyewe au mtu mwingine. Nitajuaje? Tunda anahitaji kuwa na uhakika kuwa ninampenda, basi. Naamini akikubali hilo, na kuamini kuwa anastahili, wengine hawatamsumbua.” Net akaendelea.

“Sasa hivi anakimbia kwa kuwa anajiona ni kweli hanistahili. Lakini mimi ndiye naona simstahili kabisa Tunda. Nampenda na ninamthamini sana Tunda. Hakuna kitakachonizuia kumuoa Tunda. Si mama yangu, si mtu yeyote yule na sitapoteza muda kufanya walimwengu wakubaliane na maamuzi yangu. Ninamuoa Tunda, tena nitamuoa si muda mrefu kuanzia sasa. Hata wewe mwenyewe ujiandae kwa harusi yangu na Tunda.” Net alionekana na yeye amekasirika sana.

Akatoa simu yake nakuanza kumpigia Tunda. Ilikuwa ikiita tu mwishowe ilikatwa na kuzimwa kabisa. Tunda akawa hapatikani kabisa kwa simu. “Naomba ufikirie Tunda anaweza kuwa amekwenda wapi.” “Nimekwambia sijui.” Mama Penny akajibu  tena kwa hasira. Net akatoka pale akiwa hajui pakuanzia lakini akaona akamwangalie tu nyumbani kwake.

Net amsaka tena Tunda.

Akatoka kwenye ofisi za Tunda zilizokuwa karibu na Moroco, njia yakuelekea Kawe mpaka Kimara nyumbani kwa Tunda. Akafika, kukawa kunaonyesha wazi hakuna dalili ya mtu ndani. Akarudi tena ofisini kwa Tunda, hakuwepo. Siku ya Net ikawa imeshavurugika. Hajui pakumpata tena Tunda. Akaenda kuegesha gari sehemu na kuendelea kumpigia bila kuchoka. Mwishoe akaamua kwenda kumtizama kwa Mchungaji wake. Akatoka hapo kwa kasi, akielekea Tabata huku akijaribu kumpigia simu. Simu yake haikuwa hewani kabisa.

Akafika nyumbani kwa mchungaji wake, akakuta na Mama Penny na yeye ndio anaingia nyumbani kwake. “Tunda amefika hapa?” “Na mimi ndio nafika sasa hivi.” “Basi naomba ukamwangalie ndani.” “Kwa nini usimpe muda akatulia?” “Nimekwambia nimeamua kuwa na Tunda, katika shida na raha. Hatakaa akalia peke yake tena na hii safari ya kudhalilishwa haitaishia leo. Atafuatwa na watu wengi tu. Sasa ukisema nimpe muda, nitampa miaka mingapi? Na sina uhakika kama mama yangu hatamfuata tena.” Net akajibu na yeye.

“Ndio maana nakwambia ukaanze kuongea na mama yako kwanza kabla ya Tunda.” “Sitaishi na mama yangu, nitaishi na Tunda ambaye atafuatwa na kila aina ya watu wakitaka kumlaumu kwa maisha aliyoishi zamani. Kazi yangu ni kumjenga Tunda mke wangu, wengine sio jukumu langu. Nilikwambia na nimerudia tena. Sasa unanisaidia kumtafuta Tunda au nihangaike mimi mwenyewe?” Mara ujumbe ukaingia kwenye simu ya Net.

‘Net! Nakuomba sana uniache, na usinitafute tena. Sikutaki na sipo tayari kuolewa na wewe. Nafikiri nilikurupuka kukukubalia. Sikuwa nimefikiria vizuri. Sasa hivi nimefikiria na nimeamua sitaki kuolewa na wewe tena. Endelea na maisha yako na mimi uniache na maisha yangu kabisa.’

“Namimi naomba kusoma huo ujumbe.” Net akampa Mama Penny simu yake. Akasoma. “Utafanyaje?” Mama Penny akauliza kwa kutulia kidogo baada ya kusikia hekima za Net. Net akajaribu kumpigia, simu ikaita mara tatu mwishowe ikakatwa na kuzimwa kabisa.

Akafikiria kama dakika moja kisha akampigia simu mtu. “Haloo!” “Vipi Net?” “Nahitaji msaada wako, ndugu yangu.” “Niambie kaka.” “Naomba uniambie hii namba ya simu, huyu mtu mara ya mwisho amewasiliana na mimi alikuwa wapi?” “Naomba kama dakika tano, nitakupigia.” “Sina dakika tano kaka.” “Kuna mtu amenisimamia mbele yangu, Net!” “Naomba umwambie akusubiri.” “Daah! Haya kaka.” Net hakutaka hata kukata simu.

Baada ya muda mfupi sana akasikia akiitwa. “Net?” “Nipo kaka.” “Kigamboni.” Akamtajia hilo eneo tu aliloona mtandaoni mara ya mwisho simu ya Tunda ilipo. Net akamgeukia Mama Penny. “Unafikiri Tunda anaweza kuwa Kigamboni kwa nani?” “Sijui.” Net akarudi kwenye simu. “Unaweza kuniambia eneo alilopo?” “Itachukua muda kidogo Net.” “Basi nakuomba unisaidie kuangalia. Ukipata, unipigie simu. Mimi naelekea hukohuko Kigamboni. Hata kama ni usiku, tafadhali unijulishe. Naenda kusubiria simu yako huko.” “Lakini kwema Net? Kama ni mwizi kwa nini tusimtafute Pius mtu wa usalama. Watamkamata sasa hivi.” “Hapana sio mwizi ni mpenzi wangu. Tafadhali usimwambie mtu yeyote. Wewe tafuta eneo husika alilopo. Utakuwa umenisaidia sana.” “Sawa Net. Kuwa makini huko.” Net akakata simu.

“Naomba nikuachie namba yangu ya simu. Endapo Tunda akikutafuta, naomba unijulishe na umwambie na mimi nipo huko huko Kigamboni, sitaondoka huko mpaka anione.” Hakusubiri jibu. Akamkabidhi mama Penny kadi yenye namba zake za simu na kuingia kwenye gari lake. Akaondoka Tabata akielekea Kigamboni kumsaka Tunda.

Akiwa njiani mama Penny akampigia. “Umefika wapi Net?” “Bado nipo njiani kuelekea Kigamboni kwenda kumtafuta Tunda.” “Samahani sana Net, nahisi bado nilikuwa na hasira.” “Naelewa kabisa. Najua kitendo alichofanya mama ni kibaya. Lakini sina uwezo wa kuzuia watu wengine waongee nini na wafikiri nini juu ya mahusiano yangu na Tunda. Ningetamani kufanya kama ulivyonishauri, mama Penny. Lakini naona nitapoteza muda mwingi sana hapo. Naona nitakuwa ni kama nazuia maji ya mvua yasiingie mchangani! Sitaweza, na nitajichelewesha sana.”

“Nakuelewa. Naweza kuhisi mahali alipo Tunda.” “Wapi?” “Hukohuko Kigamboni. Kuna hoteli moja tulikwenda wakati fulani kama familia, kutembea tu. Lakini Tunda alipapenda sana, akasema ni patulivu anaweza kupanga mambo yake yakapangika. Akaja kurudi tena huko akiwa peke yake, akakaa huko kama siku tatu, aliporudi ndipo akafungua na ile ofisi. Huwa anakwendaga huko mara kwa mara. Ukimuona huko naomba usimwambie kama mimi ndio nimekwambia alipo.” Mama Penny akampa jina la hoteli na sehemu iliyopo. “Asante sana.” Net akazidi kukanyaga mafuta kwa nguvu.

~~~~~~~~~~~~~~~~~~~~~~~

Alifika pale hotelini, giza lilikuwa limeshaingia. Akaulizia pale mapokezi, akaambiwa mahali kilichopo chumba alichokodi Tunda, tena baada yakujieleza sana mpaka wakamwamini. Alipofika mlangoni akamsikia Tunda akilia kwa uchungu sana. Net akasimama pale nje kwa muda akitafakari nini chakufanya, kwani aliendesha akiwa na wazo lakumpata Tunda tu, bila kujua nini chakumwambia pindi akimpata.

Kilio cha Tunda, kilimfanya ashindwe kuvumilia. Akagonga. Alisikia kile kilio kimekoma. Net akarudia kugonga tena. Kimya. Akarudia kugonga mara mbili mfululizo. “Nani?” Tunda akauliza kwa upole, kisha akaendelea. “Nilisema msiniletee chakula.” Alimsikia akijieleza bila kufungua mlango.

Net akagonga tena. “Ni mimi. Naomba unifungulie Tunda.” “Net!?” “Ndiyo.” Kimya kilitanda kwa muda. “Tunda?” “Nilikutumia ujumbe kwa simu Net. Hujapata?” “Nataka uniambie mimi mwenyewe ukinitizama machoni Tunda, kama mimi nilivyofanya wakati nikikwambia nakupenda. Si kwa kunitumia ujumbe.” Akamsikia Tunda akianza kulia tena bila kufungua mlango. “Siwezi Net. Sitaweza tena.” “Naomba unifungulie mlango Tunda.” Tunda alilia kwa muda, kisha akafungua mlango taratibu.

Macho yake meupe yalikuwa yamebadilika yakawa mekundu sana. Alivimba uso kwa kulia. Net alikwenda moja kwa moja kwenye friji ndogo iliyokuwepo pale chumbani akatoa maji na kumpa Tunda. “Kunywa kwanza haya maji.” Tunda akayaangalia yale maji kwa muda, akafuta machozi na kamasi zilizokuwa zikimtoka kwa mkono wake kisha akapokea yale maji akanywa kidogo huku wakiwa wamesimama.

Net akavua viatu akapanda kitandani. “Njoo hapa.” Net akionyesha huku akipiga piga kile kitanda taratibu kumuonyeshea pakukaa. Tunda akabaki akiangalia huku akiendelea kulia. “Njoo, Tunda.” “Siwezi Net. Sitaweza kabisa.” “Umeshaniambia hilo zaidi ya mara moja. Nakuomba uje hapa.” Tunda akaongeza kulia akafunika uso wake kwa viganja vyake akabaki amesimama akilia sana. Net akaenda kumfuata pale alipokuwa amesimama akilia, akamshika mkono na kumsogeza mpaka kitandani.

Kitanda kilionekana kisafi na kimetandikwa. Wazi alionekana hakuwa amekaa kitandani hapo tokea alipoingia kwenye chumba hicho. Net akampandisha kitandani, akaweka kichwa chake kwenye mto, kisha akamfunika, na kuvuta mto mwingine juu kidogo ya kichwa cha Tunda, akajiegemeza na yeye huku akimtizama. Tunda bado alikuwa akilia.

Akaingia chooni, akachukua kitaulo kidogo na kukilowesha na maji ya baridi akarudi nacho pale kitandani nakuanza kumfuta nacho kichwani huku akiweka nywele zake vizuri, akizitoa usoni nakuzirudisha nyuma. Tunda alikuwa amegeukia ukutani akilia. Net aliendelea kumfuta taratibu mpaka alipotulia. Akaweka kile kitambaa pembeni akarudi kujilaza pembeni yake.

Akambusu upande wa kichwa aliokuwa pembeni yake. Tunda akajivuta karibu yake, kisha akavuta pumzi kwa nguvu na kuzishusha taratibu kama kusafisha kifua chake. “Pumzika kidogo. Mimi nitakuwepo hapahapa. Ukiamka ndio tutakula.” Tunda hakujibu, lakini baada ya muda Net akamsikia akihema taratibu kama mtu aliyekwisha pitiwa na usingizi. Naye akajiegemeza vizuri pale kitandani akapitiwa na usingizi pembeni yake.

 

Jumanne!

Hakuna aliyeshtuka mpaka ilipofika asubuhi. Tunda hakuongea chochote aliamka na kwenda kuoga bafuni. Alishtuka sana baada yakujiangalia kwenye kioo na kuona jinsi uso wake ulivyo vimba. Alitoka na kurudi kukaa kwenye kochi. Akapandisha miguu yake kwenye kochi, akabaki amejikunja. Net na yeye akabaki akimwangalia.

Baada ya muda akasimama, akaenda kumzungushia shuka pale pale kwenye kochi, kisha akambusu tena kichwani. “Na mimi nakwenda kuoga. Nimeagiza watuletee kifungua kinywa huku chumbani. Najua baada ya muda mfupi sana watakugongea mlango, uwafungulie.” Tunda akatingisha kichwa kukubali. Net akaelekea na yeye bafuni.

Baada ya muda Net akatoka akakuta kifungua kinywa mezani. “Nimeagiza tu, sijui utapenda?” Tunda hakujibu ila akaanza kulia tena. “Naomba tule kwanza Tunda, halafu tutazungumza.” “Sitaweza Net. Naomba uendelee na maisha yako.” “Mimi naendelea na maisha yangu. Umeniona nikikimbia au nimesita mahali? Eti Tunda?” Tunda akaendelea kulia.

“Kwa nini unanikazania mimi, badala ya kuoa msichana mwengine? Wasichana warembo wako wengi tu. Na wengi wanakupenda Net na wanahistoria za maisha za kueleweka. Kwa nini usichague hata mmoja wao, ukamuoa !?” “Mimi mwenyewe sijui Tunda!” Net akakaa mezani nakuanza kufungua zile sahani. Hakuwa amevaa shati, alibaki na suruali yake na kinguo kidogo cha ndani ya shati, cheupe. Sio singlendi ila t-sheti nyepesi tu.

“Njoo tule. Au unataka nikusogezee hapohapo kwenye kochi?” Tunda akainama na kuanza kulia tena. “Kwa nini hutaki kunielewa Net!?” Net akasimama na kuhamia pale kwenye kochi alipokuwa amekaa Tunda.

“Naona unataka tuzungumze kwanza kabla ya kula. Naomba ufute machozi, ndio tuzungumze.” Tunda alijitahidi kukausha machozi, lakini mengine yaliendelea kutoka. Akafuta tena na tena. “Nakusikiliza Tunda.” “Naona mimi sipo tayari kuolewa.” Tunda aliongea huku akilia. “Naomba ufafanue. Hutaki kuolewa na mimi au hutaki kuolewa kabisa?” “Vyote.” “Kwa kuwa mama yangu amekwambia hutakiwi kuolewa na mimi au kwa kuwa umefikiria ukagundua hunipendi?” Tunda akaanza kulia tena kwa kuficha uso wake.

“Naomba uniambie ukweli kabisa Tunda. Kama kweli umegundua hunipendi, na siwezi kuwa mume wako, uniambie sasa hivi. Nitaondoka, na hutakaa unione tena. Maana sitakuwa na jinsi nyingine ya kutengeneza maisha yetu yakawa ya amani na furaha kama hutakuwa unanipenda. Na sitataka kuoa mwanamke ambaye hanipendi. Nakuapia Tunda, sitakaa kukusumbua tena, endapo utanitamkia leo, hunipendi. Nitaondoka sasa hivi na sitakusumbua tena. Naomba uniambie ukweli.” Tunda akaendelea kulia.

“Tunda? Nataka kujua hutaki kuolewa na mimi kwa kuwa hunipendi au kwa kuwa mama yangu amekudhalilisha?” “Siwezi kuwa mke wa mtu yeyote Net. Hata kama nakupenda kwa kiasi gani! Siwezi.” “Ni lini ulishakuwa mke wa mtu, ukashindwa? Mimi mwenyewe siwezi kusema siwezi kuwa mume wa Tunda, wakati sijawahi kukuoa. Au siwezi kukuahidi nitakuwa mume mzuri sana kwako wakati hata sijui mume anakuaje!”

“Lakini najua mapenzi ya kweli niliyonayo kwako, na msaada wa Mungu, vinanitosha kunitia nguvu ya kuanza safari yetu ya mapenzi. Na hata wewe huhitaji vitu vingi sana kuwa mke bora kwangu. Mapenzi na Mungu uliyenaye inatosha kukupa moyo wakujua unaweza. Hakuna sifa nyingine au hatuhitaji mtu wa tatu, au kitu cha tatu kutufanikishia ndoa nzuri, Tunda.”

“Lakini kama hamna mapenzi kati yetu wala hakuna hofu ya Mungu katika mahusiano yetu, ni kweli hatutafika mbali. Ninaweza nikaoa binti ambaye hajawahi hata kuguswa na mwanaume yeyote, na mama yangu akampenda sana, lakini mimi na yeye tukashindwana vibaya sana. Historia za nyuma za maisha yetu na mtu watatu katika maisha yetu, vyote hivyo havituhakikishii usalama wa ndoa yetu.” Net akaendelea kuzungumza naye taratibu, wakati Tunda akiendelea kulia.

“Itakusaidia nini mama yangu akupende halafu mimi nikawa sina mapenzi ya dhati kwako? Utaishi na mimi kwenye maisha yako yote yaliyobaki hapa duniani. Na kwa bahati mbaya sana, kwa historia yako ya nyuma watu kama mama hutawaepuka Tunda. Wapo, watakuwepo na wataendelea kuwepo katika kila hatua ya maisha yako, ili kukurudisha chini. Leo wamekujia kwenye upande wa ndoa, amenikimbia na kunitumia ujumbe mkali sana kuwa hunitaki tena.”

“Bahati mbaya sana, mama amekutukana ofisini kwako mbele ya wateja wako, haya umeshaachana na mimi, na ile ofisi nayo utafunga na kuacha ile biashara kabisa? Maana kwa jinsi nilivyowasikia wale wateja niliowakuta pale ofisini kwako, wameshabikia sana. Tena wao ndio wamenisimulia mambo yote mama aliyokwambia, sasa kama wamenieleza mimi hivyo, ujue watatangaza kwa kila mtu watakaye weza kumfikia. Eti Tunda?” Tunda akaanza kutulia. Yale maneno yakaanza kumwingia.

“Utakimbia wangapi na mpaka wapi? Mama yangu tu peke yake amekukimbiza mpaka Kigamboni. Haya, akija na mama yako mzazi siku ya harusi yetu? Si ndio utaniacha madhabahuni wewe!?” Tunda akacheka kidogo. “Unacheka Tunda? Huo sio ukweli?” “Nilipaniki Net.”

“Lakini nilishakupa tahadhari mpenzi wangu! Hao watu hatutawaepuka kabisa. Watakuja, tena sitashangaa hata watakuwepo wakutaka kuweka pingamizi kwenye harusi yetu. Wapo na jinsi siku zinavyozidi kwenda na watu wakagundua tupo pamoja, ndio watazidi kumiminika. Hapo bado hawajaja watakao kwambia walikuwa wapenzi wangu, wewe ndiye uliyesababisha tukaachana.” “Kwani na wewe ulikuwa na wasichana wengine!?” Net akacheka kidogo.

“Muone anavyopenda kujihami! Acha kuhangaika na watu wa nje Tunda! Anguko kubwa na la hatari ni la kutoka ndani yako Tunda, si nje. Usiruhusu watu wachezee hisia zako kiasi hicho! Huwezi kubadilisha kila mtu, lakini unaweza kubadili nafsi yako. Hicho ndicho kitu cha msingi ulichofanya, basi. Huwezi kusaidia wengine. Wewe ndiye unayejua ulipotoka, ulipo na unapokwenda. Acha kutafuta nani atakuelewa na nani atakukubali. Utapoteza muda mwingi sana hapo, na malengo pia. Umenielewa?” Tunda alishabadilika sura yake, akawa anatabasamu. Akatingisha kichwa kukubali.

“Nikuombe kitu Tunda?” Tunda akatingisha kichwa tena kukubali. “Naomba usiwe mwepesi kubadilika hasa katika mahusiano yetu. Mtu akikuudhi kidogo tu, unaona mimi ndiye wakuniadhibu na upo tayari kuniacha.” “Sikuwa nakuadhibu Net. Maneno ya mama yako yalinifanya nifikirie na kuona ni kama kweli sikutendei haki kunioa. Ni kama nilikuwa nakuokoa kutoka kwenye janga.”

“Sio kwa namna ile Tunda! Naomba matatizo yasitufanye tukimbiane bali tukimbiliane. Usinikimbie na kujificha. Uliniumiza sana kuona hutaki kupokea simu zangu kabisa, mwishowe unazima kabisa simu yako ili nisikupate!” “Samahani Net, nilipaniki. Nikajawa majuto, aibu ya kudhalilishwa. Halafu nikachukia sana kuona furaha yangu imedumu kwa masaa machache tu. Nikajiona vile ambavyo sistahili kuolewa.” Akajifuta machozi.

“Naelewa kabisa Tunda. Matatizo ni mengi, tena sasa hivi yatakuja zaidi na zaidi, ila ukumbuke haupo tena peke yako. Kila tatizo utakalopata sasa hivi, hata liwe kubwa kiasi gani, usinikimbie, tujifunze kutatua matatizo yetu pamoja.” “Kwa hiyo huniachi?” Tunda akauliza kwa aibu kidogo.

“Kama ukiniambia hunipendi, sitakuwa na chakufanya Tunda. Nitaondoka. Lakini si vinginevyo.” “Nakupenda sana Net, lakini mama yako alinishtukiza, sikuwa najua chakufanya.” “Pole. Lakini ngoja nikwambie ukweli Tunda. Utakuwa mke wangu, na utaishi na mimi. Lazima nikueleze ukweli. Sawa?” Tunda akatingisha kichwa kukubali.

“Umeumiza watu wengi sana na mimi nikiwa mmoja wao. Ilinichukua muda na kwa msaada wa Mungu kuweza kukusamehe na kukupenda tena. Nakuomba wape watu wengine nafasi kuwathibitishia umebadilika. Usikimbie na usiwachukie, wape muda. Watakuja kukuamini na waume zao, watoto wao, au tuseme watakuja kukuamini tena, mpenzi wangu. Tuwape muda ili Mungu ashugulike nao. Inaweza ikachukua muda mrefu. Tena tunaweza kujikuta  tukabakia mimi na wewe tu, lakini lazima tukubaliane kwa chochote na lolote, kuwa tutakuwa pamoja na hatutakimbiana.”

“Ukipata tatizo utanikimbilia mimi sio kunifukuza. Hiyo itakuwa ndio nguvu yetu na wewe ukikubali kuwapa watu nafasi ili waje kukuamini tena, haitakuumiza tena. Utajua wanahitaji muda wa kupona majeraha uliyowaachia.” Tunda akajifuta machozi yaliyoendelea kutoka.

“Najuta Net! Najuta sana.” “Naelewa. Na ninajua unajuta sasa hivi kwa kuwa ulipatanishwa na Mungu na unayo ofisi inayoweza kukufanya uishi vizuri na mimi nipo hapa. Lakini wakati ule hukua na njia nyingine yakuishi Tunda. Hukua na kimbilio, hukuwa na mtu wakukuongoza vizuri. Ulitupwa ulimwenguni ukiwa hujui chakufanya, na akili yako ikakupeleka kufanya kile uwezacho ili kuishi. Usikae muda mrefu sana hapo ukijilaumu. Sasa hivi tafuta jinsi ya kusaidia ulio waumiza.”

“Nitafayaje? Maana ile njia ya kwanza uliyonipa ndio imeshashindikana. Maneno yatazagaa sana. Nimeshachelewa. Sasa, sasahivi nifanyaje?” “Kwanza usiwe unakimbia.” Tunda akacheka kidogo huku akijifuta machozi. “Sitakimbia tena Net.” “Afadhali.” Net akamsaidia kukausha machozi.

“Pili, unatakiwa wewe mwenyewe ukumbuke umesamehewa na Mungu, huna hatia na unahitaji kusamehewa na wanadamu pia.” “Net! Siwezi kurudi kwa mama yangu kumuomba msamaha kwa yale aliyonitendea. Kwanza yeye mwenyewe ndio amenisababishia yale maisha. Alinitupa wakati namuhitaji. Nimekuwa nikibakwa yeye akiwepo!” Tunda alianza kulia tena.

“Yeye ndio anatakiwa kuniomba msamaha!” “Sikiliza Tunda. Kwa jinsi ulivyonisimulia, sidhani hata kama mama yako anajua upande wa pili wa hii stori. Yeye anachojua ni mtoto aliyekataa shule na kuwa na mahusiano na mume wake. Au sikuelewa sawa sawa?” “Ni kweli. Si baba wala mama wanaojua ukweli wote.” “Basi hao ndio watu wakwanza na wamuhimu wakuanza nao.”

“Narudije kwa mama yangu Net!?” “Nitakusindikiza. Akikubali kukusikiliza sawa. Akikataa pia ni sawa, tutampa muda na yeye wakufikiria na tutamwambia pakukupata endapo atakuwa tayari kuzungumza na wewe. Lakini hakikisha unafanya upande wako na swala la kusamehewa na kutokusamehewa sio juu yako tena.” “Asante Net. Na mama yako nitafanyaje?” “Huyo atakutafuta kama atakuwa tayari kukusamehe. Mwache kabisa.” Tunda akavuta pumzi kwa nguvu na kuzishusha taratibu akijua ukweni hali ni mbaya kwa hakika.

“Nakushukuru Net. Lakini ni ngumu, ni ngumu sana! Ni rahisi vile nilivyokuwa nikiishi pale kanisani kwa kina mama Penny. Hakuna anayenijua na kuninyoshea kidole. Kila mtu ananiheshimu na kumpenda Tunda aliyesamehewa dhambi.” “Yalikuwa mapumziko ya muda Tunda na yameisha. Hata kama sio swala la kuolewa ndilo lingekurudisha mwangani ili kusafisha na kutibu madonda uliyoyaacha kwenye mioyo ya watu, basi ungerudishwa kwa njia nyingine. Muda umefika. Mungu ameona upo tayari kusaidia watu wengine. Na mimi nipo na wewe, siwezi kukuacha peke yako.” Tunda akafuta machozi na kujisogeza vizuri kwa Net, Net akamkumbatia.

          “Nakupenda Tunda.” “Sasa hivi ndio nakuelewa ukisema hivyo Net. Asante.”  Net akacheka. “Sasa leo ni jumanne, siku ya kazi mama. Kukaa hapa hotelini ni kuzuri sana, lakini ile ofisi uliyofungua kwa kuteseka, itafungwa kama ukiendelea kujifungia huku, na Net akikukumbatia.” Tunda akacheka.

“Narudishaje uso wangu kwa wale wafanyakazi wangu?” “Nimependa sana hiyo sentensi. Ni wafanyakazi wako. Wapo chini yako. Anza kwa kuwaambia ukweli. Tena sio kwa mapana, kilekile walichomsikia mama akisema, unawambia ni kweli, lakini..., hapo ndio unawaeleza juu ya Tunda huyu na kuwasaidia hata kama na wao wanawazo la kufanya kama uliyofanya wewe, basi wasithubutu. Waambie upo tayari kuwasaidia kwa namna yeyote ile kwa kuwaeleza madhara yake.” Net aliongea na Tunda mpaka Tunda akapata nguvu mpya.

“Hivi nilikwambia kuwa nakupenda?” “Mmmmhh!” Net alijidai kufikiria kidogo. “Sikumbuki. Ngoja nitoe simu yangu niangalie ujumbe wako wa mwisho ulikuwa unasemaje.” Tunda akampokonya ile simu na kuufuta ule ujumbe kisha akachukua simu yake na kumtumia ujumbe mwingine.

‘Net! Namshukuru sana Mungu kwa kukuleta kwenye maisha yangu. Sijui ningekuwa wapi sasa hivi bila wewe mpenzi wangu. Nakushukuru kwa kunipokea jinsi nilivyo. Nilikuwa kama glasi iliyovunjika, lakini umeanza kunijenga upya. Najua ipo siku nitafikia ukamilifu ambao nitakuwa ni mke utakayenifurahia. Nipe tu muda. Nakupenda sana Net, naahidi kuwa mwaminifu kwako daima.

Tunda!’

Net alimuona Tunda akifuta machozi, kisha akatuma ule ujumbe. Akachukua simu yake mara baada yakuona ujumbe umeingia, nakuanza kusoma. Tunda alimuona akitabasamu.

‘I love you too, Tunda. Nakuahidi kuwa na wewe daima. Kwenye mvua na jua, nitakuwepo kukushika mkono, ili usianguke tena. Nitakupenda, nitakutunza na kukulinda daima.’

Nathaniel!

~~~~~~~~~~~~~~~~~~~~~~~

Tunda alirudi nyumbani kwake akabadili nguo na kurudi ofisini kwake. Alimkuta mfanyakazi mmoja, Bety na kuambiwa mwingine Jaz, ambaye alimtegemea sana, na ndiye aliyemtuma hata kwenye kikao alichokuwa amekutana na Net, ameacha kazi. Aliumia sana na hofu ilimnyemelea. Wale wasichana wote, Bety na Jaz, walikuwa wakiabudu pamoja kwenye kanisa la kina mama Penny. Alijua kanisa zima litamjua Tunda wa zamani na kupoteza heshima aliyokuwa ameshapata pale kanisani.

~~~~~~~~~~~~~~~~~~~~~~~

Kwa muda mfupi aliokuwa amesimama pale mbele ya Bety, mfanyakazi wake, taarifa nyingi zilianza kuingia kichwani kwake. Picha ya pale kanisani kutengwa na watu, ilianza kumjia. Aliona vile watu watakavyokuwa wakikaa vikundi kumsema na kumnyoshea vidole.

          Pale kanisani ni mahali pekee alipopata marafiki na familia. Alipenda kwenda kanisani iwe katikati ya juma au mwishoni sababu ya furaha na amani aliyokuwa akipata. Si wakubwa wala wadogo waliokuwa wakimuheshimu. Mama Penny na mumewe hawakuacha kumsifia hata mbele za watu.

Kwa mara ya kwanza maishani mwake Tunda alianza kuishi maisha ambayo wanadamu wengi wanayatamani. Kuheshimiwa, kupendwa na bila wasiwasi wa kesho. Akiwa na pesa na uhakika hata akifa kesho anaenda mbinguni kwa Mungu wake. Alishasahau kulia kwa huzuni, uso wake ulijaa furaha kila wakati. ‘Kweli naanza kulipa gharama ya niliyoyatenda! Ni kweli Mungu amenisamehe, lakini siwezi kuacha kulipa gharama.’ Tunda akajiwazia nafsini mwake.

~~~~~~~~~~~~~~~~~~~~~~~

Lakini akamkumbuka Net, jinsi alivyomwambia huo ndio wakati wakutokurudi nyuma, lazima apambane akisaidia aliowaumiza na mabinti wengine wanaopitia kwenye hali kama yake. Akamgeukia Bety aliyebaki pale ofisini. “Nilifanya maamuzi mabaya sana zamani. Sina jinsi ya kujitetea, na mama Cote hakukosea kabisa. Kwa yale niliyoyafanya sistahili kusamehewa wala kuheshimiwa kwenye jamii. Inanipasa kukaa mbali kabisa na watu. Lakini sitafanya hivyo. Ni uchafu wangu, lazima nisafishe mimi mwenyewe. Atakayeweza kuwa na mimi kunisaidia sawa, atakayeshindwa pia nitaelewa. Hata kama na wewe unataka kuondoka ni sawa tu, sitakuzuia.” Tunda akaendelea taratibu tu.

 “Nataka kusaidia watu wanaopitia kwenye hali niliyopitia mimi. Kukimbia ni kukubali wengine watumbukie kwenye shimo nililokuwepo mimi. Lakini Mungu alinihurumia akanitoa huko. Kujificha na kutosimama tena mimi ninayejua ukweli wa maisha yangu, nikumkatalia Mungu kusaidia kuwatoa watu wengine waliopo kwenye hiyo shida, kupitia mimi.”

“Net alikubali kutumiwa na Mungu akanifikia mimi, na kunitoa kwenye yale maisha machafu. Amenipatanisha na Mungu, Mungu umenitakasa, amenisamehe na amenibariki. Kama niliweza kumtumikia shetani bila aibu wala hofu, hata sasa sitaogopa tena.” Tunda alidhani alikuwa akiongea na yule mfanyakazi wake aliyebaki lakini kumbe alikuwa akiiambia nafsi yake iliyokuwa imeshakata tamaa. Alihakikisha anaiweka sawa nafsi, mwili na roho yake iliyokubali kuwa imesamehewa. Alivuta pumzi kwa nguvu akatoa tabasamu pale alipoona ameishinda nafsi yake na mwili uliomshawishi kutokusonga mbele kwa hofu na aibu.

“Kwa hiyo Bety, upo na mimi au na wewe unataka kuondoka?” “Mimi nipo dada yangu. Sina hata pakwenda. Huu mshahara unaonipa hapa, unategemewa sana. Halafu na mimi najua kukosa na kusamehewa. Najua kulipa gharama ya makosa. Nimefurahia huo moyo wa utayari, maana ni kwambie ukweli tu, vita yako ndiyo imeanza. Hutapumzika. Hata wale waliokuwa wakikupenda, watakugeuka na kuwa kama mwiba kwa maneno.”

“Lakini huwa haidumu muda mrefu, endapo ukisimama kama ulivyosimama hapa mbele yangu na kuamua kupambana. Ila ukianza mchezo wakurudi nyuma na kwenda mbele, utakaa hapo kwa muda mrefu sana, na wengi hushindwa katikati na kuamua kurudi kabisa walipotoka.” Yule dada hakujua ni kwa kiasi gani anamjenga Tunda. Waliongea kwa muda mrefu sana siku hiyo wakisimuliana mambo mengi ya maisha yao. Uhusiano wao ukahama, kutoka kwa bosi na mfanyakazi, wakajikuta wameanza kuwa marafiki.

 

Kwa Mara ya kwanza, Net amtoa Tunda kama mpenzi.

Jioni Net alifika nyumbani kwa Tunda kumchukua kwenda kupata naye chakula cha usiku. Akabaki akimtizama. “Bwana Net! Utanifanya nishindwe kutembea.” “Umependeza sana Tunda mpenzi wangu. Siamini kama jioni hii, mimi ndio napata bahati ya kukaa na wewe meza moja na kukutizama.” Tunda akacheka. Alijisikia vizuri sana kuona bado Net anaona thamani yake.

“Asante. Hata wewe umependeza na unanukia vizuri. Nimependa ulivyovaa. Simple but classic!” Tunda mjua thamani ya mavazi na vitu, alishampigia mahesabu kuanzia juu mpaka chini, akajua hajajifanyia ubahili. “Asante. Basi twende ili tukapate muda wa kutosha huko.” Wakaondoka hapo nyumbani kwa Tunda, Tunda asijue wanapokwenda.

Net alimtendea haki vile alivyopendeza na sehemu aliyompeleka. Kwanza gari ilipokelewa nje ya hiyo hoteli. Valet. Akashuka na kwenda kumfungulia mlango na kumkabidhi kijana wa Valet funguo za gari yake kwamba yeye ndio akatafute sehemu ya kuegesha gari. Kiatu cha juu alichokuwa amevaa Tunda na aina ya gauni, ungependa kumtizama. Alipendeza haswa. Net alishindwa kumuachia mkono.

Wakaingia akiwa amemshika mkono. Ungependa kuwatizama. Tunda huyu anapendwa. Yupo na Net, anayemfahamu. Ungependa kuiona furaha yake usoni! Alijitengeneza vizuri tu usoni na hereni zake zilimkaa vizuri.

Walifika kwenye meza, Net akamvutia kiti, akakaa. Akampa busu la shavuni na kwenda kukaa mbele yake. “Asante.” Tunda akashukuru akiwa amejawa tabasamu. “Tunda wewe ni mzuri sana.” “Kweli Net au unanipa tu moyo?” Tunda alidhani ni kwa kuwa anajua historia ya kutukanwa weusi wake, ndio maana anamsifia. “Nilikwambia sura yako ilibaki akilini mwangu karibu kuchanganyikiwa!” Tunda akaanza kucheka.

“Mimi sio mtu wakuchanganywa hovyo. Wewe ulinichanganya Tunda! Ulinivutia mara tu nilipokuona. Nikatamani kupata na wewe huu muda ambao Mungu anatupa sasa hivi. Nakupenda Tunda.” “Asante Net. Nakushukuru sana. Sina jinsi nikaeleza mtu akanielewa juu yako Net. Lakini Mungu anajua kile alichonitendea kupitia wewe. Wala sikustahili. Lakini Mungu amenirehemu.” Wakatulia kidogo, kama kila mtu akiwaza lake.

Muhudumu akafika kutaka kuwahudumia. Kila mmoja akaagiza kinywaji chake, kisha Net akaagiza Champagne isiyo na kileo. Tunda akacheka. “Lazima tutoss kwenye first date yetu.” Net akaweka msisitizo. Kwa Tunda kila kitu alipenda na kufurahia. Hata mengine hakuyawazia, akabaki kupokea tu kwa shukurani.

“Niambie habari za kazini.”  Tunda akamuelezea juu ya msichana aliyeacha kazi, lakini Net akamwambia huo ndio wakati wakujua watu wa destiny/hatima yake. “Ndio nini?” Net akacheka. “Unajua katika maisha kuna watu wa aina tatu. Na lazima wote uwe nao makini sana, ili usiachwe ukiwa umeumia na kumkosea Mungu wako.”  Net akaanza.

“Ukiwa kwenye shida fulani, Mungu hutuma watu wakukutoa pale kwenye shida na kukusogeza mahali fulani. Iwe kwenye misiba, harusi, na matukio fulani Mungu anayojua utahitaji watu. Huwa hao watu hawakai hata kidogo. Wakishakutoa kwenye ile hali tu, au wakishatimiza kusudi, utakuta kunatokea sababu isiyo hata na msingi wanaondoka kwenye maisha yako. Na pia sio wavumilivu hata kidogo. Usipojua kuwatumia vizuri, hupita kwa haraka, hawakai. Kwa hiyo ni lazima ujue ni nini unataka ili wakitokea, unachukua kile unachoona kitakufaa kwenye maisha yako, na wao wapo tayari kusimama na wewe kwenye hilo. Tena kwa haraka. Nilikwambia huwa hawakai?” Tunda akatingisha kichwa kukubali.

Akarudi muhudumu na vinywaji vyao wote na ile champagne aliyoagiza Net. Wakamiminiwa kwenye glasi nzuri sana maalumu kwa champagne na juisi zao. “Lazima tufanye toss.” Tunda akacheka kwa furaha wakati ananyanyua glasi yake. “Tuna toss kwa ajili ya nini?” Akauliza Tunda. “Mwanzo wa safari yetu mpaka kifo kitakapo tutenganisha. Tuombe Mungu atushike mkono katika kila hatua.” Net akaeleza kwa ufupi kile anachoomba na kutamani kuona kwenye hayo mahusiano, Tunda akimsikiliza. Kisha akasema, “For us.” Tunda akagonga glasi ya Net taratibu na tabasamu usoni. “For us.” Na yeye akajibu kwamba yote ‘kwa ajili yao’. Kisha wakanywa kwa pamoja.

Wakatulia kidogo. “Umeishia juu ya watu wa aina ya kwanza Net.” Tunda akavunja ukimya akimtaka Net aendelee. “Yeah. Watu wa aina ya pili, Mungu huwaleta kukamilisha huduma/maono/au kazi fulani aliyokupa. Na hao pia huwepo kwa kukusaidia kutimiza hilo kusudi tu. Wapo kwa ajili ya lile lengo tu. Kuhakikisha linatimia. Mvua inyeshe, jua litoke, mpaka lile lengo likamilike au lisimame. Lile tu. Usijichanganye, na kuwapa mambo au malengo yako mengine ya maisha yako. Ujue utaumia. Kama ni huduma iliyopo ndani yako. Inakuwa ni ile tu. Iwe Kanisa au huduma kubwa Mungu anayotaka kukutumia wewe ikamilike. Atakutumia hao watu kwa hilo tu.”

“Hawawezi kusimama na wewe katika mambo mengine. Ni hilo tu. Na mara nyingi hawa watu wanakuwa na uwezo mkubwa kukuzidi wewe. Iwe fedha au wakati mwingine hata uelewa wa mambo fulani fulani. Kama ni kanisani, watasimama na wewe katika ile huduma ya kanisani. Wakikusaidia na kukuelekeza jinsi ya kufanya. Wewe utakuwa na yale maono ya kanisa, lakini wao wanaweza wakawa na uelewa labda ya jinsi ya kuendesha kifedha. Wapi mtapata pesa.”

 

“Nini mfanye ili kusaidia ile huduma iendelee. Watakuja wale watu wa aina ya kwanza, watafanikisha mambo fulani kwenye ile huduma, wataondoka kwa sababu moja au nyingine, lakini hawa huwa wanabaki na wewe. Na huwa Mungu hawaweki wakawa wengi. Unaweza kuta kanisa zima wakawa hata wasiozidi watano.”

“Watasimama na hiyo huduma tu kuhakisha haifi labda wewe mwenyewe uamue kuacha. Lakini hao watu watakuwepo kwenye ile huduma, au kazi Mungu aliyokupa. Hivi nilishakwambia usijichanganye na kuanza kuwapa kazi au malengo yako mengine? ” Net akarusha swali, Tunda akacheka.

“Umeshaniambia.” “Ukicheka hivyo na macho hayo, unazidi kunichanganya kabisa.” “Acha bwana Net. Niambie juu ya watu wa aina ya tatu.” “Upo makini sana mpaka unaniogopesha! Utafikiri upo darasani unachukua dondoo za mtihani!” “Hujui nikiasi gani unanisaidia Net. Sio kwamba sina elimu ya darasani tu, sina elimu yeyote ile ya mambo ya jamii. Sikubahatika kulelewa na mtu yeyote. Nimejikuza mwenyewe. Yale yaliyokuwa sawa kichwani mwangu ndio nilikuwa nikifanya. Ndio maana huwa sipendi kuacha kwenda kanisani ili nijue na Mungu naye anataka nini kwa wanadamu, na huwa napenda kwenda kukaa nyumbani kwa Mchungaji ili nione familia huwa zinakuwaje. Mke na mume huwa wanatakiwa waishije!” Tunda akaendelea.

“Niliishi na baba na mkewe, lakini hawakuwa wakielewana sana. Yule mama ndiye aliyekuwa kama mtawala pale ndani. Baba hakuwa akiongea. Haya, nyumbani kwa mama na mumewe, mama hakuwa na muda kabisa na mambo ya familia. Baba Tom ndiye aliyekuwa kama mama. Alifanya mambo yote ya pale ndani, na msichana wa kazi ndio alijua kupikwe nini, siku gani afanye nini, yaani alipewa uhuru wote pale ndani.”

“Mama hakuwa akikaa sana pale ndani na akija anakuwa na watoto wake tu. Halafu pia baba Tom alikuwa mbabe sana. Sio kwangu tu, hata kwa mama. Akionyesha yeye ndio mtawala pale. Mwenye mali. Wote tumevikuta na tunaweza kuviacha siku atakayoamua yeye. Kwa hiyo hivyo unavyoongea na mimi, natamani kukusikiliza na kukuelewa vizuri. Inanisaidia kuliko vile unavyofikiri. Sikuwahi pia kuwa na rafiki. Kwa hiyo unaweza kufikiri vile nilivyo na taarifa chache za maisha.” Net akatabasamu.

“Lakini hujachelewa Tunda. Upo katika wakati sahihi na Mungu atakuletea watu sahihi kukusaidia kuishi maisha aliyokukusudiwa uishi. Na ninakuombea sana tu. Mungu hawezi kukuacha.” “Asante Net.” Tunda akatabasamu nakumfanya Net atabasamu na kubaki akimtizama.

“Nini sasa?” “Nafurahi kukuangalia Tunda. Una uzuri ambao mtu akitulia na kuamua kukuangalia vizuri, hawezi kutosheka.” “Ukifanya hivyo nitakuwa nashindwa kukutizama machoni.” “Unakumbuka kipindi tupo Arusha?” “Nakumbuka.” “Nilikwambia kutoniangalia, ndio adhabu yangu tosha.” Tunda akacheka kwa sauti na kufanya waliokuwa wamekaa meza za jirani kuwageukia.

“Unajua Net?” “Ehe!” “Sikuwahi kuwaza hata kidogo, kama kijana wa kizungu anaweza kunipenda mimi! Haswa wewe Net. Mama alishanikashifu juu ya haya macho nakuniambia yapo kama ya paka. Huu weusi wangu ndio ilikuwa kabisa. Alikuwa anasema ninamfanya atapike.” “Yeye ni mweupe?” Net akauliza.

“Kwa asili sio mweupe sana, lakini huwa anajiongeza. Kwa hiyo ukimuona ni mweupe kukukaribia wewe.” Net hakuongeza neno hapo. Tunda akaendelea. “Kwa hiyo nilikosa ujasiri kabisa na kila kitu kwenye huu mwili.” “Huo ulikuwa ni uongo wa shetani. Tena ukute hata mama yako hakuwa akijua analoongea. Alikuwa akiropoka tu sababu ya hasira. Lakini shetani akahakikisha anapigia mstari hilo neno, ili awe anakukumbusha mara kwa mara kukutesa tu. Mimi napenda wasichana wazuri na huwa nawajua. Wewe ni mmoja wapo.” “Net wewe! Kwa hiyo ulishawapenda wangapi?” Net na yeye akacheka sana, tena kwa sauti ya juu. Aligundua ameropoka.

“Nimeropoka Tunda. Sikuwa na maana ya kupenda kwa jinsi hiyo. Kuna watu wanavutia kuangalia, mpaka unajiuliza siku wanaumbwa huko tumboni, Mungu hakuwa na kazi nyingi siku hiyo au anakuwa anakusudi nao gani hapa duniani! Na wengi wamekuwa wakichezewa na shetani kwa kupitia uzuri wao. Naomba tuache hilo, tusizungumzie tena. Ni sawa?” “Mmmh! Nimeanza kupatwa wivu.” Net akacheka zaidi.

“Usiwe na wasiwasi Tunda. Mungu amenipa mrembo wangu, macho yangu yametulia kwako tu. Mungu amenijalia kuridhika na anachonipa, sitamani visivyo vyangu. Ni wewe tu.” Tunda akatabasamu kidogo kama anayefikiria.

“Asante. Niambie juu ya watu wa aina ya tatu.”  Akabadili mazungumzo. “Kweli umekusudia kujifunza. Haya, hawa watu wa aina ya tatu, Mungu anakuletea ni watu wakudumu. Mvua inyeshe, jua litoke wapo na wewe katika kila jambo kwenye maisha yako. Mtakwaruzana, lakini baada ya muda mfupi mnarudisha mahusiano. Wapo kukujenga na kukufanya uwe vile uonekanavyo. Umeshawahi kusikia ule usemi unaosema, ukitaka kujua tabia za mtu, angalia aina ya marafiki wanao mzunguka?” Tunda akatingisha kichwa kukataa.

“Basi ndio ujue. Marafiki wabaya huaribu tabia njema. Sio uanze kukimbia watu lakini! Unaweza kukuta Mungu anakuletea mtu ili umsaidie. Jukumu lako ni kumsaidia. Akikubali kubadilika sawa, akikataa unamruhusu apite, lasivyo ukimng’ang’ania utajikuta na wewe unanza kuwa njia panda na kutilia mashaka hata baadhi ya mambo uliyokuwa ukiyaamini. Kwa kuwa na wao wataanza kukuhubiria njia zao. Umeridhika sasa?” “Sana.” Waliendelea kuzungumza jioni hiyo mambo mengi sana. Nia ya Net nikumfahamu Tunda, kwa ngazi ya kutaka awe mke wake. Ajue ataishi na mtu wa namna gani.

Chakula kikaanza kuletwa kama alivyoagiza Net. 3 full course. Yaani milo mitatu. Wakaanza na appertizer. Kwa kuwa alijua Tunda mpenda matunda na mboga mboga hasa mida ya jioni, akaomba wampe menu yenye appertizer za matunda. Tunda akachagua matango yaliyokatwa na kupambwa vizuri na nyanya juu yake yakiwa na sour cream katikati. Yeye Net akataka aletewe supu.

Baada ya muda mfupi tu vikaletwa. Wakaanza kula hiyo appertizer na vinywaji vyao, taratibu tu. Muhudumu alikuwa akipita mara kwa mara kuongeza juisi na kuuliza kama wanahitaji chochote. Mwishoe alikuja kutoa vyombo vya appertizer. Wakabaki wametulia tu.

Muhudumu akarudi tena na menu ya main course sasa. Kila mmoja akaagiza chakula. Ila Tunda alitaka mboga mboga na samaki wakuchomwa asiye na mifupa. Net akaagiza mlo uliokamilika. Aina ya huduma waliyokuwa wakipewa, na ile sehemu tu, Tunda alijua pesa itamtoka Net. Chakula kililetwa wakaendelea kula taratibu huku wakizungumza hili na lile bila kuvuka mipaka, wakati mwingine kimya.

Wakamaliza chakula, ikaja dessert. Net alitaka aletewe kipande cha cheesecake. Tunda akataka mchanganyiko wa matunda. Strawberry na zabibu. Vikaletwa vimewekwa kwa kuvutia, safi. Baada ya utulivu wa pale na kupepesa macho, Tunda akagundua kitu cha tofauti pale. Akacheka na kumwangalia Net. “Nini?” “Hii sehemu iliandaliwa maalumu kwa ajili yetu?” Net akacheka kidogo.

 “Maana nimeona tumepewa meza ya pembeni. Kuna mpaka mishumaa! Patulivu, hakuna mtu huu upande wote, ni sisi tu! Halafu pako romantic, madhari ya kimahaba.” “Umependa?” Net akauliza. “Sana Net! Unauliza tena? Mimi Tunda nani anifanyie mambo haya!? Au umenisahau?” Net akacheka taratibu. “Unastahili zaidi ya hivi Tunda. Ni vile leo ilikuwa siku ya kazi nilikuwa na mambo mengi ndio maana matayarisho yamekuwa hivi. Lakini unastahili zaidi ya haya. Na nimefurahi kama umefurahia.” Ilimgusa sana Tunda. “Nashukuru sana Net. Asante. Sasa hivi nimetulia na kuangalia vizuri, ndio nimegundua! Nashukuru kwa kuniheshimu na kunithamini. Asante Net. Hakika sikutarajia kitu kama hiki! Ni mambo nayaona kwenye sinema! Sikutegemea!” “Acha kulia sasa. mimi nataka ufurahi!” Tunda akaendelea kujifuta machozi.

“Hakika sikutegemea hata kidogo! Kwa ajili yangu mimi Tunda?” “Wewe mpenzi wangu.” “Asante Net. Mimi najua unajua kama namaanisha.” “Nimefurahi kama umefurahia. Halafu unakumbuka nilitoa cheni mguuni kwako kisha nikakuahidi nitairudisha nyingine hapo?” Tunda akakumbuka na kucheka akijifuta machozi.

“Nilikwambia haina haja Net! Yale yalipita.” “Lakini nilimuonea wivu yule aliyeweka ya kwanza. Jinsi ulivyoivaa na kuiweka maana kubwa sana! Ulishindwa kuitoa Tunda. Unakumbuka sifa za mtu uliyeniambia unataka aje airudishe hapo mguuni?” Tunda akanyamaza, akainamia matunda yake kama anayefikiria kwa muda.

“Wakati ule niliongea vile nikiwa najua wazi hakuna atakayeweza kuja kuitoa ile cheni Net. Kwanza sikujua kama hata kuna mtu atajali kiasi cha kunifikiria kwa namna ile. Halafu sikujua kama naweza kupata mtu atakayenipenda, kunijali na kunithamani kwa kiasi kile cha Sadiki. Ilikuwa na nguvu fulani na maana kubwa sana moyoni kwangu. Sikujua kumbe ni nguvu za giza.” Tunda akatulia kidogo.

 

“Anyway.” Tunda akaendelea. “Wewe nilikuruhusu uitoe nikiwa hata sijui kama unanipenda ila nilijua unanijali kwa namna fulani. Halafu nilikuheshimu kwa umbali uliolipa gharama kwenda na mimi. Halafu ukawa umeshaniogopesha kuwa nakuwa bado nipo kwenye maagano na Sadiki au kwenye ndoa ya Sadiki na mkewe.” Net akacheka taratibu huku akimwangalia jinsi anavyoongea taratibu kwa sauti yake tulivu.

“Nikaona nikukubalie wewe ndio uwe umeitoa. Angalau kuweka historia yangu mwenyewe kuwa ni wewe ndiye ulinitoa kwenye vifungo vyote. Hata hivyo nilijiambia sitaweza kupata tena mtu niliyetamani aje anitoe hiyo cheni hapo mguuni. Kwa hiyo nikaona ni heri nikupe tu wewe hiyo nafasi, uwe umeandika historia nzima yakunifungua vifungo vyote. Sikujua kama nastahili au hata kuja kupendwa kimapenzi na kuheshimiwa. Nilijua ni ndoto ambazo zinaweza zisitimie Net.” Tunda akaendelea taratibu.

“Tokea mtoto, au tokea natolewa kwa bibi na babu, kila mtu, si wakike hao kina mama nilioishi nao au wanaume wote niliokuwa nao, wamekuwa karibu na mimi kwa ajili ya kujinufaisha kwa namna moja au nyingine. Lakini sio kunitizama mimi kama Tunda halisi. Kwa hiyo nikakuruhusu wewe uitoe, lakini sikuwa hata na wazo kuwa unanipenda hivi Net! Ningejua wakati ule, nahisi mimi mwenyewe ningekuomba unitoe.” Net akacheka tena, Tunda akajifuta machozi.

“Basi naomba nirudishe nyingine.” Tunda akatoa macho. “Kwamba umetengeneza kama ile!?” “Tofauti kidogo.” Tunda akacheka asiamini. “Asante Net.” Net akapiga magoti, Tunda akanyanyua mguu juu kidogo, Net akamvalisha ile cheni ya mguuni. Kisha akaizungusha kidogo kitu kilichomfurahisha sana Tunda. Alijisikia vizuri. Alikuwa akicheka huku akifuta machozi. Net akamnyanyua ule mguu na kuubusu akiwa amepiga goti kwa mguu mmoja vilevile. Tunda hakuamini. 

“Hii imenikaa vizuri zaidi.” Akajisifia Tunda. “Na nimeipenda sana Net, japo sijaona muundo, lakini nimependa.” Mwanga wa pale haukuwa mkali sababu ya Net mwenyewe. Alitaka mwanga hafifu na mishumaa iwashwe. “Asante sanaaaa.” Net akacheka na kusimama. “Karibu.” Akambusu shavuni. “Sasa kwa kuwa naona umevaa cheni shingoni na mkononi umeweka bangili nzuri, hivi utakuja kuvaa wakati mwingine.” Net akaweka kijimfuko mezani.

“Acha mchezo Net! Hivi navua hapahapa!” Net akaanza kucheka. “Ili uvae hivi?” “Hapana. Ili univalishe hivi.” Net akaendelea kucheka wakati Tunda anaanza kuvua. “Basi acha nikuvue mwenyewe na kukuvalisha.” “Hapo sawa.” Tunda akakubali. Akanyanyua nywele alizokuwa amezibana sehemu moja, mkia ukining’inia, Net akamfungua ile cheni ya shingoni na kuweka yake. Akampa mkono wa kushoto, akafanya hivyohivyo.

“Ningejua nisingeagiza dessert.” Net akazidi kucheka. “Kwamba hii ndio ingekuwa dessert yako?” “Kabisa Net!” Tunda alijibu huku akijiangalia ile cheni mkononi na ile ya shingoni. “Asante sana Net.” Tunda akasimama na yeye akaenda kumbusu pale alipokua amekaa, shavuni.

~~~~~~~~~~~~~~~~~~~~~

Japokuwa alikuwa na mambo mengi kazini kwake, lakini Net alijitahidi kupata muda na Tunda kwa kadiri alivyoweza. Upendo wa dhati ulianza kujengeka katikati yao. Jumbe na simu za hapa na pale hazikuwa zikiisha. Mama yake Net alishangaa kuona Net hamuulizi kitu chochote juu ya fujo alizomfanyia Tunda. Alihisi wameachana, lakini furaha aliyokuwa nayo Net, alijua kijana wake yupo kwenye mapenzi. Mama Cote mawazo akahamisha kwenye mali zake. Akiwinda jasho lake.

  Kwa Ufupi Juu ya Ritha, Mama Cote au Mama Net na wakweze, ndoa yake na wanae.

Net ndiye aliyeachwa mrithi wa mali zote za bibi na babu yake, endapo bibi yake pia akifariki. Na pia endapo mama huyo angefariki, pia Net ndiye angebaki mrithi tu. Sasa kitendo cha msichana mwenye sifa kama Tunda kujitokeza kwenye maisha ya mwanae, na kukimbilia kanisani alipo Net, tena akiwa ameanza na Gabriel, akaja wale wazee. Tena wote walikuwa wana hali nzuri ya kifedha! Moja kwa moja yule mama alijua Tunda anataka tu mali. Kitu ambacho asingeruhusu mama huyo.

Pesa yake aliihangaikia mwenyewe, tena kwa kulipa gharama kubwa sana. Alitua nchini akiwa hafahamiani na yeyote aliyemsaidia kufika hapo alipo sasa. Kampuni hiyo ya Cote Ltd, aliianzisha hapo nchini yeye mwenyewe. Kuanzia ni jina tu, mpaka sasa inafahamika nakutajwa mpaka bungeni na waheshimiwa kama moja ya kampuni iliyofanikiwa na kupigiwa kelele na baadhi ya wabunge kuwa, inatakiwa kufikiriwa kupewa kipaumbele kwenye tenda za ujenzi wa mabarabara, yenyewe kwanza kabla ya kampuni za kigeni, kwa kuwa ni ya mzawa na hajawahi kuharibu.

Ritha alirudi nchini akiwa peke yake, shule kichwani, pesa nyingi benki, na juhudi zake. Mumewe alipofariki yeye ambaye alikuwa anajulikana kama mke kihalali, akanufaika na mafao yote ya mumewe. Akachanganya na pesa aliyofanyia kazi kwa shida sana na baridi kali akiwa nchini Canada, na pesa aliyopewa na wakweze ikiwa imebeba siri nzito ambayo si baba yake Net ambaye ni mumewe Ritha, aliyefariki, wala watoto wake, {Net na Maya} na utuuzima huo, walijua siri hiyo. Siri hiyo alikufa nayo Mzee Cote na sasa amebaki nayo bibi yao tu.

Ritha au mama Net, aliipenda pesa na kuijua. Alikuwa na malengo ambayo hayakuwahi kusimamishwa na mtu au kitu. Lilipofika swala la maendeleo yake au malengo aliyojiwekea, hata watoto wake walisubiri. Watoto hao wawili aliokuwa amezaa na huyo mwanaume wa kicanada aliyefariki, aliwaacha kwa wakweze, wakitunzwa tokea watoto. Kuanzia malazi, mavazi huku wakisomeshwa mashule ya gharama sana yeye akihangaikia maendeleo yake.

Hata kabla kifo cha mumewe, aliishi kama mwanamke aliyetimiza jukumu lake la kuzaa kwa uchungu, kisha basi. Mumewe alitunza hao watoto wakati yeye akiwa na sababu ya shule. Akasoma shahada zote, mumewe na wazazi wake wakisaidiana kulea hao watoto wawili aliokuwa amezaa. Wakidhani shule itakapoisha ndipo atatulia, haikuwa hivyo. Shule iliisha yakaja malengo yake mengine na mipango ambayo iliwapelekea Maya na Net kuchukuliwa kuwa kama watoto wa huyo babu na bibi. Mengi ya siri yalikuwa yakiendelea kwenye ndoa ya wazazi wao, lakini huyo babu na bibi hawakuwahi kumwambia Net au Maya ukweli.

Watoto hao walichojua ni mama anasoma, shule imemfunga, ndio maana baba anawalea peke yake. Baba alipoanza kuugua, wakarudi kuishi kwa bibi na babu. Wakijua majukumu ya mama ni mengi, inabidi bibi na babu kusaidia kuwalea wote watatu. Dady ambaye ameanza kuugua na wao watoto. Kumbe lipo jambo kubwa na la siri linaloendelea, wao wakiwa hawajui bibi na babu wakifunika ili watoto wakue kwa amani kumbe Ritha, mama yao anahangaika kutimiza ndoto zake ambazo hazikuwahi kusubiri.

Rita alijua kupambana bila kuchoka. Ni wale wakina mama wanayoipenda na kuifurahia pesa na mafanikio yao. Aliitafuta pesa bila hofu wala kujivunga. Ila kihalali sio kama Tunda. Kwa kukaa darasani kwa shahada mbili za uhandisi, akaja kuongeza na shahada ya mambo ya utawala kwenye biashara.

Jina hilo la Cote, alilipenda na lilimletea heshima kubwa kila lilipotamkwa. Si kwenye mabenki ambako walijua kiwango cha pesa kwenye maakaunti yake yote, hata kwenye maofisi alikokuwa akifanya nao biashara. Mwanamke wa kwanza, msomi, muhandisi mzuri mkubwa sana nchini. Anayegombania tenda za ujenzi wa barabara nchini Tanzania pamoja na mashirika mageni tena makubwa! Hana sifa mbaya na wala haaribu kazi yeyote. Pesa yake imenyooka, haina maswali. Hana mikopo nchini Tanzania.

Mbali na hapo, kwa mali na utajiri wa wakwe zake akijua kijana wake Net ndio mrithi wa mamali yote ya wakwe zake. Akipata Net, ndio na yeye ataponea hapo hapo. Hata akifilisika nchini Tanzania, anaweza akaishi kitajiri, asiwahi kuja kufanya kazi tena maishani, kwa mali nyingi za wakwe zake. Leo Tunda aje aitwe na yeye Cote! Hakuwa tayari hata kidogo.

Net akiwa kijana mkubwa, yupo chuoni, hata kabla yakukutana na Tunda,  ndipo akaanza kuishi na mama yake akiwa hamfahamu au amefichwa ukweli wa huyo mama. Akijua anatekeleza agizo la baba yake la kumtunza mkewe na Maya, kumbe Ritha alitumia akili kumtega Net. Taratibu bila haraka, kila alipokuwa akija likizo kumsalimia mama yake chini Tanzania, Ritha aliweka mitego yake. Bila kujijua, Net akanasa yeye mwenyewe na kuchagua kuishi Tanzania moja kwa moja na mama yake, Canada akageuza kukawa matembezi.

Haikuwa ni mapenzi ya mama kwa mtoto tu, Ritha alijua atanufaika sana na mtoto huyo kwa wakati huo kwa maadili mazuri aliyojengewa na babu na bibi yake. Kwa kazi na majukumu mazito ya Ritha hapa nchini, kijana kama Net ndiye aliyejua atamfaa. Ritha alijua mwanae huyo ni msomi, mchapakazi, mwadilifu, hawezi kumwibia au kumgeuka kwa lolote. Akamuweka sawa kwa gia ya umama, mpaka Net akajikuta anaacha maisha yake nchini Canada, malengo ya babu yake, na kuamua kumtumikia mama yake bila Net mwenyewe kujua hila ya mama yake.

Akajikuta anamtumikia mama yake kwa upendo mkubwa sana. Lakini Ritha alikuwa mwanamke makini sana na kichwa yake ilikuwa ikifanya kazi kwa haraka. Anafikiria na kuona mbali. Hilo hata wakwe zake walikiri kuwa anazo akili nzuri zakufikiria na Mungu alimpa na za darasani pia.

Aliacha watoto wake nchini Canada kwa wakwe zake kwa sababu zake yeye mwenyewe binafsi         . Akaja kujitajirisha nchini Tanzania. Mzee Cote na mkewe walikuwa wacha Mungu waliofanikiwa sana nchini Canada. Ni watu waliojaliwa uadilifu na ndipo Net alikopata tabia njema. Matajiri wasio na hila, waliotafuta mali kwa mikono yao. Japokuwa Ritha aliondoka nchini Canada na kuwaacha hao watoto, lakini wao hawakutaka waje wamchukie mama yao au watengane na mama yao.

Watoto hao walipofikia umri mkubwa kidogo, hasa Net, kipindi cha likizo zao, babu na bibi yao walikuwa wakihakikisha wanarudi nchini kumuona mama yao. Lakini tokea mara ya kwanza Maya anafika nchini Tanzania, hakukupenda hata kidogo. Hakutaka kabisa kuishi Tanzania, alidai hawezi kuishi bila bibi na babu yake. Kwani Maya ni kama hakuwahi kulelewa na mama yake kabisa.

Alizaliwa mama yake akiwa anasoma. Akaishia kulelewa na baba yao. Kuanzia mchanga kabisa. Baba yake ndiye aliyemlea Maya kwa uzima na ugonjwa. Kliniki na shule. Usiku na mchana, Maya alilelewa na baba yake huku mara nyingi akipelekwa kwa bibi na babu yake siku za ijumaa na kwenda kufuatwa siku za jumapili tokea mtoto, hata wazazi wake walipokuwa wakisafiri, Maya alibakishwa kwa bibi yake na babu yake. Hakujua maisha mengine mbali ya hao wazee. Na walimdekeza sana Maya, kitu kilichokuwa kikimkera sana Mama Cote. Wazazi aliowatambua Maya ni bibi na babu yake. Ambao waliwaita Nana na Papa. Hapo ndipo alipojua mapenzi ya wazazi kutoka kwa wazee hao.

Mama Cote aamua kuvunja ukimya kwa mwanae, baada ya kumvaa Tunda.

Maisha yaliendelea pale ofisini kana kwamba hakuna analojua Net, kuwa limetokea. Au mama yake amelifanya kwa Tunda. Nidhamu kazini na heshima kwa mama yake vikabaki vilevile. Hakumuuliza lile alilolifanya wala hakuonyesha hata dalili kuwa anakitu na mama yake. Maisha yakaendelea kama kawaida pale kazini, lakini bado alikuwa akiishi nyumbani kwake Salasala. Hakurudi nyumbani kwa mama yake.

Siku hiyo kama kawaida yake yakuwahi ofisini, Net alifika ofisini kwake asubuhi na mapema akaingia ofisini kwake nakuanza kuongea na Tunda huku akifanya shuguli ndogo ndogo palepale mezani kwake. Akiwa anaongea naye, akasikia wafanyakazi wengine wakisalimia nje ya ofisi yake. Akajua mama yake amefika.

Moja kwa moja akaingia ofisini kwa Net. “Do you have a minute?” Mama yake akamuuliza kama anao muda mfupi wa mazungumzo, ni kama kumtaka akate simu ili wazungumze. “Yes boss!” Net akajibu kwa heshima tu na kumfanya mama yake acheke.

Wakati wote alipokuwepo ofisini, Net alimtania mama yake kwa kumuita bosi. “Ukimaliza kuongea na simu uje basi ofisini kwangu.” Mama yake akafunga mlango nakutoka. “Tunda! Bado upo?” “Nipo.” “Tutaongea baadaye, naona bosi wangu ameshafika. Ameniita ofisini kwake.” “Haya. Kazi njema.” “Na wewe. Lakini usisahau kuwa nakupenda.” “Nilikuwa nakaribia kusahau.” “Usithubutu.” Tunda akacheka na kukata simu.

~~~~~~~~~~~~~~~~~~~~~~~~

Net aliingia ofisini kwa mama yake na tabasamu kubwa usoni. Mama yake akabaki akimtizama. “Uliniita mama. Au sikukusikia vizuri?” “Nakusubiri uniulize.” Mama yake akajibu. “Nikuulize nini tena!?” “Tunda hakukwambia?” “Juu ya nini? Maana naongea na Tunda mambo mengi sana.” “Net Please!” “What mama!?” “Acha kunifanya mimi mtoto mdogo. Niulize tu.” “Sijui unataka nikuulize nini mama yangu! Ni kweli sijui!”

“Hakukwambia kwamba nilienda ofisini kwake?” “Oooh! Ulivyokwenda na kutumia siri za madhabahuni kwa Bwana, alizokiri, akasemehewa, Mungu akasema amezifuta dhambi zake zote na hatazikumbuka kamwe. Akamuahidi Tunda kuziweka mbali dhambi zake kama mashariki na magharibi, nakumwambia ile hati yake ya mashitaka haipo tena, kumbe wewe ambaye upo kanisani ukisema unampenda Mungu na kutambua nguvu ya msalaba na damu ya Yesu, kumbe umebaki na hati ya Tunda! Ndio umempokonya Mungu, unayo sasa unaitumia kumuadhibu Tunda! Hilo ninalijua mama.” Yule mama akanywea kabisa.

“Sasa kwa nini hukuniuliza ukabaki kufanya kila kitu kama kawaida tena vizuri?” “Kwanza sijui maisha mengine mbali na hivi. Kufanya kazi kwa bidii na kuheshimu mamlaka. Tukiwepo hapa ofisini wewe ni kiongozi wangu. Umeniajiri na unanilipa mshahara. Hakuna jinsi naweza kufanya tofauti, kwa kuwa sijui mbali ya hivi kuwa natakiwa nifanyaje! Ndivyo dad alivyo nilea na babu kuweka msisitizo kwa vitendo mpaka na yeye anakufa.”

“Pili, nilifundishwa na mtu ninayempenda na kumuamini kuwa, nisichanganye mambo ya familia na kazi. Ya nyumbani niache nyumbani na kazini niache kazini. Na ukumbuke sisi hatuishi nyumba moja.” Mama Cote alikumbuka kuwa ni yeye ndiye aliyemfundisha hivyo.

“Tatu niliogopa mama. Niliogopa kujiingiza kwenye vita isiyonihusu na ninajua nitashindwa tu. Kwa kuwa unachokifanya wewe mama, unagusa mboni ya jicho la Mungu. Unafanya kitu hatari sana mama yangu. Unamchokoza Mungu aliyemtafuta Tunda na kumpata kwa gharama kubwa sana, ambayo hata uuze mali zako zote huwezi kufikia thamani ya gharama Mungu aliyotumia kumkomboa Tunda.”

“Kutoka kwenye maisha aliyokuwa akiishi, bila wazazi wakumfundisha baya na jema, kama mimi na Maya tulivyobahatika. Akaishi maisha machafu sana, Mungu akanituma kwa Tunda, ambaye nilimshuhudia kwa kumfumania, si chini ya mara tatu, nilimfumania yule binti. Na kila nikikumbuka sasa hivi sura nilizokuwa nikiziona wakati namfumania sio kama ya sasa alipotangaziwa uhuru na Mungu.”

“Alionekana amechoka na anatumikishwa na ibilisi. Furaha aliyonayo sasa hivi Tunda, wazi anaonekana si kazi ya mwanadamu mama, ni Mungu ndiye aliyehusika kujenga moyo wa yule binti. Sasa nawezaje kugusa na kukilaani kile Mungu alichokiita kitakatifu? Nawezaje kuanza vita ninayojua nitaishia kushindwa tena kwa laana na adhabu juu?” Sio kuwa Mama Cote hakuwa akimjua Mungu. Mumewe alikuwa mtu wa Mungu na wakweze pia walikuwa wakimjua Mungu kwa kuishi maisha ya kikristo ya ukweli. Walimpokea akiwa msichana wa kawaida kabisa. Wakaishi naye katika misingi ya kiMungu. Huyo mama alishaokoka lakini kwa malengo akiwa na huyo baba yake Net.

“Naomba ufikirie na mimi Net. Kidogo tu.” Net akabaki akimtizama mama yake. Mama Cote akaguna. “Nahisi ninawapenda wanangu kupita kiasi. Ndio maana najitahidi kuwalinda na kila aina ya kitu ninachojua kitakuja kuwaumiza. Nakupenda Net. Sitaki uje ushie pabaya.” “Na mimi nalijua hilo mama, ndio maana nimeshindwa hata kukuchukia. Najua jinsi unavyonipenda na jinsi unavyonilinda. Isingekuwa hivyo najua wazi nisingekuwa hapa na nisingekuwa hivi nilivyo sasa hivi. Nakushukuru sana.” Net akamsogelea mama yake kwenye meza aliyokuwa amekaa, akazungusha kiti chake, akambusu kichwani na kupiga magoti.

“Nakupenda sana mama yangu na ninatamani kila mama angekuwa kama wewe mama. Labda tusingepata watoto wa mitaani au labda kusingekuwepo kwa asilimia kubwa mabinti kama kina Tunda. Tunda hakupata bahati kama anayochezea Maya sasa hivi. Maya anaishi maisha kama ya Tunda, wakati tumehangaika kufanya kila tuwezalo. Tunda amekubali kubadilika baada yakupata msaada wa Kiroho na Kimwili. Ndio maana mimi nampa nafasi. Mbali ya hapo sijui ni kwa nini nampenda Tunda kimapenzi. Ni kweli nampenda Tunda, mama. Na ninajua ndiye atakayekuwa mke wangu.” “Nakuona jinsi ulivyobadilika.” Net akacheka.

“Ananifanya niwe nafuraha sana.” “Lakini kwa nini usipate muda wakufikiria Net? Kwa nini unataka kuingia sehemu ambayo..” “Nimefikiria mama.” Net akamkata mama yake kabla hajamaliza usemi wake. “Hapana Net. Naomba ufikirie na mimi. Kaa hapo nchini tujiulize pamoja.” Net akaenda kukaa.

“Huyu Tunda anamaswali mengi kuliko jibu moja tu kuwa ameamua kuokoka. Kumbuka jinsi alivyotusimulia jinsi alivyompata Gabriel. Ni binti ambaye anaonekana akikusudia kumpata mwanaume, anatumia kila njia. Haonekaniki kama ni binti ambaye anakusudia kutulia. Alianza na wale wazee wawili. Tena wote wenye pesa. Kutoka kanisa hilohilo, akamtega Gabriel, kijana aliyesimama kwenye wokovu. Asiyejua dhambi. Akamtega mpaka Gabriel akachanganyikiwa. Unakumbuka hali ya Gabriel lakini?” “Nakumbuka.” Net akajibu.

“Sasa niambie ule msimamo wake wakuwa radhi kumuacha mkewe, aliyeanza naye tokea zamani, na kutaka kumuoa Tunda, unatofauti gani na wewe sasa hivi?” Net akacheka kidogo. “Usicheke Net. Gabriel alikuwa hivyo hivyo! Akiwa tayari kuacha mali zote na watoto wake, ili awe na Tunda! Ni vikao vingapi vilifanyika kumrudisha Gab kwa mkewe kutoka kwa Tunda? Mpaka wewe ulipoingilia kati baada ya kumfumania na Tunda na kujua msichana mwenyewe ni Tunda ambaye hana mwanaume mmoja. Ukazungumza na mwenzio mpaka akakuelewa, akarudi kwenye ndoa yake. Sasa eti na wewe unaona mwenzio amepona, na wewe unataka ukajiingize huko huko! Ni nini Net mwanangu?!” 

“Mimi nilimfahamu Tunda kabla ya wanaume wote hao kumchezea. Nimekutana na Tunda baada ya kufukuzwa kwa mama yake aliyekuwa au asiyejua ukweli wote juu ya Tunda. Mumewe au baba yake wa kambo Tunda aliyekuwa akitumia mwili wa Tunda bila mama yake kujua. Tokea ni katoto mpaka msichana mkubwa ndani ya nyumba hiyohiyo yule baba alikuwa akimtumia Tunda mpaka akashika mimba, mama yake akamfanyia hila yakutoa mimba, nakumtelekeza hospitalini.” Net akaendelea taratibu tu.

“Nimekutana na Tunda akiwa amehamishiwa kwa shangazi yake, wakimtesa, Tunda hatizamiki, kwa mateso na kunyanyaswa nyumbani kwa shangazi yake, hiyo ni miaka zaidi ya mitano iliyopita. Lakini akiwa kwenye ile hali, mimi nilimpenda Tunda. Nilitaka kumwambia, lakini wakampiga sana na kumsingizia swala la wizi, na kutelekezwa tena hospitalini.”

“Akiwa hajui pakwenda, kwani aliyemuuguza alikuwa baba yake ambaye aliishia jela, alitoka pale na kumlazimu kuishi anayoishi.” “Lakini hayo si anakwambia Tunda mwenyewe? Unajua ni stori gani aliyompa na Gabriel mpaka akafanikiwa kumuweka kitandani?” Net akacheka kwa kumsikitikia mama yake.

“Usidharau hoja zangu Net! Sio watu wote ni waadilifu kama wewe. Watu wanaishi kwa ujanja ujanja sana hapa mjini!” “Binafsi nakuelewa kabisa mama yangu. Nakuelewa. Hapo ulipo sasa hivi, nilishakuwepo. Nikaamua kumchukia kabisa Tunda. Nikaamua kurudi Canada, nikataka kumuoa Chloe, lakini nilishindwa. Sijui Mungu ameniunganishaje na Tunda, mama! Nampenda Tunda. Na ninaona yeye ndiye atakamilisha hata maisha yangu yakumtumikia Mungu.” “Unajuaje kama ni Mungu ndiye anayekuunganisha na Tunda?” Mama Cote akauliza na kumfanya Net akunje uso.

“Sasa wewe unafikiri nini!?” “Watu wanatumia nguvu za giza Net.” Net akasimama. “Unajua nini mama, sina jinsi ya kukubadilisha hapo ulipo na kile unachokiamini. Naamini Mungu kwa wakati wake, atakusaidia na wewe. Maana hata mimi haikuwa kazi ya siku moja.” “Nisikilize Net. Usifanye haraka kuondoka. Uchawi upo, na unafanya kazi.” “Kuliko nguvu za Mungu!?” Net akamuuliza mama yake kwa mshangao, nakubaki akimtizama.

 

“Uniambie leo, kama tulichokuwa tukikiamini hakina uwezo wa kutulinda na hila na mitego ya shetani! Kwamba shetani amefanikiwa sana, na ana nguvu zidi ya maombi, na uwepo wa Mungu!” “Bibilia imeruhusu kujaribu kila roho. Wewe endelea, na mimi sitatulia mpaka nijue ni roho gani inafanya kazi ndani ya yule binti.”

“Kuwa tu mwangalifu mama yangu. Mungu hajaribiwi. Usije ukafika umbali ambao ukashindwa kurudi kwa mapenzi yako ya umama kwangu. Yapo mambo mengine ya Mungu, huwa hayachunguziki kwa akili za kibinadamu. Huwa hayana majibu. Humpa amtakaye. Muone pale Mungu alipomuweka Tunda. Ulimfukuza kikatili sana. Lakini ona Mungu jinsi alivyomfanikisha hata kifedha.”

“Wapo wapambaji wangapi hapa mjini? Lakini ukiangalia kazi ya Tunda, jinsi alivyojipanga, anavyozungumza na wateja wake! Huwezi kujua ni Tunda ambaye hakusoma. Ana kazi nyingi mpaka nyingine anakataa. Ushajiuliza ni kwa nini yeye, na wapambaji ni wengi? Leo kila mtu analalamika maisha magumu. Kwa nini Tunda anastawi kwenye nchi ya watu wanaolia shida?” Net akauliza.

“Nilishakujibu Net. Shetani anao uwezo. Na yeye pia hufanikisha watu wake.” “Kwa maana nyingine unasema hata kazi anazozifanya, na kufanikiwa pia ni kwa ajili ya ushirikina?” “Huwezi kujua.” “Basi shetani ni mzuri mama. Kama wewe unayemuomba Mungu, umefika hapo ulipo. Ulimtoa Tunda kwenye ofisi yako Arusha, ukaibiwa mpaka kufilisiwa kabisa. Halafu Tunda anayemtumikia shetani amefanikiwa hivyo, kwa nini tunaenda kanisani na sio huko anakokwenda Tunda?”

“Maana yeye anaonekana ana amani kuliko watu wengi sana ninao waona. Au ana marafiki wa ukweli, kuliko watu wengi wanao kuzunguka wewe mama.” “Sio kweli.” Akabisha. “Ni wewe mwenyewe umekuwa ukiwalalamikia kwangu marafiki wanao kuzunguka. Huna rafiki wa kweli mama. Mwangalie Tunda na mama Penny aliyesimama kumlinda Tunda mbele yako! Wewe unaye huyo mtu ambaye anaweza kukukingia kifua pindi watu kama wewe wakisimama mbele yako?” Mama Cote akababaika sana.

“Nimehangaika sana kufika hapa nilipo Net. Siwezi kuruhusu Malaya yeyote yule aje kwenye maisha yetu na kurithi jasho langu. Tunda anajua kuwa wewe unapesa, ndio maana anakuwa kama malaika wa nuru. Atakwambia na kukujenga kwa maneno yanayoendana na vile ulivyo ili aweze kukuaminisha.” Bila kujijua, kwa jazba mama Cote akaanza kufungua alichoficha ndani. Net akabaki akimsikiliza.

“Aliweza kulala na kina Meto, Mati na Gabriel, watu wa maana wa kanisani kwa kutumia uongo unao endana na wao. Alipokuchunguza wewe na kukujua upo hivyo, ndipo akaamua kuja na gia ya kukuokokea. Anajiliza bila kuchoka kwa kuwa nia nikufikia mfuko wako. Na usifikiri wewe utakuwa wa mwisho. Utamuoa na bado atakuwa na wanaume wengine. Siwezi kukubali eti wote tutumbukie kwenye mtego wa kijinga hivyo! Nitakuwa mama wa ajabu sana, kuruhusu uangukie kwa mwanamke kama Tunda.” Mama Cote hasira zilishapanda.

“Mimi nakuonya tu mama. Usipambane na Mungu. Hautashinda. Na utaikumbuka siku ya leo.” “Wewe niache mwenyewe. Una wasiwasi gani? Kama kweli amesimama, tutajua tu. Na wala sitajuta kwa kuwa Mungu ameniruhusu kujaribu kila roho. Na yeye nitamjaribu mpaka niridhike. Kama wewe ulipata muda wa kumuelewa mpaka ukamsamehe  basi tupe na wengine nafasi.” “Sawa mama yangu.” Net akamuhurumia mama yake. Akatamani isingekuwa Tunda ndio anayesimama kati yao.

Hakuwahi kusumbua nyumbani, leo amependa ndio imekuwa tatizo! Alikuwa ni kijana wa ‘ndiyo’ kwa mama yake, kila wakati. Aliacha kazi na maisha mazuri nchini Canada, akaamua kuja kuishi na mama yake ili amsaidie kazi. Alimuhurumia, lakini hakujua kitu chakufanya. Ni Tunda, msichana anayempenda na amekusudia kuwa naye.

“Au hasira hii kali kwa Tunda ni kwa ajili ya Meto!?” Net aliwaza wakati akimtafakari mama yake asielewe ukweli mzima juu ya chuki ya mama yake. Akanyanyua uso akamtizama mama yake. Akamkuta bado akimwangalia. “Unaendeleaje na Meto?” Net akamuuliza mama yake taratibu tu. “Nimeamua kuachana naye kabisa. Japokuwa amekuwa akinitumia jumbe zakuomba msamaha lakini nimeamua kumuacha kabisa. Nimeumia mno. Sina jinsi yakueleza mtu akaelewa. Nimeumia sana. Nimeamua niache kabisa kufikiria swala la ndoa tena.”

          “Sitaweza kuja kumuamini tena maishani. Itanisumbua mno. Nimekuwa naye kanisani, akiniambia na kunionyesha jinsi alivyo muaminifu kumbe anaishi maisha machafu huko nje! Nitakuja kumuamini vipi tena? Naanzia wapi kumuamini tena? Mtu anayekwambia hiki na kuishi vile! Hapana. Nimeamua kuishi tu peke yangu. Naona nimeshapoteza kila mtu sababu ya Tunda. Mimi ndio nimebaki muathirika wa maovu ya huyo Tunda. Naamini Mungu atafanya kwa wakati wake.” Mama Cote akajilalamisha akimtuhumu Tunda.

“Naelewa, unasababu zote za kibibilia zinazokuruhusu kuachana na Meto. Zote kabisa, zinazokuruhusu kutokusamehe kutokana na kosa la uzinzi, lakini pia unasababu zote kabisa za kibibilia zinazokufanya usamehe, mama. Naomba upime kwa manufaa yako si yamwingine. Unataka nini? Kusamehe na kuwa mwenye furaha tena, au kutokumsamehe na kuendelea kuwa mpweke?”

“Nitarudi nyumbani, lakini hivi karibuni nitamuoa Tunda, huwezi jua Mungu atatupa watoto lini! Hutakuwa ukiniona kama hivi. Nitakuwa nikihudumia familia yangu. Nitaumia kukuona unaendelea kuishi mpweke mpaka kifo chako. Samehe kwa ajili yako. Naamini amejifunza na hatarudia. Ona jinsi alivyokubali kutengwa mbele ya kanisa, amevuliwa madaraka pale kanisani, amebaki kuwa mtu wa kawaida tu. Angeondoka kama mwenzake, lakini yeye amekubali kutumikia adhabu yake. Huhisi kuwa amejutia kitendo alichofanya?” Mama Cote akajifuta machozi.

“Ukute na mapenzi ya kweli ndiyo yanambakisha pale kanisani, mama. Anataka uone na uamini kuwa amejutia kitendo alichofanya. Amemwambia Mchungaji ni kitendo alichofanya mara moja, tena baada ya mwenzake kumuunganisha na Tunda na kumwambia amemtafutia binti atakayemsaidia kwa kuwa amekaa muda mrefu bila mke. Anasema hata hakumwingilia Tunda. Ilikuwa kwenye gari tu, tena mara moja. Anajuta sana.”

“Halafu ni mzee mwenye uwezo, huwezi sema anakupenda kwa kuwa unapesa, kama wanaume wengine wanavyokufanyia. Yule mzee haiitaji hata shilingi yako. Nakuomba mama yangu, pata muda ufikirie juu ya hilo.” Net akasimama na kwenda kumzungushia mama yake mikono. Akambusu kichwani. Mama Cote akajivuta chini kidogo na kujiegemeza kwa mwanae. “Is gonna be fine mama.” “Hope so Net. Hope so baby.” Walikaa pale kwa muda, Net akaanza kumchokoza mama yake, na kuanza kucheka. “Kuna mtu aliniambia nisichanganye mambo ya familia na kazi. Sasa hivi ni asubuhi mama, acha nirudi kazini.” Mama Cote akacheka. “Amebarikiwa mwanamke aliyekuzaa.” Net akacheka akambusu tena na kuondoka.

  Mama Cote aanza mikakati yake kwa Tunda. Aanza kumuhusisha na Bethy.

Ni kweli mama Cote alishindwa kuvumilia. Moyo wake ulimkataa kabisa Tunda. Kila alipojitahidi akashindwa. Chuki juu yake ikazidi. Akaona isiwe shida, asije akafa pale ofisini. Akakumbuka Net alimwambia angerudi nyumbani, lakini siku za karibuni atamuoa Tunda. Na wakipata watoto anaweza hata asiwe anamuona. “Siwezi nikamuachia huyu Malaya, atawale mtoto wangu. Ameshanichukulia ndoa, hawezi kunipokonya Net.” Mama Cote akawaza nakuzidi kujipandisha hasira. Akampigia simu Bethy, mke wa Gabriel. Akaomba wakutane kwa chakula cha mchana.

Bila kubisha, kwa kuwa mama Cote alikuwa kama mkwe wake, na wapo karibu, Bethy akakubali. Walipanga wakutane saa sita mchana. Wote walifika bila kuchelewa kwenye mgahawa huo. Wakaagiza vinywaji, wakaanza kuzungumza.

“Unamjua mwanamke aliyekuwa amemchanganya Gabriel wakati ule?” Mama Cote akauliza. “Mpaka akataka kuniacha?” Mke wa Gabriel, Bethy akauliza na kuguna. “Ulishamjua?” “Nilivyokuwa nimechanganyikiwa wakati ule, na Gab alikataa kabisa kumtaja. Aliniambia tatizo haliko kwa huyo mwanamke wa nje, tatizo liko kwangu. Nikaonekana mimi ndio mbaya! Akieleza mabaya yangu kwa kila mtu! Nilichofanya nikukubali kosa ili akose sababu.” “Basi mwanamke huyo huyo, sasa hivi ndiye amemwingia na Net. Net amechanganyikiwa anataka kumuoa.” Bethy alishtuka, mpaka akasimama.

“Ni jini nini huyo dada!?” Bethy akauliza na mshangao mkubwa usoni. “Afadhali wewe unanielewa Bethy. Maana ile hali iliyokuwa imempata Gabriel, ndiyo anayo Net sasa hivi. Kaa chini.” Bethy akarudi kukaa akiwa bado na mshangao mkubwa sana. “Haiwezekani mama! Ipo namna. Net na Gab ni kama ndugu wa damu! Kwa akili za Net, hawezi kumuoa mwanamke aliyelala na Gab. Hata iweje, hawezi. Mimi namjua Net. Ipo tu namna mama Cote.” Hapo akamfurahisha mama Cote.

“Afadhali kama sasa unanielewa wasiwasi wangu ulipo. Maana Net hasikii wala haoni! Yule binti anatafuta wanaume wenye pesa tu. Sasa anaona umeshindwa kwa Gabriel, amehamia kwa Net kwa kuwa sasa hivi anajua Net anapesa nyingi za urithi. Siwezi kukubali yule binti akaolewa na Net. Heri kufa kuliko kumuona anaolewa na Net. Yaani na yeye aje aitwe Cote! Nahisi nitakufa.” Mama Cote akaweka msisitizo akitoa ya moyoni kwa Bethy.

“Hata mimi sikubali! Kwanza alivyonitesa kwenye ndoa yangu! Gabriel alinianika na kunichafua bila aibu wala huruma, kama hanifahamu ili tu kupata sababu ya kuwa naye! Hakika lazima kumuwekea kikomo. Mchafu na mshenzi wa tabia. Amenyimwa aibu kwa kiasi gani!” Hapo wakawa wameshapatana.

“Sasa tutafanyaje?” Mama Cote akauliza. “Nikumfungua macho Net, kwa kuweka wazi mabaya yake yule msichana. Ni rahisi sana mama. Wewe wala usihangaike na Net tena. Mimi namjua Net jinsi alivyo na msimamo. Ukiendelea kumpinga, ndio utampoteza.” “Mara ya pili? Alishahama na nyumba sababu ya kumkatalia kuwa na huyo binti! Kwanza anaitwa Tunda. Wala si binti, Malaya yule.” Mama Cote akavyoza.

“Mama wewe! Net aliyekuwa anasema hana mpango wakuondoka nyumbani, anataka aishi na wewe, leo ameondoka kwa ajili ya huyo Tunda!” “Kwani hamjui kama amehama nyumbani?” “Siku hizi ukaribu na Gab ni kama umepungua. Siwasikii.” “Anaishi kwake, Salasala. Na utengano huo wa Net na Gab, sababu kubwa ni huyo Tunda. Atavuruga kila aina ya mahusiano na kila nyumba!” Mama Cote akazidi kumwaga sumu kupandisha hasira ya Bethy zaidi.

“Mama Cote huyo msichana ana kitu. Sio bure.” “Nimemwambia Net mimi. Hajaniamini. Alimsaidia mwenzie kuokoa ndoa yake. Akaweka sawa akili ya Gabriel, naona amenaswa yeye sasa hivi. Na amembana kweli Net! Anataka kufaidi kwa wote wawili!” “Itabidi kumuweka mwangani haraka.” Wakapandishana morali, wakapanga na mipango yao ya jinsi ya kumuangamiza Tunda na kumuweka mwangani. Zaidi kumtenga na Net. Wakakubaliana vizuri, ndipo wakaachana.

Vita ya Tunda yaanza bila kujijua.

          Akiwa anafurahia penzi jipya. Jumbe za hapa na pale, kutolewa kwa chakula kiwe cha mchana au usiku, Tunda hakuwa na taarifa juu ya mipango mikali dhidi yake. Siku hiyo akiwa ofisini kwake, alikuja kijana na maua mazuri sana ameyashika mkononi na kadi. Aliingia hapo ofisini na kwenda moja kwa moja kwenye meza ya Bety. Akamwambia ametumwa kwa Tunda. Tunda alikuwa akiwasikiliza. Bety akamuelekeza kwa ndani kidogo, ilipo ofisi ya Tunda.

Tunda alikuwa amekodi kama nyumba. Lakini mbele kulikuwa na ofisi, nyuma kulikuwa na vyumba ambavyo ndiko alikokuwa akihifadhia vitu vyake vyote vya kupambia.

Yule kijana akaingia alipokuwa amekaa Tunda. Akamsalimia na kumkabidhi yale maua na kadi. Tunda alimshukuru akiwa amejawa furaha, akijua vinatoka kwa Net. Akatoa ile kadi kutoka kwenye bahasha, juu iliandikwa ‘I am Sorry!’  Tunda akakunja uso. Akaamua afungue ili kujua inatoka kwa nani huyo anayemuomba msamaha!

Moja kwa moja Tunda akasoma chini kujua inatoka wapi. Akakuta imesainiwa na Gabriel. Ilionyeshwa imeandikwa na Gab mwenyewe, akiomba msamaha, na kumtaka waonane baadaye kwa mazungumzo. Tunda alicheka, akamuomba yule kijana aliyetumwa kuleta yale maua na kadi arudi navyo na kumuonya asiwahi kurudi tena pale. Yule kijana akatoka na kila kitu alichoingia nacho. Maua na ile kadi. Alitamani kumwambia Net, lakini akaona itakuwa uchonganishi. Akaamua kunyamaza.

~~~~~~~~~~~~~~~~~~~~~~~~

Jioni Net alifika pale ofisini kwa Tunda ili wakapate chakula cha usiku pamoja. Wakiwa hotelini, Net alimuona vile Tunda alivyobadilika. Net akajaribu kuuliza lakini Tunda akamwambia nikuchoka tu. Baada ya chakula cha pamoja, waliagana kila mmoja akarudi kwake.

Akiwa anataka kulala, ujumbe ukaingia. ‘Naomba tuonane kesho saa nne. Nina kitu cha msingi sana nataka kuzungumza na wewe. Gab.’ Alimtajia na eneo la kukutana. Tunda akabaki akiitizama ile simu kwa muda akifikiria chakumjibu Gab, akaamua apuuze.

Kesho yake tena akiwa ofisini, ukaingia tena ujumbe mwingine. ‘Ulipata ujumbe wangu? Nitakuwepo pale nikikusubiri Tunda. Tafadhali usipuuze hata kidogo.’ Tunda alianza kufikiria ni kitu gani hicho cha muhimu Gabriel anataka kuzungumza naye! Swali jingine lililomsumbua ni wapi Gabriel amepata namba yake? Akajiuliza hili na kujishauri lile, bila jibu.

Alibaki akimfikiria Gabriel. Alikuwa muungwana sana kipindi yupo naye. Kwa kifupi ni kama walishakuwa kwenye mahusiano ya karibu tofauti na wateja zake wengine. Gab alitumia muda mwingi na Tunda akimueleza matatizo yake ya ndani sana na kumfariji. Ndiye mteja pekee aliyekuwa akimpigia simu hata usiku sana na Tunda alipokea hata awe amelala na mtu. Alitoka na kwenda kuzungumza naye.

Muda mwingi walipokuwa wakiwa pamoja walitumia ndani kitandani wakizungumza na mapenzi, tofauti na wateja zake wengine ambao ilikuwa ni kazi tu.  Tunda alimfahamu Bethy na watoto wao wawili. Mara nyingi Tunda alikuwa akituma salamu za hao watoto kupitia Gabriel. Bethy alimfahamu kwa mabaya yake aliyokuwa akimfanyia Gabriel. Mbali ya nia yake yakumchomoa pesa, Tunda na Gabriel wakajikuta wanakuwa kama marafiki. Wakiambiana ya ndani sana. Haswa Gabriel ndiye aliyejikuta akimwambia Tunda mambo yake, kwani alisema hana pakusemea.

Alisikia mama Cote akiropoka kwa hasira siku alipomfuata ofisini kwake na kwenda kumtukana, kuwa alitaka kumuacha Bethy kwa ajili yake. Vikafanyika vikao vya nguvu ili kubadili akili yake Gabriel na kumrudisha kwa mkewe. “Kama kweli alinipenda kwa kiasi hicho, ni kwa nini anifukuze vibaya vile?!” Tunda akajiuliza. Akakumbuka jinsi alivyomtishia kumpiga kama hataondoka kwa haraka. Tena akiwa ametoka kulimlilia shida usiku ule wa baridi na mvua, akamkatalia kumsaidia. Tunda akakumbuka hofu iliyokuwa imemkamata usiku ule akiwa hana tumaini jingine tena, hasira zikampanda zaidi. Akaamua kumpuuza. Akaendelea na kazi zake.

Ilipofika saa nne, ujumbe mwingine ukaingia. ‘Naona unasoma kila ujumbe ninao kutumia Tunda. Nimeshafika hapa, nakusubiri. Nitakuwa nje tu, wala hatutajificha.’ Alisoma ule ujumbe. Kule kujua watakuwa nje, hadharani kukamtia moyo Tunda. Akaamua kwenda kumsikiliza ili amalizane naye amuache kwa amani. Ila akakusudia hatampa sikio lake tena kwa matatizo yake. Akanyanyua pochi yake na kutoka akiwa ameshapanga hoja zake.

Gabriel kwa Tunda Tena.

Kweli alimkuta Gab akimsubiria nje ya huo mgahawa. Amekaa peke yake. Akamsalimia baada ya kumsogelea.  “Habari yako Gabriel!” Hakutaka hata kumpa mkono. Gabriel alinyosha mkono, lakini Tunda alivuta kiti na kukaa. “Sina muda mrefu sana. Naomba tuanze mazungumzo.” “Hutaagiza kitu chochote?” “Hapana.” Tunda alimkatalia huku akimtizama machoni ishara yakutaka aanze kuongea.

“Nakupenda Tunda. Nataka kukuoa.” Tunda akacheka kwa kejeli. “Asante na hapana.” Akajibu hivyo tu na kusimama. Akavuta pochi yake na kuanza kuondoka. “Sijamaliza Tunda. Naomba unisikilize.” Tunda akasimama. “Nilikosea sana kukuacha. Lakini Net ndiye aliyenishawishi. Baada ya siku ile nilijuta sana. Sikuwa na furaha tena baada ya kukupoteza wewe. Kila aliyeniona alijua lipo tatizo.” Gab aliongea kwa upendo akibembeleza.

“Maisha yanakosa ladha bila wewe Tunda. Nakupenda na ninakuhitaji. Nimekutafuta sana, mpaka siku ile nilipokuona kwenye kikao cha harusi, yule mwenyekiti ndiye aliyenipa namba yako. Nakupenda Tunda, sitafanya ujinga niliofanya zamani. Nitakutunza, utakuwa wangu tu. Hakuna mwanamke anayenijulia kama wewe.” Tunda alibaki amesimama akimkodolea macho.

“Nakupenda Tunda.” Tunda alikuwa amekunja uso wa mshangao. Gab akamsogelea na kumkumbatia. Tunda akamsukuma. Kilikuwa ni kitendo cha muda mfupi hata Tunda hakujua kama angemkumbatia.

“Kwanza naomba nikusahihishe Gab. Hujawahi kuwa na mahusiano na Tunda, ila Nancy. Pili, sikuwahi kukupenda kama ninavyompenda Net, wewe nilikuwa nikikutumia kama wewe ulivyokuwa ukitumia mwili wangu kama wanaume wengine tu.”

“Sasa hivi anayeishi hapa ni Tunda, aliyesamehewa dhambi na kuishi maisha ya nidhamu mbele za Mungu. Kina Nancy walishatolewa kwenye huu mwili muda mrefu sana. Hawapo na wala hawatakaa wakaishi tena kutumia huu mwili uliotakaswa na kuoshwa na damu ya Yesu. Narudia tena, anayeishi hapa ni Tunda ambaye hujawahi kumfahamu ila Net.” Tunda akaendelea taratibu.

          “Net anamfahamu Tunda wa zamani sana ambaye hata angejiita Nancy, ninauhakika wewe Gabriel usingethubutu hata kumsemesha. Net huyohuyo, anawafahamu na kina Nancy, Fina, Ani, Maria na wengineo wengi tu walioishi kutumia huu mwili wangu. Tena aliwafahamu kwa kuwafumania na huuhuu mwili wangu, kila mmoja kwa wakati wake.”

“Alishanifumania nikiwa Nancy. Nafikiri unakumbuka. Maana tulikuwa wote na wewe ukimtumia Nancy kupitia huuhuu mwili. Haya, alishanifumania nikiwa Maria, na wengine wengi tu Net aliokuwa akiwafumania kupitia huuhuu mwili. Wakiishi vile watakavyo na kujipa majina watakayo wao. Lakini akiwa ananijua mimi kama Tunda ambaye wewe ulimfahamu kwa upande mmoja tu, Nancy.”

“Ninachotaka kukwambia Gab, kwa mabaya yote niliyofanya zamani, na yeye Net kujua kwa kushuhudia na kuambiwa. Tena mengine mabaya, machafu, yasiyoweza kutamkika hata kwa watu na sijawahi kumwambia mtu yeyote hapa duniani, nilikiri mimi mwenyewe kwake Net. Nikiwa nimefika mwisho. Wewe na wenzako waliokuwa wakitumia huu mwili kwa majina tofauti tofauti, mliponitelekeza. Nafikiri unakumbuka jinsi ulivyonifukuza kinyama kana kwamba tulikuwa maadui wakati nilikupa sikio langu hata saa sita za usiku. Nilikusikiliza Gab na kukufariji bila kuchoka. Sasa siku ile uliponifukuza kikatili huku ukitishia kunipiga nikiwa nakulilia shida Gab. Mvua na baridi ya Arusha ikinipiga. Tena nikiwa nimekwambia wazi, sina pakwenda usiku ule. Net alinipokea vilevile.”

“Net alihakikisha ananitoa kwenye kila kifungo kilichokuwa kinanishikilia bila kuchoka kwani haikuwa rahisi wala kazi ya siku moja. Ndani ya muda huo, nimemdhalilisha Net, ninauhakika wewe usingeweza Gab. Ziko siku nilizotaka kubebwa juujuu, nikiwa na Net na wanaume waliokuwa wakiutumia huu mwili wangu. Net alinipigania na kunitoa mikononi mwa wale wanaume wawili waliokuwa wakining’ang’ania usiku ule. Ziko sehemu nilizopita naye Net, ambazo wahudumu walinitambua mimi kama mwanamke wako, wakikuulizia wewe. Lakini Net alibaki na mimi akinivumilia.”

“Haikuwa rahisi hata kidogo kwa Net. Mimi mwenyewe nilikuwa najiuliza anawezaje! Aibu na fedheha niliyokuwa nikimtia. Lakini Net alisimama na mimi. Akanisaidia kuanzia pale uliponiacha wewe, nikiwa na kina Nancy na wengine wengi ndani yangu, mpaka msalabani ambako niliwekwa huru. Amenifundisha kuomba na amenijenga kiakili. Naishi kama msomi sasa hivi, nakuingiza pesa kwa kazi ninayofanya, kwa shule fupi aliyonipa Net nikiwa naye Arusha.”

“Alianza na mimi chini sana kwa elimu yangu ndogo ambayo ninauhakika nisingeweza kuajiriwa popote kwani hata kazi aliyoniachia nayo nilifukuzwa kwa kuwa sikuwa na vyeti japo niliimudu kazi vizuri tu. Net akiwa amenifundisha. Alinielimisha na kunijenga mchana na usiku bila kuchoka ndio maana sasa hivi ninaketi na wakuu sababu ya Net.”

“Na huo ndio nahesabu kuwa ni upendo. Upendo na jinsi anavyonithamini Net, hata ungenipa miaka kumi nifikirie kama nastahili hivyo, nisingekuja na jibu ya jinsi alivyo Net kwangu. Hakuna mwanadamu amewahi kuwa karibu na mimi, isipokuwa ananufaika na mimi kwa namna moja au nyingine, wewe ni shahidi. Ulikuwa karibu na mimi ulipokuwa unamatatizo na Bethy. Ulikuwa kama umechanganyikiwa kwangu Gab. Sijui kama unakumbuka! Mlipopatana na Bethy, hukuniaga kwa heshima Gab. Ulinifukuza vibaya sana. Kwa kuwa ulikuwa umeshamaliza matumizi yako kwenye huu mwili kama wanaume wengine, lakini si Net.”

“Sihitaji kutuzwa na yeyote kama ulivyosema mwanzo kuwa unataka kunioa na kunitunza. Nancy aliyekulilia shida wakati ule ukamfukuza, aliondoka na shida zake zote. Huyu Tunda anaridhika na pesa anayoingiza kwa jasho lake na mapenzi ya Net, basi. Nakushauri na wewe uanze kuridhika na mkeo. Ulifanya kosa sana kukubali kuwa na mahusiano na Nancy.”

“Wakati ule ulitakiwa unisaidie, kwa kuwa kwanza wewe ulishapata neema ya kushinda dhambi. Ulikuwa na uwezo wa kuishi maisha matakatifu, lakini ukakubali kunitumia mimi niliyekuwa nimefungwa na nguvu za giza! Nilikuwa na majini yaliyokuwa yakinitesa, Gab. Sikuwa nalala vizuri kwa hofu nikitumikishwa kwa hili au lile, mchana na usiku. Ulitakiwa unisaidie kunitoa kwenye ile hali kama Net alivyofanya.” Tunda akaanza kutokwa na machozi.

          “Lakini ukiwa na uelewa kabisa wa baya na jema, ulitumia mwili wangu kama wanaume wengine wasiomjua Mungu! Nimepata msaada Gabriel. Nimesamehewa dhambi. Huko kwenye hayo maisha sitakaa nikarudi tena. Nilitumikishwa na ibilisi mchana na usiku. Mungu amenifungua, nipo huru. Nimeanza biashara yangu kwa jasho langu bila kuhongwa, na sasa hivi ninafurahia maisha.” Tunda akafuta machozi.

“Naelewa unamatatizo na mkeo, lakini Gabriel, hakuna kinachomshinda Mungu. Mgeukie Mungu. Kuhangaika na wanawake hakutakusaidia, wote tunamadhaifu yetu, yanatofautiana majina tu. Rudi kwa mkeo, anza upya. Naomba uniache na usirudie tena kunitafuta, lasivyo nitamwambia Net.” Gab alikuwa amesimama amepigwa na butwaa kama sanamu. Tunda akageuka nakuondoka bila hata kugeuka nyuma. Alimuacha Gab akiwa amesimama palepale, akaingia kwenye gari yake akiwa na hasira sana, akarudi kazini kwake.

~~~~~~~~~~~~~~~~~~~~~~~~

Net alimpigia simu baada ya muda kumtaka watoke kwa chakula cha mchana, lakini kwa kuwa hakuwa sawa kutokana na yale mazungumzo, akaona wasikutane. “Net yupo makini sana. Akiniona tu, atajua kuna kinachoendelea. Tokea jana ameanza kunitilia mashaka.”  Tunda akawaza. Akaona ampe sababu ya kiuungwana. Akamwambia ana kazi nyingi zakufanya siku hiyo, labda wakutane kesho yake.

“Mbona kama haupo sawa? Kwema?” Alitamani kumwambia Net, lakini akasita. Hakutaka kugeuka kuwa mchonganishi. “Tunda! Vipi?” “Kwema kabisa, ninashuguli nyingi tu. Naomba tuongee baadaye.” Akaamua kumuaga kwa haraka. Dhamira ilimsuta, kila kitu kwenye mwili wake kilimshawishi kumshirikisha Net juu ya Gab, lakini akasita.

“Hata hivyo hatarudia tena. Gabriel ni mstaarabu sana.’ Tunda akajipa moyo lakini bado hakuwa kwenye hali nzuri kabisa. Akili ilikuwa imevurugika kabisa. Siku nzima alishindwa kula kwa hofu yakuonana na Gab bila kumwambia Net. Historia ya maisha aliyoishi nyuma ya kupanga wanaume wengi kwa wakati mmoja ilimsumbua sana Tunda, akijua wazi Net anamjua alivyo mtaalamu kwenye hilo. “Sasa akija kujua kuwa nilikutana na Gab bila kumtaarifu, tena tukiwa tumezungumza asubuhi hiyohiyo, atajua narudia yale maisha ya kina Nancy.” Wasiwasi ulizidi kumtesa Tunda. Akaona afunike dhambi ya kwanza, yakuonana na Gab bila kumtaaribu Net.

Hata jioni ile aliamua kumkwepa kabisa Net. “Naomba nikuone kesho Net.” “Kuna nini? Mbona kama nahisi unanikwepa!?” “Hapana.” “Naomba kama kuna kitu chochote kile uniambie Tunda.” “Hamna Net. Kesho tutaenda kumuona baba?” Akaamua kubadili kabisa mazungumzo. “Mmefikia wapi na yule wakili mpya?” “Anaonekana atatusaidia. Japo wanadai pesa nyingi kidogo.” “Unataka msaada?” Net akauliza wakiwa bado wanazungumza kwenye simu.

“Hapana Net. Asante sana. Nitaweza tu.” “Ukikwama, usiache kuniambia.” “Nitafanya hivyo, japo..” Tunda akasita. “Nini?” “Natakiwa kulipa kodi ya mwaka mzima pale ninapoishi, na hapa ofisini pia wamenipandishia kodi!” “Wanataka kiasi gani?” Net akauliza. “Kuna kazi mbili kubwa nimepata mwezi huu na nyingine ndogo ndogo, naamini mpaka mwishoni mwa mwezi nitakuwa nimekamilisha pesa yote. Nakwambia hivi kwa kuwa nitakuwa na shuguli nyingi sana huu mwezi, ili kujaribu kukusanya hiyo pesa. Kwa hiyo usipokuwa ukiniona mara kwa mara ujue ni kwa muda tu.”

“Naelewa. Ila siku za jumamosi nitakuwa nikija kukusaidia. Si unajua siendi kazini?” “Kweli Net?” “Kabisa. Hata kukusogezea maua, si itakuwa msaada pia?” “Uwepo wako tu ni msaada tosha. Nitafurahi sana, lakini nakuwa na kazi nyingi hata muda wa kula huwa nakosa.” “Usijali. Kwa hiyo umekataa kuniambia kinachokusumbua sasa hivi?” Tunda akasita japo alijua Net sio mtu wakumpotezea. Hasahau jambo. Lakini akajiambia ni heri nusu shari, kuliko shari kamili. Akakusudia asimwambie. “Hamna kitu cha kukwambia Net. Kesho tutaonana. Usiku mwema.” “Asante na wewe.” Tunda akakata simu lakini akiumia sana moyoni.

~~~~~~~~~~~~~~~~~~~~~~~~

Alirudi nyumbani kwake akiwa amechoka zaidi mawazo. “Huu ujinga sitakuja kufanya tena.” Akajiambia. “Siku nyingine ni heri tu nimwambie mapema. Nimejawa hofu sina amani!” Tunda akaendelea kuwaza. Akaingia kuoga na kupanda kitandani bila hata kula. Kwa kuwa alishaagana na Net, alimpigia simu Mama Penny akaongea na watoto kidogo, wakaagana.

Kosa La Siri Laleta Balaa & Aibu!

Akazima sauti kabisa kwenye simu zake zote mbili na kujiweka vizuri kitandani. Akatulia akijaribu kulala lakini dhamira ilikuwa ikimsuta haswa na kushindwa kulala. Ni Net aliyemlipia gharama yote hiyo! “Nani ameniloga Tunda mimi!? Hivi ni kwa nini hata nilikwenda kuonana na huyo Gab! Heri ningemshirikisha kwanza Net, akanishauri au nikamsikia anasemaje juu ya hili. Net ananithamini sana, nawezaje kumsaliti. Hii ni tabia ambayo lazima niiache.”  Wakati anaendelea kuwaza, akaona taa ya simu yake inawaka. Jumbe nyingi za picha zikiingia kwenye hiyo simu yake ambayo ni ya watu wa karibu tu ndio wana namba hiyo.

Akavuta ile simu yake ili afungue aone ni picha gani. Kwa kuwa ilikuwa ni simu ile isiyo ya biashara, akahisi labda mama Penny anamtumia picha fulani za mapambo ili aone. Maana ni tabia yao, kutafuta picha za kumbi mbali mbali zilizopambwa vizuri mtandaoni na kurushiana ili kuiga.

Alikaribia kufa kwa mshtuko. Zilikuwa ni picha zake na Gabriel, walipokuwa wamekaa pale mgahawani na nyingine Gab amemkumbatia. Halafu mbaya zaidi, mtumaji alikuwa Nathaniel Cote. Bila kufikiria au kujijua Tunda akaitupa ile simu mbali akaruka pale kitandani. Uchovu wote ulimwisha, akabaki amejishika moyo wake. ‘Mungu wangu nisaidie. Mungu niokoe. Uwii jamani!’ Tunda akaanza kulia. ‘Ni mkosi gani huu!?’ 

Baada ya kulia kwa muda, akaona kulia haitasaidia. Ni heri amtafute tu Net ajieleze. Kwani Net alituma picha tu bila ujumbe wowote.

Tunda akaokota simu yake kwa haraka nakuanza kumpigia Net. Lakini iliita bila kupokelewa. Alipiga zaidi ya mara kumi bila majibu. Akaamua kutuma ujumbe. ‘Net, haipo kama inavyoonekana kwenye hizo picha. Tafadhali pokea simu nikuelezee ilivyokuwa.’ ‘Nilifikiri hakuna cha kuniambia Tunda! Naomba nilale. Mimi nitakutafuta.’ ‘Lini?’ Tunda akauliza kwa ujumbe. Kimya.

Akasubiri jibu kwa muda, alipoona hajibiwi akaamua kutuma tena ujumbe mwingine. ‘Lini utanitafuta Net?’ ‘Nitakapokuwa tayari.’ ‘Sawa Net. Lakini sijafanya kitu kibaya. Mungu wangu nishahidi mpenzi.’ Hakupata jibu lolote. Hakuna usiku uliokuwa mrefu kama huo.

 ~~~~~~~~~~~~~~~~~~~~~~~~

Tunda aliamka na kubaki akiangalia simu yake akisubiri labda Net atapiga. Lakini hakuona kitu. Hapakuwa na simu wala jumbe za mapenzi asubuhi hiyo. Akasubiri na kusubiri, kimya kwenye hiyo simu. Siku hiyo hata mama Penny hakumpigia. Ila simu ya kikazi ikaanza kuita mfululizo. Akakumbuka uhitaji wa pesa alio nao, akaamua kwenda kazini.

~~~~~~~~~~~~~~~~~~~~~~~~

Alikwenda kazini, siku nzima macho yalikuwa kwenye simu yake. Alibeba simu zake mpaka chooni, bafuni kila mahali, lakini hapakuwa na ujumbe wowote. Usiku alikaa kitandani bila kulala akisubiri simu kutoka kwa Net lakini Net hakukosea hata kupiga. Tunda akaamua kutuma ujumbe. ‘Pole na kazi Net.’ Kimya. Akatuma ujumbe mwingine. ‘Bado nasubiri simu yako Net.’ Kimya. Tunda akaamua kulala na simu zake zote sauti mpaka mwisho.

Ikawa asubuhi ikawa jioni, siku tatu mfululizo bila kusikia chochote kutoka kwa Net. Tunda alikuwa halali vizuri kwa mawazo. Alilia na kujibembeleza. Alijuta sana kutokumshirikisha Net juu ya Gabriel.  ‘Net hawezi kuniamini tena, atajua nimerudia tabia zile mbaya.’ Tunda alikuwa akiwaza huku akilia.

Akaamua kumtumia ujumbe mwingine tena. ‘Net mpenzi wangu naomba katika yote usifikirie kuniacha. Utaniua. Nina hali mbaya, nakaribia kuchanganyikiwa. Tafadhali nipigie.’  Kimya.

 Kanisani nako moto.

Kanisani nako habari zilishafikishwa na Jaz msichana aliyekuwa akifanya kazi ofisini kwa Tunda na kushuhudia mama Cote akiongea mazito ya Tunda kwa kuumia. Walio na uwezo waliendelea kupeleleza zaidi, kama vile ilivyo kawaida habari mbaya huenea kwa haraka sana. Walioweza kuongeza ubaya ili kunogesha ubaya wa Tunda waliongeza. Ilimradi tu.

Tunda alipoenda katikati ya juma kwenye vipindi vya kanisani kama kawaida yake, hakuihitaji kuuliza. Ule uangaliwaji wake, alijua tu walishafikishiwa habari. Kila aliposogelea kundi, walipomuona walinyamaza. Alipoamua kukaa, walinyanyuka mmoja baada ya mwingine. Akajikuta anabakia na wawili au watatu.

Kikafika kipindi cha maswali wakati wa bible study siku hiyo ya jumatano. Mmoja wa wanawake ambaye aliheshimiana sana na Tunda, akanyoosha mkono. Mchungaji akamchagua aulize swali. Swali lake ndilo lililomchosha Tunda, akaamua anyanyuke na kuondoka kabisa. “Nina swali Mchungaji. Lakini litakuwa nje kidogo na ulichofundisha leo.” Akasimama. “Karibu.” Mchungaji alijibu huku akimtizama.

“Naelewa kuwa watu wanapookoka wanasamehewa dhambi. Lakini kama ni mtu ameanzisha biashara kwa pesa za umalaya na yeye bado anajiita ameokoka, na yupo kanisani, anaabudu pamoja nasi, huku akijua kabisa anaishi kwa pesa za dhambi. Je ni sawa?” Alipoweka tu kituo, mwenzake akadakia. “Maana humu makanisani kumejaa kondoo na mbwa mwitu.” Mwengine akadakia. “Tujihadhari jamani, chachu ndongo huchachua donge zima! Tuna vijana wetu wadogo humu ndani.” Mwingine akaongeza kwa hekima tu. Ikaibuka minong’ono, ndipo Tunda akanyanyuka nakuondoka. Siku hiyo Mama Penny hakuwepo. Alirudi nyumbani kwake kama mgonjwa. Akapanda kitandani na kuanza kulia kwa uchungu wakupitiliza, kama aliyefiwa. 

~~~~~~~~~~~~~~~~~~~~~~~

Tunda hakujua chakufanya tena. Alishindwa hata kumwambia mama Penny kwa hofu. “Mama Penny na yeye hawezi kunielewa! Atajiuliza niliwezaje kwenda kuonana na Gab bila hata kumwambia hata yeye, kama Net nilishindwa! Watajua bado naishi yale maisha kwa siri. Mungu nitetee!” Tunda akaendelea kulia na kujutia.

Alijimbia endapo wale watu wakijua tena hata Net alimuacha kwa ajili ya kwenda kuonana na mwanaume mwingine ambaye alikuwa na mahusiano naye zamani, tena alikwenda kwa siri, ingekuwa mbaya zaidi! Hofu ilizidi kumwingia Tunda.

~~~~~~~~~~~~~~~~~~~~~~~~

Je, Lipi JEMA kwa Tunda? Yale maisha na ujanja ujanja aliyokuwa akiishi kama kina Nancy akililiwa na kina Gab mpaka sasa, hata Arusha aliacha wafanyabiashara wakubwa tu wakipishana ofisini kwa Cote, wakimtongoza AU hivi alivyookoka anashindwa kuaminika na kupokelewa kwenye jamii? Tena wakitumia vibaya siri zake alizokiri kanisani, ili kupata ukombozi!?

Kwenye penzi la Net ambalo hata hakuwahi kufikiria kama anaweza kuja kustahili kupendwa kwa kiasi hicho, AMELIKOROGA YEYE MWENYEWE. Na hata Net akimrudia, amekutana na kipingamizi kikubwa, mama Cote anayemfahamu ndani na nje kama tapeli la mapenzi, anamwita ‘Malaya’. Amesimama kama Mlima akiapa Tunda hatakaa kuwa mrithi pamoja naye, yeye aliyehangaika kuanzia chini. Na ameanza kukusanya majeshi yake. Ameshampata Bethy ambaye naye amempandisha hasira na amekusudia kumlipa Tunda kisasi kwa fedheha aliyomsababishia. Kwa ufupi vita ya Tunda ndio imeanza rasmi.

 Sasa bora lipi?

v Vile alivyoacha ukahaba akakimbilia kanisani na siri alizozitoa madhabahuni kwa Mungu akikiri makosa, ndizo zinazomwangamiza sasa au

v Vile alivyokuwa amepagawa na mapepo, akitumiwa mwili wake lakini heshima na pesa ilikuwepo? Alikosa soko kwa muda tu. Lakini Tunda huyu wa sasa hivi anatakiwa mpaka na Gabriel na ameacha wanaume wakimpigania jijini Arusha.

 

1.    Nani ametuma zile picha?

2.   Itakuaje kwa Net?

3.   Umbali gani mama Cote na Bethy watakwenda kumuangamiza kabisa Tunda.

4.   Bethy atafanyaje akijua nia ya mumewe ya kurudiana tena na Tunda?

5.   Gabriel atafanyaje baada ya kujua mwanamke aliyetaka kumuoa tena akiwa tayari kuacha kila kitu, Net kama ndugu wa karibu akamkataza, ndiye na yeye Net anaye?

6.   Tunda ataamua lipi juu ya maisha yake, Net akiwa ameota mbawa? KIMYA. Mama Penny hawezi kumshirikisha tena kwa chochote ili amshauri, kwa kosa la kwenda kukutana na Gab kwa siri?

7.   Nani atasimama na Tunda huyu tena? Aliyekiri kuokoka, lakini kashfa ya kukutana kwa siri na Gabriel, mwanaume aliyekuwa naye kwenye ukahaba zamani, inamkabili?

 

Kanisani moto, kazini moto, aliowaibia waume zao nao moto! Itakuaje?

 Yooooooote, na ya kusisimua, yanapatikana mbeleni. Vita ya kiroho na ya kimwili kwa Tunda inaanza rasmi. Tena akiwa na adui wasomi, wanaakili ya kufikiria/kupanga na wanayo pesa. {Mama Cote & Bethy}.

 

Usikose Mazito ya nilipotea.